ZAŊ Kel gə minti áŋ fələy giidə kefter toŋaŋ
Kel gə minti áŋ fələy giidə kefter toŋaŋ
Gud kefter waaɗe'i gə waate sam Kel pəsaŋ kəmarwaŋ, bə daŋə-deŋe kumsu minti kel duŋ wəra hal haa kə Zaŋ. Kel gə minti təpu kefter nuutuŋ də kə kaayaŋ soope'iŋ paapa ablaw ba. Aŋ fele ada haa me də Yeesu təwa (18.1—19.42) də kel gaalaŋ-gaalaŋ ada anə hiw bagŋ. Aŋ fele kel gaalaŋ giidə kefter nuutuŋa ada, teŋ paapa gə jeerə-jeere giidə kə kaa kaayaŋ soope'iŋa ba. Kel teŋ haa kəɗwəy gə ve kuliŋ giidə seŋka də Kaanaŋa (2.1-12), ŋefe də Yeesu də Nikodem (3.1-21), də həlgə də Samariŋ (4.1-12), də hulum bə hurufi bə Betsata (5.1-18), də hulum bə minti waŋ wəra bə bəwə-bəwi paŋ (9.1-41). Kefter kə kaayaŋ soope'iŋ ha'aŋ, áŋ falte kel gə minti jəətəŋ a ko bə minti Yeesu kəm caw giidu ablaw dəŋaŋ kə Zaŋ. Səma Zaŋ təkaŋ joŋre bə minti Yeesu juunu bə təpu də hate bə karman bə minti Yeesu a bəlaŋ hətu a kaŋ.
Kel nuutu gə minti wə məlaŋ gud jeereŋ diiri gə minti wə məltənəy ta'-ta'i bə gudul anaŋ (1.1-18), yə waate sam Yeesu minti wə kəna Kel kə Waateŋ kə Pepeŋ gə minti tewe baŋ. Wə koloŋ wəra hulum kisirki, wə bəŋ bə bi a ji aduubə də kaa kəsarkaŋa, wə haa Pəɗaki bə adəwaldiŋ, wə haa gəəziŋ, wə haa hulum bə aye dədərgə a kaŋ gəm.
Kefter kə Zaŋ, kəmtəŋ də kel gə giiduŋ ɓasi. Gə ajew haa kel kə Yeesu gə minti wə jiiniy ajew də cəwa nuutu də nekeŋ. Gə ɓasiŋ kel gə minti wə jiiniy də ko bə minti cəwa nuutuŋ nəkaŋ, bə minti wə me wəraŋ daana wə koore warna apəy na bə ɗe a isi a kasi kemer kə Pepeŋ naŋ (2.4; 12.23).
1. Ajew də cəwa du də minti ɗe yaŋ a neke hõy (1.19—12:50), áŋ fele ada haa kel gə minti kaŋ jəətəŋ bar kəkəy cəərə Yeesu diiriŋ. Kaa teŋ haa Zaŋ Batisi, Andere hulum bə minti a jəŋ guudu, Filipi daana Nataniyel, mindi mindi topoŋ bəlam də kel cəərə Yeesu haa də hel nuutu damdi wə əsnəy sar Yeesu ana. Adoro kəyaŋ, kefter kə Zaŋ tope bəlam də ŋafte bə minti Yeesu ŋafte də kaŋ daana miɗi bə minti wə juutunu seeɗa'iŋ. Miɗi toŋ veɗe wəra haa gəəzi də kel kə Pepeŋ. Zaŋ golde minti kaŋ əskə gud kel teŋ la.
2. Də ko bə minti cəwa nuutuŋ nəkaŋ (13.1), Yeesu ayaŋ kel nuutu gə adoroŋ a kaa gə guuduŋ minti yə jəə la anəkay-anəkay adordə me duŋ (13.1—16.33). Adoro wə əsəŋ bə toose bə ɗampe kusru bə ɗe a jeme dər meŋ daana wə ayaŋ kaa gə guuduŋ kasi Buru gud maa mo wə koore ha'aŋ, wə yəəkəy cəərə seŋkaŋa (17.1-26). A kel kə Zaŋ gə adoroŋa, wə jiiriniy damdi anə Matiye, Markə, daana Liki a jiiriniy ana gəm. Aŋ fele sam ɗe də Yeesu, de du də kəətiŋaŋ, ɓele du wəra a kəbaŋ gə largaŋaŋ, hare du wəra dədərgə adordə meŋaŋ, kaŋ fəlaŋ tələŋkəŋ wəra boobo gəm (18.1—20.29). Dər hi bə kəɗwəy gə Pakiŋaŋ, Yeesu vəɗaŋ kusru a Mari də Magdala daana a kaa gə guuduŋa daŋgeŋ a Tomasi. Adoro hiti maki, kaa gə guudu seeɗa'iŋ kooroŋ a ce aska a kan gə Tiberiyadiŋ, kəya yə ŋəfaŋ də Yeesu ku kana ada, wə əseŋ bə nele də Piyer (21.1-25).
Kel gə minti Zaŋ gaŋ cəərə kel nuutuŋ diiriŋ (20.30-31), yə ge gud kel wəra a hulum bə əŋkəy cəərə karman bə minti Zaŋ jeereŋ kefter guuduŋ, wə jiirunu haa minti hulum bə əŋkəy asə la minti Yeesu haa Hulum bə minti Pepeŋ a ŋəmnuŋ bə minti wə a wəətunu səmu wəraŋ, Kormə Pepeŋ. Yeesu, hulum bə minti Buru gəənu daŋ minti: «Ten haa kəkəy, ten haa gəəziŋ, ten haa dədərgəŋ.» Bədoona ana ta, hulum toŋ doŋ ne guuduŋ, wə fele dədərgə də bay teweŋ.
Áherslumerki
Deildu
Afrita
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.