IIMU/UUNGW 12
12
Ateetamór Abramu
1AAKOÓ MUNGÚ Abramu guri báy, «Ti'iít, kuúng, baraá yaamuuwoge nee baraá mar'eefowoge nee doó baabuúwoge, tláw ay baraá yaamaá án ni kuúngií laqaam. 2Án kuúng u xoorór ur tleéhh, án kuúng u tsuúq, nee umuuwók nguri ureés, nee kuúng tari tsuuqa tleehhít.
3Oo kuúng u tsuúq, án u tsuúq,
Oo kuúng u lu'umís, án un lu'ús.
Nee baraá kuunge xoordu sleémeero kin tsuuq.»
4Naagáy Abramu iri tláy adoodá' AAKOÓ MUNGÚ ngura ádbáy. Nee Loti garmoó hhiyaawós tiri koné'. Qoomaarihe Abramu a heé kureeraá mibeeri faanqw nee kooán, qoomár iwa ti'iít baraá gixsár Haraniro. 5Abramu hareerós Sarai gari ar tláy, nee Loti garmoó hhiyaawós, nee muruuwós sleémeero nee lawaaleerose, kudá' aa sláy baraá gixsár Haranír wa alé. Tari ti'iít as tawa tlay ay baraá yaamaá Kana'ani.
Inooín tawa dáh baraá yaamaá Kana'anír i alé, 6Abramu iri waaraáhh ar tla/ángw yaamaá Kana'ani, iri hardáh ay dír ta/eewír More, tidá' tseew bihhaá gixsár Shekemu. Qoomaadae múk xoorór Kana'ani ina yaamuudá' wa hoót. 7Amoodaádae AAKOÓ MUNGÚ Abramu guri i ti'iít, guri báy, «Yaamukaáká' ngin kuúng i haniís nee xwaylarók.» Didaádae Abramu kitángw ilahhooa guri tleéhh as AAKOÓ MUNGÚ nguwa ilahhooárí haniisi, kudá' gwaa i ti'iit didae. 8Abramu iri didá' wa tláy, iri hardáh ay yaamaá goongoama bihhaá da/aáw awa gixsár Beteli. Heémarós gari didií kikií', gixsár Beteli i bihhaá /uwa, nee gixsár ta bay Ai i bihhaá da/aáw. Kitángw ilahhooa guri tleéhh, umuú AAKOÓ MUNGÚ guri ateetín baraá firoorose. 9Abramu iri kumaamiít aaiiwo amór báskwí alé ay dír yaamaá Negebu.
Abramu i baraá yaamaá Misri
10Ala giyeér ur nina tleér baraá yaamaá Kana'aniro. Abramu iri tláy iwa ala hotaá ay yaamaá Misri, asma giyeédá' ka ló'wa ur. 11Qoomár iwa nakaá/ yaamaá Misri, hareerós Sarai gari báy, 12«Kiíng a /ameenír hhoohhoo'. Múk Misri kiíng bira ár, tan ooi, ‹/Ameenirí a hareerós.› Aníng iri gaasiyá', kiíng tiri máy. 13Án kiíng i firiím, kiíng ta o', ‹Inós a hhiyaaeé',› as aníng niwa /uw, nee slafingw'eé' iwa ba/an as kiíng.» 14Naagáy Abramu iwa hardáh yaamaá Misri, múk Misri /ameenidá' gari ár, adór inós kar hhoohhoó'. 15Mukdá' urén oo waawutmo Farao /ameenidá' gari ár, hhohhoartós ngiri ooiyé' dír waawutmo Farao. Aluuwo /ameenidá' kari huúw amór doó Farao i alé. 16Farao Abramu guri hhooeemií tleéhh as /ameenidá'. Abramu bee/aangw guri sláy, nee hikwa nee daqwaayér yaqaambe, nee lawaalér hhawaate nee ar /ameena, nee daqwaayér /ameena nee angamía.
17Ala AAKOÓ MUNGÚ Farao guri slaáhh, nee múk do'ose, ar muxtár ur as Sarai, harér Abramu. 18Farao Abramu guri ateét guri báy, «Tí a milá naa aníng i tléhh? Baré ngaa oiká adór tar hareerók? 19Kuúng baré ana ó' a hho'oorók, aníng ngiri duúx? Ala daxta hareerók tí areengaay, ar tlaweek!» 20Farao mukós guri hara'ayín daanduú Abramuwo kuwa hingeesi. Inooín kuri hingeés baraá yaamudae, inós nee hareerós nee umuúqo gár i kona.
Valið núna:
IIMU/UUNGW 12: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.