ମାଥିଉ 5
5
ଯୀଶୁ ମାନାୟାରିଙ୍ଗ୍ ହିକ୍ଷା ହିନାନ୍
1ଯୀଶୁ ପାଚେ-ପାଚେ ହାନିମାନାୟ୍ ରୁଣ୍ଡାଆଦେଙ୍ଗ୍ ଲାଗାତାର୍। ଇଦାଙ୍ଗ୍ ହୁଡ଼୍ଜି ଯୀଶୁ ମାଡ଼ିଜପି ହାଲ୍ଜି ହେୱାରିଙ୍ଗ୍ ହିକ୍ଷାହିଦେଙ୍ଗ୍ କୁଚ୍ଚାନ୍। ତା ଚେଲାହିର୍ ତା କଚଣ୍ତ ୱାତାର୍।
ଇମ୍ଣାକାରିଙ୍ଗ୍ ଈଶ୍ୱର ୱାରି କିନାନ୍
(ଲୁକ. ୬:୨୦-୨୩)
2ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ଈଶ୍ୱର କାତା ହିକ୍ଷାହିଜି ୱେଚ୍ଚେଙ୍ଗ୍ ଲାଗାତାନ୍,
3“ଇମ୍ଣି ମାନାୟ୍ ଈଶ୍ୱରତିଙ୍ଗ୍ ତା ଗରବ୍ତାକେ ଆହ୍ନାର୍, ଈଶ୍ୱର ସାସନ୍ କିନି ରାଜି ହେୱାର୍ତି ଆନାତ୍।
4ଇମ୍ଣାକାର୍ ନଙ୍ଗୟ୍ ଦୁକ୍ ପାୟାଆନାର୍ ହେୱାର୍ ପାଚେ ୱାରିୟା ଆନାର୍, ଇନେସ୍କି ଈଶ୍ୱର ହେୱାରିଙ୍ଗ୍ ଶାନ୍ତି ହିନାନ୍।
5ଇମ୍ଣାକାର୍ ଦରମ୍ଆଜି ମାନାର୍ ହେୱାର୍ ୱାରିୟା ଆନାର୍, ଇନେସ୍କି ଈଶ୍ୱର ପୁର୍ତିନି ୱିଜୁ ବିଷୟ ହେୱାରିଙ୍ଗ୍ ହିନାନ୍।
6ଇମ୍ଣାକାର୍ ଈଶ୍ୱର ଇଚାତାଙ୍ଗ୍ ଜିବୁନ୍ କାଟି କିଦେଙ୍ଗ୍ ମାନ୍ କିନାର୍ ହେୱାର୍ ହାର୍, ଇନେସ୍କି ଈଶ୍ୱର ହେୱାରିଙ୍ଗ୍ ୱିଜୁ ବିଷୟ ପୁରା କିନାନ୍।
7ଇମ୍ଣାକାର୍ ଜେକନି ମାନାୟ୍ତିଙ୍ଗ୍ ଦୟା କିନାର୍ ହେୱାର୍ ହାର୍, ଇନେସ୍କି ଈଶ୍ୱର ହେୱାରିଙ୍ଗ୍ ଦୟା କିନାନ୍।
8ଇମ୍ଣାକାର୍ ମାପୃକାତାତିଙ୍ଗ୍ ମାନିକିନାର୍, ଲାଗିଙ୍ଗ୍ ହେୱାର୍ ମାପୃଲାହାଙ୍ଗ୍ ମାନ୍ଞ୍ଜି ଈଶ୍ୱରତିଙ୍ଗ୍ ହୁଡ଼୍ନାର୍।
9ଇମ୍ଣାକାନ୍ ଶାନ୍ତିନି କାମାୟ୍ କିନାନ୍ ହେୱାନ୍ ହାର୍, ଇନେସ୍କି ହେୱାର୍ ଈଶ୍ୱର ମେହି ଇଞ୍ଜି ପୁନିୟା ଆନାର୍।
10ଦରମ୍ କାମ୍ କିନି କାଜିଙ୍ଗ୍ ଇମ୍ଣି ମାନାୟ୍ ଦୁଃକ୍ ପାୟା ଆନାନ୍ ହେ ମାନାୟ୍ ହାର୍, ଇନେସ୍କି ଈଶ୍ୱର ସାସନ୍ କିନି ରାଜି ହେୱାରିଙ୍ଗ୍ ତା ଲକ୍ବାକ୍ ଲେକେ ଆହ୍ନାନ୍।
11ଏପେଙ୍ଗ୍ ନା କାଜିଙ୍ଗ୍ ନିନ୍ଦା ଆରେ ଇନସ୍ତା ଆନାଦେର୍, ଆରେ ମିଚ୍ତାଙ୍ଗ୍ ମିଙ୍ଗେଙ୍ଗ୍ ବିରଦ୍, ଆରେ ୱିଜୁ ପ୍ରକାର୍ ବାନ୍ୟା ବେଣ୍ ଇଞ୍ଜ୍ନାର୍, ଲାଗିଙ୍ଗ୍ ଏପେଙ୍ଗ୍ ହାର୍। 12ଲାଗିଙ୍ଗ୍ ୱାରି କିୟାଟ୍ ଆରେ ସାର୍ଦା ଆଡୁ, ଇନେସ୍କି ମି କାଜିଙ୍ଗ୍ ସରଗ୍ତାକେ ଗାଜା ପୁରଷ୍କାର୍ ମାନାତ୍। ହେଲେକେନେ ହେୱାର୍ ଆଗେନି ଭବିଷ୍ଯତବକ୍ତାରିଙ୍ଗ୍ ପା ଇନସ୍ତାକିଜି ମାଚାର୍।
ଏପେଙ୍ଗ୍ ହର୍ ଆରେ ଅଜଡ଼୍ଲେକେ
(ମାର୍କ. ୯:୫୦; ଲୁକ. ୧୪:୩୪-୩୫)
13ହର୍ ଇନେସ୍ କାଦିତିଙ୍ଗ୍ ହାର୍, ହେଲେକେନେ ମାନାୟାର୍ ହାର୍ଦି କାମାୟ୍ କିନି ଦର୍କାର୍। ଇନେସ୍କି ହର୍ ତା ହୱାଦ୍ ଆରାଇ କିନାତ୍, ଲାଗିଙ୍ଗ୍ ତା ହୱାଦ୍ ଇନେସ୍ କିଜି ତାସିୱାନାତ୍। ହେଦାଙ୍ଗ୍ ଆରେ ଇମ୍ଣି କାମାୟ୍ତାକେ ଆଉତ୍, ବାର୍ତ ତୁଇହିଜି ମାନାୟାର୍ ହେ ହର୍ଦିଙ୍ଗ୍ ତଗାୱିହା କିନାର୍। ହେଲେକେନେ ମାନାୟାର୍ ହାର୍ଦି କାମାୟ୍ କିୱିତିସ୍ ହେୱାନିଙ୍ଗ୍ କୁଟୁମ୍ତାଙ୍ଗ୍ ପାଗ୍ରି ପିହ୍ନାର୍। 14ଏପେଙ୍ଗ୍ ଇ ପୁର୍ତିନି ବଇଟାଲେକେ। ମାଡ଼ିଜପି ମାନି ନାସ୍ ଡ଼ୁଗ୍ଜି ମାଞ୍ଜେଙ୍ଗ୍ ଆଡୁତ୍।
15ହେଲେକେ ମାନାୟାର୍ ପା ବଇଟାତିଙ୍ଗ୍ ମାଣ୍ପାକ୍ଚି ଇଟୁର୍, ମାତର୍ ବଇଟା ଇଟ୍ନି ବାହାତାକେ ଇଟ୍ନାର୍, ଇନେସ୍କି ହେ ଇଞ୍ଜ ମାନି ମାନାୟ୍ତିଙ୍ଗ୍ ୱିଜାରିଙ୍ଗ୍ ଅଜଡ଼୍ ଆନାତ୍। 16ହେଲେକେ ମି ବଇଟାନି ଅଜଡ଼୍ ମାନାୟ୍ ମୁମ୍ଦ ଚଞ୍ଜିଆ ଆୟେତ୍, ଇନେସ୍କି ହେୱାର୍ ମି ହାର୍ଦି କାମାୟ୍ ହୁଡ଼୍ଜି ସରଗ୍ନି ଆବାଙ୍ଗ୍ ଜୟ୍-ଜୟ୍ କିନାର୍।
ମଶା ଲେକିକିତି ନିୟମ୍ ସାସ୍ତର୍ ପୁର୍ତିନି ଖ୍ରୀଷ୍ଟ
17ଯୀଶୁ ମୋଶା ଲେକିକିତି ନିୟମ୍ନି ସାସ୍ତର୍ ଭବିଷ୍ଯତବକ୍ତା କାଜିଙ୍ଗ୍ ଦରମ୍ ବେଣ୍ ବାଙ୍ଗାୟ୍ କିଦେଙ୍ଗ୍ ୱାତାଙ୍ଗ୍ନା, ଏଲେଙ୍ଗ୍ ଏପେଙ୍ଗ୍ ବାବିକିମାଟ୍, ମାତର୍ ପୁରା କିଦେଙ୍ଗ୍ ୱାତାଙ୍ଗ୍ନା। 18ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଇ ସରଗ୍ ଆରେ ପୁର୍ତି ବୁଡାଆୱି ପାତେକ୍ ଆରେ ଇୱିଜୁ କାତା ଗଟାଆୱି ପାତେକ୍ ମୋଶା ଲେକିକିତି ନିୟମ୍ନି ସାସ୍ତର୍ନି ର ମାତ୍ରା କି ର ଟପା ଇନେସ୍ କିତିସ୍ ପା ଡ଼ୁଗୁତ୍। 19ଇଦାଙ୍ଗ୍ କାଜିଙ୍ଗ୍ ଈଶ୍ୱର ହିତାକା ୱିଜୁ ଆଦେସ୍ ମାନିକିନି ଦରକାର୍। ଇନେସ୍କି ଦର୍କାର୍ଆୱି ହିରୁ ଆଦେସ୍ତିଙ୍ଗ୍ ପା ମାନିକିନି ଦର୍କାର୍। ଇମ୍ଣାକାନ୍ ଇ ଆଦେସ୍ତିଙ୍ଗ୍ ମାନିକିଉନ୍, ଆରେ ଜେକ ଲଗାଙ୍ଗ୍ ଆଦେସ୍ତିଙ୍ଗ୍ ମାନି କିଦେଙ୍ଗ୍ ବାଙ୍ଗାଇ କିନାନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ହିରୁକାନ୍ ଇଞ୍ଜି ଗାଣା କିୟିଆନାନ୍। ମାତର୍ ଇମ୍ଣାକାନ୍ ହେ ଆଦେସ୍ତିଙ୍ଗ୍ ମାନି କିନାନ୍ ଆରେ ଲକାରିଙ୍ଗ୍ ପା ହେ ୱିଜୁ ହିକ୍ଷା ମାନି କିଦେଙ୍ଗ୍ ୱେଚ୍ଚାନାନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ଗାଜାକାନ୍ ଇଞ୍ଜି ଗାଣା କିୟିଆନାନ୍।
20ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଈଶ୍ୱର ଇଚାନି ଆଦେସ୍ତିଙ୍ଗ୍ ମାନିକିଜି ଏପେଙ୍ଗ୍ ପଣ୍ଡିତ୍ ଆରେ ପାରୁସିଦଳ୍ତାଙ୍ଗ୍ ଆଗେ ଆନାଦେର୍। ଲାଗିଙ୍ଗ୍ ଏପେଙ୍ଗ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡ୍ନାଦେର୍।
ଯୀଶୁ ରିସା ବିଷୟରେ ହିକ୍ଷା ହିନାନ୍
21ଏପେଙ୍ଗ୍ ୱେଚାଦେର୍ନା ଯେ, ଈଶ୍ୱର ମା ଆଗେନି ଆକଦାଦିରିଙ୍ଗ୍ ୱେଚ୍ଚି ମାଚାନ୍, ମାନାୟ୍ ଅହ୍ନି କାମାୟ୍ କିମାଟ୍, ମାତର୍ ଇନେର୍ ମାନାୟ୍ ଅହ୍ନାର୍, ହେୱାନ୍ ବିଚାର୍କିନି ବାହାତାକେ ଦଣ୍ଡ୍ ପାୟା ଆନାନ୍। 22ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇନେର୍ ଜାର୍ ଟଣ୍ତେନିଙ୍ଗ୍ ରିସା ଆନାନ୍, ହେୱାନ୍ ବିଚାର୍କିନି ବାହାତାକେ ଦଣ୍ଡ୍ ପାୟା ଆନାନ୍। ଆରେ ଇନେର୍ ଯଦି ଜାର୍ ଟଣ୍ତେନିଙ୍ଗ୍ ମୁର୍କ ଇଞ୍ଜି ଇନାନ୍, ହେୱାନ୍ ଗାଜାସବାତାକେ ଦଣ୍ଡ୍ ପାୟା ଆନାନ୍। ଆରେ ଇନେର୍ ଯଦି ବାନ୍ୟା ମାନାୟ୍ ଇଞ୍ଜ୍ନାର୍, ହେୱାନ୍ ନାଣିନି ନରକ୍ତାକେ ଦଣ୍ଡ୍ ପାୟା ଆନାନ୍।
23ଏଚେପାଦ୍ନା ଏପେଙ୍ଗ୍ ପୁଜା କିଦେଙ୍ଗ୍ ହାନିହିଙ୍ଗ୍ ମି ବିରୁଦ୍ତାକେ ମି ଟଣ୍ଡେନ୍ ଇନାକାପା ନଷ୍ଟ କିତାନ୍ ଇଞ୍ଜି ମାନ୍ତ ୱାତିସ୍, 24ହେ ବେଦି ମୁମ୍ଦ ପୁଜା କିନାକା ପିସ୍ତି ହାଲାଟ୍। ଆଗେ ଜାର୍ ଟଣ୍ଡେନ୍ ଲାହାଙ୍ଗ୍ ମେହାଆଡୁ, ଆରେ ତାପାଚେ ୱାଜି ପୁଜା କିୟାଟ୍।
25ଯଦି ମି ଶାତ୍ରୁ ମିଙ୍ଗେଙ୍ଗ୍ ବିଚାର୍କିନି ବାହାତାକେ ଅସାହାଞ୍ଚାନ୍ନା, ଲାଗିଙ୍ଗ୍ ବିଚାର୍କିନି ବାହାତାକେ ହାଲ୍ୱି ଆଗେ ହେୱାନ୍ ହୁଦାଙ୍ଗ୍ ମେହାଆଡୁ। ନଇଲେ ମି ଶାତ୍ରୁ ମିଙ୍ଗେଙ୍ଗ୍ ବିଚାର୍ କିନାକାର୍ କେଇଦ ହେଲାଇ କିଦ୍ନାନ୍, ଆରେ ହେ ବିଚାର୍ କିନାକାର୍ ମୁଡ଼୍ଦି ମାନାୟ୍ କେଇଦ ହେଲାଇ କିଦ୍ନାନ୍, ପାଚେ ଏପେଙ୍ଗ୍ ଜଇଲ୍ ଇଞ୍ଜ ବନ୍ଦି ଆଜି ମାନ୍ଗାନାଦେର୍। 26ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏପେଙ୍ଗ୍ ଏଚେକ୍ ବାକି ଡାବୁଙ୍ଗ୍ ହୁଜାଆୱାଦାଙ୍ଗ୍ ଜଇଲ୍ ଇଞ୍ଜାଙ୍ଗ୍ ହତୁଦେର୍।
ଯୀଶୁ ଦାରି କାମାୟ୍ କିୱି ବିଷୟରେ ହିକ୍ଷା ହିତାନ୍
27ଏପେଙ୍ଗ୍ ୱେଚାଦେର୍ନା, ଈଶ୍ୱର ସାସ୍ତର୍ତାକେ ଲେକା ମାନାତ୍, ଦାରି କାମାୟ୍ କିମାଟ୍। 28ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇନେର୍ ପା ଇମ୍ଣି କଗ୍ଲେଙ୍ଗ୍ ପା ଦାରି କାମାୟ୍ କିଦେଙ୍ଗ୍ ହୁଡ଼୍ତିସ୍, ହେୱାନ୍ ତା ଲାହାଙ୍ଗ୍ ମାନ୍ତ-ମାନ୍ତ ଦାରି କିତାନେ।
29ଯଦି ମି ତିନାବାଗାୟ୍ନି କାଣ୍କୁ ପାପ୍ କାମାୟ୍ କିନାତ୍, ହେ କାଣ୍କୁକାଙ୍ଗ୍ ଉନ୍ନ୍ଦି ତୁୟାଟ୍, ଲାଗିଙ୍ଗ୍ ମି ୱିଜୁ ଗାଗାଡ଼୍ ନରକ୍ତାକେ ତାକେ ହାନି ବାଦୁଲ୍ ର ଜିନିଷ୍ ନଷ୍ଟ ଆଜି ସରଗ୍ତାକେ ହାନାକା ହାର୍। 30ମାତର୍ ମି ତିନିକେଇ ଯଦି ଇନାୱେଡ଼ାଙ୍ଗ୍ ପାପ୍ କାମାୟ୍ କିନାତ୍, ଲାଗିଙ୍ଗ୍ ହେ କେଇ କାଦ୍ଦି ତୁୟାଟ୍, ମାତର୍ ମି ଇୱିଜୁ ଗାଗାଡ଼୍ମୁଡ଼ି ନରକ୍ତାକେ ହାନି ବାଦୁଲ୍ ରଞ୍ଜାଙ୍ଗ୍ ଜିନିଷ୍ ନଷ୍ଟ ଆଜି ସରଗ୍ତାକେ ହାନାକା ହାର୍।
ଯୀଶୁ ହେଲ ନାଟ୍ନି ବିଷୟରେ ହିକ୍ଷା ହିତାନ୍
(ମାଥି. ୧୯:୯; ମାର୍କ. ୧୦:୧୧,୧୨; ଲୁକ. ୧୬:୧୮)
31ଆରେ ଈଶ୍ୱର ସାସ୍ତର୍ତାକେ ଲେକା ମାନାତ୍, ଇନେର୍ ପା ଯଦି ନିଜର୍ କଗ୍ଲେଙ୍ଗ୍ ହେଲୱାଇ ହିଜି ପିହ୍ନାନ୍ ହେୱାନ୍ ହେଦେଲିଙ୍ଗ୍ ହେଲୱାଇ ନାଟେନ୍। 32ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇନେର୍ ପା ନିଜର୍ କଗ୍ଲେଙ୍ଗ୍ ଦସ୍ ଆୱାଦାଙ୍ଗ୍ ଦାରି କିତାୟ୍ ଇଞ୍ଜି ହେଦେଲିଙ୍ଗ୍ ପିହ୍ନାନ୍। ହେୱାନ୍ ହେଦେଲିଙ୍ଗ୍ ଦାରି କିୟିକିତାନ୍, ଆରେ ଇନେର୍ ପା ପିସ୍ତି କଗ୍ଲେଙ୍ଗ୍ ବିବା ଆନାନ୍, ହେୱାନ୍ ଦାରୁଲା କିନାନ୍।
ପାର୍ମାଣ୍
33ଆରେରଗ ଏପେଙ୍ଗ୍ ୱେନାଦେରା ଯେ, ଈଶ୍ୱର ଆଗେନି ମାନାୟାରିଙ୍ଗ୍ ୱେଚ୍ଚି ମାଚାନ୍, ଏପେଙ୍ଗ୍ ମିଚ୍ ପାର୍ମାଣ୍ କିମାଟ୍, ମାତର୍ ଜାର୍ ପାର୍ମାଣ୍ ୱିଜୁ ଈଶ୍ୱର କାଜିଙ୍ଗ୍ ମାନିକିନାଦେର୍। 34ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ମୁଡ଼୍କେ ପାର୍ମାଣ୍ କିମାଟ୍, ସରଗ୍ନି ଆବାତିଙ୍ଗ୍ ପାର୍ମାଣ୍ କିମାଟ୍, ଇନେସ୍କି ହେଦାଙ୍ଗ୍ ଈଶ୍ୱର ସିଂହାସନ୍। 35ଆରେ ପୁର୍ତିନି ପାର୍ମାଣ୍ କିମାଟ୍, ଇନେସ୍କି ହେଦାଙ୍ଗ୍ ହେୱେନ୍ତି କାଲ୍ ଇଟ୍ନି ବାହା, ଯିରୁଶାଲାମ୍ନି ପାର୍ମାଣ୍ କିମାଟ୍, ଇନେସ୍କି ହେଦାଙ୍ଗ୍ ଗାଜାରାଜାନି ସହର୍।
36ମି କାପ୍ଡ଼ା ଆସ୍ପିସ୍ ପା ପାର୍ମାଣ୍ କିମାଟ୍, ଇନେସ୍କି କାପ୍ଡ଼ାନି ତେମୁଲ୍ ଡ଼ିଚ୍ଚେଙ୍ଗ୍ କି କାର୍ହାୟ୍ କିଦେଙ୍ଗ୍ ମି ସାକ୍ତି ହିଲେତ୍। 37ମାତର୍ ମି ଆଁ ବେଣ୍ ଆଁ ଆଏତ୍, ଆକାୟ୍ ବେଣ୍ ଆକାୟ୍ ଆଏତ୍। ଇବେତାଙ୍ଗ୍ ଇମ୍ଣାକା ବେସି ହେଦାଙ୍ଗ୍ ଶୟତାନତାଙ୍ଗ୍ ଉବ୍ଜା ଆନାତ୍।
ଡାରାଆୱି ବିଷୟ
(ଲୁକ. ୬:୨୯-୩୦)
38ଏପେଙ୍ଗ୍ ୱେଚାଦେର୍ନା, ମୋଶା ନିୟମ୍ତାକେ ଲେକା ମାନାତ୍ କାଣ୍କୁ ବାଦୁଲ୍ କାଣ୍କୁ ଆରେ ଟାଡାଙ୍ଗ୍ ବାଦୁଲ୍ ଟାଡାଙ୍ଗ୍। 39ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଶୟତାନ ମାନାୟ୍ ଲଗାଙ୍ଗ୍ ଟେବାଇ କିମାଟ୍, ମାତର୍ ଇନେର୍ ପା ମି ତିନି କୁର୍ୱାତ ଚାପ୍ଡ଼ା ଇଡ଼୍ଦାନାର୍, ହେୱାନିଙ୍ଗ୍ ଆରେ ର କୁର୍ୱା ପା ଚଚ୍ଚି ହିୟାଟ୍।
40ଆରେ ଇନେର୍ ପା ମିହୁଦାଙ୍ଗ୍ ବିଚାର୍କିନି ବାହାତାକେ ଅଲ୍ଗା ଆଜି ମି ଆଙ୍ଗି ଅଦେଙ୍ଗ୍ ମାନ୍ କିନାନ୍, ହେୱାନିଙ୍ଗ୍ ମି ଶାଲ୍ ପା ହିୟାଟ୍। 41ଆରେ ଇନେର୍ ପା ମିଙ୍ଗେଙ୍ଗ୍ ର କୋଶ (ର କିଲମିଟର୍) ହାଞ୍ଜେଙ୍ଗ୍ ଟାଟାଇ କିଦ୍ନାନ୍ ତା ଲାହାଙ୍ଗ୍ ରି କୋଶ (ଦୁଇ କିଲମିଟର୍) ହାଲାଟ୍। 42ଆରେ ଇନେର୍ ମିଙ୍ଗେଙ୍ଗ୍ ଏନ୍ତାନାର୍, ହେୱାନିଙ୍ଗ୍ ହିଆଟ୍, ଆରେ ଇନେର୍ ପା ନିବେତାଙ୍ଗ୍ ୱାଡି ଅଦେଙ୍ଗ୍ ମାନ୍ କିନାନ୍, ହେୱାନିଙ୍ଗ୍ ଏପେଙ୍ଗ୍ ମୁନା କିମାଟ୍।
ଶାତୃରିଙ୍ଗ୍ ଲାଡ୍ କିୟାଟ୍
(ଲୁକ. ୬:୨୭-୨୮,୩୨-୩୬)
43ଏପେଙ୍ଗ୍ ୱେଚାଦେର୍ନା, ମୋଶା ସାସ୍ତର୍ତାକେ ଲେକା ମାନାତ୍, ମି ପାଡ଼୍ହା ନି ଇଞ୍ଜାକାରିଙ୍ଗ୍ ଲାଡ୍ କିୟାଟ୍ ଆରେ ମି ଶତ୍ରୁଙ୍ଗ୍ ଗିଣ୍ କିୟାଟ୍। 44ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଏପେଙ୍ଗ୍ ମି ଶାତ୍ରୁରିଙ୍ଗ୍ ଲାଡ୍ କିୟାଟ୍। ଆରେ ଇମ୍ଣାକାର୍ ମିଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନାର୍ ହେୱାର୍ କାଜିଙ୍ଗ୍ ଏପେଙ୍ଗ୍ ପାର୍ତାନା କିୟାଟ୍। 45ହେଲେକେ କିତିସ୍ ଏପେଙ୍ଗ୍ ମି ସରଗ୍ନି ଆବା ମେହି ଆନାଦେର୍। ହେୱାନ୍ ତ ବାନ୍ୟା ଆରେ ହାର୍ଦାକାନ୍ ଇ ରିକାର୍ ଜପି ପା ଜାର୍ ୱେଡ଼ାନି ଅଜଡ଼୍ତିଙ୍ଗ୍ ହପିକିନାନ୍, ମାତର୍ ହାର୍ଦି ଆରେ ବାନ୍ୟା ମାନାୟ୍ ଜପି ପା ବାର୍ହା ପଡିକିନାନ୍।
46ଆରେ ଇମ୍ଣାକାର୍ ମିଙ୍ଗେଙ୍ଗ୍ ଲାଡ୍ କିଦ୍ନାର୍, ଏପେଙ୍ଗ୍ ପା ଆପ୍କା ହେ ମାନାୟାରିଙ୍ଗ୍ ଲାଡ୍ କିନାଦେରା, ହେୱାରିଙ୍ଗ୍ ଲାଡ୍ କିତିସ୍ ମିଙ୍ଗେଙ୍ଗ୍ ଇନା ପୁରଷ୍କାର୍ ଗାଟାଆଦ୍ନାତ୍? ସିସ୍ତୁଅନାକାନ୍ ପା ହେଲେକେ କିନାନ୍। 47ଆରେ ଏପେଙ୍ଗ୍ ଯଦି ମି ଟଣ୍ଡାଦିଙ୍ଗ୍ ଜୱାର୍ କିନାଦେର୍, ଲାଗିଙ୍ଗ୍ ଏପେଙ୍ଗ୍ ଜେକନିକାର୍ କିତିତାଙ୍ଗ୍ ପା ଆଦିକ୍ବେଶି ଇନାକା କିୱାତାଦେର୍ନା। ବିନେନି ଜାତିନି ମାନାୟାର୍ ପା ହେଲେକେ କିନାରା, ଇମ୍ଣାକାନ୍ କି ମାପୃ ସାସ୍ତର୍ତିଙ୍ଗ୍ ପୁନ୍ୱାତାନ୍ନା। 48ଲାଗିଙ୍ଗ୍ ମି ସରଗ୍ନି ଆବା ଇନେସ୍କି ହାର୍ ମାନାନ୍, ଏପେଙ୍ଗ୍ ପା ହେଲେକେ ହାର୍ ଆଡୁ।”
Valið núna:
ମାଥିଉ 5: PEGNT
Áherslumerki
Deildu
Afrita
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.