ดอ โฆว 1
1
ลอง เฌาพรา พาน เบลห กาดาย
1อู ซีณ ดอ โฆว อัน เฌาพรา พาน เบลห บอ ฆางหราว บอ กาดาย. 2ดอ อัน ตี กาดาย อาว มึห อารึบ อัน. อึณ มืร ตู มึห มาเซ แดง กาดาย นี. อึณ อับ ว็อง แดง อึม ตาง, อึม บล็อง. น็อห พึอม เฌาพรา มืร ฮาว นา แดง อึม ตาง ตี.
3วาย อัน ตี เฌาพรา ต็อห, “แตห อึณ บลาง.” แฮะ ฮอต กาลาง, อึณ บอ บลาง. 4เฌาพรา มืร ยึร, บลาง ตี แฮะ กยัะ. ปาย ตี เฌาพรา แฮะ กาย็อห บลาง ฆาย อับ. 5บลาง, อัน จืร ซีแง. อับ, อัน จืร แคง หมึร. แฮะ อับ วี บลาง, แฮะ โนะ อู ซีแง.
6เฌาพรา วี ต็อห, “แตห อึณ แบน โดง ตาง นา กาแต อึม, แตห อึณ กาย็อห อึม อา บลาก.” 7ปาย ตี เฌาพรา โบง แตห อึณ แบน ฆางหราว, แตห อึณ กาย็อห อึม นา ครึม ฆาย อึม นา แดง. 8ฆางหราว ตี, เฌาพรา มืร แตห อึณ จืร เบลณ. ปาย ตี แปร วี อับ วี บลาง, แฮะ โนะ อา ซีแง.
9วาย อัน ตี เฌาพรา วี ต็อห, “อึม นา ครึม, แตห อึณ กาฌูะ อู โปละ, แตห อึณ ลึห โดง กาฮ็อห.” เฌาพรา แฮะ ฮอต กาลาง, อึณ บอ แบน. 10โดง ตู มึห อึม, เฌาพรา แตห อึณ จืร กาดาย. โดง กาฌูะ อึม, เฌาพรา แตห อึณ จืร นัมมูกซารา. เฌาพรา วี ยอด โตต, แฮะ กยัะ กาเซา. 11แฮะ ฮอต เฌาพรา ต็อห, “แดง กาดาย ตี, แตห อึณ เลห เปต, แตห อึณ มึห เดา อี มึห เฆา อัน. แตห อึณ มึห เฮ อี มึห เบล. เฮ ดอน โมยว, แตห อึณ มึห เบล อาโมยว อัน. แคง เบล ตี ดอน โมยว, แตห อึณ มึห กาอาง อัน, ปี วี ปึอน ซัม แคง กาดาย.” เฌาพรา แฮะ ฮอต กาลาง ปาย ตี เฮ บอ เบล วี แบน โตต ดอน โมยว. 12แดง กาดาย อึณ วี ลัต เปต เฆ เดา แบน โมยว แบน โมยว อี มึห เฆา อาโมยว อัน บอ เฮ อี มึห เบล แบน โมยว แบน โมยว. เฮ ดอน โมยว มึห กาอาง อัน. เฆ ดอน โมยว ลัต โตต แดง กาดาย. 13เฌาพรา มืร ยอด, อึณ กยัะ โตต ดอน โมยว. ดอ อัน ตี แฮะ อับ วี บลาง, แฮะ โนะ โอย ซีแง.
14วาย อัน ตี เฌาพรา วี ต็อห, “แตห อึณ มึห อู โมยว อี ปี เบล บลาง แคง เบลณ. โมยว อี ปี เบล ตี, แตห อึณ กาย็อห กาแต ซีแง ฆาย แคง หมึร. เซ อี ยึร เบล ตี, แตห เฆ นับ ปัน เหมา อึณ ดี มึห บลอย แบน โมยว แบน โมยว, แตห อี ปึอน ดี ตีห อาคราว อัน, ซีแง อัน บอ ซีนัม อัน. 15เบล บลาง ตี โลว กอย แคง ฆางหราว, แตห อึณ บลาง แดง กาดาย.” แฮะ ฮอต กาลาง, อึณ มืร โบว แบน ปาย ตี อู เฌณ. 16ปาย ตี เฌาพรา พาน เบลห อี บลาง ตาง อา กาลัง. โบ็ง ตาง, เฌาพรา แตห อัน อึบ ซีแง กาแต, โบ็ง เตียะ แตห อัน อึบ แคง หมึร. อัน เฌา มืร โบง เฆ ซีมัณ แบน โมยว. 17อัน เฌา แฮะ ฮอต โบง เบล บลาง บอ ซีมัณ, อัน มืร เบลห อูน เฆ แคง เบลณ, แตห อึณ บลาง แดง กาดาย. 18แตห เฆ กอย ซีแง กาแต บอ แคง หมึร, แตห เฆ บอ กาย็อห บลาง ฆาย อับ. เฌาพรา แฮะ ฮอต โบง ปาย ตี อัน วี ยอด, อึณ กยัะ ดอน โมยว. 19ปาย ตี แปร วี อับ วี บลาง, แฮะ โนะ พวน ซีแง.
20วาย อัน ตี ปอ อู จึบ เฌาพรา วี ต็อห, “แตห อึณ มึห โดว อี กอย แคง อึม แบน โมยว แบน โมยว, แตห เฆ กืน. บอ แคง เบลณ แตห อึณ มึห มาซีม อี ปึอน บึณ ฮาว นา แดง แคง เบลณ.” 21ปาย ตี เฌาพรา พาน เบลห มาฆา บอ อี ตาง อี เตียะ บอ โดว ซัดดาวา อี กอย แคง อึม, แตห อึณ มึห แบน โมยว แบน โมยว. อัน เฌา มืร โบง แตห อึณ มึห มาซีม เฆ โดว อี มึห เพียง ดอน โมยว. อัน เฌา มืร ยอด ปี โบง อัน, อึณ กยัะ. 22แฮะ ฮอต โบง, เฌาพรา ม็องการา แตห ดี โดว ซัดดาวา ดอน โมยว. อัน ต็อห, “แตห เบ แบร, แตห เบ กืน. แคง อึม, แตห อึณ บอ โนะ โดว แบน โมยว แบน โมยว. แดง กาดาย, แตห เฆ โดว อี มึห เพียง ดอน โมยว อี แกร ดี กืน.” 23ปาย ตี แปร วี อับ วี บลาง, แตห อึณ บอ โนะ พัน ซีแง.
24วาย อัน ตี เฌาพรา วี ต็อห, “แตห อึณ มึห โดว อี มึห อาซาก ดอน โมยว. แตห อึณ มึห บอ โดว อี กอย แดง กาดาย ดอน โมยว. แตห เฆ แกร ดี กืน, อาโมยว เหมา อาโมยว อัน.” แฮะ ฮอต กาลาง, อึณ แบน โตต ปี ต็อห เฌาพรา. 25ปาย ตี เฌาพรา โบง แตห อึณ มึห โดว ซัดดาวา อี กอย แดง กาดาย, แตห อึณ มึห อาโมยว เหมา อาโมยว อัน. แฮะ ฮอต เฌาพรา วี ยอด, โตต ดอน โมยว แฮะ กยัะ กาเซา.
26วาย อัน ตี เฌาพรา ต็อห, “แตห เอ โบง ดูอี, แตห เฆ ปี เอ เฌาพรา. อารึบ ดูอี, แตห อึณ ปี เฌาพรา. เฆ ดูอี ตี, เฆ โลว อึบ มาฆา อี กอย แคง อึม, อึบ บอ มาซีม อี กอย แคง เบลณ. บอ โดว ซัดดาวา อี กอย แดง กาดาย, แตห ดูอี อึบ โตต ดอน โมยว.”
27แฮะ ฮอต กาลาง, เฌาพรา มืร โบง แตห อึณ มึห ดูอี, แตห ดูอี ปี อารึบ อัน เฌา. อัน เฌา โบง บอ อีบึณ บอ อีมาย, แตห ฆาย ปี อัน.
28เฌาพรา วี ม็องการา ดัว ดี ฆาย. อัน ต็อห, “แตห บาย ฮืง แบร กืน, แตห ดูอี กอ โนะ แดง กาดาย นี, แตห บาย บอ อึบ โตต แดง กาดาย นี. แตห บาย บอ อึบ เฆ มาฆา อี กอย แคง อึม บอ เฆ มาซีม อี กอย แคง ฆางหราว บอ เฆ โดว อี มึห อาซาก ดอน โมยว อี กอย แดง กาดาย นี.”
29อัน เฌา มืร ต็อห, “แคะ กอย เดา อี มึห กาอาง, แคะ กอย เฮ อี มึห เบล เฆ กาอาง, โอว ดัว ดี บาย, แตห อึณ แบน ปี ดี โฮม บาย. 30แคะ มึห โดว ซัดดาวา แดง กาดาย, แคะ กอย มาซีม แคง เบลณ, แคะ กอย โดว แบน โมยว แบน โมยว, โอว ยี ดัว เฆ โฮม เปต อี ลัต ดอน โมยว.” เฌาพรา แฮะ ฮอต กาลาง, อึณ บอ แบน ปาย ตี. 31เฌาพรา มืร ยอด โตต ปี โบง อัน ดอน โมยว. อึณ แฮะ กยัะ กาเซา. ปาย ตี แปร วี อับ วี บลาง, แฮะ โนะ เดา ซีแง.
Valið núna:
ดอ โฆว 1: pce
Áherslumerki
Deildu
Afrita
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.