ମାଥିଉ 3
3
ଡୁବନ୍ହିନି ଯୋହନ୍ ଶୁଣାୟ୍ କିତାନ୍
(ମାଥି. ୧:୧-୮; ଲୁକ. ୩:୧-୧୮; ଯୋହନ. ୧:୬-୮-୧୫-୩୪)
1ହେପାଦ୍ନା ଡୁବନ୍ହିନି ଯୋହନ ୱାଜି ଯିହୁଦା ଜିଲ୍ଲାନି ଟାଙ୍ଗ୍ରାବାହାତ ମାନ୍ଞ୍ଜି ୱେଚ୍ଚେଙ୍ଗ୍ ଲାଗାତାନ୍, 2“ପାପ୍ କାମାୟ୍ ପିସ୍ତି ମାପୃତାକେ ୱାଡ। ଇନେସ୍କି ଈଶ୍ୱର ସାସନ୍ କିନି ରାଜି ଲାଗେ ଇକାୱାତାତେ।” 3ଯିଶାୟ ଭବିଷ୍ଯତବକ୍ତା ୱେଚ୍ଚି ମାଚାନ୍, “ଇୱାନ୍ ହେ ମାନାୟ୍, ଟାଙ୍ଗ୍ରାବାହାତ ଗାଜାକାଟ୍ କିଜି ୱେଚ୍ନି ରକାନ୍ତି କାତା। ମାପୃତି ହାଜି ରହାଟ୍, ହେୱାନ୍ତି ରାଜାହାକ୍ଡ଼ି ହାଣ୍କୁ କିୟାଟ୍।”
4ହେ ଯୋହନ ଉଟ୍ ତେମୁଲ୍ତ ରସ୍ତି ହେନ୍ଦ୍ରା ଉସ୍ପି ମାଚାନ୍, ଆରେ ଜାର୍ ମେଙ୍ଗାକାଙ୍ଗ୍ ତଲ୍ତାଙ୍ଗ୍ ରସ୍ତି ମେଙ୍ଗାଡରି ଗାଚିଆ ଆଜି ମାଚାନ୍। ଆରେ, ହେୱାନ୍ ତିନିଆନି ପିକୁଙ୍ଗ୍ ଆରେ ରାନ୍ପୁକି ତିନ୍ଞ୍ଜି ମାଚାନ୍। 5-6ହେପାଦ୍ନା ଯିରୁଶାଲାମ ସହର୍, ଯିହୁଦା ଜିଲ୍ଲା ଆରେ ଯର୍ଦ୍ଦନ ନାଗୁଡ଼୍ ଲାଗାଇନି ପାଡ଼୍ହା-ପାଡ଼୍ହି ନାଟାକାର୍ ତା ଲାଗାୟ୍ ୱାଦେଙ୍ଗ୍ ଲାଗାତାର୍, ଆରେ ହେୱାର୍ ଜାର୍-ଜାର୍ ପାପ୍ତିଙ୍ଗ୍ ୱେଚ୍ଚାର୍। ହେବେ ଡୁବନ୍ହିନି ଯୋହନ ହେୱାରିଙ୍ଗ୍ ଯର୍ଦ୍ଦନ ନାଗୁଡ଼୍ତ ଡୁବନ୍ ହିତାନ୍।
7ମାତର୍ ପାରୁସିଦଳ୍ ଆରେ ଯିହୁଦି ଦର୍ମନି ସାଦୁକିଦଳ୍ ବିତ୍ରେତାଙ୍ଗ୍ କେତେକ୍ ମାନାୟ୍ ଡୁବନ୍ ଅଦେଙ୍ଗ୍ ୱାନାରା, ଇଦାଙ୍ଗ୍ ହୁଡ଼୍ଜି ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ବିସ୍ମାନି ରାଚ୍ ଲେକେ ବାନ୍ୟା ମାନାଦେର୍! ଏପେଙ୍ଗ୍ ମି ଆଗେନି ରିସାତାଙ୍ଗ୍ ହନ୍ତେଙ୍ଗ୍ ମିଙ୍ଗେଙ୍ଗ୍ ଇନେର୍ ଚେତ୍ନା କିତ୍ତାର୍। 8ମିଙ୍ଗେଙ୍ଗ୍ ଜାର୍ କାମାୟ୍ତାଙ୍ଗ୍ ଚଚିୟାଆଦେଙ୍ଗ୍ ଆନାତ୍ ଯେ, ଏପେଙ୍ଗ୍ ହାତ୍ପା ପାପ୍ କାମାୟ୍ ପିସ୍ତି ମାପୃତାକେ ୱାତାଦେର୍ନା। 9ଈଶ୍ୱର ମାଙ୍ଗେଙ୍ଗ୍ ଦଣ୍ଡ୍ ହିଦୁନ୍ ଆପେଙ୍ଗ୍ ଅବ୍ରାହାମ୍ ମେହି ଇଞ୍ଜି, ଏଲେଙ୍ଗ୍ ଏପେଙ୍ଗ୍ ମାନ୍ତ ବାବିକିମାଟ୍। ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଈଶ୍ୱର ଅବ୍ରାହାମ୍ କାଜିଙ୍ଗ୍ ଇ କାଲ୍କୁକାଙ୍ଗ୍ ପା ତା ହିମ୍ଣାୱାକ୍ଡ଼ା ଉବ୍ଜାଇ କିଦେଙ୍ଗ୍ ଆଡ୍ନାନ୍।
10ଟେଙ୍ଗିଆ ଆସ୍ତି ମାର୍ କାଦ୍ଦେଙ୍ଗ୍ ଜାଗ୍ରତ୍ ଆଜି ମାଚିଲେକେ ଈଶ୍ୱର ପା ପାପ୍ କାମାୟ୍ ପିସ୍ତି ମାପୃତାକେ ୱାୱିତି ମାନାୟାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଜାଗ୍ରତ୍ ଆତାନ୍ନା। ର ପାଡ଼୍ ଆହ୍ୱି ମାର୍ତିଙ୍ଗ୍ ଇନେସ୍ ମାର୍ କାତ୍ନି ମାନାୟ୍ ଇନେସ୍ଲେକେ କାଦ୍ଦି ନାଣିତାକେ ତୁସିହିନାନ୍, ହେଲେକେ ଇମ୍ଣାକାନ୍ ହାର୍ଦି କାମାୟ୍ କିଉନ୍ ହେୱାନିଙ୍ଗ୍ ଈଶ୍ୱର ଦଣ୍ଡ୍ହିଜି କାଚାଆନି ନାଣିତାକେ ତୁହିହିଦ୍ନାନ୍।”
11“ଏପେଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାତିଲେ ଆନେଙ୍ଗ୍ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍ନାଙ୍ଗା, ମାତର୍ ନା ପାଚେ ଇନେର୍ ୱାନାନା, ହେୱାନ୍ ନା ତାକେତାଙ୍ଗ୍ ବେସି ସାକ୍ତିକାଟାକାନ୍। ଆନେଙ୍ଗ୍ ଚାକର୍ ଲେକେ ଆଜି ତା କାଲ୍ନି ପାଣ୍ଡାୟ୍ ଆସ୍ତେଙ୍ଗ୍ ପା ସାମାନ୍ ଆକାୟ୍। ହେୱାନ୍ ମିଙ୍ଗେଙ୍ଗ୍ ପବିତ୍ର ଆତ୍ମା ଆରେ ନାଣିତାଙ୍ଗ୍ ଡୁବନ୍ ହିଦ୍ନାନ୍। 12ହେୱାନ୍ କେଇଦ ଗହମ୍ନି ପଲ ଏଡ଼ାଇ କିଦେଙ୍ଗ୍ ତା କେଇଦ ହେଚି ମାନାତ୍। ହେବେତାଙ୍ଗ୍ ହେୱାନ୍ ତାସ୍ତିଙ୍ଗ୍ ପଲତାଙ୍ଗ୍ ଏଡ଼ାଇ କିନାନ୍। ହେୱାନ୍ ତା ହେଚିତାଙ୍ଗ୍ ବାଚିକିତି ହାର୍ଦି କୁଲିଙ୍ଗ୍ ରୁଣ୍ଡାଇକିଜି ପାଲ୍ତାକେ ଅଜି ଇଟ୍ନାନ୍। ତାପାଚେ ପଲ ଆରେ ଦର୍କାର୍ଆୱି ବାରବିନି ଜିନିଷ୍ତିଙ୍ଗ୍ ୱିଜୁଦିନ୍ କାଚାଆନି ନାଣିତାକେ ଅଜି ତୁସିହିନାନ୍।”
ଯୋହନ ଯୀଶୁଙ୍ଗ୍ ଡୁବନ୍ ହିତାନ୍
13ହେପାଦ୍ନା ଯୀଶୁ ଯୋହନତାଙ୍ଗ୍ ଡୁବନ୍ ଅଦେଙ୍ଗ୍ ଗାଲିଲୀ ଜିଲ୍ଲାତାଙ୍ଗ୍ ଯର୍ଦ୍ଦନ ନାଗୁଡ଼୍ତ ୱାତାନ୍। 14ମାତର୍ ଯୋହନ ଯୀଶୁଙ୍ଗ୍ ମୁନା କିଦେଙ୍ଗ୍ ଉପାୟ୍ କିଜି ୱେଚ୍ଚାନ୍, “ଆନେଙ୍ଗ୍ ନିତାକେ ଡୁବନ୍ ଅନି ଦର୍କାର୍, ଏନେଙ୍ଗ୍ ନାବେ ଇନା କିଦେଙ୍ଗ୍ ୱାତାୟ୍ନା?”
15ମାତର୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନଙ୍ଗୟ୍ ରାଜି ଆ, ଇନେସ୍କି ହେଲେକେ ୱିଜୁ ହାର୍ଦି ବିଷୟ ମାନିକିନି ଦର୍କାର୍।” ଲାଗିଙ୍ଗ୍ ଡୁବନ୍ହିନି ଯୋହନ ଯୀଶୁ କାତାତିଙ୍ଗ୍ ଡୁବନ୍ ହିଦେଙ୍ଗ୍ ରାଜି ଆତାନ୍।
16ଯୀଶୁ ଡୁବନ୍ ଅତି ଦାପ୍ରେ ଏଜୁଙ୍ଗ୍ତାଙ୍ଗ୍ ନିଙ୍ଗ୍ଞ୍ଜି ୱାତିହିଙ୍ଗ୍ ବାଦାଡ଼୍ ଜେୟା ଆତାତ୍। ଆରେ ହେୱାନ୍ ଈଶ୍ୱରତି ପବିତ୍ର ଆତ୍ମାତିଙ୍ଗ୍ ପାର୍ୱା ଲେକେ ତା ଜପି ୱାନାକା ହୁଡ଼୍ତାନ୍। 17ହେପାଦ୍ନା ଈଶ୍ୱର ବାଦାଡ଼୍ତାଙ୍ଗ୍ ଯୀଶୁଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନା ଲାଡ୍ ମାଜି, ଆନେଙ୍ଗ୍ ନିତାକେ ବେସି ୱାରି।”
Valið núna:
ମାଥିଉ 3: PEGNT
Áherslumerki
Deildu
Afrita
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.