मत्ती 3
3
बप्तीस्मा पीन्बे युहन्नइ प्रचार्
(मर्कुस् १:१-८; लुका ३:१-१८; युहन्न १:१९-२८)
1य्हक्को बर्स लीप्चे बप्तीस्मा पीन्बे युहन्नचे यहुदीया प्रदेस्की उजाड् ग्लारी खज्यीम् चोले प्रचार् स्य्हेङ्ब तीप्ज्यी। 2थेचे पङ्ज्यी, “पस्चताप् स्य्हेङो, तलेपङ्सम् स्वर्गइ य्हुल् ज्यदङ् खबल मुब।” 3तलेपङ्सम् यसैया अगम्बक्तचेएनो चु युहन्नइ बारेरी चोले पङ्बल मुबल-
“उजाड् ग्लारी म्ही गीइ क्रीङ्बे केत्,
‘परम्प्रभुइ ग्यम् टोप् लउ,
थेङ् ब्रजेत्पे लागीरी ग्यम् तङ्-तङ् स्य्हेङो!’#यसैया ४०:३”
4युहन्नचे ऊँटकी पेइचे राबे येन् येन्ब मुबल, ओसेम् केप्परी डीइ केः खीब मुबल। ओसेम् तीरीतेङ् र्हीइ सीङ्सुर् खुदु चब मुबल। 5ओसेम् म्हीमा यरुस्लेम् सहर्तेङ् यहुदीय प्रदेस्की जम्मनो ग्लामा, ओसेम् यर्दन् स्योङ्की रेइमाकी जम्मनो ग्लामाचे युहन्नइज खज्यी। 6ओसेम् थेङ्यीमाचे र्हङ्-र्हङ्की पाप् स्वीकार् लज्यीम् युहन्न ग्यम्चे यर्दन् ग्येन्दीरी बप्तीस्मा कीन्ज्यी।
7तर युहन्नचे फरीसीतेङ् सदुकीन्हङ्की य्हक्को म्हीमा थेज बप्तीस्मा कीन्बरी खटीबल म्रङ्ज्यीम् थेङ्यीमात पङ्ज्यी, “ओ पुख्रीइ कोलमा, पर्मेस्वर्चे न्हङ्य्हम्बे सजाय ग्यम्चे स्योर्बरी एङ्यीमात खल्चे चेतावनी पीन्ज्यी? 8होत्तज्यीम् एङ्यीमाचे पस्चताप् स्य्हेङ्बल य्हीन्सम् हुजु अनुसार्नो ब्रउ। 9‘ङ्यीमा अब्रहाम्की ज-जमे य्हीन्ब, होत्तज्यीम् पर्मेस्वर्की न्याय ग्यम्चे स्योर्ब खम्ब’ बी थपङो। तलेपङ्सम् ङ एङ्यीमात पङ्ब, अब्रहाम्की लागीरी पर्मेस्वर्चे चु युङ्बमाचेएनो ज-जमे स्य्हेङ्जेत्प खम्ब। 10दोङ्बोइ दुङ्री तरीचे तम्य्हम्बल मुब। ओसेम् ज्यबे रोरो अरोःबे जम्मनो दोङ्बोमा थाज्यीम् मेन्हङ् ख्लास्ये मुब।
11“ङचेम् एङ्यीमाचे पस्चताप् स्य्हेङ्बल ङोन्बे लागीरी यीचे बप्तीस्मा पीन्ब। तर ङ बीम ङ्हच्छ्यङ् गी ब्योन्खय्हम्बल मुब, ङम् थेङ्की पनेइ नाबरीएनो जेःबल अरे। थेङ्चे एङ्यीमात पबीत्र आत्मातेङ् मे ग्यम्से बप्तीस्मा न्हङ्स्ये मुब। 12अन्न क्रप्परी नख्लेइ थेङ्की फ्यारी मुब। थेङ्चे अन्नमा बर्टी ओसेम् पोल्वमा खेमेनो अस्यीबे मेन्हङ् ख्रङ्लाजेत्स्ये मुब।”
येसुइ बप्तीस्मा
(मर्कुस् १:९-११; लुका ३:२१-२२; युहन्न १:३२-३४)
13हुजु लीप्चे येसु युहन्न ग्यम्चे बप्तीस्मा कीन्बरी गालील् प्रदेस्चे यर्दन् ग्येन्दीरी ब्योन्खज्यी। 14तर युहन्नचे थेङ्त र्होद्प म्हइज्यीम्, “थेङ्चेक ङत बप्तीस्मा न्हङ्थोबल मुबल, तले थेङ्क ङइज ब्योन्खबल?” बी पङ्ज्यी। 15येसुचे सुङ्ज्यी, “देरे चोलेनो तपुङो, तलेपङ्सम् पर्मेस्वर्की थुः टोप् लपरी ङ्य्हङ्चे चोलेनो स्य्हेङ्थोब।” हुजु लीप्चे थेङ्त बप्तीस्मा पीन्बरी युहन्न ङ्येन्ज्यी।
16ओसेम् बप्तीस्मा कीन्जेत्ज्यीम् येसु यीन्हङ्चे डोङ्जेत्ज्यी। हुजु बेलोरीनो स्वर्ग ठोङ्ज्यी, ओसेम् थेङ्चे पर्मेस्वर्की आत्मा ढुकुर् र्हङ्ले र्हङ्की जोरी ब्योन्युटीबल म्रङ्जेत्ज्यी, 17ओसेम् स्वर्ग ग्यम्चे चोतेबे केत् थ्येःज्यी, “चु ङइ म्होइबे ज य्हीन्ब, ओसेम् ङ थेतेङ् य्हक्को तङ्बल मुब।”
Valið núna:
मत्ती 3: WTDG
Áherslumerki
Deildu
Afrita
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.