Luke 6
6
1Da neħˑheˑniˑya'wă̱ħˑo̱h neħ ne daˑwaˑdyeˑă̱nt' aˑwă̱nˑdaˑdo'gă̱hˑdo̱h joˑno̱nˑdăˑdyeħ ne dekˑnii waˑdo̱ħ'taħ wă̱ˑnĭs'hăˑdeħ ne deˑwa'daˑwă̱'o̱hˑgwaħ, neeħ ne' neħˑhuh, hoˑăh'do̱h heˑgaˑyă̱nt'ˑhwahˑso̱ħ noˑno̱o̱ˑjaħ; da neħ' neh, waaˑdiˑjiħˑjiˑyaħˑkho̱o̱ħ naˑgo̱'iˑo̱ˑnyaˑnih, waˑă̱ˑno̱nˑdek'ho̱o̱ˑniħ gwaħˑhuh, doo'nă̱ħˑnyaˑgăă'nyeˑaaˑdyeħ, noˑno̱o̱ˑjaħ.
2Da neħ' na'di'yaħˑdaˑdooˑgă̱ă̱h' ne Pharˑiˑsees ho̱ˑwă̱ nă̱'o̱hˑseeh, A'naeh heˑgoˑwaah', neħˑhuh' neˑswaˑyeeħ', ne tă̱ħ'ă̱h deħˑgaˑyaˑnes'hăħˑgĕh no̱ˑyeˑyeeħ' naˑwĕnˑdaˑdo'gă̱hˑdo̱h wă̱ˑnĭs'hăˑdeeˑnyo̱o̱ħ'?
3Neħ ne' dechˑhaˑgoˑwă̱'no̱ħˑsăăˑgwă̱h ne Jeˑsus', haˑwă̱ă̱, Tă̱ħ'ă̱h gă̱h deħˑswaˑwă̱ˑno̱h'saaħ', nă̱kˑhuh'sho̱ niˑyo'iˑwaħ, he'niˑoˑdyeˑăsˑo̱h ne Daˑvid, noˑnă̱h' shaˑo'do̱sˑweħ'dă̱h ne'aˑo̱hˑhwa̱ħ neħ' kuh, ne' shaħˑgaat' hă̱ˑneħs'gwaħ;
4Heˑniˑya'wă̱ħˑo̱h he'neħˑhuh heˑo'yo̱sˑo̱h hoˑno̱h'soot Na'wĕnˑniˑyòħ, doˑgă̱s' deˑoh'gwă̱h noˑăhˑgwaħ ne' yo̱ntˑchiħˑwăăhˑgwaħ, hoˑdek'ho̱ˑnyas'o̱h gwaħˑhuh, haˑgo̱ˑyaˑwiih' ha'eħˑgwah ne' shaħˑgaat' hă̱ă̱ˑneħ', ne tă̱ħ'ă̱h deħ'gaˑyaˑnes'hăħˑgĕh naaˑyeek', neħ' sħo̱ naˑdi'yaħˑdo̱ntˑhwʋs' hoˑno̱h'ho̱ħˑge'ah?
5Neħ' kuh naˑgo̱ˑyă̱ˑo̱h'seeh, Neħ No̱ˑwa̱'wak no̱ˑgweh', Haˑyaħ'daˑgwĕnˑniˑyòħ' ha'eħˑgwah naˑwĕnˑdaˑdo'gă̱hˑdo̱h.
6Da' neħˑhuh' heˑya'wă̱ħˑo̱h, noˑnaeħ oˑyaħ' jaˑwĕnˑdaˑdo'gă̱hˑdo̱h' neħˑhuh ne'waħ heˑo'yo̱sˑo̱h' hă̱ˑno̱nt'gă̱ˑnis'atˑhaħ, wa'diˑo̱ˑnyă̱ħ' kuh; da neħ' neh', hă̱ħˑdyo̱ħ' neħˑhuh' no̱o̱'gweh, hosˑoh'datˑhă̱s'o̱h naˑyă̱n'nehˑgo̱h.
7Oˑnă̱h' ne shaˑgo'diiˑyaˑdo̱ˑnih', kuh ne Pharˑiˑsees ho̱ˑwa̱t'gaˑă̱'o̱sˑo̱h, a'diħ'gwah ă̱chˑhaˑgoˑjă̱ħt' naˑwĕnˑdaˑdo'gă̱hˑdo̱h wă̱ˑnĭs'hăˑdeħ; neħ' neh, a'aˑdiˑwas'hă̱ˑwiħ' iˑgă̱ă̱ na'o̱ˑwa̱'iˑwa'yă̱hˑdʋk.
8Neħ' dih neˑthoˑno̱h'do̱ħ he'niˑă̱ˑnă̱nˑno̱h'doˑnyo̱ħ'syòħˑdă̱ă̱h, neħ naˑwă̱'o̱hˑseeh no̱'gweh nòsˑoh'daˑyes'haħˑo̱h, Desˑdaħt', haħˑde'wahˑsă̱'no̱hˑjih' desˑdaħt. Oˑnă̱h' detˑho'daħˑo̱h neħˑhuh' kuh, hoˑă̱ħˑheħˑo̱h.
9Oˑnă̱h' ne Jeˑsus haˑgo̱ˑyă̱ˑo̱h'seeh, Joˑi'waat ă̱ˑgwa'o̱nˑdo̱o̱ħ; Neħ'gă̱h ne gaˑya'nesˑhăħ'gĕh naˑwĕnˑdaˑdo'gă̱hˑdo̱h wă̱ˑnis'hăˑdeeˑnyo̱ħ, ne wiˑyòòh' nă̱ˑyo̱nˑdyeeħ, o̱ˑgii, neħ ne' waˑeetˑgă̱ħ nă̱ˑyo̱nˑdyeeħ; ă̱ˑja'go̱ˑheet ne' gă̱ˑeeˑyo̱s, o̱ˑgii', ă̱ˑye'iˑwah'do̱ħt?
10Neħ neh, deˑot'gahˑdo̱o̱s'o̱h heˑaˑgo̱ˑyat'gatˑhwaħ'o̱h gaˑgweˑgo̱h', haˑwă̱'o̱hˑseeh no̱'gweh, Daˑsă̱ˑnisˑoh'daˑgwa'ihˑsih. Neħˑhuh' niˑoˑyeˑă̱h; Neħ' ne saˑwaaˑdo̱ħ naasˑoh'daħ, shaħˑdo̱ˑsaˑyaaˑwă̱h' naeh' heˑniˑyòħ'dă̱ă̱h ne' sgat.
11Neħ' neh, daˑga'no̱hˑheħt haˑdi'yaħˑdaaˑdeħ ne gaˑno̱ħ'kwă̱sˑhăħ; neħ' kuh, ne deˑo'ditˑhăăs'o̱h, heˑna̱'o̱ˑwa̱ˑyeeħ' ne Jeˑsus.
12Neħ' neh, nă̱ niˑya'wă̱ħˑo̱h ne' neħ dwă̱ˑnĭs'hăˑdeˑnyo̱k, hohˑdă̱n'dyo̱sˑo̱h neħˑhuh' heˑaˑweeˑno̱o̱h' he'dyoˑno̱nˑdaˑdeħ waˑdă̱ˑno̱'yă̱ˑno̱ħ; neħ neh, ohˑso̱nˑdaˑgweeˑgo̱h' hoˑdă̱ˑno̱ˑyă̱ă̱ˑniih' Naˑwĕnˑniˑyòħ.
13Neħˑhuh dih', noˑnă̱h' saˑwă̱'nĭsˑhăăˑdă̱h heˑa'go̱ˑno̱'go̱sˑo̱h' na'go̱'iˑo̱ˑnyaˑnih' haˑyaħ'daˑdeħ; neħ heˑniˑă̱ˑno̱nˑdiih' wʋsˑhă̱ă̱' dekˑnii' sgaˑeħ ne' waˑgo̱ˑyaħ'dăăˑgòħ; daˑneħ ne' neħ heˑno̱o̱'go̱hˑsă̱'nòħˑdă̱s, ho̱ˑwa̱n'dihˑhaħˑo̱h;
14Siˑmon, (neħ' naeh ne' Peˑter naˑoh'să̱ˑnoħˑdă̱s;) Andˑrew naeh, ne' deˑya'dă̱ă̱ˑno̱nˑdeeħ; James kuh, neħ' kuh, John; Phiˑlip, Barˑthoˑloˑmew gwaħˑhuh;
15Matˑthew, Thoˑmas kuh; James gwaħˑhuh, hoˑaaˑwak' ne' Alˑpheˑus, Siˑmon kuh, ne Zeˑloˑtes ho̱ˑwa̱'yasˑthaħ;
16Neħ' kuh ne Juˑdas, ne' deˑya'dă̱ă̱ˑno̱nˑdeeħ' ne James, kuh ne Juˑdas Isˑcaˑriot, neh, hoˑdyaħ'datˑgaħ'wă̱h.
17Neħˑhuh' shaˑyaħ'dăăˑdyeħ' detˑhoˑno̱nˑdyaħ'dă̱hˑdo̱h, neħˑhuh' shoˑdi'ă̱ħˑheħ'o̱h he'o̱ˑweh' shaħˑde'yo̱ˑă̱nˑjaˑdeħ; neħ niˑoˑdyòhˑgwaħ naˑgo̱'iˑo̱ˑnyaˑnih', gă̱nˑdyòh'goˑwaaˑnă̱h' gwaħˑhuh no̱o̱ˑgweh', thoˑdiˑyaˑgă̱ħ'o̱h thiˑyoˑă̱nˑjaˑgweˑgo̱h', ne Juˑdea, Jeˑruˑsaˑlem kuh, gaˑnyòˑdăăk'daˑdyeħ', gwaħˑhuh', heˑno̱ħ'deˑyòˑdo̱'ă̱nˑjoħk'do̱h ne Tyre, Siˑdon kuh, neħ no̱ˑwa̱n'diˑwat'ho̱nˑdaatˑheħ, neħ' kuh no̱'saˑo̱ˑwa̱nˑdiiˑjă̱ħt' noˑdih'hăˑyă̱nˑdo̱h;
18Neħ' kuh haaˑdi'yaħˑdaaˑdeħ' notˑhwa'isˑhăătˑgiħs' iˑgă̱ă̱' dyoˑi'waħ, goˑwĕnˑno̱ˑi'neħs; neħ' ne' sho̱ˑwa̱nˑdiˑjă̱ħ'do̱h.
19Da neħ' ne gă̱nˑdyòh'gwaˑgweˑgo̱h' waˑă̱'nihˑsaak' naˑyaˑgo'no̱kˑdoˑdaħs' iˑgă̱ă̱, naaħˑda'o̱ˑwa̱ˑyă̱ˑo̱ˑnyo̱o̱ħ, neħˑsă̱ħˑă̱h nòħ'gaˑyaˑgă̱ħt' haaˑyaħ'daˑdeħ, ne jaˑgo'jă̱ħˑthaħ, gaħˑhasˑdesˑhăăt, gaˑgweeˑgo̱h' kuh, sa'oˑdiˑjă̱ħt.
20Neħ ne' deˑot'gaah'gwaħˑdo̱h' haˑgo̱ˑyatˑgat'hwaħˑo̱h' naˑgo̱ˑiˑo̱ˑnyaˑnih, haˑwă̱ă̱', Swă̱nˑdă̱ă̱ˑo̱h niis' ne swă̱nˑdă̱ă̱s, neħ să̱ħˑă̱h niis' swaaˑwă̱h' heh, thă̱ˑno̱h'do̱ˑo̱ħ'shăˑgwĕnˑniˑyòħ Na'wĕnˑniˑyòħ.
21Swă̱nˑdă̱ă̱ˑo̱h' niis' ne swaˑdo̱s'weħˑdaaˑnih nă̱ˑgă̱ă̱ ne'waħ, neħ să̱ħ'ă̱h ne'tgaaˑgo̱nt' ă̱hˑswah'daħt. Swă̱nˑdă̱ă̱ˑo̱h' neh' swaˑdă̱ă̱ˑno̱ħs deˑswa'gahˑsă'nisˑħă̱ħ'syo̱h nă̱ˑgă̱ă̱ ne'waħ, neħ să̱ħ'ă̱h ne' tgaˑgo̱nt' ă̱'swaˑyo̱nˑdiħ.
22Swă̱nˑdă̱ă̱ˑo̱h' niis, noˑnă̱h no̱o̱ˑgweh' ă̱ˑyech'hisˑswa'ă̱h, kuh noˑnă̱h' wakˑah' ă̱ˑyech'hiˑyaħ'daˑis he'niˑoˑniˑdyòh'gwaˑdeħ, ă̱ˑyech'hiˑno̱h'go̱nˑdă̱ħ' gwaħ'huh; neħ' kuh ne deħˑgai'waˑgwĕnˑniˑyòħ ă̱ˑa̱n'diħˑdaaħˑes'daˑno̱o̱ħ gwaħˑhuh ă̱ˑyech'hihˑsă̱ˑno̱ˑgăăt, neħ' ă̱ˑdyò'iˑwaħ'gă̱ˑa̱a̱k haaˑyaħ'daˑdeħ Noˑwa̱'wa̱k noˑgweh'.
23Swaˑdo̱h'ho̱ˑo̱k' dih ne' neħ dwă̱ˑnĭs'hăˑdeħ, neħ' neh, dă̱hˑswă̱'no̱ħˑsgwah'gwaˑno̱o̱ħ he'nă̱ˑswaˑdo̱hˑho̱'ă̱ħ; neħ să̱ħ'ă̱h ne' swatˑga'ă̱ˑo̱h, oˑi''oˑwaaˑnă̱h ne'huh, ă̱ˑdi'swatˑga'nyaħ'gă̱ħ ne gă̱ˑo̱'yaħˑgĕh; neħˑhuh' să̱ħ'ă̱h sho̱ ha'eħ'gwah no̱ˑwa̱n'diħˑnis'ho̱ħˑgă̱ˑa̱a̱ħ, nitˑho̱ˑwa̱nˑdi'yehˑhak no'diˑdoˑgă̱s'daˑni'ak.
24Neħ' dih ne gaˑnooˑo̱ħ' heˑswaˑyaħ'daˑdeħ ne' swatˑgaˑno̱o̱ˑniih? neħ să̱ħ'ă̱h naeh niis' neh, oˑnă̱h swaħˑniˑgo̱ˑi'yòħˑo̱h.
25Gaˑnooˑo̱ħ' heˑswaˑyaħ'daˑdeħ, ne' swahˑdaħ'o̱h, neħ să̱ħ'ă̱h ne' tgaˑgo̱nt' ă̱ˑswa'do̱sˑweħ'dă̱ħ. Gaˑnooˑo̱ħ' heˑswaˑyaħ'daˑdeħ ne' swasˑgaatˑgwă̱s nă̱ˑgă̱ă̱ ne'waħ, neħ să̱ħ'ă̱h ne' tgaˑgo̱nt ă̱ˑswaħ'ˑniˑgo̱ˑeˑtgă̱ħt, dă̱ˑswah'să̱ntˑhoħ.
26Gaˑnooˑo̱ħ' [heˑswaˑyaħ'daˑdeħ,] noˑnă̱h', [gaˑgweeˑgo̱h'] no̱o̱ˑgweh' wiˑyòòh' ă̱ˑyes'nyehˑdʋk' heh' swaˑyaħ'daˑdeħ! neħˑhuh' să̱ħ'ă̱h sho̱ ha'eħˑgwah nitˑho̱ˑwa̱nˑdi'yehˑhak no̱ˑwa̱nˑdiħˑnis'ho̱ħˑgă̱ˑa̱a̱ħ haˑdi'yaħˑdaaˑdeħ' ne ya'gă̱ħˑo̱h hoˑdiˑdoˑgă̱s'daˑni'ak tă̱ħˑă̱h' naeh deħˑdooˑgă̱s.
27Neħ gwaa' niiħ, nòħˑgwă̱'a̱s, nă̱ˑgă̱ă̱ ne' swaˑo̱o̱kˑhaħ, Echˑhiˑno'o̱hˑgwaak nechˑhiħ'niˑgo̱ˑă̱sˑswa'ă̱s; wiˑyòòh' niˑyech'hiˑyaˑdyeˑăħ'seˑa̱a̱k nechˑhis'swaˑă̱s.
28Echˑhi'yaˑdo̱ˑeˑsyo̱h'gwaħˑse'aak naˑdăħˑswiˑyòsˑhăħ haˑdi'yaħˑdaaˑdeħ ne dyòtˑgo̱nt' hoˑno̱nˑdo̱'eˑsyo̱hˑgo̱h naˑdăħˑswaˑet'gă̱sˑhăħ heˑswaˑyaħ'daˑdeħ.
29Neħ' kuh, haaˑyaħˑdaˑdeħ neh, saˑdah'hosˑgwaħ'gĕh ă̱ˑya'go̱ˑeek hesˑdaaˑdă̱h' ha'eħˑgwah ne sgaat; neħ' kuh haaˑyaħ'daˑdeħ, nă̱ă̱ˑyah'gwaħ neh, sahˑgwaasˑthaħ', să̱ă̱ˑno̱h' ha'eħˑgwah ă̱ˑes'no̱sˑdaaˑdă̱h' nă̱ă̱ˑyah'gwaħ ne saˑdyaħ'daˑwiħ'shăħ.
30Haħˑdeˑyo̱ˑgweħ'daˑgee' sheˑyo̱h, nă̱ˑyeˑsaˑdo̱ˑeˑsyo̱h'gwă̱ħ; neħ' kuh haˑyaħ'daˑdeħ ne dă̱ă̱ˑyaħˑnyòhˑseeħ ne' sasˑhă̱ˑno̱ˑnyas'hăħ, să̱ˑno̱h ne' neħ, ă̱chˑha'do̱ˑeeˑsyo̱k.
31Neħ' kuh, he'no̱ħˑdeˑdiˑswa'do̱ˑă̱nˑjoˑnih' na'oˑdiˑye'a̱a̱k no̱o̱ˑgweh' heh swaˑyaħ'daˑdeħ, neħˑhuh' kuh nă̱ă̱ħ' iis no̱ħˑswaˑye'a̱a̱k haaˑdi'yaħˑdaaˑdeħ.
32Neħ să̱ħ'ă̱h giħˑshă̱h nă̱s'heˑnoˑo̱hˑgwaak', haˑdi'yaħˑdaaˑdeħ, no̱o̱'saˑnoˑo̱hˑgwaħ, aˑnaħˑot' naeh ne' neħ deˑyeˑsaˑno̱o̱'nyo̱h'gwaħ'? neħˑhuh' să̱ħ'ă̱h sho̱ ha'eħˑgwah niˑyoħ'dă̱ă̱h noˑdiiˑwa'neħˑaaˑgo̱h, shaˑgoˑdiˑno'o̱hˑgwaħ, no̱'wa̱nˑdiˑno'o̱hˑgwaħ.
33Neħ giħˑshă̱h' kuh, nă̱ˑyech'hiˑyaħ'daˑgehˑhă̱ˑa̱a̱k, nă̱ă̱ħ' iis nechˑhi'yaħˑda'gehˑhă̱h, aˑna̱ħˑot' ne' neħ deˑyech'hiˑno̱ˑnyo̱h'gwaħ? neħˑhuh' să̱ħ'ă̱h sho̱ ha'eħˑgwah' niˑaˑdiˑyeeˑhaħ' noˑdiiˑwa'neħˑaaˑgo̱h.
34Neħ giħˑshă̱h' kuh nă̱ˑyech'hiˑyaˑdwă̱ˑdeh'daˑni'aak, dă̱ˑjiˑswaˑdă̱ˑno̱nˑdaħk' kuh haˑdi'yaħˑdaaˑdeħ' no̱ˑseˑswaˑyeˑno̱o̱ħ, aˑnaħˑot ne' neħ deˑyech'hiˑno̱o̱ˑnyo̱h'gwaħ'? haˑeħˑgwahˑsă̱ħ'ă̱h hoˑdiˑwa'neħˑaaˑgo̱h', shaˑgoˑno̱nˑdwă̱n'dehˑdaaˑnih', noˑdiiˑwa'neħˑaaˑgo̱h shaˑdiħ'niˑgo̱'ă̱ă̱ħ' kuh ne' neħˑhuh' nă̱sˑhaˑdiˑyeˑna̱a̱ħ.
35Neħˑgwaa' nech'hiˑnoˑo̱hˑgwaak' nechˑhiħˑniˑgo̱ˑă̱ˑswa'ă̱s, echˑhi'yaħˑdaˑgeˑhă̱'a̱a̱k, echˑhi'yatˑhaħ'do̱ˑni'aak kuh, să̱ˑno̱h' dă̱ˑswaˑdă̱ˑno̱nˑdaħk naaħˑgwĭs'dă̱ħ o̱o̱'seˑswaˑyeˑno̱o̱ħ; neħˑhuh' nă̱ntˑgaˑyeˑăħ'dʋk oˑiˑoˑwaˑnă̱h ă̱ˑswat'gaˑnyaħˑgă̱ħ, neħ' kuh, ă̱sˑhok'saħˑdaħ'sho̱ħˑgă̱'a̱a̱k neh si'gwaa He'niˑeeħˑtgă̱h; neħ să̱ħ'ă̱h ne' shaˑgoˑdă̱ˑă̱s' ne' daħˑdeˑyaˑgoˑdă̱ˑno̱'o̱ħ, kuh neh, yaˑgo̱'gweħˑda'etˑgă̱ħ.
36Neħ' dih, dyoˑi'waħˑgă̱'a̱a̱k swaˑdaˑniˑdă̱'o̱ˑa̱a̱k, hoo'daˑniˑdă̱ă̱ˑo̱h' ha'eħˑgwah ne' Sheˑswaħ'nih.
37Să̱ˑno̱h' dă̱ˑyech'hiˑyaħˑdoˑweet; tă̱ħˑă̱h kuh, nă̱ă̱ħ' iis, taħˑdaa'yechˑhi'yaħˑdoˑweet; să̱ˑno̱h' neeħ, ă̱ˑyechˑhiˑwaˑă̱ħ'hehˑdă̱h naˑyo̱nˑdat'heˑwat, tă̱ħˑă̱h kuh nă̱ă̱h' iis taˑyechˑhiiˑwaˑă̱ħ'hehˑdă̱h naˑyechˑhiˑeˑwat; deˑjiˑswaˑi'waħˑsă'gwahˑseek, dă̱ˑjechˑhii'waħˑsă'gwahˑse'aak kuh nă̱ă̱ħ iis.
38Swaˑda'wihˑseek, ă̱ˑjechˑhiˑya'wihˑseek kuh nă̱ă̱ħ' iis ne' huh; ă̱ˑga'no̱hˑho̱'o̱o̱k, ne yo̱nˑdă̱'no̱ħˑgeˑăhˑdah'gwaħ, ehˑdaħ'gĕh kuh hă̱ˑgaaˑwih'do̱ˑo̱o̱k, ă̱ˑyo̱n'daħˑdo̱'o̱o̱k ă̱ˑwa̱nˑdă̱nˑdo'eek, dă̱ˑwa̱nˑdaˑwă̱nt'ho̱'nyoˑo̱o̱k kuh, ne' swaˑnyas'daˑgo̱o̱ hă̱sˑhă̱'no̱hˑsă̱nt no̱ˑgweh'. Neħ să̱ħ'ă̱h shaħˑgaat' nă̱ˑyech'hiˑyaˑdă̱ˑno̱ħ'geˑăh'dahˑgwă̱ħ, kuh nă̱ă̱ħ' iis ă̱ˑjechˑhiˑyaˑdă̱ˑno̱ħˑgeˑăh'dahˑgwă̱ħ.
39Oˑnă̱h' neeħ, ne deˑgaˑyă̱ˑo̱nˑdăăh'gwaħˑshăħ haˑgo̱s'nyehˑdah'gwaˑnii; Hoˑgweeˑnyo̱o̱ˑgă̱h' ne deˑa'gahˑgweˑgo̱h, ă̱ˑo'nă̱chˑhiiħ ne deˑa'gahˑgweˑgo̱h? tă̱ħ'ă̱h gă̱h deˑiˑgweˑgo̱h' oˑyaˑdaˑgo̱o̱h' thaħˑda'iˑyaħ'dă̱ħt?
40Tă̱ħˑă̱h waeh naˑde'yă̱sˑthaħ deˑo'ăhˑdaaˑniih' naˑdyă̱s'daˑnih; neħ gwaa' naaħ'deˑyo̱ˑgweħ'daˑgee, nă̱nˑdyòsˑahˑdo̱'o̱o̱k ă̱ˑo'yă̱ħˑheħˑo̱ˑo̱o̱k', shaħˑdă̱ˑi'yaħ'daˑdă̱h' waˑeh' oˑnă̱h' naaˑdyă̱s'daˑnih.
41A dih na'eh, heh' seeˑgă̱ă̱h' ne niˑwaħ'aah nochˑhi'no̱sˑgăħ hoˑgah'dahˑgwă̱h ne deˑja'dă̱ˑno̱nˑdeeħ', tă̱ħˑă̱h' naeh, deħˑseˑgaħˑă̱'yo̱ˑo̱ħ niis, ne deˑgă̱ˑo̱nˑda'o̱h neh seˑgaaħ'gĕh?
42Neħ giħˑshă̱h, neh, a no̱o̱ˑyaˑwă̱h' aah'seˑgweˑniħ a'ehˑsă̱'o̱s ne deˑja'dă̱ă̱ˑno̱nˑdeeħ, Deˑdya'dă̱ˑno̱nˑdeeħ, do nyòħ' sgoˑgòh nochˑhi'no̱sˑgăħ niˑyòħ neh seˑgaaħ'gĕh, heˑnă̱ˑyo̱'nisˑheħt, niis ă̱ˑgă̱'a̱a̱k deħˑse'gaħˑă̱'yo̱ˑo̱ħ heh, deˑgă̱ˑo̱nˑda'o̱h neh seˑgaaħ'gĕh? Iis ne' desˑniˑgo̱ˑă̱ħ'seeħ, oˑyaħ' satˑgo̱hˑso̱nˑdah'go̱h, neħ' daˑsaˑdyeeˑă̱nt' ne saˑsooˑgòh' ne' detˑgă̱ˑo̱nˑda'o̱h neh seˑga'go̱o̱h, oˑnă̱h wa'eeh ă̱chsˑdok'haħˑheħt tisˑgă̱ă̱ˑno̱ħ tă̱hˑseeˑgă̱ħ' nă̱ch'hoˑgòħ nochˑhi'no̱sˑgăħ hoˑgah'dahˑgwă̱h' ne deˑja'dă̱ˑno̱nˑdeeħ.
43Neħ waeh ne tăħ'ă̱h deħˑgă̱'o̱nˑdiˑyòòh' neh oˑya'etˑgă̱ħ wa'yo̱nˑtaħ; neħ gwaˑhuh' neh tă̱ħˑă̱h deħˑgă̱ˑo̱nˑda'etˑgă̱ħ no'yiˑyòòh waˑyo̱nˑtaħ.
44Neħˑhuh să̱ħ'ă̱h niˑyòˑyă̱nˑdes'dahˑgo̱h' heˑniˑgă̱ˑo̱nˑdoħ'dă̱ă̱h naaħ'deˑgă̱ˑo̱nˑdaˑgee, heˑwaˑdaa'yo̱ˑnih; neħ' waˑeh ne tă̱ħ'ă̱h no̱ˑgweh', neħˑhuh' deˑaˑdiˑniˑo̱nˑdaaˑgwʋs ne figs, heh oˑiħkˑdòòt neh aˑwe'oˑeek, neħ giħˑshă̱h noˑnyo̱'gwiħˑsăħ, a'aˑdiˑniˑo̱nˑdaˑgwah'seek he'o̱ˑweh' oˑiħk'duˑyă̱ħ' notˑgăăs'hăħ.
45Neħ no̱ˑgweħ'diˑyòòh no̱'gweh, neħˑhuh, heh thaˑwĕn'nyahˑsaat he'o̱ˑweh' thòhˑsă̱ˑno̱ˑniih ne wiˑyòòh, thaˑya'gă̱hˑdah'gwaħ neˑwiˑyòòh; da oˑnă̱h' neh, ho̱ˑgweħ'daˑeetˑgă̱ħ no̱'gweh, he'o̱ˑweh' thohˑsă̱ˑno̱ˑniih' neˑwa'eetˑgă̱ħ heh thaˑwĕn'nyahˑsaat, kuh' naeh thaˑya'gă̱hˑdah'gwaħ ne' waˑeetˑgă̱ħ; neħ să̱ħ'ă̱h heˑniˑdyòˑdo̱h'ho̱nˑdo̱ħ' gă̱ă̱s heˑthaˑwĕn'nyahˑsaat, neħˑhuh' oˑwă̱ă̱ˑno̱ħ heˑwa'do̱ˑo̱ħ heˑthahˑsa'gaˑă̱nt.
46Neħ' kuh neh, aˑnaˑeh' heh sgwaˑwă̱ˑnă̱ă̱ħs', swaˑdo̱h, Syaħˑdaˑgwĕnˑniˑyòħ', Syaħˑdaˑgwĕnˑniˑyòħ, tă̱ħˑă̱h' naˑeh' neħ deħˑswa'diiˑwahˑdă̱nˑdyaħ'do̱h ne no̱ħˑoˑiˑoħ'dă̱ħˑsho̱ħ' ne' gaaˑdo̱h.
47Neħ neh, so̱'diħˑgwa'naħˑot ăˑa̱'gyaħˑdoˑwă̱ħt, ă̱ˑot'ho̱nˑdeek' kuh nă̱ˑga'do̱o̱ˑno̱o̱ħ, neħˑhuh' kuh nă̱ˑa̱a̱ˑyeeħ, ă̱ˑgyo̱'wa̱tˑhas' ne' neħ, ne' desˑhyaˑdyeˑă̱h.
48Neħ' desˑhyaˑdyeˑă̱h' no̱o̱'gweh noohˑno̱h'so̱ˑnyas'o̱h, neħ noˑya'desˑdo̱h, gasˑdă̱ă̱ħˑgĕh' kuh thohˑsa'wahˑgo̱h heh waa'no̱hsaˑgă̱ħˑsăħ; da neħ noˑnă̱h' daˑwă̱ă̱'noˑdo̱o̱ħ, neħ nòhˑhne'gahˑdă̱n'dyo̱ˑo̱nˑdyeħ oħˑhaasˑdeħ neħˑhuh' deˑyaˑoˑyă̱h'do̱h, heh gaˑno̱h'soot, tă̱ħˑă̱h' deħˑoˑgweˑnyo̱s'o̱o̱h ne daaˑgaˑno̱h'saˑniiħˑeek, neħ gai'o̱ˑnihˑheh osˑdă̱ă̱ħˑgĕh tgaˑgă̱ħ'seeħ.
49Neħ gwaa' haˑyaħ'daˑdeħ ne waa'o̱o̱k tă̱ħˑă̱h' naeh neħˑhuh' deˑoˑyeˑă̱ă̱ħ, neħ' naeh desˑhyaˑdyeˑă̱h' no̱'gweh, tă̱ħˑă̱h' naeh deħˑthaħ'gwĭsˑdă̱ħ deħtˑga'gă̱ħˑseeħ, yoˑă̱nˑjaħˑgĕh' hoˑno̱h'soˑdʋs'o̱h, dyoˑdeħ'hasˑdo̱s'o̱h neħˑhuh' oˑneˑgaˑyă̱h'do̱h noˑnă̱h' ohˑhne'gahˑdă̱n'dyo̱ˑo̱nˑdyeħ, neħ ne' waħˑoˑgo̱nˑdaaˑdyeħ' oħˑgaħ'hnyeˑnă̱ħt, neħ kuh noˑgă̱'isˑdo̱h doˑgă̱s oˑi'oˑwaaˑnă̱h he'no̱ħˑo̱o̱ˑwă̱h' shaħˑga'no̱hˑsah'do̱ħ.
Valið núna:
Luke 6: SEE
Áherslumerki
Deildu
Afrita
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.