NGËRO 10
10
Korneeliu arui Per
1Aka nalon niints di Seesareeya, ka jaka Korneeliu; aci kapëton kandënd basondaari ki ka n jaka ki “ki Itaalia.” 2Aci niints nawar, na lënk Nasien-batsi, nul ni bañaan katoul bëlieng, a nu wël bañaan bëtseend mak, nu ñaan Nasien-batsi kara unu. 3Ulon unu, ko pi ngëler ngëwaants bëtakala, tsi bëwinal, na win uwar ulon uwaanju Nasien-batsi bi tsi nul, a u jaul: “Korneeliu!” 4A na kaŋan wul këkës, na lënk, a na ja: “Aci we, Ajug?” A uwaanju jaul: “Bëñaanu ni kawël-bëtseendu apaiya ee lesa tsi bërun Nasien-batsi. 5Inkri, yëlan balon bañaan di Jope, ba rui Simon, ni ka n jakee buts Per. 6Nul awelanaan di Simon ni ka leempëna unk itël, nan ciina unk tsi kambaŋ bërëk.” 7Bi uwaanju u ñakanaanul wunk pën bi, a Korneeliu rui baleemp batëb biki katoul, ni nalon nasondaari na lënki Nasien-batsi tsi ban ci biki tsi uleempul; 8a nu ba pëleents bukul ngëko bëlieng, na yël bukul Jope.
Bëwinal Per
9Tsi unu u neki wi, a ba ci tsi bëga pëtsëp; bu kë wokan përaasa, a Per paya ruëts kato, tsi uson unu, pa pëñaan. 10A na tsijar ni ubon, na ŋal përiala; maa bi ba wama bi ka kayecis bariala, na te na pën tsi nul. 11Din, na win batsi waantsar, a ko ulon kë welee anaami unk kaleenj kawiak, kan tana ki tsi imbiantëmb ibaakër, ka wela tsi utsia. 12Bametsu kul a tsij ngëkoraar ngë n jar bëlieng, ngi këtsiim këbaakër, ni ngi kan puula ngi tsi utsia, ni ngëko-ngëyits batsi. 13A përim jaul: “Natsaan, Per! Fiŋan kë re.” 14Maa Per jankma aja: “Nin a, Ajug! Par iji i netse n de u niiranaatsa wi përea, a u tsopand.” 15A përim jaul uyaas utëbantsan: “Ko wi Nasien-batsi jëntsan wi, wi m di kë ja wul atsop.” 16Kako kamënts kun ro unk te ngëyaas ngëwaants, a uyëk umënts wun, ka witsa batsi.
17A Per kë yepar tsi uwejatsul ko wi bëwinal bi na win bi pac wi; a bayënts biki Korneeliu yëli biki nats di pëlëman, bu kë yepar kato Simon. 18A ba ru, a ba yepar ne Simon ni ka n jakee buts Per atsooŋatsaan tsi kato ki.
19A Per wama ka wejatsar uleka bëwinal, a Uwejats jaul: “Teenan-e, bayënts batëb biki, bu ka tsasu; 20natsaan, kë juŋa pëtsëp ni bukul, tsë tsij ngëwejats ngëtëb, par nji yëli un bukul.” 21Per wela ee tsënk bayënts bamënts bukun, a na ja: “Nji ni! Nji ci-un ni nduu tsasi. We tsu wun a nda bi tsi?” 22A ba ja: “Korneeliu, aci kapëton basondaari, niints namabal, na lënkand Nasien-batsi; a ucaak Bajudeu bëlieng kë jaarul ko u wara wi. Ulon uwaanju uyëma njaul wun na ruiu bi katoul, nii te irimu.” 23Din, a Per welan bukul.
Per di kato Korneeliu
A tsi unu ucints, na natsa atsëp ni bukul, a balon batsaar tsi Këristu, ban pëni biki Jope, ci ni nul. 24A tsi unu ucints kak, ba band Seesareeya. Korneeliu ro rui ba bayëtsul ni ifetsarul, bee juk, a nuu lip bukul. 25Bi Per kë niaj bi, Korneeliu tsëp ee jëk ni nul, a na yër tsi itsiimul ajintëlaul. 26Maa Per katul, a na ja: “Natsaan, nji buts man ci ñaan-najin.” 27Bi na wama bi ka ñakan ni nul, na niaj ee tsënk bañaan bacumal juk, 28a na ja bukul: “Nda me u niiranaatsa niints Najudeu pëbofëlar oo pëya di natsooŋ; maa Nasien-batsi apibanin n kaats pëja nin ñaan jëntsats oo waraatsa. 29Wul ka wun, in pokats pëbi, bi nduee bi; maa inkri, ma ŋal pëme ko wi m duurin wi?”
30A Korneeliu yankës aja: “Aro ba ntsari ngënu ngëbaakër, tsi uler pi wi; a n do ci tsi bëñaan, ngëler ngëwaants ngi bëtakala di kato nji; tsi uyëk umënts wun, a nalon niints nats tsi bërun nji, atiema iŋi ijielal, 31na ja: ‘Korneeliu! Bëñaanu ateaa, a kawël-bëtseendu lesaa di bërun Nasien-batsi. 32Yëlan ñaan di Jope na rui Simon, ni ka n jakee buts Per; aci natsooŋ di kato Simon ni ka leempëni itël, tsi kambaŋ bërëk.’ 33Din, a n yëli bañaan ba ruiu, a m do uwar bi m bi bink. Inkri, n ja ci bikink tsi bërun Nasien-batsi, pa pëte ngëko bëlieng ngi Ajug tsuu ngi pëja.”
Irim i Per ñakan yi di kato Korneeliu
34 #
Ulú 10.17
A Per jankmaul aja: “Tsi ucär, man yëkëran Nasien-batsi di ka kicës bañaan; 35maa tsi ucaak un ci wi-ba këci, na lënkuli a nuu ro ko u mab wi, në niiranul. 36Awëtani përimul pa babuk Israel, pa pëleents bukul Upetsan-uwar pëfac tsi Yeesu Këristu. Namëntsi ci-un Ajug bañaan bëlieng. 37Ind nda me përim pa leentsaa pi ajëk Judeeya bëlieng, akur-ni di Galileeya, bi Joŋ ba bi pëleents uleka bëmíja: 38bi Nasien-batsi tulari bi Yeesu Uwejats-ujënts ni pëyëlan, nul Kanpënë-ni-nasaret, a nuu yaana ngëleka bëlieng, nuu ro uwar, a nuu yësan bañaan bëlieng biki Ujabël tsu biki tsi pëluëk, par Nasien-batsi aci ni nul.
39A wund ci ba maatir biki ngëko ngi na ro ngi bëlieng tsi ucaak Bajudeu, ni di Jerusalem. Nul ni ba fiŋi tsi rialul di pëmul, 40maa tsi unu uwaajantsan Nasien-batsi natsaniul di pëcäts, a na tsuul na winaa; 41cits bañaan bëlieng winul bukun, maa bamaatir, biki Nasien-batsi ro biki car arat, un ci wi, wund ban diala biki ni nul, a wund raan tsëloole, bi na natsee bi di bacäts. 42A na tsu wund pëleents bañaan përim, ni pëpiban u ciul ci-un ni Nasien-batsi rati pëci nawat bayësal pëleents, ni bacäts. 43Ulekaul wi bayëlia bëlieng ñakandar wun aja: Na waki ba këwak tsi nul, në jampësaa ngëjuban tsi katimul.”
Ban cits biki Bajudeu, bë yank Uwejats-ujënts
44Bi Per wama bi ka ñakan irim yan, Uwejats-ujënts welee tsi ban ci biki bëlieng tsi pëcikëndën përim. 45A bafets Yeesu ban ci biki Bajudeu, ban do bukunk ci ni Per, win bi utseend Uwejats-ujënts koŋee bi buts tsi ban cits biki Bajudeu, a ba pikra bëlieng. 46Par, bë te bu kë ñakan mleents, a bu kë rëmban Nasien-batsi. Din a Per yjankema aja: 47“Ba yank bikink Uwejats-ujënts pinja ane ñaan yëlan pëlaaŋ bukul pëmijana tsi mlik-a?” 48Na tsu pa ba mijana tsi katim Yeesu Këristu. A ba ñaanul na ruka ni bukul ba ro ngënu.
Valið núna:
NGËRO 10: KPKNT
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.