KALAQAMA 22
22
ABIRIHAAMI JIFAMA
1Hakkunni gedensaanni, Maganu Abirihaami jife laisi. Qoleno, «Abirihaami!» yee woshshisi; isino, «Mooticha'ya macciishsheemmona coyi'ri» yee dawari.
2«Baxattoha mitto beettokki Yisihaaqi haadhe Mooriyu Gobba ha'ri; hakkiicho ani kuleemmohe ilaali aana gorrite shilqote kakkalo assite shiqishie» yiisi. 3Abirihaami soodo gute kae kakkalote ikkitanno haqqe boce, harrichoho hogowi; lame soqqamaanosinna beettosi Yisihaaqi anga adhe Maganu kulinosiwa ha'ri. 4Sayikki barra Abirihaami alba qole lae, hakkonne darga fafe nooha afi. 5Isino soqqamaanosi, «Ki'ne harrichu ledo konne agarre; aninna beetti'ya ka'a marre Magano magansi'nummohu gedensaanni hingeemmona» yiinsa.
6Abirihaamino kakkalote giirranni haqqe beettisi Yisihaaqira duhisiisi; isi billawanna giira baccichoho haa'reenna lamunku mitteenni hadhu. 7Yisihaaqi annasi Abirihaami, «Annaanna!» yee woshshi. «Annisino maaho beetto'ya?» yiisi. Yisihaaqino, «Kune giiranna haqqe noonke; kakkalote ikkanno ge'rechi hiikko nooyya?» yee xa'mi.
8Abirihaamino, «Beetto'ya! Shilqote kakkalora ikkanno ge'recho Maganu qixxeessanno» yiisi. Lamunku mitteenni doogonsa hadhu.
9Maganu kulinosi darga iillituta, Abirihaami hakkiicho kakkalote darga seekki; haqqeno duuni; beettosi Yisihaaqi usure kakkalote darga haqqete aana haawiisse kari. 10Abirihaamino beettosi gorrara billawa haa'ri. 11Billawa haa're hee'reenna, Kaaliiqi sokkaasinchi gordoho hee're, «Abirihaami! Abirihaami!» yee woshshisi.
Isino, «Mooticha'ya macciishsheemmona coyi'ri» yii.
12Isino, «Beettokki kissooti; aanasi mittoreno assitooti; mitticho beettokki dimararootto; Magano ayirrasattohanna isira hajajamattoha ikkoottotano xa afoommo» yiisi.
13Abirihaamino caaqqi yee la"anno woyite, mitto ge'rechu goco dubbu giddo buuddasi dubbi-xuxe xaaxxe amadde nooha afi; Abirihaamino mare goco haa'ri; beettisi darga shilqote kakkalo asse shiqishi. 14Abirihaami hakko dargira, Yaahiwe Yirie#22:14 Yaahiwe yirie yaa Ibiraawootu afiinni Kaaliiqi qixxeessanno woy Kaaliiqi la"anno yaate. (Kal 22:8 lai). yee su'ma fushshi. Techo geeshsha mannu, «Kaaliiqi ilaalu aana qixxeessanno» yaanno.
15Kaaliiqi sokkaasinchi gordoho hee're Abirihaami layinkimeeshsho woshshe, 16-17«Kaaliiqi: Lowo geeshsha maassi'reemmohe gede su'mi'yanni xaareemmo. Konne assoottohuranna mitto beettokki anera ho'loottoekkihura, anino sirchokki gordu beeddahe gedenna baaru shaafi gede asse batiseemmo; sirchikki diinnansa qeele katammansa amadanno. 18Anera hajajamoottohura baattote aana noo manni baalunku sirchikkinni maassamanno» yiisi.
19Hakkunni gedensaanni Abirihaami soqqamaasinesiwa higeenna mitteenni galagalte Bersaabehi hadhu. Abirihaamino Bersaabehi hee'ri.
NAAKOORI SIRCHO
20Kuni baalu ikkihu gedensaanni, Abirihaami Milka rodiisi Naakoorira ooso iltinosita macciishshi. Iltinosi oosono: 21Umihu Uutsi, Buuzi, Araami anni Qemueeli; 22Keseedi, Haazo, Fildaashi, Yidilaafiitinna Beetueeliiti. 23Beetueeli Ribiqa ili; Milka kuri settenta ooso Abirihaami rodiira Naakoorira iltino. 24Reuma yinanniti Naakooriti irkote galte Xeebaahi, Gehaami, Tehaashanna Maaka yinanni ooso iltusi.
Valið núna:
KALAQAMA 22: QulMax
Áherslumerki
Deildu
Afrita
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014