IIMU/UUNGW 24
24
Duuxór Isaka
1Abrahamu daxta aa dín, a heé kureeraá yaariir ga /aay, AAKOÓ MUNGÚ gwaa tsuúq baraá mura' sleémeero. 2Abrahamu sagadiyusmoowós kudá' úr dír awa hatlá' sleémeerowo, kudá' daqaari'iimarós sleémeero ga sageesihhimiít, guna báy, «Dakók qaaseek gawaá nawdueé'. 3Án kuúng u lo'ór /aymiís ar umuú AAKOÓ MUNGÚ, Munguú doori nee yaamu, harér garmaaeé' ma lehhtuú awaar baraá tla/ángw dasuú múk Kana'ani, kwí nee atén alhootá'. 4Ala tláw ayaarén amór muk'eé' as garmaaeé' Isaka nguwa harér i sleer.»
5Sagadiyusmoodá' iri oó', «Hám barnaxés /ameenisíng aa sí' nee án tiwa alkoomaan amoorí alé, bar adoorí, xáy gár tiwa hariím a garmaawók un ki/ísaáke yaamuudá' ta dahh?»
6Abrahamu guri báy, «Ti harmagahh, garmaaeé' mu amorqá' i ki/isaar. 7AAKOÓ MUNGÚ, Munguú doori, kudá' aníng iga duux amór doó baabuúeé' wa alé, baraadá' ti laqwaál, ina aníng i axweés, iri al'axweesántí haniís iwa kaahi, yaamuká' ngi xwaylarógí haniís. Inós malaykamoowós ngu ya/aaw geeraawók wa alé, kuúng garmaaeé' nguri harér i sleér amoosíng wa alé. 8Barnaxes /ameenisíng aa sí' nee kuúng tiwa koonda' ay amoorí, lo'or'eé' kuúng u /agká, ala tam ado gaalá, garmaaeé' mu amoodí ki/isaar.» 9Naagáy sagadiyusmoowí dakós guri qaás gawaá naawdaá Abrahamu, aakoowós lo'o gari /aáy as kaangwí.
10Sagadiyusmooduú Abrahamu angamía mibaangw giri ar tláy. Iwa tlay muruú hhohhó' oo daa'aweemaá dimbadimbé oo amór aakoowós daáhh gu kón. Iri aa'aá káy ay gixsadá' Nahori i hooti ar baraá yaamaá Mesopotamia. 11Iwa hardáh, angamíarós gari tumbarara'atís bihhaá hhalangwduú bihhaá gixsa, a tsiindo qoomár /ameena iwa ma'aá hhekaakit. 12Inós iri firín, «AAKOÓ MUNGÚ, Munguú aakooeé' Abrahamu, án kuúng u firiím laarí, alee/iisáng, nee aakooeé' Abrahamu hhooeemií tleehheek. 13Hám a diirí dirií' afaá hhalaangwí oo dasuú yaamuká' i hhekiiti. 14Ala dasír án ni baw, ‹Sirwirók ar ma'aay aweeriseek, ma'aá wahaango qawáng,› inós ma'aay ngiri aní hanís, dinkwa nee angamíar'eé' ngiwa wahas, tí masók an dasír kuúng taa tsawát sagadiyusmoowók Isáká wa alé. Adoorí bira tleehharút, daqaní aga xuú' adór tidá' taa dír aakooeéní ó' kara boo/és.»
15Tam qoomár firooro iwa hhe'eesiiká, naxés Rebeka dasír Betueli, garmoó Milka, harér Nahori hhiyoó Abrahamu, ina hardát, i sirwirós koón ar suuma. 16Dasiirí ka ló'wa hhoohhoo', nee a /amaatliito'ór nee hhawaata taa alqaatiiká. Iri awét ay baraá hhalaangw, sirwirós gay dalá/ ma'aaywo, nay waatleér. 17An qoomár sagadiyusmoodá' iwa ta'aaín as nee inós tiwa doogiya', gari báy, «Na'ás, ma'aá wahaango qawáng awa baraá sirwirók.»
18Dasi iri ó', «Gimáy wáh, aáko.» Siiwadár kilae sirwirós gay aweerís, guri wahás. 19Nguwa hhe'és wahaasaro, guri beér, «Angamíarók sleeme ngin wahaás ay dír i hhe'es.» 20Naagáy iri muutlít, ma'aá baraá sirwirós giri és baraá miringamo dír angamía, iri ta'aaiín baraá hhalaangw as ma'aá hatlá' ngiwa iihhek, angamíarós sleémeero gari wahás. 21Heedaádá' /aymuú aa oó' i kaahh, ala iri ló'wa xumiís as ngiwa tsaahhi, xáy, tidaádá' aa firín dír AAKOÓ MUNGÚ, aa tleehharúti.
22Angamía qoomár wahaango iwa hhe'és, heedaádá' peétér taa tleéhh ar sahaábu gana taataáhh, iiloeemaawós a har afi qoomoó tlaqtá shekeéli.#24:22 Shekeéli: A qoomoó iilooeema. Shekeéli kumuú wák a kílo wak. Peéterí gari dahaás gawaá duungaá Rebeka. Nee munga'aá tsár awa taa tleéhh ar sahaábu giri dahaás gawaá dabaawós, iiloeemaaín a har afi qoomoó shekeéli mibaangw. 23Gari báy, «Kiíng a ma'á? Xáy, qata dír doohunge i deéro?»
24Rebeka iri ó', «Aníng a dasír Betueli, garmoó Nahori nee Milka. 25Doorene qawór bu'uut i deer, qata sleeme i deer.»
26Heedaádá' sagós guri xup'uús, AAKOÓ MUNGÚ guri sluufiís. 27Iri oó', «I xirfuuti AAKOÓ MUNGÚ, Munguú aakooeé' Abrahamu, kudá' hhooeemaawós nee inkihhimuuwose gaa gunqareesiiká dír aakooeene. Án bartaeene AAKOÓ MUNGÚ ina geerahaár ay dír múk aakooeé'.»
28Dasiidá' iri ta'aaiín amór do' dír aayírós, muu sleémeero guri ádbeér tidá' sleémeero aa tleehharut. 29Rebeka hhiya' gu koón, ku bay Labani. Labani iri ti'iít, iri ta'aaín iwa amór hhalángw kay, amór heedaádá'. 30Labani peéteedá' gawaá duungaá hho'oorós gaa qo geerií ár, nee mungi'iidaá gawaá dabaawose sleeme. Nee kangwdá' Rebeka kaa báy nee heedaádá' gwaa axaás sleeme. Iri tláy amór sagadiyusmooduú Abrahamu. Iwa hardáh, heedaádá' aa sihhiít bihhaá angamíarós afaá hhalaangw. 31Labani heedaádá' guri báy, «Baraá do' i dahang, kuúnguusíng taa tsuúq nee AAKOÓ MUNGÚ. Ahaá waáy, mas tsee/aá wa sihhimít? Qatuwók ugwa amohhe'eesaán, nee dír angamíaro.»
32Gawaá adoorihe heedaádá' iri baraá dó' i dáh. Labani angamía gay gweér, gay gitsór i haniís. Iwa hhe'eés, ma'aá ya'aá heedaádá' nee mukós giri haniís. 33Kuwa muruú /aymár i sláy, inós ina oó', «A /ayimaaká ay dír ya/abtor'eé' ngay oo'.»
Labani iri oó', «Gimáy, ooang.»
34Heedaádá' iri oó': Aníng a sagadiyusmoó Abrahamu. 35AAKOÓ MUNGÚ aakooeé' gwaa ló'wa tsuúq, nee gway daqaari'iitís. Nee inós a heé iia tleér. AAKOÓ MUNGÚ gwaa bee/ángw i haniís nee hikwa nee peésa nee sahaábu, nee sagadiyuusér hhawaate nee ar /ameenaaro, nee angamía nee daqwaayeero. 36Sara harér aakooeé', aakooeé' gwa na/oó garmaií xwayluúr baraá diimaywose. Nee aakooeé' na/aywí gwaa daqaari'iimarós sleémeero i haniís. 37Aakooeé' án ina lo'ór /aymiís, ina báy, «Dasír yaamaá Kana'ani, yaamuudá' ni hoot, mingi garmaaeé' wa lehhiitaar. 38Ala an tleér ay ayaaeé', amór muk'eé', as garmaaeé' Isaka kuwa harér i leelehh.» 39Án aakooeé' nguri báw, «Daqtakaaro /ameenisíng in sí' nee án tiwa koomaan amoorí alé.» 40Ala inós iri oó', «AAKOÓ MUNGUÚDÁ' aní geeraharahaár baraá slafingw'eene, malaykamoowós ngu ya/aaw as nee kuúng tiwa koonda' nee uwa alee/iisi baraá aaiiwoge, kuúng garmaaeé' ngu harér i sleér baraá múk tlahhay'eé'#24:40 Tlahhay'eé': Múk Ebraníaro mar'eefo ti duxuutiyá'. wa alé, nee baraá guruú doó baabuúeé'. 41Kuúng bara hardát dír muk'eé', inooín dasi biringa hanisi'iiká, lo'or'eé' tí u eeraaká.»
42Laarí niwa hardáh baraá hhaleerí alé, ana adoorír firiím, «AAKOÓ MUNGÚ, Munguú aakooeé' Abrahamu, án kuúng u firiím, án alee/iisáng baraá aaiieene, nee aakooeé' Abrahamu hhooeemií tleehheek. 43Án a diirí afaá hhalaangw, nee dasír ni hardah, tidá' naa hhek, aníng an baw, ‹Na'ás, ma'aá niiná awa wahaango qawáng, ar sirwirók.› 44Inós bira ó', ‹Gimáy waheek, nee tam angamíarók ngi wahaás sleeme,› masók inós ta dasír kuúng taa tsawát tawa harér garmoó aakooeé'.» 45Qoomár niwa hhe'eesiiká firooro baraá muunaáeene, naxés Rebeka nina hardát, i sirwirós koón gawaá suumarose. Ina awét baraá hhalaangw, ma'aay giri iihhék. Án ngiri báw, «Na'ás ma'aá wahaango qawáng.» 46Inós sirwirós gana adaá aweerís gawaá suumarós wa alé, iri ó', «Gimáy wáh, nee tam angamíarók ngi wahaás sleeme.» Naagáy aníng niri wáh, nee angamíar'eé' gay wahás sleeme. 47Án ngiri yaahaás, «Xáy, kiíng a dasír heemá?» Iri beér, «Aníng a dasír Betueli, garmoó Nahori nee Milka.» An qoomár peéte ngiwa gawaá duungií qaás, nee mungi'i gawaá daba'. 48Ana xupuú', AAKOÓ MUNGÚ nguri sluufiís, AAKOÓ MUNGÚ nguri xirfayeemiís, Munguú aakooeé' Abrahamu, kwí aníng iga geerahaar ay dír dasír tlahhoó aakooeé' as garmaawós. 49Ala daxta aakooeé' u inkihhimu nee gan'amií tlehhá'a? Bar adooriheeká, ooare', án tidá' ni tleehh, a tleéhh.
50Labani nee Betueli axweesantí kawa axaás, tari oó', «Gaarí i amór AAKOÓ MUNGÚ dáhh, tisinge atén gár ni ooaan i káhh. 51Rebeka areeng dír geeraawók, huweek harér garmoó aakoowók wa alé, ar adór AAKOÓ MUNGÚ ngira oó'.» 52Sagadiyusmoó Abrahamu adoorí ngiwa axaás, AAKOÓ MUNGÚ guri sluufiís. 53Peésa gari duúx, nee sahaábu nee tlaba', giri Rebeká i haniís. Muruú tlaxór gawa sleeme guri haniís dír hhiyoó Rebeka nee aayírós.
54Sagadiyusmoó Abrahamu nee mukdá' ti alkoomá' tay /ayín, tay wahán, tari deél. Matlaatleero tindiwa tláy qatuuwo iri oó', «Na'asé', án a kií/ amór doó aakooeé'.»
55Ala hhiya' nee aayír Rebeka tari oó', «Dasi ala mawang, nee atén a iwiiwitaán afi qoomár deelór mibaango, daqaní ni tleér.»
56Ala inós ina oó', «Aasla'áy, mi tligmisara', barqo AAKOÓ MUNGÚ aníng iga alee/iís baraá aaiieene, ya/aamé' án niwa kii/ amór aakooeé'.»
57Inooín tari oó', «Dasi a ateetaán, inós ar kilá' a yaahasaán.» 58Naagáy Rebeka kay ateét, kari yaahaás, «Xáy, ti koondá'a nee heewí?»
Inós iri ó', «Ti koomaán.»
59Hho'or'ín Rebeka kari haniís, nee dasír inós ga alee/iimiis, tawa tlay nee sagadiyusmoó Abrahamu nee mukós. 60Rebeka kari báy,
«Hho'oorén, kiíng ti tsuuqi,
kiíng ta aayór múk kumér kúm tleehhít.
Xwaylarók gixsadaá wakuuser'ín ngi sa waawuti'ine'.»
61Rebeka nee sagadiyuuseerós tiri amohhe'eesiyé', tari tsa/án gawaá angamía as tiwa kona' nee sagadiyusmoó Abrahamu, sleémeero tari tláy.
62Qoomaarihe Isaka naa amór hhalángw Lahai-roi wa tláy. Dír i hooti a yaamaá Negebu. 63Qoomár tsiindo Isaka ina baraá qaymór káy as iwa aldakuuti. Iwa qaytsiít, angamía gana ár iwa amoorós i hi'it. 64Rebeka iwa qaytsít, Isaka guna aán. Iri awét gawaá angamíár wa alé, 65nee sagadiyusmoó Abrahamu guri yaahás, «Heeqá' baraá qaymór daáhh naa al'awin, a heemá?»
Sagadiyusmoodá' iri oó', «A aakooeé'.» Rebeka warqamoowós guri taatáhh, gitsee/aawós giri tuuntúk.
66Sagadiyusmoodá' tidá' sleémeero aa tleéhh gari alki/iít dír Isaka. 67Naagáy Isaka Rebeka gari baraá heémárí huúw, inós gari duúx. Isaka gari slaá'. Gawaá adoorihe Isaka baraá gwa'arár aayírose gurkwa/asa gari sláy.
Valið núna:
IIMU/UUNGW 24: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.