M. Mattayo 7
7
1MSAPINGULA mngapinguliwe. 2Pakuti kupingula kumupingula ni kumti mopinguliwa nako: na mlingo umulinga nawo ni wati aŵomlingiramoni. 3Nga ukaŵona syani kambandu kali mliso la mkwanu, sembe kamuti kali mliso lako wamwine sukalukana? 4Kano uuti syani ku mkwanu, Leka nifumyemo kambandu ako mliso lako; sembe, ŵona, kamuti kali mliso lako wamwine? 5We wolipazya, tangofumyemo kamuti mliso lako wamwine: ni pauti uŵone wino kufumyamo kambandu mliso la mkwanu.
6Chila chozila msapa imbwa, msapoza mpandempande zyanu pantanzi pa nkumba, kano zingazikandekande na makasa a zine, noyaruka nompazulani.
7Sengani, ninga chipewe kwanu; sakani, ninga mufwange; kuntani, ninga chizuliwe kwanu: 8pakuti ali wonse osenga opokera; na uyo osaka ofwanga; na wamene okunta chizuliwe kwake. 9Ni ŵani wa mweo mwana wake akasenga mtanda angampe mwala; 10kano akasenga saŵi angampe njoka? 11Teti kati mweo pakuŵa aipa muziŵa kuŵapa ŵana ŵanu vyabule viweme, nga nti kupula Ausu wanu ali kumulu angaŵape viweme ŵala omsenga? 12Tetyo vintu vyonse vimupangwa ŵantu amchitileni mweo, mwachitile mweo soti ŵeve vyamene ivyo: chikomo ichi ni dango na aŵirizi.
13Loŵani pa mulyango popatikizya: pakuti mulyango ni wotalamusya, na njira ikuru mlutumba, ivyo vutwala ku kuchenekeka, oŵapo anyinji oloŵa mulamwa. 14Chifukwa pa mulyango mpopatikizya, na njira ni itonto, ivyo vutwala ku moyo, na aŵo ovifwanga akuŵa ŵopendeka.
15Chenjerani na aŵirizi ŵosempa, aŵo omzilani na vyovwala vya mbelele, sembe mkati mwaŵo ni mimbulu yoŵenka. 16Na vyotwala vyaŵo ni mumti mwaziŵire. Kansi ochera mipesya pa minga, kano chiku pa vitungwi? 17Tetyo chimuti chiri chonse chiweme chutwala vyotwala viweme; sembe chimuti icho chatyala chutwala vyotwala viipa. 18Chimuti chiweme sichingatwale vyotwala vyatyala, kano chimuti chatyala kutwala vyotwala viweme. 19Chimuti chiri chonse chisatwala vyotwala viweme chutendewa nopozewa mmulilo. 20Teti ni mumti mwaziŵire na vyotwala vyaŵo. 21Nte ŵonse oninenera, Asikuru, Asikuru, ati azaloŵe mu ufumu wa kumulu, sembe wamene ovichita vyakupangwa Ŵata ŵangu wa kumulu. 22Anyinji ati azaninenere pa siku lila, Asikuru, Asikuru, kansi sitenzoŵirizya pa zina lanu, na pa zina lanu kufumya viŵanda, na pa zina lanu kuchita vyampamvu vinyinji? 23Nipo pamene apo nize nakumbile kuti, Sinimziŵani mweo nsita zyonse: fumaponi pali neo, mweo muchita viipa. 24Teti ali wonse akumvwa malizu ŵangu aŵa noŵachita apalanishiwe na muntu wochenjera, uyo emanga ng'anda yake pa mwala: 25nipo iloka mvula, twikwenka tumana, chikunta chinkuka noisung'unzyasung'unzya ng'anda ila; nayo iliyekuwa, chikomo ikumbiliwa pa mwala. 26Soti ali wonse akumvwa malizu ŵangu aŵa nosaŵachita apalanishiwe na muntu wopusa, uyo emanga ng'anda yake pa mseche: 27nipo iloka mvula, twikwenka tumana, chikunta chinkuka nowila pa ng'anda ila; nayo ichiwa, na kuwa kwa ine kwenze kukuru.
28Lomba yenzepo pechisila Yesu malizu aŵa maumba aŵo ezuzuka pa mayeruzyo ŵake: 29pakuti enzoŵayeruzya nga ni mkuru wa nsaka, wosali nga ni alembi ŵaŵo.
Valið núna:
M. Mattayo 7: MA23
Áherslumerki
Deildu
Afrita
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.