NGËRO 4
4
Per ni Joŋ di kato kawat-pëleents kawiak
1Bi Per ni Joŋ wama bi ka ñakanaan bañaan, a bajakan, ni nawiak bawaay kato-kayëman, ni Basaduseu baandi tsi bukul. 2Bu riabats undo bi bu kë jukan bi bañaan, koo leents uleka kanatsee-di-pëcätsts Yeesu. 3A ba mob Per ni Joŋ aríc di ukalabus te unu ucints, par bërëm awokan pëjëk. 4Maa bacumal tsi ban te biki përim wak tsi Yeesu, a upinara bayënts ba uwak biki watsësar aruakan ngëmiil kañan (5.000).
5Tsi unu ucints, bawiak, ni bawiak Bajudeu, ni bapican-ulua juk di Jerusalem; 6Anas, nan pei pëci nawiak-bajakan ci rul, ni Kayafas, ni Joŋ, ni Aleksandër, ni ban bof biki bëlieng tsi pëbuka bajakan. 7A ba natsan Per ni Joŋ tsi pëncuaf bukul, a ba yepar bukul aja: “Ni pëyëlan pëom oo ni katim kaom ki nda roona kun ko wi?”
8A Per, nan cumi Uwejats-ujënts, ja bukul: “Bawiak bañaan-ucaak, ni bawiak Bajudeu, 9bi wund yepara bink ntsari uleka ko uwar undoa wi tsi niints nalab, ni bi na yësana bi aja, 10ind bëlieng, ni bañaan Israel bëlieng, nda mean uwar, niints na nats ink tsi bërun ind, ayësanaana tsi katim Yeesu Këristu, Kanpënë-ni-nasaret, nul ni nda rieŋi di kruus, a Nasien-batsi natsaniul di bacäts. 11#Iya 118.22Nul ci-un pëlaak pi nda bër pi, ind baniew, a pul bi witsa aci pëlaak pëtsaak. 12Pëbëër ciinats tsi nalon; par tsi utsia batsi, kaats kalon katim ka wëla ki tsi bañaan-bajin, ki ngë ka ki pëbuërëna.”
13Bi ba win bi bërëdëm Per ni Joŋ, din a ba pikra, par bë win ba ci bañaan ban jukats biki, te bë kaats ume. A ba yëkëran bukul, par bë ro ci ni Yeesu. 14A ba win niints na yësanee nats ni bukul, a bë kaats ko wi bu kë ja wi, un pats wi. 15A ba tsu bukul ba pën di kato kawat-pëleents kawiak; a ba baar pëloole tsi ba ci tsi, 16a ba ja: “We winja kë ro wun bañaan biki? Par bawitsa bi ba ro bink ameaa uwar tsi bañaan Jerusalem bëlieng, a ngë yëlants pëpok bukul. 17Maa, pa ko wan yilaats pe këpe pëleentsaa tsi bañaan, ngë leentsar bukul, pa ba rits kaka ñakanaan ñaan tsi katim kan.”
18A ba kaka rui bukul, a ba tsu bukul përits kaka ñakanaan ñaan, nin pëjukan tsi katim Yeesu. 19Maa Per ni Joŋ yankës bukul aja: “Nda wejatsari-e bërier ind, ne aci ko u mab wi tsi bërun Nasien-batsi, wund pëcikëndën ind, oo pëcikëndën Nasien-batsi? 20Par wund yëlants pëwët pëñakanaan bañaan tsi ko wi wund win wi, a wund teend.” 21Maa, ba ru pe këpe pëleentsar Per ni Joŋ, a ba wëtan bukul ba tsëp; a bë kaats tsi bu kë mobuna tsi bukul ba pikaar, undo bañaan, par bañaan bëlieng aci tsi përëmban Nasien-batsi tsi ko un par wi. 22Par, niints na yësana unk tsi bawitsa, aka ngëwaanu ngan pe ngi ngëntaaja ngëbaakër.
Ngëriisia ajuk aci tsi bëñaan
23Bi Per ni Joŋ wëtana bi, din a ba witsa di bacints bukul ee leents bukul ngëko ngi bawiak-bajakan, ni bawiak Bajudeu ja ngi bukul bëlieng. 24#Pëp 20.11; Nem 9.6; Iya 146.6A ute bukul ko wan, a ba kat irim bëlieng aja Nasien-batsi: “Ajug! Wi leemp un batsi, ni utsia, ni bërëk, ni ngëko ngan ci ngi bëlieng tsi tul, 25#Iya 2.1,2a m ñakan tsi Uwejats-ujënts tsi mtum asin wund Dawid naleempu, m ja:
‘We ka wun a ban cits biki Bajudeu cum ni uriab,
a bañaan kë wejats ngëko ngan kaats ngi bëkat?
26Basien tsi umundu yecis,
a bawiak bofëlar aro pëloole,
ba natsara Ajug, ba natsara Këristuul.
27 #
Lúk 23.7-11
Mat 27.1,2; Mar 15.1; Lúk 23.1; Joŋ 18.28,29 Tsi ucär, Eroodis ni Ponsiu Pilaatus, ni ban cits biki Bajudeu, ni bañaan Israel, bë bofëlar tsi përaasa pi, a ba natsara naleempu nayëman, Yeesu, ni m dati. 28Bë ro ngëko bëlieng, ngi kañanu ni uŋalu ro ngi yecis ba. 29A inkri Ajug, cikëndëni-e bi bu kë píc bi; tsuun baleempu ba leents përimu ni bëyeentsal, 30kë colan kañan pa puu yësan bañaan, puu ro ngëpibanaani ni ngëko ngan pikërën ngi, tsi katim Yeesu, naleempu nayëman.’”
31Bi ba ba bi bëñaan, a tsëko tsi ba jukëna tsi siintsar, a ba cum bëlieng Uwejats-ujënts, bu kë leents përim Nasien-batsi ni bëyeentsal.
Bawak tsi Yeesu bacak, bë bofara bëka
32 #
Ngë 2.44,45 A kandënd bañaan ba uwak biki ci uwaas uloole ni uwejats uloole; njn ñaan di ka ja tsi ibatsul, ko ulon tsi bëkaul aci wiicul bërierul; maa bë bofara ngëko bëlieng. 33Ni pëyëlan pëwiak, a bapostolu kë leents bi Yeesu, Ajug, natsee bi di pëcäts; a bëtseend bëwiak ro ci tsi bukul bëlieng. 34Kaats naranj tsi bukul, par ban ka biki irig oo ito, bë ja ba waap yul, bu ka tsiji uncaam wi ba waapar wi yul 35kee jukan tsi bërun bapostolu. Din u faa, kara ñaan bi na fier bi.
36A Juse, nul ni bapostolu tsui katim, Barnabas, uci wi, (abuk kawël katëb). Nul abofëna tsi pëbuka Lewi a na pënë-ni Cipëri, 37awaap bërigul, a na tsiji uncaam wi na waapar wi ee jukan tsi bërun bapostolu.
Valið núna:
NGËRO 4: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.