Aba Vatowo 23
23
Sera ina kámasa tetelina
1E Sera ana tala tayamo andedi tuwentiseven (127) bogina ibabane, 2Asa Ariba Kenani sinaena goi ikaaiyaka ikámasa. (Aribayana youyuwoina moe Ebironi.) Tuwo Eberamo ina Sera ina yoyou goi itáiya tauyana manuna. 3Itáiya ikavava, mana nuwomou inuwonúwana kana,
‘Nako goi bei avaliwoge?’
Inuwonúwana geya, tuwo itaoya ina Eta tubunao ilatuwokoidi idigo kana,
4‘Yau ogaoga yaimi goi akaaiyaka#Ibe 11:9,13. go, geya guna poyapoyamo, tauna geya itoboineguta bei guna tomata avaliwoge. Tuwo akawanoi yaimi bego agimone bei tomatayana avaliwoge.’#Gui 7:16.
5Go kidi Eta tubunao sidigo kadi,
6‘Tomoya, kunovēma. Kom tomoya toolagaim yaima goi. Ava valiwoga tukubu dedevina toina, e moeko goi im tomata kuvaliwoge. Madabokima bogina katagona. Geya vatau tayaamo bei ivagagalakoim o isanabodem im tomata kuvaliwoge.’
7Tuwo Eberamoyana itaoya, Eta tubunaoyadi matadi goi ivatugúyala 8go, idigo kana,
‘Neta moitamo imi nuwonúwana bego ameko goi guna tomata avaliwoge, e konovēgu. Sokara natuna Epironi yaina goi kokawanōi manugu 9bei ina tukubu Makipela goi itagone agimone. Tukubuyana ikaaiyaka Epironi ina poyapoya dadava tayamo goi. E amoko goi guna tomata avaliwoge. Tauyana kolatuwōko latuwogu agimone go, neta aivina ana maisa, madabokina komi matami goi bei aemaisi.’
10E kina go Epironiyana ina bodao nauyayanaidi iitusobu asa ana kaba siu goi moe idi kaba tugúguna. Tuwo senao liliudi matadi goi itaoya, Eberamoyana ilatuwoko idigo kana,
11‘Guna tomoya, moe nakae geya. Kunovēgu. Poyapoyayana be nakae tukubuyana guna bodao matadi goi avinim. Kūna im tomata kuvaliwōge.’
12Eberamo itaoya go, aiyuwoina ivatuguyalamna tomotayadi matadi goi 13idigo kana,
‘Moe dedevina go, kunovēgu. Neta kutagona, e poyapoyayana madabokina ana maisa toina goi aemaisi. Am mani kwābi go, ana amoko goi guna tomata avaliwoge.’
14Go kina Epironiyana idigo kana,
15‘Guna tomoya, kunovēgu. Poyapoyayana ana maisa ana badabada poa andedi (400) go, moe dogoi besobeso yaida ae? Poyapoyayana avinim. Tuwo kūna im tomata kuvaliwōge.’
16Eberamo poyapoya ana maisa inove, idigo kana,
‘Nakae dedevina. Atagona; bei aemaisi.’
Tuwo Eta tubunao matadi goi ina mani ikatuyaivi nakae Epironi idige. Ikatuyaivi ikavava, ivini.
17-19Tuwo Eta tubunao matadi goi poyapoyayana, tukubuyana be nakae alovaidi adi lovina isaidámana ina Eberamo yaina. Poyapoyayana ikaaiyaka Makipela goi. Moe asayana go, bomatu dadavina goi ikaaiyaka. Mamreyana Ebironi asaina Kenani sinaena. E niga go Eberamo ina Makipela goi tukubuyana sinaena Sera ivaliwoge. 20Tauna nakae Eta tubunao poyapoyayana be nakae tukubuyana adi lovina Eberamo ikabi aba valiwoga manuna.
Valið núna:
Aba Vatowo 23: GVS
Áherslumerki
Deildu
Afrita
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.