Like 9
9
Jesu otumi alwoni a kuumi na vwele
1Jesu okusihi alwoni a kuumi na vwele. Nde ompi bo mpari bɨla onkʉmu mo ocuura edidima me ebi eso, na lesalaha la abyeri. 2Nde otumi bo mo otooso Onkani o Njyami, na lesalaha la abyeri. 3Nde na bo ndi: «Ntini e be leje, lekaa biriha kiila se omo ni: i bira osuumbu, i bira mpye, na biila, na adoro ni. Be i bira amfa mwele ni. 4Ntini ma yamba be o njo mo, be leki ŋa tii ngo e be le cyehe mpuhu jya. 5Ntini e baari ma ali i yamba be ni, be lecyehi mo onguundu kya, lekubihi ogʉru a mo nyiili e be. Ntini e be lesa vwa, be lejyese bo.» 6Bo ayeni ma ampuhu. Atoosi Ncya e Mve, na lesalaha la abyeri.
Erode amono ongwo o mvuuru a nkuumi Jesu
7Erode Titrake#9.7 Erode Titrake ma cwoloho se ma Erode Atipase. aki nkʉmu a Ngalili, oyuha maami mayiri, ongwo osi nde. Obila maamo ndi: «Jan omi nyusuha nca leku». 8Akɨma ndi: «Eli omiya na avuruha». Ma lembɨsa ndi: «Omo nca awobi a mbari e Njyami a kala omiya na avuriha.» 9Erode ndi: «Jan me ti etuma ocebe nkii, ŋa yu mvuuru okɨma mawobo o nde na?» Nde aki asaha omono Jesu.
Jesu abunuŋa lemvuuru le kuna
10Antuma ayi na avuriha, aduhi Jesu maami a bo ma asi aso. Nde obiri bo, oyeni na bo la na baari, mpili onguundu o Betesayida. 11Lemvuuru leyuha vwa, lelwoni nde. Jesu oyambi bo, owobi na bo mo Onkani o Njyami. Osalihi ma aki na kaama. 12Cuhu eki eya ekolo, antuma a kuumi na vwele aciini mpili e nde ndi: «Vuura baari nca ampuhu na anjo a m paani. Mpili e bo mabaha biri e tolo na biila e bo ma aja. Obila saabe leli o biri e kayi.» 13Jesu na bo ndi: «Lempa bo biila be anku.» Bo akaali ndi: «Bisi leli ŋa na mpeembe taani na ancu vwele atu. Leke we asaha mbɨri bisi lemasuuma biila mo baari ba aso?» 14Bo aki mabuuna oto amile ataani a baari(5000). Jesu oduhi na alwoni a nde ndi: «Leduha bo aka ma anci asa eju. Oju omo ekuumi e baari etaani.» 15Bo anyiimi, acuusi baari aso ma anci. 16Jesu oyahi mpeembe e taani na ancu a vwele. Okeesi yulu, ovwoni, ompi andosoho o yula biila, okabi, ompi na alwoni mo okabaha lemvuuru. 17Bo aso aji, ajurihi. Abiri angara kuumi na mwele, me entiha e biila me esiili.
Pyere ndi Jesu Krisi
18Cuhu mo Jesu avwono o paani bɨla alwoni a nde. Opɨsi bo ndi: «Lemvuuru leduha ndi me na?» 19Bo akaali ndi: «Jan Batise, maamo ndi Eli. Ma lembɨsa ndi owobi a mbari e Njyami a kala, amanyusuha.» 20Jesu opɨsi bo ndi: «Mo be, me na?» Pyere okaali ndi: «We Krisi a Njyami.»
21Jesu obye na bo ndi: «Leka duha jaa jya na mvuuru ni.» 22Nde oluusi ndi: «Ove mwana Mvuuru omoni ambaba mo mɨni. Akuuru a nca ekuha, ankʉmu ma asi ma avwoŋi, na ayisihi me ekele ma aje obuma nde. Ŋa cuhu otari nde onyusuhi.»
Osuumbu mo olwono Jesu
23Emana nde na bo aso ndi: «Mvuuru asaha olwono me, i macimiha o nde anku ni, ove nde obiri lembanji le nde, ŋa nde olwoni me. 24Ŋa mpɨni mvuuru asaha okyele lebihi le nde, ayele lo. Mvuuru aje oyele lebihi le nde o me, aje ovusuha lo. 25Mvuuru obaha biibi e yula ncye eso, omana nde obiisi lebihi le nde, si kali nde oposihi lo nde anku, nde obaha oma? 26Mpini mvuuru amono okʉru o me, na mbari e me, Mwana Mvuuru aje omono okʉru o nde se, o ntini e nde aje oya nca lekʉma le nde, na le Taara, na la abaanji me epeende. 27Me eduha be asisyele, maamo o mpaniŋi e be ŋa ma aka sa kwa ni yuhu bo akini omono maami mo Onkani o Njyami ni.»
Jesu nca lekʉma le Njyami
28Ecuhu mfwomo eyiri e nde amani owobo, Jesu oyahi Pyere, bɨla Jan na Jake, okumi yula okuri na avwono. 29Ntini e nde avwonihi, olya o nde okalihi osuumbu, amfa aya kubuhu mva epeeŋi e ngari. 30O ŋa, abalaha vwele aya mawobo bɨla nde. Eki Moyise bɨla Eli bo aki awobi a mbari e Njyami. 31Bo awasihi. Lekʉma le Njyami lemajenehe bo. Mawobo na Jesu me ekuuhi e nde o Jerusaleme. 32Pyere bɨla abuha a nde amaca antolo lo mɨni. Bo anyusihi, amoni lekʉma le Jesu, bɨla abalaha vwele ma aki bɨla nde. 33Ntini e Moyise bɨla Eli ma nyili Jesu, Pyere na nde ndi: «Nkʉmu saabe mo oka ŋa yemiŋi. Lecwa elebe etari. Omo a we, omo a Moyise, omo Eli.» Pyere aka yaa maami a nde aduuhi ni. 34Ntini e nde awobihi vwa, lenguri lewuhi bo. Alwoni amoni vwoho ntini e bo manyuniŋi nca lenguri. 35Juuyi lewobi nca lenguri ndi: «Yu Mwana a me emaswolo, leyuha nde!» 36Juuyi lemana owobo, Jesu amaka nde otu. Alwoni akyeli maami maa, bo aka duha mvuuru o ntini jya ni.
Jesu asalaha mwana ali na odidima obi
37Cuhu eca, bo asurihi okuri, lemvuuru leyi mpili e Jesu. 38O nca lemvuuru, balaha mo ewʉli nkɨma: «E Nkʉmu, kolo kolo e we, lehe miisi a we o yula mwana a me a balaha. Me nde mwana a kya! 39Odidima kya okwari nde o ŋiŋa, nde owʉli nkɨma, co onyisihi nde na mpari. Awuru aya macuuha nde mo onywa. Odidima kya oswesihi nde kuna, co mo ocuuha o nde eki na onono. 40Me vwoni alwoni a we mo ocuura co, bo aka buuna ni.»
41Jesu okaali ndi: «Be baari le eli oyalihi kali, be osyaha maami ma abi. Me eje oka bɨla be, na lebaha le okiini o ma be, tii ngo jini ntini?» Jesu na balaha jya ndi: «Ya na mwana a we kuuni!» 42Ntini e mwana aciini, odidima obi obali nde o ncye, onyisihi nde na mpari. Ŋa Jesu obye na odidima obi, osalihi mwana, ovuuri na taara. 43Baari aso akimi onini o Njyami.
Jesu avuriha oduha ndi nde aje okwa
Ŋa baari aso aya ma yuusa Jesu, o maami a nde asihi. Nde na alwoni ndi: 44«Leyuha maami a me eduha be. Ma aje ompa Mwana mvuuru o jyala e baari.» 45Ŋa alwoni a nde aka yuha mbari jya ni, yo eki lempiini. Mo oduma bo amayuha, bo amoni vwoho mo olehe nde eduhu.
Avʉli abuha o mpaniŋi alwoni na?
46Alwoni aya mawobo o mpaniŋi e bo, masaha oyaa mvuuru avʉli abuha onkʉmu. 47Jesu aki oyaa ecimiŋi e bo. Oyahi mwana onkere, ocuusi o paani e nde. 48Nde na bo ndi: «Mvuuru ayamba mwana yu, o nkuumi e me, nde ayambi me. Mvuuru se ayamba me, nde ayambi mvuuru atumi me. Obila mvuuru avʉli onkere o mpaniŋi e be, jwa mvuuru avʉli abuha onkʉmu.»
Mvuuru ali mbele e be kali, oli bɨla be
49Jan oyahi mbari ndi: «E Nkʉmu, bisi lemimono mvuuru acuura edidima me ebi o nkuumi e we. Ŋa bisi lema saha okanaha nde, obila nde i lwono we bɨla bisi ni.» 50Jesu okaali nde ndi: «Lekaa kanaha nde ni. Obila mvuuru ali mbele e be kali, oli bɨla be.»
Jesu aje Jerusaleme. Asi Samari aka yamba nde ni
51Antini aki aya maciina, me ecyehi e Jesu o yula ncye, nde okuri eyenihi e Jerusaleme. 52Otumi baari levusu le nde. Bo ayeni, anyunihi o mpuhu asi Samari, mo oyeese ejihi e Jesu. 53Bo aka dya o yamba nde ni, obila nde ayenihi na Jerusaleme. 54Bo amono vwa, alwoni macwolo o Jake bɨla Jan na Jesu ndi: «E Nkʉmu we asaha bisi leduha mbaa ewa yulu, ecuha bo?» 55Jesu okalihi mpili e bo, obye na bo. 56O ŋa bo ayeni mpuhu nkɨma.
Lelwono le Jesu
57Ntini eki bo o njila, balaha mo na Jesu ndi: «Me eje olwono we, me ebiri e we aje oyira eso.» 58Jesu okaali na nde ndi: «Ebahi na abulu a mo oca tolo, anywi a yulu na anjo. Ŋa Mwana mvuuru biri owuuma kali.»
59Jesu na okɨma ndi: «Lwono me!» Ŋa balaha jya ekaali ndi: «E Nkʉmu, sa nyila me aje na ajiiha taara a me.» 60Ŋa Jesu okaali ndi: «Nyila akwi ajiiha akwi#9.60 Akwi ma jiiha akwi: baari ma ama kwa ma oduduma. Bo oyaligi kali. Ŋa ba baari ma jiiha ebiimi. Alwoni a Jesu janja le tooso la onkani o Njyami. a bo. Ŋa we, jyehe na atooso Onkani o Njyami.»
61Okima ndi: «Me eje olwono we Nkʉmu, ŋa sa nyila me eje na laasa nkwono e me.» 62Jesu oduhi nde ndi: «Mvuuru yuhu akuna nguunu omana nde okwoni yo, nde mva mvuuru ali i buuna ojanja ma Onkani o Njyami ni.»
Valið núna:
Like 9: MDT
Áherslumerki
Deildu
Afrita
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES