Matáyɔ 18
18
Ani mmbé aɛ́nyɛ́nyi ɓadakɛ ka koɓoamɛ ndea na koba?
(Ɔna phɔtɔ Mkɔ 9.33-37; Lók 9.46-48)
1Ka mbenɔ ndɔ, ɓagoigi ndea Yéso ɓáobika omúsia gea te: «Ani mmbé aɛ́nyɛ́ni ɓadakɛ ka koɓoamɛ á na koba?» 2Yéso áɔmɔphana miki abɔbɔa, áommamisa ka ɔlɔ aɓɔ, 3na yɔnga te: «Nenóngoɗi ɗoni gea, aoɓá n'oɓókókěti tambea anu ájeɗe, ɓôɓá ɓea ɓaniki ɓábɔbɔa, ɓókóngiɛku ka koɓoamɛ á na koba. 4Nkpa buakɛ mmbé ědidisande na ɓá ɓea miki abɔbɔa nde, aámbé aɛ́nyɛ́nyande ɓadakɛ ka koɓoamɛ á na koba. 5Nkpa buakɛ mmbé aonsesea miki abɔbɔa ɓea mmbé k'ína ani, amosesi eme.
Kóngusɛmbɛ dakɔ ka ɓojeɗe
(Ɔna phɔtɔ Mkɔ 9.42-48; Lók 17.1-2)
6Nkpa nde a gǎkɛ ongusa ka ɓaniki nde ɓámoɓeeki suɓi á ɓojeɗe, atókeni ɓámɓɔɛɛ n'ɛtɛ ángbó ka kingo na makea akɛ ka oɓenge. 7Ngomi ee! Ka ɓato á ka mokonda, ka nyɔngɔ á ephiphi ɗanga-ɗanga nde aǒgusa ka ɓojeɗe. Ephiphi ájeɗe káukɛku kiɗiana, a ndiu ngomi ka nkpa nde aɔmɓɛtɛkisa na dakɛ. 8Akoɓá njaga n'ecinji akɔ n'aokongisa ka ɓojeɗe, tena ú ce! Ómakɛ ɗanga n'oɓɛ. Akeni k'óɓɛ ngia ka enda á ɗoni n'ona njaga moci na ecinji moci, kángá á ngia ka nsa á mɛyɔ n'ona njaga iɓɛ na ecinji iɓɛ. 9Aoɓá iso akɔ moci n'aokongisa ka ɓojeɗe, phongota ú, ómakɛ ɗanga n'oɓɛ. Akeni k'óɓɛ óngiɛ ka enda á ɗoni n'ona iso moci, kángá á ɓá na iso iɓɛ, na maka akɔ ka ɛɛmbɛ á nsa nde nnaoímika.
Mɛní á mɔgɔgɔ n'aɓúngigi
(Ɔna phɔtɔ Lók 15.3-7)
10Cɔ, ɛ́ngɛphani! Ɓókomɓɛnjiɛgɛmbɛ ka ɓaniki ábɔbɔa ndɔɔ, ka nyɔngɔ nde, nenóngoɗi ɗoni gea, ɓamalaéka nɛɓɔ ɓá tɔ esa bui mosá á Abɛ na koba. [11Ka nyɔngɔ nde Muna-Nkpa ɗábiki kǒamisa ka měma ɓunde ɗáɓáɓúngigi.]
12Ɓookanisia ɓo? Aoɓá nkpa n'ana ɓamɔgɔgɔ mia moci (100), ka ɓɔ moci n'aɓúngigi, káeɗeketɛku ɓundɔ ɓuangbo nkama ngianjaga gena na ngianjaga gena (99) gǔ á mamba, áoga onkaɓa mmbɔ atóɓúngigi? 13Nenóngoɗi ɗoni gea, akoɓá n'amɔni, aɓande na maseye ka phɔa á mɔgɔgɔ ndɔ, kɔnyɛ́nya ɓundɔ nkama ngianjaga gena na ngianjaga gena (99) ɓundɔ ɓákátóɓúngigi. 14A gǎkɛ tɔ ɓó ka Abanu mmbɔ á na koba, nnaokonda ka ɓaniki ndɔ moci áɓungɛgɛ.
Ɓɔphɛi ka phɔa á mɓêki nde agi ɓojeɗe
15Aoɓá dakɔ n'akogǐí ɓojeɗe, gǎ ómphangiɛ ɓojeɗe nɛkɛ na ɓo tɔ na yɛ ɓaɓɛ. Aoɓá n'akɔɔ́ki, ámbé onjisi goto k'ékita. 16Cɔ, a gǎkɛ oɓá na kákɔɔ́ki, mbɛɗa nkpa moci, kaɓɛ ɓakpa ɓaɓɛ, ɓíndɔ Ɓuku á Mokonga ayɔngi gea: ‹Ambe nyɔngɔ bui ɓátenɛ ú k'ɛ́sɔ á ɓaɗigimisi ɓaɓɛ, kaɓɛ ɓasaɔ#Ɔna Tɔl 19.15.› 17Aoɓá gǎkɛ na káɛɓɔ́ki, tɔ̌mia nyɔngɔ nɛkɛ ka kanisa. Aoɓá n'ayé phɔtɔ ɔ́ka á kanisa, ntángá ɓea mphendisigi-manjanja, na nkpa nde nna mɓêki.
18Nenóngoɗi ɗoni gea, kema bui nde ɓooyá ka mokonda, ɓayánde na koba, na kema bui nde ɓooɓeekea ka mokonda, ɓáɓeekeande ú na koba#Ɔna Yoá 20.23.
19Nenóngoɗi goto ɗoni gea, aoɓá ɓakpa ɓaɓɛ sɔsɔɓɛ anu ka mokonda nde na ɓáɔ́kani ka mɛma á Mokonga nanga kema sina, Abɛ mmbɔ á na koba aeɓophande kema nde ɓámɛmi. 20Nga, ɔma nde ɓakpa ɓaɓɛ, kaɓɛ ɓasaɔ ɓáodondana k'ína ani, eme ne ka ɔlɔ aɓɔ.»
Mɛní á mbɛɗanigi nde nnaokonda íma á ɓojeɗe
21Cɔ, Pɛ́tɛɛ áoga bíbí á Yéso, áomúsia: «Mɔkɔta, neímande ɓojeɗe nde muna-ayi aomogeea mɔngɔ ángaáni?» Áɓɛ tɔ mɔngɔ ngianjaga iɓɛ (7)? 22Yéso áonsikisia: «Ɓɛɛndɔ, nna tɔ mɔngɔ ngianjaga iɓɛ (7). A ndiu mɔngɔ nkama ngianjaga iɓɛ (70) mɔngɔ ngianjaga iɓɛ (7).
23Cɔ, ka nyɔngɔ índɔ unge koɓoamɛ ndea na koba akengeani na mɛní ndee: Moamɛ moci ɗákondi áúbɛ nyɔngɔ á imɔna nɛkɛ nnde ɗáɛɛkisi ɓabɛɗanigi nɛkɛ. 24Ɓî ɗákpangi tanga í, ɓáombikia na mbɛɗanigi moci mmbé ɗátú na nyɔngɔ óphendɔ á imɔna ásii phɛɛ. 25Mbɛɗanigi ndɔ ɗákátú gǎkɛ na ka kema ka phenda á imɔna ndɔɔ. Kaɓondɔ, moamɛ áososea gea, ɓánsombisɛ yɛ ɓea nkɔɓɛ, ɓánsombisɛ phɔtɔ nkakɛ, ɓ'anakɛ na nkumba nɛkɛ bui nde ɗátú ně, ka phenda á nyɔngɔ nɛkɛ. 26Mbɛɗanigi ndɔ, áogbuka muanku akɛ mosá á moamɛ ndɔɔ, áonɗengemisaga ɓe: ‹Ómophiphia phɔ́ ka měma, nekophendande imɔna nɛkɔ bui.› 27Moamɛ ndɔ, áonkuia mbɛɗanigi nɛkɛ ngomi phɛɛ, Aoíma nyɔngɔ á ophendɔ na ɗeketa á mbɛɗanigi ndɔ ágɛ.
28Ka toka á mbɛɗanigi ndɔ wa, áodondana na ka ɓadakɛ ɓabɛɗanigi, mmbé ɗátú na nyɔngɔ á ophendɔ nɛkɛ á imɔna mia moci (100). Aondunga, áonkpáta ka kingo, áongea: ‹Phenda imɔna nɛmɔ!›
29Dakɛ mbɛɗanigi áogbuka muanku mosá akɛ, áonɗengemisaga gea: ‹Ómophiphia phɔ́ ka měma, nekophendande!›
30Mokô á imɔna kakondɛ, Áongisisa ka mekakɔ na ka ɓî amphendaeka imɔna ndɔɔ.
31Ɓî ɓabɛɗanigi ɓunɛngbo ɗáɓáɔni kema ndɔ, ɓáɔɓɛa phɛɛ, ɓáoga ɔntɔmiaga mɔkɔta nɛɓɔ kema bui nde ɗágeani.
32Mpɔ mɔkɔta áɔmɔphana mbɛɗanigi ndɔ, áongea: ‹Mbɛɗanigi ajeɗe nde ca! Netóími nyɔngɔ á ophendɔ nɛkɔ bui, ka nyɔngɔ nde otómoɗengemisigi. 33Atókeni phɔtɔ oɓɛ ónkuiɛ dakɔ ngomi, ɓíndɔ eme netóokui ngomi.› 34Mɔkɔta nɛkɛ áɔɓɛa phɛɛ, áombisisa mbɛɗanigi ndɔ ka njaga á ɓato á tambisaga, na ka ɓî aphendaeka imɔna nɛkɛ bui.»
35Yéso áotutuisa yɔnga ɓe: «Abɛ mmbɔ á na koba ageaeka tɔ ɓó, ka nkpa nde nnaokonda íma á ɓojeɗe ndea dakɛ ka měma akɛ bui.»
Valið núna:
Matáyɔ 18: KMW
Áherslumerki
Deildu
Afrita
Want to have your highlights saved across all your devices? Sign up or sign in
© 2021, Wycliffe Bible Translators, Inc.