LÚKAS 21
21
Bëtseend naranj nan catsëndani ayënul
(Mar 12.41-44)
1A Yeesu kë kat këkës, na win barëmb kë tsu bëtseend bukul di tsëgaangëni bëka. 2Na win buts nan catsëndani ayënul, na ciind naranj, tsu rul ngënciliŋ ngëtëb. 3Din, a na ja: “Mán leents ind ucär: Nan cätsëndan ink ayënul, a na ciind naranj, atsu di tsëgaangëni bëka apean ban tsu biki bëlieng. 4Par bamënts bukun bëlieng bë tsu ko wi ba rukësan wi; maa namëntsi, tsi bëranjul na tsu ko wi na ka wi bëlieng, ko un ci wi-barialaul.”
Ngi kan piban ngi uba ngëwal
(Mat 24.1-14; Mar 13.1-13)
5Bi balon ci bi tsi pëñakanaan uleka kato-kayëman, bi ka warëndani bi ni ilaak iwar, ni ngëko nga wëla ngi pa Nasien-batsi, a Yeesu ja: 6“Ngi ndu teen ngink, ngënu ka bi, ngi pëlaak rits pi ka wam tsi ruets pëcints pul pan dits pi kee garaa.”
7A ba yeparul ajaul: “Najukan! Ko wan ka ci lum? A uwom upibanaani kee piban wun ngëmënts ngan kii ci?” 8Na yank bukul aja: “Nda rukan ibats, pa ñaan tsë fal ind. Par bacumal ka biini tsi katim nji, bu kë ja: ‘Aci nji!’ Oo bu kë ja: ‘Uwal awokani.’ Ind tsë fets bukul. 9Uwal wi ndu te wi ukam kë kamaa, bañaan kë natsara pëkaman msien, ind tsë lënk! Par ngëmënts ngan aka pëci bërun; maa utuami di ka ci ucar umënts wun.” 10Din, a na ja bukul: “Ucaak ka natsara pëkaman ucaak ucints, pësien ka natsara pëkaman pësien pëcints. 11Utsia koo siintsar mak, tsi ngëleka ngëcumal ubon ni mmaak koo ci, ngëko ngëlënkanuel, ni ngëpibanaani ngëwiak kë pëni di batsi.
12Maa ngëmënts ngan bëlieng ka ruka ka ci, bu ka lak ind kañan, bu ka noor-nooran ind, bu ka guts ind di ito-ijúki ni di ngëkalabus, bu ka tsëpand ind di bërun basien, ni di bërun ba tsijëna-këboos, undo katim nji. 13Din, u bandand ind pëci ba maatir biki. 14#Lúk 12.11,12Nda tsuun përim pi di ngëwaas ind: Ind tsiits car pëwejats bi ndu natsar bi iyeen ind. 15Par nji, mán wël ind irim ni kameko, pa nin naloole tsi babër ind tsë yëlan pëliincandër, nin pëpok ni irim. 16Ŋal bábuk ind, ni bañaan biki nda tsaar biki, ni bayëts ind, ni ifetsar ind, bu kee ba guts ind tsi iñan bañaan; din bu ka fiŋ balon tsi ind. 17Bañaan bëlieng ka ñaas ind, undo katim nji. 18Maa, nin kaweel di ka pëni di been ind, ka niam. 19Nda liincandari, ndë gaañaar ubiira ind.
Yeesu ñakan tsi uleka ugarara Jerusalem
(Mat 24.15-28; Mar 13.14-23)
20Uwin ind basondaari fay Jerusalem, din ndë me, ugarara ndul awokani. 21Din, ban ci biki di Judeeya, ba túkari ngëntunda; ban ci biki di umetaari përaasa, ba pënandul; ban ci biki di ireeŋ, bukul tsë niaj përaasa. 22#Ose 9.7Par, ngënu kalukan-pëkaw ci ngun ngëmënts ngi, pa pëbandan ngëko nga picana ngi bëlieng. 23Cay bakaats ban seempa biki, ni biki kan buatan biki, tsi ngënu ngëmënts ngun! Par, pëjuatsan pëwiak ka baandë-ni utsia, ni uriab tsi bañaan biki. 24Bu ka fiŋa ni ngëlaac, bu ka moba ka tsëpanda di bañaan ban cits biki Bajudeu bëlieng. Ban cits biki Bajudeu ka poos-poosan Jerusalem, aa uwal wi ban cits biki Bajudeu ka tsënkëna ka band.
Ubi Yeesu Abuk ñaan-najin
(Mat 24.29-31; Mar 13.24-27)
25 #
Isa 13.10; Ese 32.7; Joe 3.4; Upi 6.12,13 Ngëpibanaani ka ci tsi unu, ni tsi pëlí, ni tsi ngëpesaj. A tsi utsia, unjuatsia ka ci tsi ban cits biki Bajudeu, ucapar bërëk ni ngëmaroŋ ka tsu bukul bë katse ka me ko wi bu kë ro wi. 26Bañaan-bajin ka lënk aa bu ka koba, uci bukul tsi pëlip ngi kan baandë-ni ngi umundu. Par, myëlan man ci mi di batsi ka siints-siintsana. 27#Dan 7.13; Upi 1.7Din, Abuk ñaan-najin ka wina nuu bi di kasa, ni pëyëlan, ni përëmb pëwiak. 28Ukur ngëmënts ngan pëci, nda natsaan nda nats, ndë kat iyeen ind, par pëlukara ind pëbuer awokani.”
Yeesu tib përim anaamanaan bëfíigu
(Mat 24.32-35; Mar 13.28-31)
29A Yeesu tib bukul përim pi, aja: “Nda Teenan-e bufíigu, ni mko bëlieng; 30aja uwal wi man kur wi pëjaban, uwin ind mul, ind bërier ind ndë me ne, uwal uyëki wokani. 31Unk buts, uwin ind ngëko ngëmënts ngan kë baandi, ndë me ne, pësien Nasien-batsi awokani. 32Mán leents ind ucär: Bañaan ntsari biki, bë ri ka cäts ba ba, te ngëmënts ngan bëlieng baandatsi. 33Batsi ni utsia ka par, maa irim nji di ka par yaas.
Yeesu ja bafetsul ba ruk ibats tsi uleka bukul
(Mat 24.42-44; Mar 13.32-37)
34Nda rukan ibats tsi uleka ind bërier ind, ngëwaas ind përits cum ni bëwaamal, ni ukuj, ni kawejats ngëko ubiira, pa unu umënts përitsii baandë-ni ind ucar umënts 35pi pëgungan. Par, unu umënts ka púutsi ban ci biki bëlieng tsi umundu upëban. 36Nda waayan, nda ñaanan tsi uwal un ci wi-ba këci, pa ind pëka uyëlan pëbuërëna tsi ngëko ngan ka ngi pëbaandi bëlieng, pa ind pënats tsi bërun Abuk ñaan-najin.” 37#Lúk 19.47Yeesu kë jukan ngënu bëlieng di kato-kayëman. Bërëm, në pën kee fër di untunda wi ka n jaka wi, wi Mëoliwa. 38Bañaan bëlieng kë lúŋi pëbi tsi nul di kato-kayëman, pa pëcikëndënul.
Valið núna:
LÚKAS 21: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.