ZAŊ 9
9
Yeesu seere hulum bə minti waŋ wəra bə bəwə-bəwi paŋ
1Bə minti Yeesu bə ɗe na caw, wə asaŋ hulum kəman bə minti waŋ warda haa bə bəwə-bəwiŋ. 2Kəya *kaa gə guuduŋ əsəŋ bə law ku minti: «Hulum bə hateŋ, hulum toŋ waŋ wəra bə bəwə-bəwi haa gud baymele kə mindi mo? Gud nuutu mo, ɗawba kə kəmnuŋ mo?» 3Yeesu minti: «Wə waŋ bə bəwə-bəwi paapa gud baymele nuutu ba, gud kə kəmnu bə gəm. Wə waŋ bə bəwə-bəwi haa minti joŋre kə Pepeŋ gaa guudu la wəra suru. 4Bə minti koŋ kəm daaway, áŋ kir ji haa joŋre kə hulum bə minti a gaanan daŋ. Ko bə duugŋ wəra maŋ, a ko toŋa hulum neke bə ji joŋre pəda. 5Bə minti ten kəm kəna caw cəərə seŋkaŋa, ten haa Pəɗaki kə kaa kə cəərəŋ.» 6Yeesu waataŋ kel teŋ bədoona waata kəyaŋ, wə tufuŋ kiɗiki adawra, wə halɓaŋ gedel diiri, wə sətnu dər hulum bə bəwə-bəwiŋa. 7Wə waataŋ hulum minti: «Ɗee la a baade dərəm wəra a goloŋ bə Siloweŋa.» (Siloweŋ haa minti ‹Karman bə minti yə gəənu da.›) Hulum kooroŋ, wə baadaŋ duru warda da ada. Wə haraŋ da ha'aŋ, duru máŋ bə ase.
8Kaa kə kuli nuutuŋ də kaa gə minti a əstunu bə mante kara diidəday, əsəŋ bə lete ku kumsi minti: «Haa hulum bə minti a jəŋ diidəday bə saaweŋ bə mo?» 9Sirdi minti: «Kəna tó», kaayaŋ minti: «Paapa tó ba, hulum toŋ həənu haa he bagŋ.» Hulum bə bəwə-bəwi minti: «Kəna ten!» 10Kəya yə əsəŋ bə law ku minti: «Dərəm bəŋəŋ wəra haa naanaanə biŋi mo?» 11Wə minti: «Hulum bə minti yə məntu Yeesu halɓaŋ gedel, wə satnan dən dərəna, wə waatənan minti: ‹Ɗee la a goloŋ bə Siloweŋ bə ɗe a baade dərəm wəra.› Kəya ten ɗeŋ, ten baadəna wəra, a əsəŋ bə ase faɗi.» 12Yə ləənu ku minti: «Hulum toŋ ane mo?» Wə minti: «Ten ase ba.»
Kaanə Farisiyeŋ le ku hulum bə minti duru bəŋəŋ wəraŋ
13Kəya yə kooroŋ də hulum bə minti a jəŋ bə bəwə-bəwiŋ sar kaanə *Farisiyeŋ. 14Doloy hi bə minti Yeesu a halɓaŋ gedel daana bəŋəŋ dər hulum wəra duruŋ, haa *hi bə faake kə Pepeŋ. 15Kəya kaanə Farisiyeŋ koloŋ bə le ku huluma gəm ta minti duru koloŋ bə ase haa naanaanə mo? Wə minti: «Wə satnan gedel dərəna, ten baadəna wəra, ten koloŋ bə ase.» 16Kəya sərdə kaanə Farisiyeŋ minti: «Hulum bə minti jəŋ kel teŋ neke bə bi sar Pepeŋ da ba, gud maa mo wə paapa bə humi kosoŋa cəərə *ku gili bə minti waate sam hi bə faakeŋ ba.» Sirdi kəman pa minti: «Hulum bə baymeleŋ neke haa naanaanə neke bə ji gom də miɗi toŋ kəyaŋ mo?» Kəya kuy ɓarsaŋ aduubə də kumsi faɗi.
17Kəya yə haraŋ bə le ku hulum bə minti a jəŋ bə bəwə-bəwi pa minti: «Tam gəm, hulum bə minti bəŋnəm dərəm wəraŋ, tam waate cuuru haa minti harmə gəm mo?» Wə hərnəy kel minti: «Wə haa *hulum bə jogte ku mini kə Pepeŋ.» 18Kəkamna kə tiinə kaanə Ziwifiŋ ɗempa a de haa minti hulum toŋ a jəŋ wəra bə bəwə-bəwi, hebkəna wə máŋ bə aseŋ ŋaanaanə moŋ ba hãã bə minti yə mantaŋ kəmnu da kəm. 19Kəya yə əsəŋ bə le ku kəmnuŋa minti: «Haa gila korməyoŋ mo? Aŋ waate minti wə waŋ warda bə bəwə-bəwiŋ mo? Jəəne bədoonaŋ, maa bə kulnu hebkəna bə ase mo?» 20Kəmnuŋ hərnəy kel minti: «Kəna kormə areŋ, wə waŋ wəra bə bəwə-bəwi. Kel teŋ də dər are. 21Səma karman bə minti jəŋ minti wə kolə la bə aseŋ, daana hulum bə minti bəŋnu duru wəraŋ, teŋ paapa də dər are ba. Aŋ law ku la. Wə máŋ wəra boblo bə hare kel cəərə kusru.» 22Kəmnuŋ waataŋ kel teŋ bədoona haa kas walka də kəkamna kə kaanə Ziwifiŋ. Gud maa mo yə a doŋ kuy wəra məna minti, hulum jəəne bə waate minti Yeesu haa *Hulum bə minti Pepeŋ ŋəmnuŋ, kəkəy paapa cuuru bə ɗe giidə *kuli bə toose kə kaanə Ziwifiŋa pəda. 23Gud teŋa ta kəmnuŋ minti: «Wə wəra boblo, aŋ law ku la.»
24Kəya kaanə Farisiyeŋ haraŋ bə mante hulum bə minti a jəŋ wəra bə bəwə-bəwiŋ. Yə minti: «Waatə gəəzi la wəra tiinə Pepeŋa. Wəra də dər are minti seerenem wəra haa hulum bə baymele.» 25Wə minti: «Wə hulum bə baymele mo, paapa mo, paapa də dərən ba. Karman bə minti ten əsnu məna'iŋ ha'aŋ, ten a jəŋ wəra bə bəwə-bəwi, hebkəna ten máŋ bə ase.» 26Yə ləənu ku minti: «Wə a jəənəm naanə mo? Wə bəŋnəm dərəm wəra haa də maa mo?» 27Wə minti: «Ten a topnoŋ bəlam di ne wəra, səma aŋ jeɓrenen kun ba. Aŋ bele minti ten harə la bə dogoŋ kela paŋ haa səm mo? Aŋ bele minti aŋ kolə la wəra *kaa gə guudu gəm ɗawmay mo?» 28Kəya yə əsəŋ bə sərtu minti: «Tam hulum bə gud hulum toŋ haa tam! Are teŋ, are haa *kaa gə gud *Moyisiŋ. 29Wəra də dər are minti Pepeŋ waataŋ kel a Moyisi. Səma hulum toŋ, wə bəŋ haa da ane da mo, paapa də dər are ba.» 30Wə minti: «Haa kəna kel kə ŋələ-ŋili dogna tə gəm bəŋa, ko bə minti wə bəŋ da adaŋ paapa də dərəŋ ba, anaaŋa wə bəŋnən dərən wəra! 31Wəra də dər áŋ minti Pepeŋ iski toose kə hulum bə baymele ba. Wə iski nuutuŋ haa toose kə hulum bə minti jəŋ ne bə jəw kese duŋ daana bə jəəti kel gə minti giidu bələy gəm. 32Də anə hãã ha'aŋ, hulum əskəŋ hõy minti hulum bəŋəŋ dər kumsu bə minti a waŋ wəra bə bəwə-bəwi ba. 33Hulum toŋ a bəəda kanda paapa sar Pepeŋ da baŋ, wə sə a neke bə ji karman ba anə ceki.» 34Yə minti: «A we dəm də anə hãã, tam saksaki dər baymeleŋa. Tam bə gədaŋ minti tam hate areŋ haa naanaanə mo?» Kəya yə sərmunu warda giidə kuli bə toose neeteŋ da faɗi.
35Yeesu əskəŋ minti yə sərmunu warda kəyaŋ, wə kooroŋ suru bə ɗe a wəətu minti: «Tam ha'aŋ, tam doŋ gud *Kormə Hulúma nuutu mo?» 36Hulum hərnu du minti: «Hulum bobloŋ, wə haa mindi mo, topon bəlam du la kir minti ten doo la guudu.» 37Yeesu minti: «Tam əsnu, bə waate kela dəərəm gila haa tó.» 38Hulum minti: «Barkaŋ, ten doŋ ne guuduma!» Kəya wə vaŋ də guguuru tiinə Yeesu faɗi. 39Yeesu minti: «Ten bəŋ cəərə seŋkaŋa haa bə bi a ke gud baymeleŋ wəra, kir minti kaa gə minti a jəŋ wəra gə bəwə-bəwiŋ kolə la bə ase, gə minti a jəŋ bə aseŋ, bəwə la wəra.»
40Kaanə Farisiyeŋ gə minti a jəŋ suru adaŋ əskəŋ kel teŋ kəyaŋ, yə əsəŋ bə law ku minti: «Are haa kaa kə bəwə-bəwi gəm tə mo?» 41Wə minti: «Aŋ a jəə la kəna gə bəwə-bəwiŋ, kel sə a doŋ ba. Səma aŋ minti dərəŋ bə ase tə kəm, kel kəm bə doo-de dəərəŋ haa sə teŋ.»
Valið núna:
ZAŊ 9: KERNT05
Áherslumerki
Deildu
Afrita
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.