IIMU/UUNGW 19
19
Abrahamu iri kií/ amór do'ós i ale.
1Naagáy malaykeedá' tsár iri hardát ay Sodoma tsiindoowo, nee Loti aa iwiít afkú gixsár Sodomár i alé. Loti malaykeedá' gari ár. Ngiwa ár iri tláy as ngiwa ilaoohi, iri tumbarara'aát dír geeraaín i ale. 2Loti giri báy, «Bariiser'eé', na'asé' do' awaare'. Na'asé' dahaaré' baraá doó lawaalmoohúng i alé, ni delá'. Ya'aahúng hamaatlaak, daqaní matlaatlér boo/e ta tseewa tleerá', ta kumiitá' aaiiwo.»
Malaykeedá' tari oó', «Aasla'áy, a adoosingeeká, atén looa a tsee/aá wa tleesaán.»
3Loti giri harhhehhe'eemiís ak alé. Inooín niri ya/ané', niri dahiyé', baraá do'. Loti giri muruú /aymár i tleéhh, gina mikaáteedá' taa sluuftisiiká i tleéhh, inooín nay /ayiné'.
4Qoomár tawa qatuú a'ay, yaamuloouusér gixsár Sodoma, doó Loti guri harwét, masoomba nee bariiseero, muu sleémeero oo bihhe sleémeero ngaa daahh. 5Loti kuri ateét, kuri báy, mukdá' xweerakae naa hardah i amá. Amoorén i duuxang as atén nee inooín tawa fuqusaan.#19:5 Fuqusaan: Fuqi irqwaro a hhawaata nee /ameeni, ala baraá Sodomaro hhawaata nee hhawaata tan fuqtá tlehhahhiit, asma adoodá' tlehhemi'ii'ín niwa hhitiruutiyé'.
6Loti iri amor'ín i ti'iít afkú do', guri alií tseék. 7Giri báy, «Hhaee'eé', án kuungá' nu harhheehhe'eés, adoosíng tlaakw ma tleehhara'. 8Ga/aawaak, dasuú tsár u koóm oo nee hhawaata taa alqaatiiká. Án kuungá' nu harhhehhe'eemiís ngi amorhúng i duúx, adoodá' hhoo' dír ilaahunge ti tlehhe', ala mukwí mu gár tlaákw i tleehhara', asma inooín nina dahiyé' baraá guruú dooeé' alé.»
9Loti nguri bayé', «Quútl, suruúk, atén a waarahhaán.» Niri kaahiyé', «Kuúnguú /eetusmo, atén tina sakwasleemárár eéri? Gimáy, kuúng un ak gár tlaákw i tleehhaán ta kusingae.» Loti nguri harasuruukiyé', afkú do' ngwa lak fee/iyé'. 10Ala malaykeedá' daber'ín ngiri duuxiyé', Loti nguri taatahhiyé', nguri dahaasiyé' amor'ín i ale baraá do'. Do' nguri tseegiyé'. 11Aluuwo mukdaádá' afkú doó i dirií' kuri taampúy, oo ninákw nee oo urene, tam tay slaaqamiít afkú do' leelehhtuuwo, kuri slayká.
Ti'inángw Loti
12Naagáy mukdaádá' tsár Loti guri báy, «Xáy, heé hatlá' ta koon i deéro diirihe? Hhawaataá dasuuwók, laqaá daaqaywók, laqaá dasuuwók, laqaá kudá' taqo koonda baraá gixsaro, duuxang baraakae. 13Asma atén yaamuká' i hhitiimaán. Asma /aa/eeín nina hardihiyé' dír geeraá AAKOÓ MUNGÚ, nee AAKOÓ MUNGÚ taa ya/aáw as kiwa hhitimaan.»
14Loti iri ti'iít, hhawaataá dasuuwós giri ádbeemuú áy, iri oó', «Qwalaasaré', ti'iitaré' baraá ayaawihe, asma AAKOÓ MUNGÚ gixsarí ga qwaarees.» Ala Loti tari adór heé tatlkuús dír hhawaataá dasuuwose.
15Qoomár matlaatlér boo/e malayke Loti guri harakés, i kat, «Tláw, kuúng nee hareerók nee dasuuwók kwí tsár diirí dirií', ma qwaarara' baraá tlakweemaá gixsarí.» 16Naxés Loti i hhawahhaaw, naagáy malaykeedá' Loti guri dawa ót, nee dákw hareerós nee dabaá dasuuwós kudá' tsár, ar adór AAKOÓ MUNGÚ ngura gurtláy, kuna duúx baraá gixsaro. 17Qoomár kiwa tsee/ií duúx, malaykamoó wák iri oó', «Goów, slafiingók ba/amiseek, ló' ma alií qaytaar, tam sleeme ma dír wák i sihhiitaar baraá xatstihe, ti ba/amis gawaá tloomaarí alé, as tawa gwa'aká.»
18Loti giri báy, «A adoosingeeká, bariiser'eé'. 19Ga/aaweek, lawaalmoowók ya/aám gaa sláy dír ilaawoge, kuúng gurtleemuuwók ngwa dók baraá tisíng naa aníng i tléhh ar slafingw'eé' kuwa ba/amís. Aníng guwoó gawaá tlooma u aslawká, as mitiwa sláy nee tidá' tlaakw, án niri gwaá'. 20Ga/aaweek gixsarí diirí tseew aníng a i goów. Inós ka niina, xaa ya/aám aníng niwa baraaqií goow, xáy, gixsarí ka niináweéke? As aníng hhiintlueé' nguwa tuu/.»
21Kuri báy, «Ga/aaweek, tam /aymuusíng naa ó' ugwa ya/aám. Gixsasíng naa ó' a qwaareesaaká. 22Gimáy, ti ba/amis amoosií alé. Asma gár ni tleehh i ala káhh ay dír tay dat baraasí alé.»
An gár gixsadá' kasa báy Soari.#19:22 Soari: Gídaabárós a niina.
Qwaareesár Sodoma nee Gomora
23Qoomár looa niwa tsiiríhh, Loti ina dáh Soari. 24AAKOÓ MUNGÚ asltá kibiriíti ngiri gawaá doorí wa kwaáhh daanduú Sodoma nee Gomora. 25AAKOÓ MUNGÚ gixsaduudá' giri qwaareés ar asla, nee xatsooine, nee kudá' sleémeero baraá gixsaduudá' hootá', nee tidá' sleémeero naa harma/ baraá yaamudae. 26Ala harér Loti ina alií qaytsít, iri uhmoó diwi tleehhít.
27Abrahamu iri ti'iít matlaatleero ay didiíwa axweés nee AAKOÓ MUNGÚ. 28Inós iri qaytsiít bihhaá Sodoma nee Gomora, nee yaamu sleémeero awa ayaadá', ga/aaweek, quuír naa yaamuú wa tleer gari ár, adór ira tsa/aán, adór quuír gufteeri. 29Ala Mungú yaamuudá' ngiwa hhitín, Abrahamu guna insláy, Loti guna hiingeés baraá yaamudae, as Loti munguwa qwaareés dinkwa nee múk yaamuudá'.
Iimu/úngw múk Moabu nee múk Amoni
30Loti iri iimír Soari wa tsa/án, iri baraá mar'ír wa hoót gawaá tlooma, inós dinkwa nee dasuuwós kudá' tsár, asma ina da'ayuút iwa yaamaá Soarír wa hooti. 31Dasír ur ar niina gari beér, «Baabuúrén aa uráy, slám hee i kaahh baraá yaamukae oo atén ti duxuút as na/ii kiwa slawaan. 32Gimáy, baabá u wahaasaán as tawa alqaataan nee inós, as na/ii kiwa slawaan.» 33Baabuúín kuri wahaás xweeradaádae, dasidá' ur iri qatuú eér dír baabá, tam inós gár i xui i káhh, qoomár iwa qatuú eér, tam qoomár iwa tleér.
34Bál tsár dasír ur ar niina gana beér, «Ga/aaweek, aníng ana alqaataán nee baabá /isá'. U malé wahaasaán xweerakaákae, kiíng ta dát, ta qát dirós, as na/ii kiwa slawaan.» 35Baabuúín nguri malé wahaasiyé'. Xweerawo tidá' niina iri tleér iri qatuú eér dír baabá, ala baabá gár i xui i káhh qoomár iwa qatuú eér, tam qoomár iwa tleér. 36Naagáy dasuuwí tsaraawo oo Loti iri tsíh dír baabuúín wa ale. 37Dasidá' ur garma guri xwayluúr, umuuwós guri beér Moabu. Kwí an baabuú múk Moabu tam ay laarí. 38Nee tidá' niina garma guri xwayluúr, umuuwós guri beér Ben-ami. Kwí an baabuú múk Amoni tam ay laarí.
Valið núna:
IIMU/UUNGW 19: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.