Mataayo 7
7
Ɨmanyizyo ɨzya‑alonje abhanjɨ
(Maalʉko 4:24; Luuka 6:37-38, 41-42)
1Ɨpo ʉYeesu ahayanga ahaga, “Mugandi alonje abhanjɨ huje ʉNgʉlʉbhɨ asahabhalonje namwɨ, 2pɨpo shiila sha muhubhalonga abhanjɨ, sha shɨɨsho ʉNgʉlʉbhɨ wope sha‑ahayihubhalonga namwɨ. Ɨshipimilo sha muhubhapimila abhanjɨ, sha shɨɨsho ʉNgʉlʉbhɨ wope sha‑ahayihubhapimila namwɨ.
3Yeenu ʉhwenya ahakooko ha hali mwi‑iliiso lya wamwenyu, leelo saga ʉsaajila ikooko lya lili mwi‑iliiso lyaho? 4Nantele, ʉbhajiiye wɨlɨ humʼmʉʉzye ʉwamwenyu huje, ‘Wee miya, ɨnzaga ɨhwefwe ahakooko ha hali mwi‑iliiso lyaho,’ hu habhaazyo hɨnɨɨho mwi‑iliiso lyaho muli ikooko? 5Wee nʼgulugulu! Efwa nasʉʉti ikooko lya lili mwi‑iliiso lyaho, ɨpo nkʉ‑ʉnza hwenye shinza na hwefwe ahakooko ha hali mwi‑iliiso lya wamwenyu!
6Mugandi huzipeele ɨmbwa ɨvintu ɨvisangalusu huje zisahabhagalushile na hubhalume amwɨ, awe huziponyezye ɨngʉlʉbhɨ ɨvintu ɨvyɨ nshɨnshɨ huje zisahakhanyanje.”#7:6 Alɨngaane na miiho ga Bhayahuudi, ɨmbwa nɨ ngʉlʉbhɨ vyʉma vyavu. ɄYeesu alɨngaanisya ɨmbwa nɨ ngʉlʉbhɨ na bhantu bha bhali bhaavu, pɨpo bhakhaana ɨNongwa ɨNyinza ɨzya Ngʉlʉbhɨ na‑asinte humʼmwɨtɨshe. Ɨshi, ɨvintu ɨvyɨ nshɨnshɨ Nongwa Nyinza ɨzya Ngʉlʉbhɨ.
Laabhaji, anzaji, nantele iguzyaji hwa Ngʉlʉbhɨ
(Luuka 11:9-13)
7ɄYeesu ahonjela ahaga, “Laabhaji, namwɨ munza hwambɨɨlɨle. Anzaji, namwɨ munza huvyaje. Iguzyaji, namwɨ munza hwigulilwe ʉlyango. 8Ɨnjanjile ɨsho, pɨpo ʉmuntu wowonti wa‑alaabha, ahwambɨɨlɨla, wa‑ahwanza, ahuvyaga, wa‑ahwiguzya, ahwigulilwa.
9Wɨlɨ, weenu mwaliimwɨ, nkashele ʉmwana waakwe ahunʼnaabha ɨntogito, agamʼpeela iwe? 10Awe nkashele ahunʼnaabha ɨnswɨ, agamʼpeela ɨnzoha? 11Poshe amwɨ muli bhɨ mbiibhi, leelo mumɨɨnye hubhapeele abhaana bheenyu ɨvintu ɨvinza. Lyoli ʉDaada weenyu ʉwa hu mwanya anza hubhapeele ɨvintu ɨvinza bhaala bha bhahunʼnaabha.
12Ɨshi, mubhabhombelaje abhantu abhanjɨ nanshi sha musʉngwa huje bhabhabhombelaje amwɨ, pɨpo ɨzyo zyɨ ndajizyo zya Moose nɨ manyizyo zya bhakuwi bha Ngʉlʉbhɨ.”
Atʉʉshe mu wumwɨnɨ ʉwa Ngʉlʉbhɨ
(Luuka 13:24)
13Ɨpo ʉYeesu ahajendeelela ayanje ahaga, “Tʉʉhaji ashilile ʉlyango ʉnʼnyeela. Ɨnjanjile ɨsho, pɨpo ʉlyango ʉgwi‑idala ɨlya‑abhale hu malabha mʼbaaba, ni‑idala ɨlya‑abhale ʉhwo libaaba tee. Nantele, abhantu ɨbho bhashila ʉmwo, bhinji. 14Leelo ʉlyango ʉgwa‑atʉʉshɨle hu wʉʉmi nʼnyeela, ni‑idala ɨlya‑abhale ʉhwo linyeela, nantele abhantu ɨbho bhahulyaganya, bhali bhashe.”
Abhantu bhamanyiha hu njendo zyabho
(Luuka 6:43-44)
15ɄYeesu ahajendeelela ayanje ahaga, “Mubhanje maaso na bhakuwi abhi‑ilenga. Ɨnjanjile ɨsho, pɨpo lwa bhahubhɨnzɨla, bhahwibhɨɨha abhe bhatonsu nanshi ɨngoole. Leelo mu mooyo gaabho bhakhali nanshi ɨmbwalonde. 16Ɨbho munza hubhamanye hu njendo zyabho. Wɨlɨ, abhantu bhatʉngʉla amantongooni agɨ zabiibu mu makwi agɨ mimvwa, awe bhatʉngʉla amantongooni agɨ makʉ mu makwi agɨ mimvwa? Ndaadi! 17Ikwi lyolyonti ɨlinza lihwela amantongooni aminza, leelo ikwi lyolyonti ibhiibhi lihwela amantongooni amabhiibhi. 18Ikwi ɨlinza saga libhajiiye ahwele amantongooni amabhiibhi, nantele ikwi ibhiibhi saga libhajiiye ahwele amantongooni aminza. 19Ikwi lyolyonti lya saga lihwela amantongooni aminza, lidumulwa na‑ataagwe mu mwoto. 20Ɨpo pa munza hubhamanye abhakuwi abhi‑ilenga hu njendo zyabho.”
Saga ɨmbamɨɨnye amwɨ dumu
(Luuka 13:25-27)
21ɄYeesu ahonjela ayanje ahaga, “Saga shila muntu wa‑ayiga, ‘Wee Mwɨnɨ, wee Mwɨnɨ,’ wa‑ahayitʉʉha mu wumwɨnɨ ʉwa hu mwanya, leelo ya yʉʉyo ya‑ahuzibhomba zya zihwanziwa nʉ Daada waanɨ wa‑ali hu mwanya. 22Isiku ɨlya‑alongwe lwa lyahayifiha, abhantu abhinji bhahayihumbʉʉzya bhahayiga, ‘Wee Mwɨnɨ, wee Mwɨnɨ! Wɨlɨ, saga tahakuwaaga, saga tahashɨmbɨzyaga amapepo na‑abhombe amayele#7:22 amayele Bhaazya izwi Mayele hu Ngalulanyo ɨyɨ Mazwi aMajenu hu malishilo wɨ shitaabu ɨshi. aminji hwi‑ikhone lyaho?’ 23Ɨpo nahayihubhabhʉʉzya pa pazelu nahayiga, ‘Saga ɨmbamɨɨnye amwɨ dumu! Epi ɨpa, amwɨ mubhabhomba mbiibhi!’ ”#Bhaazya ɨNsalifyo 6:8.
Ɨshifwani ɨsha bhazenji bhabhɨɨlɨ abhɨ nyumba
(Luuka 6:47-49)
24ɄYeesu ahamala ayanje ahaga, “Ʉmuntu wowonti wa‑ahwʉmvwa amazwi gaanɨ ɨgo na hugabhombele ɨmbombo, abha nanshi ʉmuntu ʉwɨ njeele, ʉyo ahazenjile ɨnyumba yaakwe pa mwanya pi‑ilyalawe. 25Hu habhaazyo ɨmvula lwa yatoonya, amasooho gahamema tee, ɨnkʉngʉ ɨhali yahɨnza na huyibunshile ɨnyumba ɨla. Hwope ɨnyumba ɨla saga yahagwa pa nsi, pɨpo ʉlwalo lwakwe lwahazengwilwe pa mwanya pi‑ilyalawe. 26Leelo ʉmuntu wowonti wa‑ahwʉmvwa amazwi gaanɨ ɨgo, wope saga ahugabhombela ɨmbombo, ʉyo abha nanshi ʉmuntu ʉmʼfwasu ʉyo ahazenjile ɨnyumba yaakwe pa mwanya pa nʼsanga. 27Hu habhaazyo ɨho ɨmvula lwa yatoonya, amasooho gahamema, ɨnkʉngʉ ɨhali yahɨnza na huyibunshile ɨnyumba ɨla, yope yahagwa pa nsi na‑abhuguuhane yonti!” 28Hu habhaazyo ɨho ʉYeesu lwa waamala ayanje amazwi ɨgo, ɨmpʉga ɨla ɨya bhantu yahakhasamala tee hu manyizyo zyakwe. 29Bhahakhasamala tee, pɨpo saga ahamanyiziizye nanshi sha bhahamanyizyaga abhamanyizyi bhaabho abhɨ ndajizyo zya Moose, leelo nanshi ʉmuntu wa‑ali ni‑ikhone.
Valið núna:
Mataayo 7: SBK
Áherslumerki
Deildu
Afrita
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.