IIMU/UUNGW 17
17
Hheehhe'eemis a layár alqado
1Abramu qoomár kureeriiwós tawa mibeeri gwaleél nee gwaleél AAKOÓ MUNGÚ guna harati'iít, guri báy, «Aníng a Munguú Aleesleemusmo. Dir'eé' wa hootang, masók tu xaslxaansli wásl. 2Aníng alqado a tleéhh tla/ángw án nee kuúng, aníng xwaylarók a ló'wa tlahhás.» 3Abramu iri tumbarara'aát, Mungú iri oó', 4«Aníng alqador'eé' ngi dirógií tleéhh, kuúng a baabuú xoordaá yaariir tleehhít. 5Kuúng daxta tu male bayká Abramu,#17:5 Abramu: Baraá tsifrír Ebraniaro gídaabárós a baabuú xiríf. ala tun bay Abrahamu#17:5 Abrahamu: Baraá tsifrír Ebraniaro gídaabárós a baabuú múk yaariír. asma án kuúng ugwa baabuú xoordaá yaariir tleéhh. 6Aníng kuúng un xwaylár yaariír i haniís, slám u xooro tleéhh, nee waawitá nin baraawók wa ti'iit.»
7«Alqador'eé' an gawdeés tla/ángw án nee kuunge, nee xwaylarók nee xwaylár na/aá na/iiwók nee xwaylar'ín, as tawa alqadór alhhe'eesay wasle, adór aníng tar Mungú diroge nee dír xwaylarók ar kumiit aluuwoge. 8Aníng yaamuká' kuúng ta dahi'iimár wa hot, ngi haniís dirógí ale, nee dír xwaylarók ar kumiit aluuwoge, yaamuká' sleémeero awa Kana'ani, tawa kók ay alhhe'eesay wasle, aníng tay Munguúín.»
9Munguú Abrahamu guri báy, «Kuúng alqador'eé' na ooheek, kuúng nee xwaylarók, nee dír xwaylar'ín aluuwoge. 10Gaarí an alqador'eé' ar kuúng ta ot, tla/ángw aníng nee kuúng, nee xwaylarók aluuwoge. Umuúqo hhawaata dirhunge ku hheehhe'eesi. 11Tundun hheehhe'eemiis, nee adoorí tay layár alqado tla/ángw aníng nee kuungá'. 12Umuúqo na/oó garma oo deelo dakaát ku hheehhe'eesi dirhunge, umuúqo hhawaata baraá xwaylarhunge oo taa laqwaál dó' wa alé, nee oo taa tlaáxw ar peésa, umuúqo dahaaymowo oo xwaylarogeeká, 13oo taa laqwaál dír do'ók wa ale, nee oo taa tlaáxw ar peésarók, masók aqo kun hheehhe'ees, nee daqaní tari layár alqado gawaá slaqoohunge, tawa alqadór alhhe'eesay wasl. 14Umuúqo hhawaata oo ta hheehhe'eesiiká kun paraatl dír mukose, asma alqador'eé' gaa boo/eesiiká.»
15Munguú Abrahamu guri báy, «Sarai hareerók umuuwós u sangw malé beeraaká Sarai, ala umuuwós a Sara. 16Aníng inós a tsuúq, nee inós kuúng uri na/oó garma i xwayluúr. Án a tsuúq, inós tari aayór xoordu, nee waawituú tlahh'aá muu dirós ngin daahh.»
17Naagáy Abrahamu iri tumbarara'aát, iri qasén, iri baraá muunaáwós i oó', «Xáy, heé kureeraá tsiiru dirose na/aay ku laqwaáli? Sara ar kureeraá mibeeri gwaleél sleeme iqo xwayluúra?» 18Abrahamu Mungú guri báy, «Doóqa Ishmaeli in dír geeraawók wa hoot.»
19Mungú iri oó', «A adoosingeeká, ala hareerók Sara, kuúng un na/oó garma i xwayluúr, kuúng umuuwós kway beer Isaka. Aníng alqador'eé' an gawdeés dirose tawa alqadór alhhe'eesay wasl as xwaylarós ar alu. 20Ala daanduú Ishmaeliwo án kuúng ugwa axaás. Inós ugwa tsuúq. Án u tlahhás, as iwa doogin kángw kilá' wa ale. Inós tay baabuú waawituú mibaá nee tsár, aníng ngway xoorór ur tleéhh. 21Ala alqador'eé' an gawdeés dír Isakawo, kudá' Sara i xwayluúr kurko qoomár adór tihe.» 22Mungú axweesantá dír Abrahamu ngiwa hhe'eés, iri tláy.
23Abrahamu garmaawós Ishmaeli guri óh, nee kudá' sleémeero taa laqwaál baraá do'ós wa alé, nee kudá' sleémeero taa tlaáxw ar peésa, hhawaate sleémeero awa múk doó Abrahamu, giri hheehhe'eés baalaadár kilá' adoodá' Mungú ngira oó'. 24Abrahamu kureeriiwós a mibeeri gwaleél nee gwaleél qoomár kuwa hheehhe'eés. 25Nee garmaawós Ishmaeli kureeriiwós a mibaá nee tam kuwa hheehhe'eés. 26Baalaadár kilae Abrahamu nee garmaawós Ishmaeli kina hheehhe'eemiís. 27Nee muu sleémeero oo do'ós, kudá' taa dó' wa laqwaál, nee kudá' taa tlaxún ar peésa dír dahaayér wa alé, kina hheehhe'eemiís dinkwa nee inose.
Valið núna:
IIMU/UUNGW 17: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.