मति 9
9
येसु गाइल्हि खोअ्काहेङ एल्पाहि
(मर्कु 2:1-12; लुक 5:17-26)
1येसु एनोङ नाउता धोल्तेङ काम्भेको ओदोइ पार हानिहि, कालाउ वा ताइको सहर भारि थुकाहि। 2द्यामि द्याङगेलाइ एमि गाइल्हि खोअ्का कालाउ सिधाउता दोङ थाला जेङका द्याङहेङ येसुकोता चुमाहि। येसु ओबालाइको खाङधुरि ताइ ह्रुता तिङतेङ उङको गाइल्हि खोअ्काहेङ दोअ्हि, ओइ चान, नाङको पापगेलाइ गोताङ स्यामा जेङहोइ।
3कालाउ मोसाको व्यवस्था धिरपाका द्याङगेलाइ आधिमि ता-ताइमिता दोअ्हि, “याते परमेस्वरहेङ मन्दा माताका काथा हि।”
4येसु ओबालाइको मनको बिचार बुझिहि कालाउ दोअ्हि, “हाइ पालि नेलाइ ताइको हृदयता मारेम्का बिचार पासुखेना।” 5एला हाइ दोअ्लि सोबाइयाङ कुनु, नाङको पाप पाका स्यामा जेङहोइ दोअ्लि ना इतासो, ल्हो कालाउ तेअ् दोअ्लि? 6कालाउ का चाहिखा, कि नेलाइ गिसु, कि का द्याङको चानहेङ प्रिथिबिता द्याङगेलाइको पाप स्यामा पालि खाबारा हि। कालाउ न्हुसो वा गाइल्हि खोअ्काहेङ दोअ्हि, का नासेहेङ दोअ्खा “नाअ् ल्हो, कालाउ नाङको धोक्रा चुम्तेङ सिता हाने।” 7कालाउ वा ल्होतेङ, ताइको साअ् भारि हानेहि। 8जेलाउ द्याङगेलाइ इङको तिङहि, कालाउ ओबालाइ थिचोङहि, कालाउ द्याङगेलाइ इसिका भारबुसाइ पाका परमेस्वरको महिमा पाहि।
येसु मतिहेङ काइका
(मर्कु 2:13-17; लुक 5:27-32)
9जेलाउ येसु हानिकाताङ पालाउ एमि मति मिङ हिका द्याङहेङ दुसुहि, मति पोत ल्होपाका थामेता योम्तेङ हिघाहि। येसु वासेहेङ दोअ्हि, “का दोफा लोसु कालाउ काङको चात्या जेङसु, कालाउ मति ल्होहि ताइको काम लाअ्तेङ येसुको चात्या जेङहि।”
10आले दिना न्हुसो येसु कालाउ वाको चात्या मतिको साअ्ता चाघाखे। एन्सालाउ हेन्जा पोत ल्होपाका द्याङगेलाइ कालाउ जेदोङ गेलाइहेङ पापि दोअ्तेङ गिघाहि, इम्बालाइ बुङ वाको दोफा चाघाखे। 11येसु उङको आरु द्याङगेलाइ दोफाङ चाकाताङ पाका फारिसि दोअ्का समुहगेलाइ तिङहि, कालाउ येसुको चात्यागेलाइहेङ हिअ्हि, “हाइ पालि गुरु ज्यु नाअ् इन्सिका पोत ल्होपाका कालाउ पापि द्याङगेलाइ दोफा योम्तेङ चाखेना?”
12इदोइ काथा हिङतेङ येसु इम्बालाइहेङ दोअ्हि, जेदोङ द्याङगेलाइ निरोगि हि ओबालाइहेङ ओसेरे पैति मागोइखे, कालाउकि जाइ रोगाइका द्याङगेलाइहेङ खिनिङ गोइखे। 13का नेलाइहेङ एनोङ काथा दोअ्ताङका हाने कालाउ या दोअ्का हाइ कुनु धिरसु। का बलि माको, का ते द्याङको दायाका भोखा, इसिकाङ का बुङ पापिगेलाइहेङ बान्चिपालि लोघा वासेहेङ माको जाइ द्याङ ताइमिहेङ धर्मि सम्झिखे।
बारिका को ह्रुकाको बारेता हिअ्का
(मर्कु 2:18-22; लुक 5:33-39)
14जेलाउ युहान्नाको चात्यागेलाइ येसुकोता लोहि, ओबालाइ येसुहेङ दोअ्हि। केलाइ कालाउ फारिसिगेलाइ हेन्जा जोसो बारिन्हाखे, “कालाउ हाइ पालि नाङको चात्यागेलाइ माबारिखे?”
15येसु इम्बालाइहेङ दोअ्हि, बिहुको बेला जाइ दारादोफा हिखे, वाको मन मातुखे, जेलाउ वाको बेला लोखे एन्सालाउ ओबालाइसो दारा लाअ्न्हावा कालाउ ओबालाइको मन तुखे, कालाउ इम्बालाइ बारिखे।
16“हिदोइ बुङ द्याङ पुरना धाबाता नावा धाबा मातालाइयावा, माकुनुते पुरना धाबा आरोङ थेअ्तेङ हानावा, इन्सिकाङ नावा धाबा फेलाउ पुरनासो इस्तु थेअ्तेङ हानावा।” 17हासु बुङ नावा दाखरस पुरना धालेको झोलाता माह्वातावा, माकुनुते इङको नावा दाखरसहोइ फुलियावा कालाउ पुरना धालेको झोला थेअ्तावा, कालाउ इङको दाखरस बुङ नासातावा, इङको भाअ्सिङ द्याङगेलाइ नावा धालेको झोलागेलाइता नावा दाखरस ह्वाखे, एसापा दाखरस कालाउ धालेको झोलागेलाइ रेम्फा ह्यावा।
याइरसको चामिन्दि एल्हि
(मर्कु 5:21-43; लुक 8:40-56)
18येसु इम्बालाइहेङ या काथा दोअ्काताङ पालाउ, एन्सालाउ दोङ यहुदिगेलाइको चाउघारा साअ्को एमि याइरस सासक येसुकोता लोहि, येसुको आगाता लोतेङ तुघुरतेङ दोअ्हि, काङको एमि खिनिङ चामिन्दि हिका बुङ सिहि, का बिन्ति पाखा नाअ् काङको साअ्ता लोपि, कालाउ नाङको खुर चामिन्दि ह्रुता ताअ्पि, कालाउ आरोङ सिन्हुतावा। कालाउ आरोङ नावा जिउ निनावा। 19एन्सालाउ दोङ येसु ल्होहि, कालाउ सासक दोफा हानिहि। कालाउ येसुको चात्यागेलाइ बुङ न्हु-न्हु हानेहि।
20तेन्हे बासार खान्तेङ लाम्फासोङ, हिति होतेङ हिका मासाधेका बेबाल इन्ता हिघाहि। कालाउ वा न्हु पाहा लोतेङ येसुको होङका धाबा साइहि। 21हाइपालिपानु वा सोचिहि वाको धाबा खिनिङ साइलि निङलाउ बुङ का एलाङका।
22येसु न्हु घुरिहि कालाउ उङको बेबालहेङ तिङतेङ दोअ्हि, ओइ चामिन्दि, माअ्थि, नाङको खाङधुरिहोइ नाअ् एल्होइना। “एन्सालाउ दोङ वा एल्हि।”
23येसु यहुदिगेलाइको सासक दोफा साअ्ता लोहि, इन्ता वा द्याङगेलाइ मन तुका मुरलिको धुन बाजाइतेङ हिका तिङहि। कालाउ वा इन्ता हेन्जा द्याङगेलाइ खार्तेङ हिका बुङ तिङहि। हाइपालिपानु इङको साअ्ता एनोङ बेजान सिका हिघाहि। 24येसु दोअ्हि, बाहार हानेसु, “उङको बेजान सिका मान्थु वाते जिम्तेङ खिनिङ हि।” कालाउ वाको काथा हिङतेङ द्याङगेलाइ वासेहेङ लेङपिहि। 25जेलाउ येसु द्याङगेलाइहेङ साअ्सो बाहार दिङगिल्हि, कालाउ येसु उङको बेजानको कोठा लिता दुल्हि, कालाउ येसु वाको सुर चाहि, ओदोङ घुरि उङको बेजान ल्होहि। 26कालाउ या काथाको सुसमाचार गोताङ थामे भारि चार-चाराइहि।
न्हेमि कान्हाँ द्याङ एलका
27जेलाउ येसु उङको बेजानको साअ्सो हानिलि तोम्लाउ दामाता न्हेमि कान्हाँ द्याङगेलाइ येसुहेङ लेसारा पिताइतेङ बार्का गालाहोइ ह्रिकाइकाताङ दोअ्हि, “हे राजा दाउदको हारागुटिया येसु, केलाइहेङ दाया पातेङ एल्पापि।”
28कालाउ येसु साअ् लिता दुल्हि, उङको कान्हाँ द्याङगेलाइ येसुकोता लोहि। कालाउ येसु इम्बालाइहेङ दोअ्हि, हाइ का नेलाइहेङ तिङलि दोअ्का बानाइ याङका दोअ्तेङ नेलाइहेङ खाङधुरि जेङखे? कान्हाँ द्याङगेलाइ जोबाफ पिहि, “एइ प्रभु केलाइ खाङधुरि पानाखे नाअ् दोङ केलाइहेङ एल्पालि द्वाना।”
29कालाउ येसु ओबालाइको मिसियाँगेलाइ साइतेङ दोअ्हि, “हाइपालिपानु नेलाइ खाङधुरि पासुखेना कि का नेलाइहेङ एल्पालि द्वाङका, ओदोङ भाअ्सिङ का नेलाइहेङ एल्पाङका।” 30कालाउ ओबालाइ ओदोङ घुरि तिङका जेङहि। कालाउ येसु ओबालाइहेङ थाङका आग्या पितेङ दोअ्हि, “होस ताअ्सु! या काथा हासुहेङ बुङ माअ्दोसु का दोङ नाङको भाअ्सिङ हाइ पापिघा।” 31कालाउ बुङ उङको कान्हाँ द्याङगेलाइ बाहार हानिहि। कालाउ इङको थामेता द्यापाहाङ येसुको बारेता नावाइ चार-चाराइ पापिहि।
32जेलाउ उङको न्हेमि कान्हाँ द्याङ हानिकाताङ पालाउ, आधिमि द्याङगेलाइ भेनेङ एमि द्याङहेङ येसुकोता चुमाहि, जाइ लाता हिघाहि हाइपालिपानु वासेहेङ भुत-आत्मा धेल्का हिघाहि। 33कालाउ येसु उङको द्याङसो भुत-आत्मा बाहार ओल्ले पापिहि, कालाउ उङको द्याङ नुइ धुइलि तेङहि। द्याङगेलाइ इङको तिङतेङ भाङ-भाङतेङ दोअ्लि तेङहि, “इसिकाते केलाइ इस्राएल सारभिता हेलाउ बुङ तिङका मान्थुघानाखे।”
34कालाउ फारिसिगेलाइ दोअ्हि, “याते भुत-आत्माको ग्रिह्रिसो भुत-आत्मागेलाइ ओल्लेपाखे।”
आतुइसा खेतालागेलाइ
35येसु कालाउ वाको चात्यागेलाइ गालिल जिल्लाको हेन्जा जोसो सहर, देरागेलाइको कालाउ यहुदिगेलाइको चाउघारा साअ्गेलाइता सुसमाचार पाकाताङ कालाउ परमेस्वरको सासनको सिक्स्या पिकाताङ, येसु द्याङगेलाइको गोताङ खाल्को मासाधेका मिसा लोकालाइहेङ एल्पाहि। 36जेलाउ येसु द्याङगेलाइको जेरहेङ तिङतेङ वाको मन दायाहोइ पोङघाहि, हाइपालिपानु इम्बालाइते लाखुरिया माकोसिङको भेडागेलाइ भाइपा चिलिबिलिका कालाउ साघाइ मानिङका भाइका आवाइ तुगिल्का हिघाहि। 37कालाउ येसु ताइको चात्यागेलाइहेङ दोअ्हि, “जेसाङ मिलिङगेलाइता हेन्जा बालि हिखे, एन्साङ दोङ हेन्जा द्याङगेलाइ हि जाइ परमेस्वरको बचन हिङलि मन पाखे। कालाउ परमेस्वरको सासनको बारेता दोअ्लि द्याङगेलाइ आतुइसा हि। 38प्रभु सेकाको गिह्रि, वासेहेङ प्रार्थाना पाअ्, कालाउ सेका जोम्पालि हेन्जा खेतालागेलाइ दिङगिल प्यावा।”
Valið núna:
मति 9: DHINT
Áherslumerki
Deildu
Afrita
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.