KALAQAMA 21
21
YISIHAAQI ILAMA
1Kaaliiqi coyi'rinonte gede Saara towate yiino coye wonshise. 2Saarano godobbu; Maganu yiino yanna iillituta Abirihaamira geedhimmasi giddo labbaa beetto iltusi. 3Abirihaami, Saara iltinohura qaaqqisira su'ma Yisihaaqi yee fushshi. 4Maganu hajajinosi gede Abirihaami qaaqqosi Yisihaaqi settikki barra barcimshiishi. 5Abirihaami beettisi Yisihaaqi ilami yannara 100 diri geerchooti. 6Saarano, «Maganu oso'leemma gede assinoena, konne coye macciishshannohu baalu ane ledo oso'lanno» yitu. 7Qolteno, « ‹Saara Abirihaamira ooso ilte qansidhanno› yee hedinohu nooni? Xa kayinni kune geedhimmasi yannara labbaa beetto iloommasi» yitu.
8Qaaqquno lophe unuuna qana aguri; qaaqqoho unuuna hoollisi barra Abirihaami lowo jila jili.
AGGAARANNA ISMAEELI FUSHSHINE HUNNI
9Mitto barra Saara Gibitsitte Aggaara Abirihaamira iltinosihu Ismaeeli, qaaqqise Yisihaaqi ledo godo'lanna affu. 10Mitteenni godo'litanni noore affe Abirihaamira, «Tenne borojjicho beettise ledo kawiinni hoolie; tenne borojjichote beetti qaaqqi'ya Yisihaaqi ledo ragi'ra dihasiissannosi» yitusi. 11Ismaeelino beettosi ikkino daafira kuni coyi Abirihaami lowo geeshsha qarrisisi. 12Maganu kayinni Abirihaamira, «Qaaqqunna borojjichokki Aggaara daafira qarrantooti; sirchikki sirannohu Yisihaaqi widoonni ikkino daafira Saara yitannohere baala assi. 13Borojjichokki beettino ateha ikkino daafira lowo gosa ikkanno gede sirchosi batiseemmo» yiisi.
14Layinki soodo Abirihaami gute kae, shiima sagalenna waa maaqqete wonshe Aggaarara bayisiise qaaqqise ledo mininni fushshe ha'risise; iseno hakkiinni fulte Bersaabehi yinannitera molo baattora raataabbanni heedhu. 15Maaqqete noo wayi goofita, qaaqqo shiimu citi giddo worte agurtu. 16Iseno, «Qaaqqi'ya reyanna illetenni dilaeemma» yite hakkiichinni 100 qaafo geeshsha xeertidhe ofoltu; hakkiicho heedhe wi'litu.
17Maganuno qaaqqu raare macciishshi; Maganu sokkaasinchi gordoho hee're, «Aggaara! Mayi qarrisinohe? Maganu qaaqqu raare macciishshinona waajjitooti. 18Kai, qaaqqo haadhe hanqaffe dogisiisi; isono lowo gosa asseemmosi» yiise. 19Maganuno illese faneenna, wayi buicho affu; marte maaqqete waa wonshite abbite qaaqqoho hayikkissu. 20-21Qaaqqu lophi geeshsha Maganu ledosi no; Ismaeeli halallitte gobbara Faaraani hee'rino; digaanunni ugaaxate egennaminoha ikkino. Amasino Gibitsete ilama ikkitino beetto haadhusi.
ABIRIHAAMINNA ABEMELEEKI SHEEMAATE
22Hatte yannara Abemeleeki olantosi hajajaanchi Fiikooli ledo mare Abirihaamira, «Assatto coyi baalunkura Maganu ate ledo no. 23Xa anera, ooso'yaranna ooso'ya oosora busha coye assattokki gede Maganu su'minni xaarie; qolteno, atera dancha assummohe gede, atino aneranna hee'ratto baattora dancha coye assattoe gede Maganu su'minni xaarie» yiisi.
24Abirihaamino, «Maahoyye, yootto gede asseemmo» yiisi.
25Abirihaami, Abemeleeki soqqamaasine wolqatenni adhitinositera wayi bale daafira Abemeleekira qaxxadhi. 26Abemeleekino, «Konne assinohu ayitiro diafoommo; atino dikuloottoe; konne coye techo macciishsha'yaati» yiisi. 27Hakkunni gedensaanni Abirihaami ge'reewonna lalo abbe Abemeleekira uyisi; hakko barra lamunku mimmitu ledo sheemaate e'u. 28Abirihaami 7 ge'reewo hoshshatewiinni badi. 29Abemeleekino, «Konne lamalanka ge'reewo mayira badde uurrisitto?» yee xa'misi.
30Abirihaamino, «Konne lamalanka ge'reewo adhi; konne ge'reewo adhittoro tenne bale u'moommohu ane ikkoommota afatto» yii. 31Lamunku xaarte sheemaate e'inowa ikkino daafira hakkonne darga Bersaabehi#21:31 Bersaabehi yaa Ibiraawootu afiinni 7 woy sheemaatu buicho yaate. yini.
32Konne sheemaate Bersaabehi assidhuhu gedensaanni Abemeleekinna olantosi hajajaanchi Fiikooli Filisxeemete gobba higgu. 33Hakkunni gedensaanni Abirihaami Bersaabehira Tamaarisiki#21:33 Tamaarisiki yinanniti aanannootto labbanno haqqichooti. kaase Hegere Magano Kaaliiqa magansi'ri. 34Abirihaami Filisxeemete gobbara wosinchimmatenni seeda yanna hee'ri.
Valið núna:
KALAQAMA 21: QulMax
Áherslumerki
Deildu
Afrita
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014