JOŊ 1
1
Përim, ci pun Nasien-batsi
1Tsi ujuundi, përim aci, a përim ci ni Nasien-batsi, a përim ci Nasien-batsi. 2Pul, tsi ujuundi aci ni Nasien-batsi. 3Pul leempëna pun ngëko bëlieng; kaats ko u leempa wi, te cits pul leempëna pun wul. 4tsi pul tsi ubiira ciina tsun, a ubiira umënts wun ci wun ufac bañaan-bajin. 5A ufac fiets tsi krëm, maa krëm kaats kape tsi wul.
6 #
Mat 3.1; Mar 1.4; Lúk 3.1,2 A nalon ñaan baandi, ni Nasien-batsi yëlii, katimul Joŋ. 7Nul abi pi namaatir, pa pii leents ngi na me ngi tsi uleka ufac; pa tsi undo përimul, bañaan bëlieng ka wak. 8Citsul ci-un ufac, maa, abi pii leents uleka ufac. 9Pul përim ci pun ufac ucär, wi kan fiets wi kara ñaan, ubi wul tsi umundu. 10Përim aci tsi umundu, a pul leempëna pun umundu; maa bañaan umundu meets pul. 11Abi pa bañaan pul, maa bañaan pul niiraants pul. 12Maa bañaan bëlieng, ba yank biki pul, ba uwak biki tsi katim pul, pul awël bukul pëtsënkan përuka ci upäts Nasien-batsi; 13bukul, bë bukënaatsa tsi pëñaak, nin tsi uŋal uyamats, nin tsi uŋal niints, maa tsi uŋal Nasien-batsi.
14A Përim witsësar aci ñaan-najin; a na ciina tsi pëncuaf nja acum ni bëtseend ni ucär. Ngë win përëmbul, aci pi përëmb Kanbuka koorul baŋ tsi Asinul.
Joŋ-namijan aleents uleka Yeesu
15Joŋ leents uleka Yeesu, a na lie aja: “Ni ci-un ni nja ind unk: ‘Ni kan bii tsi ufets nji, aciin bërun, par man duka ka n ci, a na ro ci ba.’ 16A nja bëlieng buts, tsi përëmbul ngë yank un cum wi, ni bëtseend ba nekëlar bi. 17Par ulua awëlënee tsi Moises, maa bëtseend ni ucär abiini tsi Yeesu Këristu. 18Ñaan winats Nasien-batsi, yaas. Maa Nasin-batsi, nul Kambuka koorul, nan ci tsi Asin, piban nja un nul.”
19Ko wi, ci wun wi Joŋ leents wi, bi Bajudeu ban ci biki di Jerusalem yëli bi bajakan, ni bañaan pëbuka Lewi, pa bee ba yepar Joŋ ba ja: “Wi ci-un yën?” 20A Joŋ leents, pokats, aleents aja: “Cits nji n ci-un Këristu.” 21#Mal 3.23 Ulú 18.15,18A ba yeparul aja: “A ba m ci yën? M ci Eliyas a?” A na ja: “Nji n citsul.” A ba jaul: “M ci nayëlia-a?” A na yank aja: An-a 22Maa, a ba jaul: “Wi ci-un yën, pa wund pii leents ba yëlii wund biki? Wee m ja wun tsi ulekau bërieru?” 23#Isa 40.3Din, a na yankësaan bukul irim Isaaya nayëlia, aja:
“Nji n ci-un përim ni ka lie unk di ulaalats, a nuu ja:
‘Nda colani bëga Ajug.’”
24Ba yëlee biki, bë ci ban pënë-ni biki tsi Bafariseu. 25A ba yeparul aja: “Uci u cits wi ci-un Këristu, nin Eliyas, nin nayëlia, a we ka wun a kë mijan bañaan?” 26A Joŋ yank bukul aja: “Nji, mán mijanaan di mlik, maa tsi pëncuaf ind aka nalon ni nda meetsi, 27nul ci-un ni kan bii tsi ufets nji; nji n tsënkaants pëjaa mán pacul katani karaalaul.”
28Ngëko ngan apar-na di Betaania, di kalutar Jordan, di Joŋ do ri ka mijanaan.
29Tsi unu ucints, a Joŋ win Yeesu kë bi tsi nul, a na ja: “Ni ci-un unkaanel-uties Nasien-batsi, wi kan pënan wi ujuban umundu. 30Ni ci-un ni n doi ja ind: ‘tsi ufets nji, nalon niints ka bi, aciin bërun, par man duka ka n ci, a na ro ci ba.’ 31Nji bërierin nji n doots meul; maa pa pëtsu bañaan Israel ba meul, wul ka wun n bi a ndu n mijanaan di mlik.” 32A Joŋ ñakan aja: “Man win Uwejats pëni di batsi awelee, pi utuuba, ee jut tsi nul. 33Nji n doots n meul, maa na yëliini pii mijan di mlik, nul jain un: ‘Ni m wini Uwejats welee ee jut tsi nul, nul ci-un ni ka mijan indi di Uwejats-ujënts.’ 34Maa nji ma win, a n leents a n ja, nul ci-un Abuk Nasien-batsi.”
Bafets Yeesu bacäk
35tsi unu ucints, a Joŋ kaka nats ni bafetsul batëb, tsi tsëko tsëmënts tsun. 36Bi na win bi Yeesu kë par, a na ja: “Ni ci-un unkaanel-uties, wi Nasien-batsi.” 37A bafetsul batëb bukun te bi na ñakan bank, din a ba fets Yeesu. 38A Yeesu witsësa, a na win bu kë fetsul, a na ja bukul: “Wee nduu tsas wun?” A ba jaul: “#1.38 Rabi, un ci wi Najukan.Rabi,” un ci wi Najukan, “tsum tsi m ciina tsun?” 39A na ja bukul: “Nda bili n dii win.” A ba tsëp ee win tsi na ciina tsi, a ba ci ni nul unu umënts wun; aro ci ko pi mfuts-unu.
40Nalon tsi batëb bando bukunk te irim Joŋ a ba fets Yeesu, aci Andëre, nan tsaari ni Simon Per. 41Ni Andëre cakësi pëwin aci Simon, nan tsaari bërierul ni nul; a na jaul: “Wund awin Mesia:” “un ci wi Këristu”. 42A na tsëpandul di Yeesu. A Yeesu teenul a na ja: “M ci Simon, abuk Joŋ; kë ruka ka jaka Seefas” un ci wi #1.42 Per: un ci wi BëlaakPer.
Yeesu arui Filip, ni Natanael
43tsi unu ucints, a Yeesu natsar pëya Galileeya, a na win Filip, na jaul: “Fetsin.” 44Filip aciina përaasa Betësaida, përaasa Andëre ni Per.
45A Filip win Natanael, a na jaul: “Wund awin nan picana unk ulekaul tsi ulua-Moises, ni tsi ngi bayëlia pican ngi: aci Yeesu Kanpënë-ni-nasaret, abuk Juse.” 46Natanael jaul: “Ulon ko u wara wi a yëlan pëpën-ni di Nasaret-a?” A Filip yankul aja: “Bili kë win.”
47A Yeesu win Natanael kë bi tsi nul, a na ñakandar ulekaul aja: “Nul ni, naisrael nacär, nan kaatsi kanguungu.” 48A Natanael jaul: “Meenin tsum?” A Yeesu yankul aja: “Filip aruka ka ruiu, a n do winu ba, uwal wi m ci wunk di utsia bëkungul.” 49Din, a Natanael yankul aja: “Rabi, wi ci-un Abuk Nasien-batsi! Wi ci-un Nasien Israel.” 50A Yeesu yankul aja: “Undo bi n jau bi man winu di utsia bëkungul, ka wun m wak-a? Kii win ngan pe ngi pëci ngëwiak.” 51#Uju 28.12A na kaka jaul: “Mán leents ind ucär, Ndii win batsi waantsar, ngëwaanju Nasien-batsi kë paya, nguu welee tsi Abuk ñaan-najin.”
Valið núna:
JOŊ 1: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.