G%E9nesis 14
14
Ma Abram kuto ma Lot
1Xuk'ulmaj che taq i ij le, chi ma Amrafel, are ajawinel re i tinimit Sinar, ma Arioc are ajawinel re i tinimit Elasar, ma Quedorlaomer, are ajawinel re i tinimit Elam xaq ma Tidal, are ajawinel re i tinimit Goim, 2i kajib' ajawinelab' le xki'an ch'oj chkij i jo'ob' chik ajawinel chi are kib'i iri: Ma Bera ajawinel re i tinimit Sodoma, ma Birsa ajawinel re i tinimit Gomorra, ma Sinab ajawinel re i tinimit Adma, ma Semeber ajawinel re i tinimit Zeboim xaq chrij i ajawinel re i tinimit Bela chi xaq Zoar ub'i. 3I jo'ob' ajawinelab' le xkimol kichi' i kiwinaq chi je yij che i ch'oj chila chwa ta'aj Sidim, chi are i Mar Kamnaq kb'ix che. 4I jo'ob' ajawinelab' le kab'lajuj junab' xkiya kib' pu'ab' i ajawinel ma Quedorlaomer, xwiri che i oxlajuj junab' xkijeq ch'oj chrij elsab'al kib' pu'ab'. 5Are uri che i junab' kajlajuj, ma Quedorlaomer xaq i jub'an chik ajawinel chi kiya'om kiwach ru', xe'e chu'anik ch'oj chkij i jalajuj taq tinimiti: Aj Refa k'a pa Astarot Karnaim xetiki wi chke, te'uri xaq xetiki chke aj Zuz pa Ham, aj Em k'a pa Save Quiriataim xetiki wi chke, 6i aj Hor xjeqan b'i kelsaxik chwi taq jyub' Seir k'a xk'is tikilem chke chila Parán chi o chuchi' i tz'inilik jyub' chaqij. 7Te'uri xetzalijik, i ma Quedorlaomer, are xeupon pa En-mispat chi xaq Cades ub'i, xkichup kiwach konojel aj Amalec, xaq i aj Hamor chi je o pa Hazezontamar.
8Are uri xe'el li ajawinelab': Ajawinel re i tinimit Sodoma, ajawinel re i tinimit Gomorra, ajawinel re i tinimit Adma, ajawinel re i tinimit Zeboim, xaq i ajawinel re i tinimit Bela, chi xaq Zoar ub'i; ike le xkimol kib' chwa ta'aj Sidim chu'anik ch'oj chkij, 9i ma Quedorlaomer ajawinel re i Elam; ma Tidal ajawinel re i Goim, ma Amrafel ajawinel re i Sinar, xaq ma Arioc ajawinel re i tinimit Elasar. Je jo'ob' ajawinelab' xki'an ch'oj chkij i kajib' ajawinelab'. 10Ronojel uwach i ta'aj re i Sidim le lik k'i i k'otom olik chi nojnaq che i ol eq, are xe'anmaj i ajawinel re i tinimit Sodoma xaq ajawinel re i tinimit Gomorra xetzaq chupam i k'otom le; i jub'an chik ajawinelab', xkich'ij anmajik chwi taq jyub'.
11I kajib' ajawinelab' chi xech'akan che i ch'oj, xkik'am b'i ronojel ni'pa i b'eyomal re i tinimit Sodoma, xaq re i tinimit Gomorra, xaq xkik'am b'i ni'pa kiwa te'uri xe'ek, 12xaq xkik'am b'i ma Lot chi rika' ma Abram, junam ru' ub'itaq re, man ire jeqel chila pa tinimit Sodoma, rumali xkik'am b'i ku'.
13Are uri jun chke i jub'an chi xkich'ij anmajik, x-e chub'ixkil che ma Abram chi aj Heber; chi ma Lot xchaptaj kumal i ajch'oj, i ma Abram le jeqel chila naqaj che i nimaq taq sik'al re i ma Mamre, chi aj Hamor, katz kicha' kib' ru' ma Escol xaq ma Aner. Ike le kiya'om kiwach ru' ma Abram.
14Are xuta ma Abram chi o chik rika' prexil pki'ab' ajch'oj, xumol kichi' umokom chi je alaxel prachoch chi xaq je yij che i ch'oj, je wajxaqlajuj jo'lajujwinaq (318) xeyiji konojel, are uri xeterej b'i chkij i ajawinelab', xekiriqa k'a chila che i tinimit Dan. 15Are cha'ab' chik te'uri ma Abram junam ku' umokom xe'ok chu'anik ch'oj chkij i je k'amawnaq b'i rika', xkijeq b'i u'anik ch'oj chkij chila pa Dan xetiki chke k'a pa Hoba, chi o pa moxab' che i Damasco. 16I ma Abram xtiki chumajik chke ronojel i b'eyomal chi kik'amom te'eq b'ik; xaq xtiki chrelsaxik ma Lot pki'ab', chi rika', rachi'ilam ub'itaq re. Xaq xtiki chkelsaxik ixoqib' pki'ab' xaq i jub'an chik winaq chi je k'amtal b'ik.
Mam Melquisedec xutz'onoj utzil chomal puwi ma Abram
17Are xtzalij li ma Abram chkich'akik i ajawinelab' chi je rachi'ilam b'i ma ajawinel Quedorlaomer, are uri i ajawinel re i Sodoma x-e chuk'ulaxik ma Abram chwa ta'aj chi Save ub'i, chi xaq Ta'aj re i Ajawinel kb'ix che. 18Xaq x-e mam Melquisedec, ajawinel re i Salem chi xaq ajsujul sipon chwach i Nim laj Dios, ire le xresaj li wa re trigo xaq uwa'al uva muqb'am. 19Te'uri xuya utzil chomal puwi ma Abram ru' i tziji:
“I Nim laj Dios chi xu'an i kaj xaq i ulew
chuya ni utzil chomal pawi;
20xaq lik nim ni u'ij i Nim laj Dios,
chi xeujach ajch'oj pa'ab'.”
Xcha.
I ma Abram xresaj usipon chi are i lajuj che i ch'akanik che ronojel ni'pa xuch'ako, xuya che mam Melquisedec. 21Are uri i ajawinel re i Sodoma xub'ij che ma Abram:
—Cheaya i winaq chwe yin, yet chak'ama i b'eyomal.
22I ma Abram xub'ij che i ajawinel re i Sodoma:
—Lik inb'im pub'i i Nim laj Dios, chi xu'an i kaj xaq i ulew, 23chi kink'am ti jurab'aj chij re t'isb'al xaq mijun uwach xajab' ronojel ni'pa awe yet, man keje ile kab'ij ti iri: Yin xinb'eyomarsaj ma Abram le. 24Lik nti kink'amo, xwi ile chi xkitij i alab'om; xwiri i achiyab' chi xeupon wu', chi ma Aner, ma Escol xaq ma Mamre, chkik'ama i ke ike —xcha.
Valið núna:
G%E9nesis 14: ACHICUB
Áherslumerki
Deildu
Afrita
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala