Luk 1
1
Itase ja makana ma Luk akwɛlɛsɛ
1Ɔbɛ Teofili wa nɛni, bato buce banyekasa ikwɛlɛcɛ beyaya byayekanasa opanga bɛhɛ. 2Bakwɛlɛsɛ byango, nda bakumɛsɛ utase batandasa bɛhɛ. Na bango ikalakasa bajazi ba iyɔkɔ ja Zambe. 3Bosina mɛnɛ namɛ mayɛnɛ te yaje o bwɛji ilwaka ihimwaka iyamɛ ekusi, masina ma mambo nda mango abekubwɛsɛ utase, na ikwɛlɛcɛ ɔbɛ Teofili wa nɛni, beyaya byɛ, nda byango byayekanasa, na janga mwa mbɛ. 4Okate mabeka nɛ, oyebace te, maheya moyokasa maje mombo.
Ngɛlɛ atanda ijibwe ja Zabatisi
5O sondi ya Elodi ajasa Nkani o Zude, yajasa na we mwa be buwa mwa jinɔ te Zakali, wa lupu ja Abya, wa we mwa bebuwa. Mwaji ajasa mwehito wa ikaka ja Alɔn wa we mwa bebuwa, jinɔ jeji Elizabɛti. 6Bahajɛ baba bajasa hongololo o boho bwa Zambe, bakɔlɔkosɔ obwɛji maheya na mapeko mahajɛ ma Ku wa mini. 7Nde bijasa na bana, bosina te Elizabɛti ajasa ekomba, bajasa te betolubwa.
8Ibwate buya, Zakali abekakasa ehaji eji ya we mwa bebuwa okatwa Elongwɛ ya Zambe, bosina te yajasa ekusi ya lupu jeji ijazaka. 9Ihinjɛcɛ ibonwu ja ango ja bawe ba bebuwa, Zakali abɔnubwɛ ikweyaka o elongwɛ ya Zambe wa Ku itumbaka nguma. 10Lupu jahajɛ ja bɔndɔkɔsɔ bya hɛnjɛ o elɔmɔ ya batumbakasa nguma. 11Okate, ngɛlɛ wa Ku te apwa o boho bwa Zakali ntɛtɛ opɛyi obɔ wa hangwɛ okuna etaka ya batumba nguma. 12Usya Zakali ayɛnɛ ango, ayɛnɛ bohihi, bɔngɔ te bwa banda ango. 13Nde, ngɛlɛ asɔhɔ neji te: «Teka lɔngɔ Zakali, ngwɛnɛ Zambe eyoka membɔndu myɔbɛ, mwaji ɔbɛ Elizabɛti ejiyaka ɔbɛ mwana wa ndomana wa oyocɛcɛ jinɔ te Za. 14Obijaka o ncebo bosina bweji, na bato buce babicebaka bosina bwa ijibwe jeji, 15bosina te abijaka njazi munɛnɛ mwa Ku wa mini. Mwaji wan maku nde maku, ejaka humɔn na Ekokoyi ya Pu aneci o mwɛnyi mwa nyangwɛ. 16Abihuwanka boyaka na bana buce ba lupu ja Izahɛli o boho bwa Zambe Ku ango, 17Ejongaka o boho bwa Zambe na Ekokoyi na tuma ya Eli, ihangwɛcɛ melema mya bahangwɛ na bana, na ibekaka Ku lupu ja hongololo ja esiswa ango.» 18Zakali ahimwa ngɛlɛ te: «Meyebaka te yejaka mombo na? Majetɛ ntolu, na mwaji amɛ etolubwa.» 19Ngɛlɛ te ahujɛ na neji te: «Imɛ Ngabyɛli, matɛmɛ o boho bwa Zambe ijazaka ango, amuloma mɛ isɔhɔkɔ na ɔbɛ na itandaka ɔbɛ itundu ja mbɛ. 20Nde yoji teka bukwɛ mayɔkɔ mamɛ me bekubwɛcɛ o elɔmɔ eji, ɔbɛ obikalaka nkina, moji mini isɔhɔ ngu na usya bemba byɛ byahajɛ bye bekubwɛcɛ.»
21O elɔmɔ yɛ, lupu ja bokakasa Zakali ja yɛnɛ ngambala bosina bwa ango ayimwasa buce o elongwɛ ya Zambe. 22Usya ango apwasa mujasa minɛ na pizo ya isɔhɔkɔ na bango, bayebasa te eyɛnɛ jɔtɔ bya o elongwɛ ya Zambe, asɔhɔkɔsɔ bosimɛcɛ nda nkina.
23Usya Zakali ahijɛsɛ minyan meji ma ehaji, alwa bya itona jeji. 24O nyate elɔmɔ yɛ, Elizabɛti wa mwaji te atombɛ mwɛnyi, ya ango ahɔmɔ bangɔndɛ ba tanyi, na isɔhɔkɔ te: 25«Ngwɛnɛ bɔnhu bwa Ku wa mɛ amubeka mɛ, ayebwa mɛ, na ijɛlɛcɛ mɛ hɔyi o boho bwa bato.»
Itundu ja ijibwe ja Zɛzi
26Usya bangɔndɛ toba bakokasa, Zambe aloma Ngabyɛli wa ngɛlɛ o betafɛlɛ ya Ngalile, ya jinɔ te Nazalɛti. 27Bya eloka ya mwehito ya teka yeba bandoma, wa Zozɛfi asojɛkɛsɛ ajasa moto wa buka bwa Davidi wa Nkani, jinɔ ja eloka ya mwehito mɛnɛ Mali. 28Ngɛlɛ akweya o Elongwɛ eji na isɔhɔkɔ neji te: «Oyemwa Mali, Zambe ebeka ɔbɛ bondonga bunɛnɛ. Ku wa mini ajɛ na nɔbɛ.» 29Mali ayɛnɛ bohihi na mwɛ janga mwa bekana. Ya ango atemanga o katɔ ya lema te: «Mutɛ janga mwa isosaka imɛ nde?» 30Ngɛlɛ te ahuwana bosɔhɔkɔ na neji te: «Teka lɔngɔ Mali bosina te, bondonga bwa Zambe bwaje na nɔbɛ. 31Ngwɛnɛ, otombɛcɛ mwɛnyi, na ijyaka mwana wa ndomana, wa oyocɛcɛ jinɔ te Zɛzi. 32Abijaka moto wa inɛnɛ, bebangaka ango mwana wa Zambe wa nyangwɛ wa iko. Zambe Ku wa mini, ewɛcɛ ango ekozi ya bonɛni ya Davidi wa tata eji. 33Abikɔkɛcɛ ukwa lupu ja Zakɔbi, abikɔkɛcɛ mbɛmbɛyi» 34Mali te asɔhɔ na ngɛlɛ te: «Ya ango mɛnɛ yɛ yebekubwɛcɛ na? Imɛ teka yaba ba ndomana.» 35Ya ngɛlɛ ahungwɛ na neji te: «Ekokoyi ya Pu yehulaka ukwa ɔbɛ, tuma ya Zambe wa nyangwɛ wa iko yekubaka ɔbɛ, na bosina mɛnɛ mwana wa ojiyaka ejaka Pu bebangaka ango, mwana wa Zambe. 36Taka na Elizabɛti wa moto ɔbɛ, na neji aje na mwɛnyi o botolu. Wa babangakasa te ekomba, aje na bangɔdɛ toba, 37bosina te teka emba ya nyeni yeka Zambe.» 38Mali te ahungwɛ te: «Imɛ njazi mwa Ku, iyɔkɔ jɔbɛ ja bekubwɛce na bosina bwamɛ!» Ngɛlɛ te amanya na neji.
Mali alwa itaka Elizabɛti
39O sondi mɛnɛ yɛ, Mali ahula bojongaka kabakaba, ilwaka bya betafɛlɛ yaji o mabete ma njenja mɔngɔ ya Zude. 40Ya ango akweya o elɔngwɛ ya Zakali, asosa Elizabɛti. 41O elɔmɔ ya Elizabɛti ayoka nda Mali asosa ango, mwana te aningana ango o mwɛnyi, Ekokoyi ya Pu yalozɛ ango. 42Ya ango apotanga yoce na isɔhɔkɔ te: «Oje na ipota jayekana bayito bahajɛ, na mwana aji na nɔbɛ o mwɛnyi ajɛ na ipota. 43Imɛ beza? Wa nyangwɛ wa Ku wamɛ aya iyɛnɛcɛ? 44Bosina te o elɔmɔ yomu sosa imɛ, mwana aningana mɛ o mwɛnyi na ncebo. 45Oje o mana, na bosina bwa omubukwɛ te emba ya Ku, atandasa ye bekubwɛcɛ.» 46Usɛ Mali te asɔhɔ te:
«Masomɛ Ku wamɛ na ngwanda amɛ, na lema mwamɛ mwahajɛ.
47Ekokoyi amɛ yajetɛ humɔn na ncebo munɛnɛ,
bosina bwa Zambe yonjamɛ.
48Ayebwa imɛ wa njazi mweji mwa mabiya,
bato ba belɔmɔ byahajɛ bemici sɔhɔ te majete o mana.
49Bosina te Zambe wa tuma ebeka imɛ bemba binɛnɛ,
jinɔ jeji jaje Pu.
50Cɛyi eji yalandanga o menkola na menkola na bato basiswa ango.
51Aya na obɔ eji wa tuma,
na ihangaka bato baji na matemange o melema,
52na ijɛlɛcɛ ba mapizo o bekozi bya bonɛni,
na ibesɛcɛ bato ba mabiya.
53Okate ahowa metende bokumani, na ipepaka bakani na ihunwanaka mabɔ nɛnɛ.
54Ya ango nyamwaka Izahɛli wa njazi mweji,
na bosina bwango aji teka yebijɛ cɛyi eji,
55nda ango atandasa na batata bamini,
na Abalami na ikaka jeji jahajɛ mbɛmbɛyi.»
56Mali abekasa bango na Elizabɛti ice bangɔndɛ bahanto, ya ango ahunwana bya mboka eji.
Ijibwe ja Za batisi
57Usya elɔmɔ ya Elizabɛti ijiyaka yakoka, ajiya te mwana wa ndomana. 58Bana nyangwɛ na yali eji, bayoka te Ku wa mini eyɛnɛ ango cɛyi, ya bango baceba bango ango. 59O buya bwa mwambi, baya ipubɛcɛ mwana saci, bayongasa banga ango te Zakali, wa jinɔ ja hangwɛ. 60Nde nyangwɛ te akwa iyɔkɔ na isɔhɔkɔ te: «Hamama! Bebangaka ango Za.» 61Ya bango basɔhɔ neji te: «O bana ba ikaka jɔbɛ teka moto aji na jinɔ jɛ.» 62Ya bango basimɛ hangwɛ ihakaka nda bebangaka mwana. 63Zakali te ahimwa bango ejali na ikwɛlɛcɛ te «jinɔ jeji be Za.» Bahajɛ te bayecɛ. 64O elɔmɔ mɛnɛ yɛ, honko mwa Zakali te mwa jibwana, elemi yahundwana, na isɔhɔkɔ na iwɛcɛ Zambe kuma. 65Bato bahajɛ na emba ya yekasa yɛ bɔngɔ te bwabanda bana nyangwɛ bango, na bajasa o mabete ma njenja mɔngɔ ya Zude, na itatubaka na bosina bwa beyaya byɛ. 66Bahajɛ bayokakasa byɛ byahajɛ, bakɔlɔkɔsɔ o melema myango, itemangaka na ihimwakasa te: «Wɛ mwana ejakasa na?» Usɛ tuma ya Ku wa mini yajɛ na neji.
Zakali ayemba bondonga bwa Zambe
67Ekokoyi ya Pu yalozɛ Zakali hangwɛ wa mwana, ahula isɔhɔkɔ nda ntɔci te:
68«Masomɛ Ku wamɛ, Zambe wa Izahɛli,
ya ango amuya inyamwaka lupu jeji, na ipokwaka jango.
69Okate eloma mini Yonji munɛnɛ
o buka bwa Davidi wa Nkani wa njazi mweji,
70ndango asɔhɔsɔ sondi ya ka o mehoko mya mentɔci mweji mya Pu.
71Atandasa te abiyonjɛcɛ mini na pala babena mini,
na banjinyɛ mini.
72Okate ahɛlɛ cɛyi eji na batata bamini,
na iyebwaka yonga eji ya Pu.
73Asijɛsɛ meseka na Abalami wa tata wa mini te 74eyojɛcɛ mini na pala banjinyɛ mini,
na ijazaka na neji teka bɔngɔ,
75na ijaka pu na hongololo
o boho bweji minya mahajɛ ma mini ejaka o hehe.»
76Okate Zakali te asɔhɔ te: «Mwana mɛ bebangakasa ɔbɛ ntɔci mwa Zambe wa biko.
Usɛ ojongakasa o boho bwa Ku wa mini na iyebɛcɛ mapeyi meji,
77na ihɛlɛcɛ lupu jeji te eyɛnɛ cɛyi ya mesɛmbɛ myango,
na iyonjɛcɛ bango.
78Lema mwa Zambe wa mini mwaje na cɛyi,
elomaka njazi mweji nda moji mwa yoyi ya iko,
79na iyonjɛcɛ bato baji o epundu na baji oha ekokoyi ya ilɛlɛ,
na ilazɛcɛ mako ma mini o pɛyi ya itabu.»
80Mwana wɛ anɛnɛkɛsɛ na ijelaka o ekokoyi eji. «Ajakasa o masi ma bato teka pwa, ngu na buya bwango apwasa o boho bwa Izahɛli.»
Valið núna:
Luk 1: KOQ
Áherslumerki
Deildu
Afrita
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES