NGËRO 6
6
Bayënts paaj ni nalon arata pa pëci batsënk tsi Ngëriisia
1Tsi ngënu ngëmënts ngan, bafets Yeesu kë pe këpe pëwatsësar, a Bagërek natsara pëkuët Bayebëreu, par ban cätsëndan biki bayën bukul tsi bukul, bë ja ba roon bu kë finaa kafa ngëko kara unu. 2Din, a Untaaja bukun ni batëb rui kandënd bafets Yeesu, bee juk, ba ja bukul: “Yúkats, wund pëwëtan përim Nasien-batsi pa puu këmand ngëko bariala. 3Maa, batsaar ni wund! Nda ratan bayënts paaj ni nalon tsi ind, biki ka n jaara biki ngëwar, a ba cum Uwejats-ujënts ni kameko, nja ka tsu bukul tsi uleemp wi. 4Maa wund, wund ka mob tsi bëñaan, ni tsi uleemp përim.”
5A kandënd lílandër irim bapostolu, a ba rat Estefan, niints nan cumi uwak ni Uwejats-ujënts, ni Filip, ni Përokoru, ni Nikanoor, ni Timon, ni Parmenas, ni Nikolas nan pënë-nii Antiookia, na ro ci nafets bëga Bajudeu; 6Ba natsan bukul tsi bërun bapostolu, a bapostolu paf bukul iñan, añaandër bukul.
7Unk, a përim Nasien-batsi kë laar mak, ucumara bafets Yeesu kë pe këpe pëwatsësar di Jerusalem, a kandënd bajakan niiran uwak.
Pëmoba Estefan
8A Estefan cum bëtseend ni pëyëlan, a nuu ro ngëko ngan pikran ngi, ni ngëpibanaani ngëwiak tsi pëncuaf bañaan. 9Maa, balon ban bofëna biki di kato-kajuki, ki ka n jaka ki, ki bafacana, ni bañaan ban pënë-ni biki Sireeni, a balon pëni Aleksandëria, ni balon ban pëni biki Siliisia ni Aasia, ci tsi mantotëlër ni Estefan; 10a bë yëlanats pëpok kameko, ni Uwejats, un tsuul wi a na ñakan.
11A ba tsu balon bayënts pa ba ja: “Wund ateul a nuu kar Moises, ni Nasien-batsi.” 12Bu sualan bañaan, ni bawiak Bajudeu, ni bapican-ulua, a ba yërand Estefan a ba mobël, ba tsëpandul di kato kawat-pëleents kawiak. 13A ba tumtsarul aja: “Ñaan ni, wëtaants pëja irim in ci yi ikar pa tsëko-tsëyëman tsun, ni pa Utsua; 14par wund ateul a nuu ja: Yeesu namëntsi, nul Kanpënë-ni-nasaret, ka gar kato-kayëman, në bëtan undimaan wi Moises wëlnjawi.” 15A ban tsoar biki bëlieng di kato kawat-pëleents kawiak kaŋan Estefan këkës, a ba win këkësul, pi këkës uwaanju.
Valið núna:
NGËRO 6: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.