LÚKAS 10
10
Yeesu yël bafetsul, ngëntaaja paaj ni ulon [ni batëb.]
1A uu ba, Ajug rat balon; bë ci ngëntaaja paaj ni ulon [ni batëb.] Na yëlëna bukul batëb-batëb, bu ka yërul bërun pëya kara përaasa, ni kara tsëko tsi na ka tsi pëya bërierul. 2#Mat 9.37,38A na ja bukul: “Kacët arëmb, maa baleemp cumats. Bi u ci bank, nda ñaanan Ajug kacët, pa na wëtan baleemp, ba yaarul kacët. 3#Mat 10.16Nda tsëpan. Nji n yël ind ink pi ngëbuk-ngënkaanel, tsi pëncuaf ngënjurtu. 4Ind tsë tsëpand nin pëkalëpa, nin kamaañ, nin iraala; te ind tsë nats maleendar di bëga. 5Kato ki ndu niaj ki, nda jaan bërun: ‘Pëfac, pa ciin tsi kato ki.’ 6A uci abuk pëfac ci, din pëfac ind ka ci tsi nul. Ucits ank ba, pë kak tsi ind. 7#1Kor 9.14; 1Tim 5.18Nda ciin tsi kato kamënts; ko wi ba ka wi, nduu re, nduu raan. Par, naleemp aka pëyank bëlukul. Ind tsë ja nda ci tsi kato, ndë pën ka but kacints. 8Uwal wi nda niaj wi përaasa a ba welan ind, nda rean ko un tsua wi ba këtsua tsi bërun ind. 9Nda yësani bamoj ban ci biki rul; nda jaan bukul: ‘Pësien Nasien-batsi awokani ind.’ 10#Ngë 13.51Maa, uwal wi nda niaj wi përaasa a nda welanaatsa, nda yaan di ngëmbeera, ndë ja: 11#Mat 10.7-14; Mar 6.8-11; Lúk 9.3-5‘Ŋal kandëpe përaasa ind, kan tsopan wund ki itsiim, wund ka raafari ind kul. Maa, nda mean ko wi: Pësien Nasien-batsi awokani.’ 12#Uju 19.24-28; Mat 11.24 Mat 10.15Man ja ind: Tsi unu kawat-pëleents, Sodooma ka pe përaasa pëmënts pëtiesëtsana pëjuatsan.
Ilon iraasa bañaan ba yaarats biki ibats
(Mat 11.20-24)
13 #
Isa 23.1-18; Ese 26.1—28.26; Joe 4.4-8; Amo 1.9,10; Sak 9.2-4 Cay wi Korasin! Cay wi Betësaida! Par, ngëko bawitsa ngandoa ngi tsi pëncuaf ind do roa tsi Tiiru ni tsi Sidon, i ro jon ba ki i yaar ki ibats, i tiema ngësaaku, i tsoar tsi ufab. 14Unk, tsi unu kawat-pëleents, Tiiru ni Sidon ka pe ind pëtiesëtsana pëjuatsan. 15#Isa 14.13-15A wi, Kafarnaum, kë riangar te di batsi-a? Nin-a! Kë wela te di mcats! 16#Mat 10.40; Mar 9.37; Lúk 9.48; Joŋ 13.20Ñaan nan cikëndënindi, acikëndënin. A ñaan nan bër indi, abërin; a nan bërini, abër na yëliini.”
Bafets Yeesu, ngëntaaja paaj ni ulon [ni batëb] bu witsee
17Bafets Yeesu, ngëntaaja paaj ngun ni ulon [ni batëb,] bu witsee ni ulílan uwiak, a ba ja: “Ajug! Ŋal ngëcaay aro ko wi wund ja wi ngul tsi katimu.” 18Din, Yeesu ja bukul: “Man win Useetaani, uyëri wul di batsi, pi kalikajan. 19#Iya 91.13Nda teenan-e! Man wël ind pëyëlan pëpoos-poosan ngëko-pëtsats ni ngëtiifar; nabër, ndë peul uyëlan; te ko di ka ro ind. 20Ind tsë lílan undo bi ngëcaay ro bi ko wi nda ja wi ngul. Maa, nda lílani undo bi itim ind picanaa bi di batsi.”
Ulílan Yeesu
(Mat 11.25-27)
21Tsi uyëk umënts wun, Yeesu piban na lílan mak tsi Uwejats ujënts, na ja: “Man bëndanu, Paapa, Ajug batsi ni utsia. Par, m bek ngëko ngëmënts ngi, m lawan ngul bameko ni balipal, a m piban ngul upäts uties. Eey-e, Paapa. Par, ank di m ŋal run wul pëci. 22#Joŋ 3.35 Joŋ 10.15Asin nji awëlin ngëko bëlieng. Ñaan meets ni Abuk ci, ucits ba Asin. A ñaan meets ni Asin ci, ucits ba Abuk, ni biki Abuk ŋal biki pëpiban bukul nul.” 23Bi Yeesu ja bi ko wan a nu ba, a na witsësa amab bafets, na patsan bukul përim pi, aja: “Anaak, këkës kan ci ki tsi pëwin ko wi nda ci wink tsi pëwin! 24Par, ma n ja ind: Bayëlia bacumal, ni basien bacumal, bë ro ŋal pëwin ngi nda ci ngink tsi pëwin, maa bë winats, ni pëte ko wi nda ci wink tsi pëte, maa bë teets.”
Ñaan Samaaria na waree uwaas
25 #
Mat 22.35-40; Mar 12.28-34 A nalon najukan-ulua natsa pëteen-teenan Yeesu, a na ja: “Najukan! We wi n ka wun përo, pa pëka ubiira un dits wi ka ba?” 26Yeesu jaul: “We picana wun tsi ulua? M ja m layir wul kë me we tsul?” 27#Ulú 6.5 Ija 19.18Najukan-ulua yankul, aja: “Kë ŋal Ajug, Nasien-batsiu, tsi uwaasu bëlieng, ni tsi uyëlanu bëlieng, ni tsi uwejatsu bëlieng; kë ŋaland acintsu, pi m ŋal pi beenu.” 28#Ija 18.5Din, Yeesu jaul: “M leents ucär. Doon ank, kë ka ubiira.” 29Maa, najukan-ulua ŋal pëja aci na mabi, a na ja Yeesu: “A yën ci-un acints nji?” 30A Yeesu jaul: “Aka nalon ñaan nan pënii di Jerusalem, na juŋa pëtsëp Jeriko, a nee yër tsi iñan ngëwayu, ba caul ngëkoul, ba tucanul a nuu tsas pëcäts, ba bërul, ba tsëp. 31A ujëkanda nalon najakan juŋa buts bëga bëmënts bën pëtsëp. Nu winul, na par bi kajara kacints kun. 32Nalon bëts baandi tsul, nan bofi tsi pëbuka Lewi; nu winul, na par bi kajara kacints kun. 33#2Bën 28.15Maa ñaan Samaaria, nan pënari bëyaas baandi tsi kawokul; nu winul, na jampësaul. 34A na okul, na tularul mkër ni pëwat tsi mlupi, na tan. Na rijanul tsi uncaam, wiicul bërierul, na yaandul kato-pëtsooŋ, a na këmandul. 35Tsi unu u neki wi, na toti këtakan këtëb Dinaariu, a na wël wul ajug kato-pëtsooŋ, na jaul: ‘Këmandiul. Uci m bi m lak tsul ko, kee luku, uwitsee nji.’” 36A Yeesu ja najukan-ulua: “Tsi bawaants bakan, uci wi kë ja, naom ci-un acints na yër unk tsi iñan ngëwayu?” 37A najukan-ulua yankul aja: “Aci na yëkarul unk ipës.” Din, Yeesu jaul: “tsëpan, kë ro unk bëts.”
Maarta ni Maaria
38 #
Joŋ 11.1
Bi Yeesu ni bafetsul repa bi bëga pëtsëp, na niaj ulon untab. A ŋaats ni ka n jakee Maarta welanul di katoul. 39Nan tsaari ni nul, ni ka n jakee Maaria, tsoar tsi itsiim Ajug, a nuu cikëndën përimul. 40Maa, ngëleemp cum Maarta ibats a mobunats uloole. Din na pëni, a na ja: “Ajug! Nan tsaar ink ni nji, bi na bërarin bink ngëleemp koorin, ko wan dootsu ko-a? Jaanul na ela tsënkin.” 41Ajug yankul aja: “Maarta, Maarta! M yëkanaand ngëko ngëcumal a nga cumu been, 42maa uloole rin fiera wun; Maaria arat kafa kan pe ki pëwara, kan dits ki ka yankënaul.”
Valið núna:
LÚKAS 10: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.