Matáyɔ 13
13
Mɛní á mmisi mbó
(Ɔna phɔtɔ Mkɔ 4.1-9; Lók 8.4-8)
1K'ésa ndɔ Yéso ɗájúani k'éndu#Ɔna Mkɔ 2.1 áoga oika ka ɔɓɛɛ á etǔ. 2Usɛsɛ á ɓakpa ɓásii ɓáontimba, ka nyɔngɔ índɔ unge ɗákǎmbi ka koko áoikiɗia. Ɓakpa ɓáomamaga k'ɔɓɛɛ.
3Áǒngoɗea ɓakpa nyɔngɔ ásii ka mɛní ɓe: «Nkpa moci ɗáge omisia mbó ka ciko nɛkɛ. 4Ɓî ɗáomisia, mbó nɛngbo áogua ka mpɛphɛ á aphe, ɓambǔ ɓáobika oea ú. 5Mbó nɛngbo áogua ka oɗo á ɓ'etae, ɔma nde oɗo ɗátú ábɔa, áɔtɛa mbangɔ nga, oɗo ɗákáteti. 6Ɓî maní aɓɛti akpɛ, áɔɔmɔkakisa ú, áosiɗisa nga, mǐgi í ɗákásɛi. 7Mbó nɛngbo áoguwa ka ɔlɔ á ngenge, ngenge ndɔ áɔtɛa, áophiphisa mbó. 8Mbó nɛngbo â gǎkɛ oguwa ka oɗo ánjá, áɔɓɔkɔta. Nɛngbo áoɓá mbuka mia moci (100), nɛngbo nkama ngianjaga (60), nɛngbo nkama isaɔ (30). 9Cɔ, mmbé ana kecue, ambe áɔ́kɛ.»
Yéso aɔyɔnga ka mɛní ka ɓo?
(Ɔna phɔtɔ Mkɔ 4.10-12; Lók 8.9-10)
10Ɓagoigi ɓáɔsɛkɛɗa bíbí á Yéso, ɓáomúsia te: «Ka nyɔngɔ éke nde ɔɔyɔnga na ɓakpa ka mɛní?» 11Yéso áǒsikisia te: «Ɓo ye tɔi úbapha á nyɔngɔ á ɓɔsɔmɛa á koɓoamɛ á na koba. Ɓɔ gǎkɛ, ɓáká tɔi ú. 12Nga, nkpa nde ana kema, ɓámophande nengbo, áoɓá ně ásii. Mmbé gǎkɛ nna na kau, ɓámutande n'índɔ aně. 13Nɛyɔngi na ɓɔ ka mɛní ka nyɔngɔ nde, ɓáɔɔnjia, ɓánáɔɔna kema, ɓáɔɔ́ka kángá ɔ́kapha, kángá á engekisa. 14Kaɓondɔ, nyɔngɔ ndea Isáya mɔtu-nyɔngɔ ndea Mokonga atɔtɔkɛani ka ɓɔ, gea:
‹Ɓɔɔ́kande nyɔngɔ kángá á engekisa í.
Ɓɔɛnjiande kema kángá á ɔna í.
15Nga, ɓakpa nde ɓána měma akpɛ.
Ɓáɗaki kecue aɓɔ, ɓáími iso aɓɔ ka gea,
ɓákaɔnaphɛmbɛ ně,
ɓákaɔ́kaphɛmbɛ na kecuɛ,
ɓákákondi bisa á měma aɓɔ ka engekisa á nyɔngɔ.
Ɓákákondi kětia á tambea aɓɔ ámbé ka gea néeamisɛ#Ɔna Isa 6.9.›
16Cɔ, Maseye ka ɓenu nga, iso anu aɔɔnapha na kecue anu aɔ́kapha. 17Nenóngoɗi ɗoni gea, ɓaɔtu-nyɔngɔ ndea Mokonga ɓásii na ɓato á koɗoni ɓásii, ɗáɓákondi ɔna á kema nde ɓɔɔna ɗáɓákáɔni, na ɔ́ka á nyɔngɔ nde ɓɔɔ́ka, ɗáɓákáɔ́ki gǎkɛ#Ɔna 1 Pɛ́t 1.10-12.»
Kantíti á mɛní ndea mmisi mbó
(Ɔna phɔtɔ Mkɔ 4.13-20; Lók 8.11-15)
18«Cɔ, ɓenu gǎkɛ, ɔ́kani kantíti á mɛní ndea mmisi mbó. 19Mbó nde ɗágú ka mpɛphɛ á aphe, a ɓea ɓakpa ɓundɔ ɓáɔɔ́ka ɓɔphɛi á koɓoamɛ, kángá engekisa í, na nketi áobika k'aphe á kpɔa nndɔ ɓátókoni ka měma aɓɔ. 20Mbó ndɔ ɗágú ka oɗo á ɓ'ɛtɛ, a ɓea ɓundɔ ɓáɔɔ́ka Nyɔngɔ á Mokonga na ɓeekea í mɔngɔ ímoci na maseye. 21Nyɔngɔ kau kaɓɛ gǎkɛ na mǐgi suɓi aɓɔ. Ɓá tɔ ǒyamea ka Nyɔngɔ ndɔ ka mbenɔ ábɔa. Aoɓá ka mbenɔ á tambaga na ea á minyɔ ka phɔa Nyɔngɔ á Mokonga, ɓáogua mɔngɔ ímoci.
22Mbó nde ɗágú sɔsɔɓɛ á ngenge, a ɓea ɓundɔ ɓáɓeeki Nyɔngɔ ndea Mokonga, mɔphɛ á mokonda na siki ɛ́tɔi â gǎkɛ omowa Nyɔngɔ ndɔ a ka měma aɓɔ, kagɔmbisɛ mbuka. 23Mbó nde ɗágú ka oɗo ánjá, a ɓea ɓundɔ ɓáɓeeki Nyɔngɔ á Mokonga, aéengi ka měma áɔgɔmbisa mbuka: Nɛngbo miamoci (100), nɛngbo nkama ngianjaga (60) na nɛngbo nkama isaɔ (30).»
Mɛní á ɔphɔ ájeɗe
24Yéso áǒngoɗea mɛní nɛngbo, áɔyɔnga te: «Koɓoamɛ á na koba akengeani na nkpa moci mmbé ɗákoni mbó ánjá ka ciko nɛkɛ. 25Cɔ, ka ipha á esa na ɓakpa ɓá ye ɗé, mɓiɓia nɛkɛ áongia ka ciko ndɔ, áokona ɔphɔ ájeɗe sɔsɔɓɛ á nganɔ, áoga nɛkɛ. 26Ɓî mbó ndɔ atɛi ye, áokpanga ɓɔkɔta, ɔphɔ ájeɗe áɔtɛa phɔtɔ. 27Ɓabɛɗanigi ndea mɛna-ciko, ɓáogaomúsia te: ‹Mɔkɔta, ɗókókoni phɔ́ mbó ánjá ka ciko nɛkɔ? Cɔ, ɔphɔ ájeɗe nde atóki goto wani?›» 28Mɛna-ciko áǒsikisia te: «Mɓiɓia ámbé atógi nndɔ.» Ɓabɛɗanigi ɓáomúsia: «Okondi ɓégɛ ɓéphúiɛ ɔphɔ ájeɗe ndɔ?» 29Mɛna-ciko áogea: «Ɓɛɛndɔ nga, ɓoophúia ɔphɔ ájeɗe ndɔ, ámbé ɓophúiande kimoci na nganɔ. 30Ɗeketani bubui átɛɛ kimoci na ka ɓî ajúande mbenɔ á ɗungu. Wandɔ unge, neéngoɗeande ɓato á ɗungu te: ‹Phúiani phɔ́ ɔphɔ ájeɗe ndɔ, ɓóɓoɛgɛ ntɔkɛ-ntɔkɛ í, ka toɓoa í. Mpɔ ɓóbisɛ nganɔ k'égbóngbó nɛmɔ.›»
Mɛní á mbuka á Aladáli
(Ɔna phɔtɔ Mkɔ 4.30-32; Lók 13.18-19)
31Yéso áǒngoɗea mɛní nɛngbo, áɔyɔnga te: «Koɓoamɛ á na koba akengeani na mbó á Aladáli nnde nkpa ɗábɛɗi, áokona ka ciko nɛkɛ. 32Ande mbuka anyɛɓɛ ka ɓa mbó bubui. Ɓî ɗátɛi gǎkɛ, áoɓá ángbó phɛɛ, kɔnyɛ́nya mbuti bui á ka ciko, áoɓá me, na ka ɓî ɓambǔ ɗáɓáphɛ̌ki iɓɔ ka ntabi í.»
Mɛní á cacu
(Ɔna phɔtɔ Lók 13.20-21)
33Yéso áǒngoɗea mɛní nɛngbo, áogea: «Koɓoamɛ á na koba akengeani na cacu nnde nke ɗádausani na mpusu á mucɛɛ ásii ka gea, mpusu ndɔ áɓimbɛ.»
Yéso aɔyɔnga ka mɛní ka ɓo?
(Ɔna phɔtɔ Mkɔ 4.33-34)
34Yéso áɔyɔnga nyɔngɔ ndɔ bui ka mɛní mosá á usɛsɛ á ɓakpa. Ɗákáɔyɔnga na ɓɔ kángá mɛní. 35Ɗági ɓondɔ ka gea, nyɔngɔ ndɔ mɔtu-nyɔngɔ ndea Mokonga ɗáyɔngi, átɔtɔkɛanɛ gea:
«Neyɔngande ka mɛní,
néongoɗa nyɔngɔ á ɓɔsɔmɛa, kpanga ɓî ɗáɓáconji mokonda#Ɔna Jab 78.2.»
Kantíti á mɛní á ɔphɔ ájeɗe
36Mpɔ, Yéso áoɗeketa usɛsɛ á ɓakpa, áoga k'éndu. Ɓagoigi nɛkɛ ɓáɔsɛkɛɗa bíbí akɛ, ɓáongoɗea te: «Ósongoɗea phɔ́ kantíti á mɛní á ɔphɔ ájeɗe á ka ciko.» 37Yéso áǒsikisia te: «Nkpa nde akoni mbó ánjá, ande Muna-Nkpa. 38Ciko ande mokonda. Mbó ánjá ande ɓakpa á koɓoamɛ á na koba. Ɔphɔ ájeɗe ande ɓakpa ndea nketi. 39Mɓiɓia mmbé akoni ɔphɔ ájeɗe, ande nketi. Ɗúngú ande sungiaga á mokonda. Ɓato á ɗungu ɓánde ɓamalaéka. 40Ɓea ɓî ɓáophúia ɔphɔ ájeɗe na ɓóaga á ntɔkɛ í ka makea ka nsa, aɓáeka phɔtɔ ɓó, ka sungiaga á mokonda. 41Muna-Nkpa aetekande ɓamalaéka nɛkɛ, ɓáǒdondanisaga ɓakpa ɓɔbu ɓundɔ ɓáǒdemaga ɓadaɓɔ na ɓundɔ ɓáogea ájeɗe ɓáǒɓeaga ka koɓoamɛ nɛkɛ. 42Ɓáemakande ɓakpa ndɔ ka ɛɛmbɛ á nsa. Kondɔ unge ɓakpa ɓágámande na ea á minyɔ. 43Ɓato á koɗoni ɓáphenuagande gǎkɛ ɓea maní, ka koɓoamɛ ndea Abaɓɔ#Ɔna Dan 12.3. Mmbé ana kecue, ambe áɔ́kɛ.
Mɛní á ɛtɔi nde aɛsɔmɛani ka ciko
44Koɓoamɛ á na koba akengeani n'ɛtɔi nde aɛsɔmɛani suɓi á ciko. Nkpa moci ɗáɔni ú suɓi á ciko, â goto ɔsɔmɛa. Áoɓá na maseye phɛɛ, áosombisa nkumba nɛkɛ bubui ka nyɔngɔ á somba ciko ndɔ.
45Koɓoamɛ á na koba a goto ɓea nsombisigi nkumba n'aokaɓa nsángá ánjá. 46Ɓî ɗáɔni nsángá á esombi akpɛ, áoga osombisa nkumba nɛkɛ bui, áosomba nsángá ndɔɔ.
Mɛní á moaɓɔ
47Koɓoamɛ á na koba a ɓea moaɓɔ na ɓáubi ka iɓo nnde etéte bui á ɓasú ɓáotá kau. 48Ɓî moaɓɔ atúmi ye, ɓaɔphigi ɓáoɓota ú kubi, mpɔ ɓáoikia sɔmbɔa á ɓasú. Ɓundɔ ɓánjánja ɓáǒbisa ka jɔ, ɓáǒmaka ɓundɔ ɓájeɗe. 49Ɓende unge aɓáeka k'ésa á sungia á mokonda: Ɓamalaéka ndea Mokonga, ɓáekatanisaeka ɓato-ájeɗe na ɓato á koɗoni. 50Ɓáǒmakea ɓato-ájeɗe ka ɛɛmbɛ á nsa. Kó, aɓáeka ngamɔ na ea á minyɔ.»
Ɛtɔi á kɛ̌kɛ na nnde á kala
51Yéso áǒúsia ɓagoigi nɛkɛ te: «Ɓoengekisi nyɔngɔ nde bui?» Ɓáoɓeekea: «Eya.» 52Mpɔ áǒngoɗea gea: «Ngoisigi-ɛɔphi mmbé aɓeeki nyɔngɔ á koɓoamɛ á na koba, akengeani na mɛna-éndu, mmbé aphúi k'ɛtɔi nɛkɛ, kema á kɛ̌kɛ, na kema á kala.»
Ɓato á ka Najalɛ́ti ɓan'yege Yéso
(Ɔna Mkɔ 6.1-6; Lók 4.16-30)
53Ɓî Yéso agɔɓi ye tɔ̌miaga á mɛní ndɔ, áotóka sua, 54áoja ka nji nɛkɛ. Kó, áogoisaga k'éndu á madondanɔ nɛɓɔ Ɓayúda ka nyɔngɔ á Mokonga, ɓato á kó ɓáoyayama, ɓáoúsianaga te: «Atóki na kɔɓɔɔngɛ na ketangaɔ nde aogea suani? 55Nna phɔ́ muna nto á ɓɔí á mɔphɛkɔ ndɔ aámbé? Amakɛ#Ɔna Yoá 6.42 nna phɔ́ Malía? Yakɔ́ɓɔ, Yɔsɛ́phu, Simɔ́ni na Yúda ɓáká phɔ́ ɓana-amakɛ? 56Ɓ'áwákɛ ɓáná phɔ́ koikaga ka nji nde ɓe kau? Atóki na ɓukpɛkpɛ nde suani?» 57Ɓî ɗáɓáúbi cina akɛ ɓákámɓeekeɛ. Yéso â gǎkɛ ǒngoɗea te: «Ɓáonɗokomisa mɔtu-nyɔngɔ ndea Mokonga ɔma bui. A ye gǎkɛ ojúa ka nji nɛkɛ á ɓɔkɔtɛana na k'ékombo nɛkɛ, ɓáɔmɓɛnjiaga.» 58Ka nyɔngɔ á kanga ɓeekea nɛɓɔ unge Yéso ɗákági ketangaɔ ásii wa.
Valið núna:
Matáyɔ 13: KMW
Áherslumerki
Deildu
Afrita
Want to have your highlights saved across all your devices? Sign up or sign in
© 2021, Wycliffe Bible Translators, Inc.