मट्टि 16
16
आक्खॆॽमॆ योम्पक् खाङ्मिचिमॆ लोमिम्पा
(मारकुस ८:११-१३; लुका १२:५४-५६)
1इॽया एक्क हिप्पा फारिसिचि हाङ् साडुकिचि येसुबि टाआमि हाङ् ठाःक्मॆ निवाँऎ खो लोसुचि, “आना निवाँहाङ्बाङ् टामिम्पा हाङ्ग पारुबाङ् एक्क आक्खॆॽमॆ खानावाँ खाङ्मिचिमॆ।” 2टर खोसॆ आक्खाचि खानावाँ ऎम्पिटुचि, “नाम्किक्खॆहाङ् आन्ना काकानि ‘वेन्डाऎ डिना काम्नुऎ लि, मान्ठाभनॆ नाम्फलिॽवा हारलाङ्मा खाङ्मुसा।’ 3हाङ् नाम्समाक्मि आन्ना काकानि, ‘आयु वारि टा मान्ठाभनॆ नाम्फलिॽवा हारलाङ्मा हाङ् खिन्डुमानुङ्मा लिडा।’ आन्नॆ नाम्फलिॽवा खाङसे डिना मान्टक्मा लि लोमॆ लोहिकाम्नि, टर ग लःबि लिमिम्पा चिन्नाऎ लोमा यकुवॆ खानावाँ चाइ माङ्र कामानुङ् वाबाम्निनि। 4आच्चेलाहा काइसा हाङ् ब्याबिचारि याॽमिचिऎ चिन्ना खाङ्मा यगुक्मि। टर खोचिऎ योनामि चिन्ना बाहेका होइडा चिन्ना खाङ्मा टक्कुचिनि।” हाङ् येसुऎ आक्खाचि याइडाउचिहाङ् आक्कबाङ् खाइटा।
फारिसि हाङ् साडुकिचिम् खाबॆक्
(मारकुस ८:१४-२१)
5हाङ् पॆरॆरॆमा मॆआरॆङ् टाआमिर रे टिङ्खुबाचिऎ चारेपा लाखॆॽमा मिइखॆम्पा खानावाँ मिट्टकुचि। 6हाङ् येसुऎ आक्खाचि लोसुचि, “फारिसिचि हाङ् साडुकिचिम् खाबॆक्बाङ् आन्ना मिउन पेनानॆ।” 7हाङ् खोचि खोचिबि गर कामानुङ् खानावाँ इबकामि, “कानिऎ चारेपा मालाटॆमिम्पासॆ येसुऎ गर लोमिम्पा रेम।” 8येसुऎ उम्चि लुम्पि लिमिम्पा खानावाँ वाप्टकुहाङ् लोसुचि, “ओ मिःक्म टे निवाँयुङ् लॆखुबा आन्ना! चारेपा माइङ्का कामानुङ् मान्ठा आन्ना खानावाँ इकानिहा? 9माल आन्नॆ हस वाबाम्निनॆ? काङॆ ङाबाङ् याॽमिचि चामिॽमाम् लागि ङाचि चारेपा योप्मिम्पा मिखॆटाम्नॆ? हाङ् आक्रल आन्नॆ ऎॽवा बचॽवा खोमाम्निहा लोमॆ मिखॆटाम्नॆ? 10हाङ् रिबङ् याॽमिचि वाङ्चि चारेपा चामिॽमार आन्नॆ ऎॽवा बचॽवा खोमाम्नॆ? 11कॆ आन्नानुङ् चारेपामि बारेबि खानावाँ इमिम्पा हॆॽनॆ लोमॆ खानावाँ आन्नॆ मान्ठा वाबाम्निनॆ? कॆग फारिसिचि हाङ् साडुकिचिम् खाबॆक्बाङ् मिउन पेनानॆ लोमिम्पा रेटा।” 12हाङ्रे टिङ्खुबाचिऎ, खोसॆ खाबॆक् नुङ् चारेपामि बारेबि हॆॽनॆ, टर फारिसिचि नुङ् साडुकिचिम् खानावाँबाङ् मिउन पेनानॆ लोमिम्पा कामानुङ् वाबुचि।
पाट्रुसऎ येसु आना खिरिस्ट ना लोमिम्पा
(मारकुस ८:२७-३०; लुका ९:१८-२१)
13हाङ् येसु काइसारियामि फिलिप्पि लोमॆ ठालबि टाआ। हाङ् खोसॆ खोम् टिङ्खुबाचि सिमुचि, “याॽमिचिऎ याॽमिमि पासा चाइ आसार लोःॽङामिहा?” 14आक्खाचिऎ खानावाँ ऎम्पिटुचि, “ऎॽवाचिऎ चाइ बाप्टिस्मा पिक्खुबा युहान्ना काग्मि, होइढाचिऎ चाइ एलिया काग्मि, हाङ् आक्कबाङ् होइढाचिऎ चाइ यारमिहा आठावा निवाँहाङ्मि खानावाँ लोखुबाचिबाङ् एक्क लोक्मि।”
15हाङ् येसुऎ आक्खाचि सिमुचि, “टर आन्नॆ चाइ काङा आसा लोङानिहा?” 16सिमोन लिॽमॆ पाट्रुसऎ खानावाँ ऎम्पिटु, “आना हिङ्चाखुबा निवाँहाङ्मि पासा खिरिस्ट ना।” 17येसुऎ खो लोसु, “ओ योनामि पासा सिमोन, आना एट्टान आसिका टक्चामिम्पा याॽमिना। मान्ठाभनॆ इघा आनॆ याॽमिबाङ लेटम्पा हॆॽनॆ, टर पारुबिऎ काम् आपाऎ न वाप्मे निवाँ पिडॆ यो। 18कॆ आना पाट्रुस (गसॆ लोमा यकुवॆ चाइ लुङ्कॽवा रेम) लोःॽना। कॆ काम् मान्डालि ग लुङ्कॽवा सक्पि हेब्कुङ। हाङ् नाराक्मि चॆक्मावाऎ आक्क हेचाहिसुनि। 19कॆ आना पारुमि हाङ्डाम्मि चाबि पिःॽना। आनॆ माङ् इग बाखाटेम्पि हिगुकुना, म पारुबि सङ्क हिगु, हाङ् माङ् आनॆ बाखाटेम्पि हेम्पकुना, आक्क पारुबि सङ्क हेम्ब।” 20हाङ् आक्क डॆङपि खोसॆ खोम् टिङ्खुबाचि खो खिरिस्ट यॆ लोमॆ खानावाँ आसासः आलोसाम्चिनॆ कामानुङ नुःर लोसुचि।
येसुऎ टाङपा सिखॆॽमॆ खानावाँ इमिम्पा
(मारकुस ८:३१-३३; लुका ९:२२)
21म लःबाङ् चाइ येसुऎ खोम् टिङ्खुबाचि “काङा यारुसालेम खॆॽमान लॆ हाङ् टुङ्घङ्पाचिबाङ्, ढ्या याटाङ्पाचिबाङ् हाङ् मोसामि यायेॽमा चिन्खुबाचिबाङ् एट्टान डुखा आङ्मा लॆ। हाङ् खोचिऎ सेरुॽङामि टर सिखॆॽमिम्पा सिन्डाॽलाम्पॆ सिखॆम्पाबाङ् हिङ्पङा कामानुङ् लोबकुचि।”
22गरक्मा खानावाँ खेमुहाङ् पाट्रुसऎ येसु मेअङ् चिक्खॆटुहाङ् गर लोमानुङ् वोबकु, “पारभु, निवाँहाङ्ऎ गर आलॆटुर! आना सक्पि गरक्मा ग हानाम्स लिनि।” 23टर येसु ऎम्पकाहाङ् पाट्रुस लोसु, “ओ साइटान, आना काबाङ् मॆअङ् खाइटॆ। आना का हाप्सिमिक्खुबा याॽमिना, मान्ठाभनॆ आनाम् निवाँ निवाँहाङ्बि माआ, टर याॽमिचिम् खानावाँबि चु।”
टिङ्खुबॆ आङ्मा लॆऎ डुखा
(मारकुस ८:३४-९:१; लुका ९:२३-२७)
24हाङ् येसुऎ उम् टिङ्खुबाचि लोसुचि, “आसा काम् टिङ्खुबा लिमा मिनुक्, खोसॆ टाङ्पान मिखॆॽमा लॆ हाङ् टाङ्पामि डुखामि कुरुसा खिनमानुङ् काङा टिङ्मा लॆ। 25मान्ठाभनॆ आसॆ टाङ्पामि हिङ्खामा हिङ्चामिॽमिकु, खोसॆ चाइबानऎ हिङ्खामा माइकु, टर आसॆ टाङ्पामि हिङ्खामा काम् लागि लुक्पिकु, खोसॆ चाइबानऎ हिङ्खाम टक्चाकु। 26याॽमिऎ चोब्न बाखाटेम टाङ्पामि हुक्पि युङ्कु हाङ्स, टाङ्पामि चाइबानऎ हिङ्खामा माइटु हाङग खो माङ् नुऎ लिसॆ र? आठावा आक्कुबि आनाम् लावाबाङ् सङ्क ढ्या माल् चुऎ? 27मान्ठाभनॆ याॽमिम् पासा टाङ्पामि आपामि निङ्लावा हाङ् टाङ्पामि निवाँखाटॆखुबाचिनुङ् टाक् हाङ् खोसॆ चोब्न याॽमिचि उम् योम्पक आनुसारॆ नाम्याक् पिकुचि। 28चाइबान कॆ आन्ना लोकानि, गुबि येप्खुबाचिबाङ् ऎॽवाचि चाइ याॽमिमि पासा खोम् हाङ्डाम्पि टामे पाइमिम्पा मॆखाङ्रढारि सिखॆॽमिनि।”
Valið núna:
मट्टि 16: LBR
Áherslumerki
Deildu
Afrita
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society