Mattĕo 4

Dèhnakă

(Mărko 1.12,13; Lŭka 4.1-13)

1B́ĕnu Spirito Tcahtĭ leihŭgè Jezŭ d́ŏ hmîlè̄klè̆ nu cab́ô̆htè Cè kè̄ b́è Mod́èlî adèhnakă nu. 2Kîd́ò̆ b́ĕ Cu d́uhwă dèadèò̆ ani lwīscĭ athè̆ lwīscĭ nu Ca thaẃigè. 3Mèhwă d́ō, Mod́èlî leb́ôhtî kî d́ò Cè, “Ni gî̄ ḿî Kib́ĭcè Apho d́ō, hmèlabò̄ cab́ô̆htè lo ajo tòcò gî̄ phî̆hta toko nu.”

4Ḿî Jezŭ d́òge cè, “Aò hwela Cè bu, ‘Bija tò òthôḿô̆ikô mè toko lò ńò, ḿî cò òthôḿô̆ikô dèjî̄b́è gŏ ahmô̆ htè ahèhta Kib́ĭcè ahòbŭ nu.’”

5Hwă d́ō Mod́èlî htai Cè d́ŏ U Tcahtĭ abu nu kî ad́ò̆hta Cè d́ŏ Zarādo akhotòcò̆ akho nu. 6Kî ad́ò Cè, “Nî gî̄ ḿî Kib́ĭcè Apho dō, htîladēbò̄ Ne ne. Manè̄ kòd́òdo dō, aò hwela Cè bu,

‘Htè Zè gè̄ hmèlakò̆ Zò Mò̄khobwèzo tòcò gā zāhtagloikò̆ Nè

kîd́ò̆ za gā zāglokò̆ Nè zu cukhò bu,

cab́ô̆htè Na khakhò gò̄ dò tòlab́èbò lo akho ńò nu.’”

7Jezŭ d́òge cè, “Na da hnab́è ni B́ĭcè Dèado akă ńò, aò hwelawe Cè bu do.”

8Tapla be Mod́èlî htai Cè d́ŏ khò̆mudokhòlò̆htô̆ dèmè̆ akho kîd́ò̆ ad́è̆lî̄ Cè lākho ahtĭage lŏcăcè kî adòathe tòcò nu kî ad́ò Cè, 9“Ńò gò̄ gò̄la thèb́è̆hta b́eḿĕ ma jè d́ō, ji kī i tèpwè Nè dè ajo lŏcăcè.”

10B́ĕnu Jezŭ d́ò cè, “Sèphlòḿĭ, Sătana! Manè̄ kòd́òdo dō, aò hwela gōjo; Nè thèb́è̆b́è nî B́ĭcè Dèado kî na khazôb́è Cè dèbwè lò.”

11B́ĕnu lò Mod́èlî hèthĭwī Cè, kîd́ò̆ tcabò̄, Mò̄khobwèzo tòcò la khazôgè Cè.

Jezŭ D́ŏ Kapèrnaum U Nu

(Mărko 1.14,15; Lŭka 4.14,15)

12Kîd́ò̆ b́ĕ Jezŭ thîhè̆b́è hwă Zowănnī b́èphògè nu, ze geb́a òzògè d́ŏ Galilĕage bu nu. 13Kîd́ò̆ Zè hèhta hwă Nazarè̆th U, ze le ògè d́ŏ Kapèrnaum U, aò pèllèwe d́ŏ Zabulun kî Nèphtali alākho asŏhtî nu. 14Cab́ô̆htè dèjî̄b́è htè prò̆fèt Izaĭah d́ògè adĕ gē pĕhtabò̄ nu, htè cò d́ò;

15“Zabulun alākho kî Nèphtali alākho,

klè ale d́ŏ pellè, Jòrdăno ghòlò̄ alewe dòkhò̆we,

htè bwèthŭkupho tòcò, aò Galilĕa nu.

16Bija asańăògè dèkhiklè̆ alākhobu tòcò nu,

tcahtî htŏ dèhlî̆ ado kî bija asańăò d́ŏ dèthĭ aola tòcò akho, dèhlî̆lab́è htŏ cè tòcò.”

17B́ĕnu phlò̆ ahlò̆mò̄ Jezŭ thôithò̆i bija, cò d́ò, “Mèbò̄ dèkhahlô̆, manè̄, Mò̄kho Ahtĭage do htŏ,” cò d́ò bija tòcò d́o.

Bōhmubicè Aŭsu Tòcò

(Mărko 1.16-20; Lŭka 5.1-11)

18Kîd́ò̆ Jezŭ lekô Galilĕa Pèllèwe dō, Ca tcahtîgè athè̆buwe gībwè, htè Simŏnè bija jo Petru nu, kî zè mè̄ Andrĕa bāla dwī d́ŏ pèllèbu nu d́ō, (zî ḿîgè apôa dāpho tòcò.) 19Kîd́ò̆ cò d́ò lōwa, “Lekô Je le, kî jè mèphî̆htakò̆ thĭ apô bija.” 20Kîdò̆ za bāladē zi dwī, kî ze lekô danā lōwa ale.

21Kîd́ò̆ Cò phlòdotho hwă d́ŏnu d́ō, Ca tcahtî athè̆buwe alewe gībwè htè Zăkomo, Zebedi apho kî cî ṕîkò̆ Zowănnī nu. Cò òkô za pa Zebedi akă d́ŏ khlĭ tèb́è abu nu, za săge zi dwī tòcò, kîd́ò̆ Zo jo lōwa; 22kî zè lè̄lakè̆ danā zi khlĭ kî ca pa, kî zô lôkô danā lōwa ale.

Jezŭ Thèhlô̆, D́ò̆htôla kî Mèhmage Bija

(Lŭka 6.17-19)

23Kîd́ò̆ Jezŭ hè Galilĕa thèd́è̆ge abu, Cò d́òŭd́ò̆sa dè d́ŏ lōwa tòcò asinagŏgā abu. Cò d́ò̆htô Mò̄kho Ahtĭage aVanzĕlo kî Zè mèhmage lŏ bija ascwiasè̆ kî adô mô̄ da hma ńò amŏamo arră lò̆ tòcò nu. 24Zi mi Zè khè̆ hŏhtathèla Sĭria thèd́è̆ge abu kîd́ò̆ bija lei Cò ò adô mô̄ da hma ńò lŏcăcè htè ab́è dèsè̆ domo domo kî akhab́èjab́è domo domo acab́ô̆ ahnèò tòcò, abluatrò tòcò kî acuthĭkhathĭ tòcò kî zè mèhmage tèpwè lōwa. 25Kîd́ò̆ bija aò d́ŏ Galilĕage, kî Dekăpoli, kî Jerŭsalèm, kî Judĕage kî Jòrdăno gòllò̄ alewe dòkhò̆b́è tòcò lôkô òèòògè Ze le.

Valið núna:

Mattĕo 4: GRNT21

Áherslumerki

Deildu

Afrita

Want to have your highlights saved across all your devices? Sign up or sign in

Lærðu meira um Geba Roman New Testament

Mattĕo 4

Popular Bible Verses from
Mattĕo 4

Biblía:

Karen, Geba

Útgáfa: Geba Roman New Testament - GRNT21

Mattĕo 4

Mattĕo 4

Popular Bible Verses from Mattĕo 4

Biblía:

Karen, Geba

Útgáfa: Geba Roman New Testament - GRNT21

Mattĕo 4

Popular Bible Verses from
Mattĕo 4