IIMU/UUNGW 7
7
Tluwoó da/tén
1AAKOÓ MUNGÚ Noa guri báy, «Dáh baraá miringamií alé, kuúng nee múk do'oge, asma aga ár adór kuúng kilók tar gan'amuú koon dír geeraaeene baraá qartihe. 2Baraá makaydá' hhohhoe#7:2 Makaydá' hhohho': Gídaabár kaangwí kaa gooín baraá kitaábuú tlahhoó Laáwi 11:31. tsár tsár tiwa ohiin, ar yaqaamba nee ar /ameeni, ay sagaáwa faanqw. Ala makaydá' hhohhoeeká tsár tsár tiwa ohiin ar yaqaamba nee ar /ameeni. 3Slám baraá tsir/ór gáwtí tlatlaawa, tsár tsár tiwa ohiin, ar yaqaamba nee /ameeni, ay sagaáwa faanqw, as xwaylár muruusíng slaáf miwa qwát baraá yaamuwo. 4Asma alaá deelo faanqwe aníng tluwaay ngu huúw baraá yaamií alé. Tluwaay iri tluuw ay deelo mibeeri tsiyáhh tlaatla/aangw nee xweeraawo. Nee umuúqo gár slafa, tidá' naa tleehhi, an fiíts baraá yaamuwo.» 5Noa tidá' sleémeero AAKOÓ MUNGÚ aa oó' gari tleéhh.
6Qoomár tluwaay iwa tluúw baraá yaamií alé, Noa a heé kureeri tsiire lahhoó'. 7Noa iri dáh baraá miringamo, nee daaqaywós nee aamaarós, nee tlaawoó daaqaywose, as tawa /uy ma'aá tluuwaydá' hardaha. 8Nee makaydá' hhohho' nee kudá' hhohhoekahe nee tsir/ooro, nee muruú gur'eérár hi'iimita baraá yaamuwo, 9nina dahiyé' baraá miringamií alé, kudá' Noa i dirii'i. Nina tsár tsár wa darahiyé', yaqaamba nee /ameeni, ar adoodá' Mungú Noa ngura hara'ayín. 10Alaá deeloodá' faanqwe tluwaay iri tluúw gawaá daanduú yaamií alé.
11Kurkú tsiire lahhoó' baraá slafíngw Noawo, slahhángw tsár tawa mibaá nee faanqw, baldá' kutlaay sleémeero oo iloodá' uren nina gweeritiyé', nee foxa'aá doori nina gweeritiyé'. 12tluwaay iri tlubaabín gawaá daanduú yaamií alé deelo mibeeri tsiyáhh, tlaatla/aangw nee xweeraawo. 13Baalaadár kilae Noa ina dáh baraá miringamo, inós nee Shemu nee Hamu nee Yafeti, daaqoó Noa, nee aamaarós, nee tlaawaydá' tám oo daaqaywós. 14Tana aldáh nee umuúqo makiito'ór sla/a ar adoorós, nee umuúqo makiito'ór ta de'ena ar adoorós, nee umuúqo gár gurúr hi'iimit baraakaá yaamuwo ar adoorós, nee umuúqo daa'aweemaá tsir/ooro. 15Nina aldahiyé' nee Noa baraá miringamoodá', tsár tsár wa alé, umuúqo gár hiinsluú slafíngw koom baraawose. 16Nee awa naa dahiye', nina dahiyé' ar hhawaata nee ar /ameeni, awa umuúqo gár slaqwtá kooma, ar adoodá' Mungú Noa ngura hara'ayín. AAKOÓ MUNGÚ afkú miringamo guri aluuwós wa tseék.
17Tluuwaydá' úr ina kumaamiít ay deelo mibeeri tsiyáhh gawaá daanduú yaamuwo, miringamo iri gáwtí kumiít daanduú ma'aywo, iri daanduudá' wa malelee/amiít. 18Ma'aay /uuru ngway slayé' nay /uurúr dooginé' gawaá daanduú yaamuwo, nee miringamoodá' iri malelee/iít gawaá daanduú ma'aay. 19Ma'aay nay ló'wa dooginé' ar /uuru gawaá daanduú yaamuwo, tlom'aá tlet sleémeero baraá yaamuwo kina tuuntuúk. 20Ma'aay nay /uurúr dooginé' tam tlom'aá tlet kay tuuntuúk, niri harwarahhiyé' miíta faanqw nee tlaqi gawto. 21Umuúqo gár slaqwtá kooma iri gwá', tidá' qo gawaá daanduú yaamuú wa hi'iimita, tsir/o nee makaá ta deaaen, makaá sla/a nee muruú gur'eér hi'iimita sleémeero, nee umuúqo heewo. 22Umuúqo gár hiinsluú slafíngw kooma, ar duungár hiinsla ina gwá'. 23AAKOÓ MUNGÚ umuúqo gár slafa daanduú yaamuwo gana adoorír hhaamiís, muu, nee makaay, nee muruú gur'eérár hi'iimita, nee tsir/o sleémeero, gina hhaamiís gawaá daanduú yaamuwo. Ala Noa kilós iri meét, nee kudá' nee inós dinkwa baraá miringamoowo. 24Ma'aay nay malelee/amamitiyé' daanduú yaamuwo ay deelo tsiiru nee mibeeri kooán.
Valið núna:
IIMU/UUNGW 7: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.