LIKI 6
6
Yeesu bərdə hi bə faakeŋ
(Mat. 12.1-8; Mar. 2.23-28)
1Dər *hi bə faake kə Pepeŋa hõy məna, Yeesu hadlaŋ giidə aka də kaasawa. Kəya *kaa gə guuduŋ əsəŋ bə hiti kaasawa, yə bə surɓiya kəəsi daana bə hirɗiya. 2A ko toŋa kəya, sərdə kaanə *Farisiyeŋ əsəŋ bə wəətiya minti: «Aŋ ji karman bə minti ku gili náŋ a waataŋ cuuru minti wə a ji dər hi bə faake kə Pepeŋa baŋ haa naanaanə mo?» 3Yeesu hərnəy kel minti: «Aŋ aŋkaŋ kel gə minti *Davidi jiiniy də kaa gə guuduŋ hõy bə mo bə minti tay bə ɗəməyaŋ? 4Wə kəlaŋ giidə muryuki kə Pepeŋa, wə humuŋ mappa də minti yə a vaana a Pepeŋ, wə hamnaŋ, wə ayaŋ a kaa gə guuduŋ minti yə hamə la gəm. Anaaŋa ku gili náŋ bə waatə-waate minti hamə la ha'aŋ *kaa kə keere Pepeŋ təwa'i.» 5Yeesu wəətənəy pa minti: «Ten *Kormə Hulúm, ten haa bərdə hi bə faakeŋ.»
Yeesu seere hulum bə kəəsu gə mee-me
(Mat. 12.9-14; Mar. 3.1-6)
6Dər *hi bə faake kə Pepeŋ baalaŋa, Yeesu kəlaŋ giidə *kuli bə toose kə kaanə Ziwifiŋa, wə əsəŋ bə hate kaŋa ada. Hulum kəman yaŋ ada, kəəsu kemer wəra gə mee-me. 7*Kaa kə hate ku gili kə Pepeŋ də kaanə *Farisiyeŋ gə balə-bele minti té gaw də kel səm moŋ, yə əsəŋ bə gulu anə ɗeketi minti wə seere hulum yaŋ wəra dər hi bə faakeŋa ɗawmay mo? 8Səma Yeesu əsnəy ɗiki di wəra. Kəya wə waataŋ hulum bə kəəsu gə mee-meŋ minti: «Faa la apəya! Əsə la wəra anə ɗal gil aduuba.» Wə faŋ apəya, wə əsəŋ gil. 9Kəya Yeesu wəətənəy minti: «Ten laŋ kuŋ: dər hi bə faakeŋaŋ, kəkəy bə ayə-aye haa minti tam jəə hulum la pisi mo, ɗalba jəw la baymele mo? Tam siiru dədərgə du la wəra mo, ɓasə la wəra mo?» 10Wə gulnuy wəra məna-məna keɗe, kəya wə waataŋ hulum minti: «Ɗekrə kaasam la warna.» Wə ɗeŋ a ɗekre kəəsu warna anəkay, yə haraŋ wəra dədərgə faɗi. 11Kaanə Farisiyeŋ hoptoŋ wəra də waŋ anə je'-je'i. Yə əsəŋ bə ce awəya adəwaldə kumsi cəərə kel gə minti té jəə Yeesu la diiriŋ.
Yeesu vere kaa gə vaa-ve hor ciiri ɓasiŋ
(Mat. 5.1; 10.1-4; Mar. 3.13-19)
12Dər ko toŋa, Yeesu luŋ cəərə pərkiŋa bə ɗe a toose. Kəya wə həŋ wəra bə toose Pepeŋa. 13Bə minti koŋ wəlaŋ wəraŋ, wə mantaŋ *kaa gə guuduŋ. Kəya wə vəraŋ guudi hor ciiri ɓasi, wə məlnəy səməy minti *kaa kə vaa-veŋ. 14Kaa teŋ ha'aŋ anə Simoŋ bə minti wə məlnu səmu minti Piyer, siinu Andere, Zaki, Zaŋ, Filipi, Bartelemi, 15Matiye, Tomasi, Zaki kormə Alfe, Simoŋ bə minti bele seŋka nuutuŋ ablaw, 16Zudasi kormə Zaki, daana Zudasi Iskariyoti, hulum bə minti bə ji akolokiŋ yaŋ cəərə Yeesuŋ.
Yeesu seere kaa ablaw
(Mat. 4.24-25; Mar. 3.7-11)
17Bə minti Yeesu vaŋ warda cəərə pərki da diiriŋ, yə əsəŋ laki a ko paafayiŋa də *kaa gə guudu gə ablaw. Kaa gə ablaw bəŋ hãã Zude da keɗe, də Zeruzalem, də Tir daana Sidoŋ də minti agal də kan kəmtəŋ daŋ. 18Yə bəŋ a jeɓre kel kə Yeesuŋ, daana bə seere kusri wəra ku ɗeme neeteŋa. Kaa gə minti kəwal a bə ləsəyaŋ, yə seereŋ wəra. 19Kaŋ keɗe golde hel də malte kəəsi suru, gud bə minti səɓaki də seerte kaŋ kalte warda suru da daana a siirtiy ɗeme neeteŋ wəra keɗe.
Yeesu waate sam waaleŋ də lasiŋ
(Mat. 5.1-12)
20Kəya Yeesu haŋ duru apəya cəərə *kaa gə guuduŋa, wə wəətənəy minti: «Waaleŋ nəəti, aŋ kaa kə caacaŋ, gud bə minti *Kumna kə Pepeŋ nəəti. 21Waaleŋ nəəti, aŋ kaa gə minti kasi tay hebkənaŋ, gud bə minti aŋ bə seepe yaŋ wəra. Waaleŋ nəəti, aŋ kaa gə minti bə hage hebkənaŋ, gud bə minti aŋ bə awte hin yaŋ. 22Waaleŋ nəəti bə minti kaŋ malnaŋ dərəŋ ne wəra guudəna, minti yə balnaŋ aduubə di baŋ, minti yə sartənaŋ neŋ, daana minti yə waatənaŋ səmaŋ ne baymele gud *Kormə Hulúmaŋ. 23Aŋ waalə la dər hi toŋa, aŋ gadtə la də waale, gud maa mo werke bobloŋ bə məŋ na apəy na tarmə pepeŋ na. Golə la, kəmni a bə lese *kaa kə jogte ku mini kə Pepeŋa haa bədoona gəm.
24Səma lasiŋ cəərəŋa, aŋ kaa kə hurmaŋ, gud bə minti aŋ fəlaŋ waale nəətiŋ ne wəra. 25Gəəliŋ nəəti, aŋ kaa gə minti gə seepə-seepe hebkənaŋ, gud bə minti tay bə ɗəmaŋ yaŋ. Gəəliŋ nəəti, aŋ kaa gə minti a hina hebkənaŋ, gud bə minti aŋ bə laawe yaŋ, aŋ bə hage yaŋ. 26Lasiŋ cəərəŋa, aŋ kaa gə minti kaŋ keɗe aŋkaŋ pəsaŋ, gud bə minti kaa kə jogte ku mini kə Pepeŋ gə teteŋ, kəmni a jiitiniy bədoona gəm.»
Bele bə kaa gə acukur
(Mat. 5.39-47)
27«Səma ten bə waataŋa, aŋ kaa gə minti bə jeɓren kunaŋ: aŋ balə kaa kə acukur nəətiŋ la. Aŋ jəə pisiŋ la sar kaa gə minti malnaŋ dərəŋ ne wəraŋ. 28Aŋ gaa pisiŋ la cəərə kaa gə minti gaanaŋ guɗbusi neŋ, aŋ toosə la cəərə kaa gə minti bə lasəŋaŋ. 29Hulum laanam ne gabyamaŋ, əyu nayteŋ la gəm. Hulum humuŋ dəməəmə nəmti də cəərə kumsuŋ neŋ, yəəku la bə humi dəməəmə naytaŋa pa. 30Hulum mantaŋ karman ne kaasəmaŋ, əyu du la. Hulum humuŋ kar nəmtiŋ neŋ, a məntəy ba. 31Aŋ jəətə kaa la damdi minti aŋ də taynə minti yə jəətəŋ la bədoona anaŋ gəm.
32Aŋ jəəne bə bele haa kaa gə minti bə baləŋa təwaŋ, aŋ fele haa werke muntu mo? Kaa kə bayməlaŋ də kusri yə bele haa kaa gə minti bələy gəm. 33Aŋ jəəne bə ji pisiŋa sar kaa gə minti ji pisiŋ sarəŋa təwaŋ, aŋ fele haa werke muntu mo? Kaa kə bayməlaŋ jəəti bədoona gəm. 34Aŋ jəəne bə ceme bala a kaa gə minti ɗiki dəŋ minti teŋ bə haraŋ dəŋ yaŋ wəraŋ, aŋ fele haa werke muntu mo? Kaa kə bayməlaŋ ceme bal a kumsi gə bayməlaŋ bədoona gəm, a ɗikiŋa minti yə hare soloy kə teŋ yaŋ wəra a kuɗuŋa. 35Ana ɗaw, aŋ balə kaa gə acukur nəətiŋ la. Aŋ jəə pisiŋ la siri daana aŋ cəməy bal la bay ɗiki minti yə bə werkeŋ dəŋ yaŋ wəra. Bədoona, aŋ fele werke boblo yaŋ, aŋ ji yaŋ karmə Pep bə Daŋə-Deŋeŋ. Gud bə minti wə ji pisiŋ a kaa gə minti jəw suuse baŋ daana a kaa kə sərkəŋ. 36Aŋ asə caadə kaŋ la damdi Bəraŋ Pepeŋ ase caadə kaŋ ana.»
Aŋ a ceme kəəti də kumsaŋ ba
(Mat. 5.48; 7.1-12; 10.24-25)
37«Aŋ a ceme kəəti də kumsəŋ ba, Pepeŋ bə jəmaŋ kəəti cəərəŋa bə gəm. Aŋ a tope kaa də kəəti ba, Pepeŋ bə topoŋ də kəəti bə gəm. Aŋ vəəgə giidiŋ la wəra cəərə kaŋa daana Pepeŋ vəəgi giidu yaŋ wəra cəərəŋa gəm. 38Aŋ ayə la a kaŋ, Pepeŋ ayaŋ yaŋ gəm. Yə ayaŋ ŋeɓe pis-pisiŋ, bə degə-degeŋ, bə gasə-geseŋ, daana wəra bə ɗosə-ɗose fẽ-fẽ'iŋ yaŋ. Gud bə minti karman bə minti aŋ ŋaɓte kar a kaŋ duuruŋ, Pepeŋ ŋaɓtaŋ nəətiŋ yaŋ duuru gəm.»
39Yeesu waataŋ *ku kumti a niini pa minti: «Hulum bə bəwə-bəwi ge dər kumsu bə bəwə-bəwi yaŋ a kəkəya mo? Paapa! Yə ve wəra a tələŋkə ɓasi keɗe. 40Hulum bə hateŋ deŋe hulum bə hətuŋ ba, səma wə hataŋ ne nuutuŋ, wə bə ji wəra gəga də hulum bə hətuŋ.
41Tam ase kaɗəkaw weseki gə dər seenem səma, anaaŋa tam ase kəbaŋ kəmtəŋ gə dərəm baŋ, səm mo? 42Tam waate seenem naanaanə minti: ‹Seenənti, taakan la ten he kaɗəkaw weseki gə dərəm wəra›, anaaŋa kəbaŋ gə dərəm, tam ase teŋ baŋ mo? Tam bə minti waate kel kəna də kum təwaŋ, haa kəbaŋ gə dərəm la wəra kəm, adoro dərəm ase yaŋ wəra kəm pasa kirka he kaɗəkaw weseki gə dər seenem wəra.»
Kəbaŋ də we diŋ
(Mat. 7.16-21; 12.33-37)
43«Kəbaŋ pəsaŋ, we diŋ ji bayməlaŋ ba. Kəbaŋ gə bayməlaŋ, we diŋ ji pəsaŋ ba. 44Hulum ase kəbaŋ keɗe haa gud we diŋa. Hulum fele we də totkaŋ a gidiwgi ba. Hulum fele we də atələələmaŋ a amorkoya bə gəm. 45Hulum pisiŋ, pisiŋ kele warda haa ku tərmuyu pəsaŋ da. Hulum bə baymeleŋ, baymeleŋ kele warda haa ku tərmuyu də bayməlaŋ da, gud maa mo ku hulum waate ha'aŋ kel gə minti ɗusnu ku tərmuyu wəraŋ.»
Hulum bə hərsi kuli pisiŋ də hulum bə hərsi kuli bə baymeleŋ
(Mat. 7.24-27)
46«Aŋ mantan minti ‹Barkaŋ, Barkaŋ!›, anaaŋa aŋ paapa bə ji kel gə minti ten bə waataŋ dəŋa baŋ, səm mo? 47Hulum bə minti bi sarəna, əski kel nin, daana ji joŋre diiriŋ, ten gaŋ dərəŋ a hulum bə minti wə bə ŋarə-ŋere duuruŋ. 48Hulum toŋ bə ŋarə-ŋere də hulum bə minti hərsəŋ kuli. Wə jogɗoŋ koŋ kələm, wə gaŋ gud kuliŋ a ko gagraŋiŋ da. Bə minti kan haŋ, yə haŋ kuliŋ wəra də səɓaki. Səma kuliŋ geɗgeŋ ba, gud bə minti wə hərsəŋ pisi.
49Səma, hulum bə minti bə əski kel nina, anaaŋa wə paapa bə ji joŋre diiri baŋ, wə bə ŋarə-ŋere də hulum bə minti hərsəŋ kuli nuutuŋ anə faɗi bay jugɗu guudu. Bə minti kan haŋ kuli toŋ də səɓakiŋ, wə vaŋ wəra faɗi, kuliŋ puckuŋ wəra.» – 6 7
Valið núna:
LIKI 6: KERNT05
Áherslumerki
Deildu
Afrita
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.