ZAŊ 6
6
Yeesu aye hame a kaa kə ablaw
(Mat. 14.13-21; Mar. 6.30-44; Liki 9.10-17)
1Adordə kel teŋa kəyaŋ, Yeesu cakɗaŋ warna agal naaya ta də kan kəmtəŋ gə Galile na, yə mante kan teŋ minti kan gə Tiberiyadiŋ gəm. 2Kaŋ taptaŋ guudu ablaw gud bə minti yə astaŋ kar gə məɗ-miɗi gə minti wə jiini bə seerte kaa kə ɗemeŋaŋ wəra də diri. 3Kəya Yeesu luŋ wəra apəya cəərə pərki kəmana, wə əsəŋ ada je'i də *kaa gə guuduŋ. 4*Kəɗwəy kə kaanə Ziwifi gə minti yə məntəy Pakiŋ, a wəra maŋ bə ji gəm. 5Yeesu haŋ duru apəya bə gole kəyaŋ, wə asaŋ kaŋ bə ɗe da suru da ablaw. Wə əsəŋ bə le ku Filipi minti: «Áŋ fele mappa tó bə gusiŋ haa kəna ane mo minti áŋ əyəy di bə hameŋ?» 6Yeesu waataŋ kel teŋ haa bə gole koɗ Filipi. Karman bə minti tó Yeesu bə jəw wəra də duru ajew ɗaw.
7Kəya Filipi minti: «Soloy a jəə la nuutu kəna kasi náŋa kəs-kəsi ɓasi#6.7 Soloy məna, haa werke bə joŋre kə hulum dər hi məna'i. ɗaw, wə sə a neke bə gusi mappa kir minti mindi mindi mo falə la bə hame wesekiŋ ba.» 8Hulum bə guudu baalaŋ, yə məntu Andere, wə haa seenə Simoŋ Piyer, waataŋ Yeesu minti: 9«Pur kəman yaŋ kəna, mappa də jəə-ji də kaasaw orjəŋ#6.9 Mappa də kaasaw gə orjəŋ, haa hame kə kaa kə caacaŋ. yaŋ kəəsu wiiɗiw, də aska ada ɓasi gəm. Səma kar teŋ kəya neke haa mindi mo?»
10Yeesu minti: «Aŋ baarə kaŋ la adawra.» Kaɗəkaw sããya jəŋ a ko toŋa ablaw, kaŋ baaraŋ ada faɗi. Kaa kaŋkar aduubə də kaŋa ada karman bə guɓ-guɓi wiiɗiw. 11Kəya Yeesu humuŋ mappaŋ kəəsu, wə jəŋ suuse a Pepeŋ cəərə, wə ɓarsəna a kaa gə minti adaŋ. Wə jəŋ bədoona də askaŋ gəm. Wə əynəy di damdi giidi a bəlaŋ ana. 12Kaŋ seepteŋ wəra a tay di, kəya Yeesu waataŋ kaa gə guuduŋ minti: «Aŋ kotə gud mappa də yaaktə-yaakteŋ la keɗe kir minti kumundu a ɓalke wəra anə məna ba.» 13Kəya yə kotnə cəərə, yə ɗostoŋ kəlam hor cuuru ɓasi də gud mappa də minti a taakaŋ gud wiiɗiwaŋ də minti kaŋ a hamaŋ.
14Kaŋ asaŋ miɗi bə minti Yeesu juunu kəyaŋ, yə əsəŋ bə waate faɗi minti: «*Hulum bə jogte ku mini kə Pepeŋ bə minti kel a wəra gə jeerə-jeere cuuru minti wə bi yaŋ cəərə seŋkaŋaŋ, haa hulum toŋ gəəzi ɗe.» 15Yeesu asaŋ faɗi minti yə bi a de tó bə isi kumna ciiri a waŋ kəyaŋ, wə haraŋ bə he guudu na warna cəərə pərki na máŋ tó məna bay cuuru.
Yeesu ɗe də kəmpuru cəərə kana
(Mat. 14.22-27; Mar. 6.45-52)
16Cəwaŋ dəraŋ wəra kəyaŋ, *kaa gə gud Yeesuŋ sorkoŋ warna ku kan kəmtəŋ na. 17Yə luŋ giidə turtiŋa bə ɗe Kapernam agal naaya taŋ na. Koŋ a ziɓiŋ ne wəra ɗaw, Yeesu a kəm bay tuli siri gəm. 18Kaŋkaw kəmtəŋ bə ji, kəya kan əsəŋ bə layte. 19Yə a hoɗoŋ wəra karman bə kelewmeeter kənki, kəya yə asaŋ Yeesu bə bi da caw cəərə kan da də kəmpuru sar turtiŋ da. Kəya walkaŋ jəmnəy faɗi. 20Səma, Yeesu wəətənəy minti: «Aŋ a ji walka ba, kəna ten!» 21Kaa gə guuduŋ a bəlaŋ haa minti té haw giidə turtiŋa. Ɗe a goleŋa, turti məlaŋ ne wəra ku keeŋe a ko bə minti yə bə ɗe na ada naŋ ɗaw.
Kaŋ golde Yeesu
22A dibiiniŋa, kaa kə ablaw gə minti a cakɗaŋ warna agal naytaŋ na də *kaa gə gud Yeesuŋ baŋ, yə ɗəkəŋ minti deegŋ ha'aŋ, turtiŋ a jəŋ məna faɗi. *Kaa gə gud Yeesuŋ a luŋ giidə bə kooreŋ haa té təwa, Yeesu luŋ guudi ada ba. 23Kəya sərdə kətartaw kəman tuukuŋ agal də vil də Tiberiyadiŋ da anəkay. Yə məlaŋ wəra a ko bə minti Yeesu a ayaŋ mappaŋ a kaŋ adordə bə minti wə a jəŋ suuseŋ cəərəŋ. 24Kaŋ asaŋ anəkay minti Yeesu paapa a ko toŋa ada pəda də kaa gə guuduŋ, yə raawaŋ bə li giidə turtiŋa, yə kooroŋ Kapernam bə ɗe a guldu.
Yeesu haa hame bə aye dədərgəŋ
25Kaŋ ɗeŋ a fele Yeesu warna agal naaya ta də kan də aŋar də Kapernam na. Yə əsəŋ bə law ku minti: «Hulum bə hateŋ, tam tuluŋ wəra kəna haa kotnə mo?» 26Wə minti: «Gəəzi, gəəzi, ten waataŋ, aŋ goldon zuga haa gud minti aŋ a hamaŋ mappaŋ, aŋ seepteŋ wəraŋ. Aŋ goldon paapa gud bə minti aŋ əskəŋ gud miɗi bə minti ten juutunuŋ ba. 27Aŋ jəə joŋre la, paapa bə fele hame bə minti ɓalke wəraŋ ba. Aŋ jəw la ɗaw haa bə fele hame bə minti toŋ bə ji yaŋ saksaki daana aŋ fele dədərgə də bay teweŋ guuduŋ. Hame toŋ ha'aŋ, bə ayaŋ dəŋ haa ten *Kormə Hulúm, gud maa mo Barən Pepeŋ məlaŋ kəəsu cəərəna minti tó aynan abay kə toŋ.»
28Kəya yə ləənu ku minti: «Joŋre bə minti giidə Pepeŋ bele minti are jəə tó laŋ, haa muntu mo?» 29Wə hərnəy di minti: «Joŋre bə minti Pepeŋ bele minti aŋ jəw laŋ haa minti aŋ doo la guudəna, ten bə minti wə gaanan daŋ.» 30Yə minti: «Tam bə ji haa miɗi muntu mo minti are asə la daana are doo la guudumaŋ? Tam bə ji haa maa mo? 31Hame bə minti yə məntu ‹man›, kəmoomo də áŋ a həmnu a ko bə minti yə a kəm giidə ful daŋ, damdi wəra bə jeerə-jeere giidə Kefter kə Pepeŋa ana minti: ‹Wə əynəy hame bə minti bəŋ apəy daŋ#6.31 Ex. 16.15.›» 32Wə hərnəy kel minti: «Gəəzi, gəəzi, ten waataŋ, hame bə minti bəŋ apəy daŋ, aynaŋ dəŋ haa paapa moomo də áŋ *Moyisi ba. Barən ayaŋ hame bə gəəzə-gəəziŋ haa tó. 33Gud maa mo hame bə minti Pepeŋ əyuŋ, haa tó bə minti bi apəy da daana aye dədərgəŋ a kaa gə cəərə seŋkaŋ.» 34Yə minti: «Hulum bobloŋ, hame toŋ kəyaŋ, əytu la a are saksaki.»
35Yeesu wəətənəy minti: «Ten kəna hame bə minti aye dədərgəŋ a kaŋ. Hulum bə minti bəŋ da ne sarən daŋ daana wə doŋ ne guudənaŋ, tay ɗəmu hõy ba, kinkin daw hõy bə gəm. 36Səma ten a waatənaŋ kel teŋ warda: aŋ asnan də dərəŋ, də teŋ keɗe aŋ doŋ guudəna ba. 37Kaa gə minti Barən ayan dən, yə bi sarəna keɗe. Hulum bə minti bəŋ ne sarənaŋ, ten həru duru warna ba anə ceki. 38Gud maa mo ten bəŋ apəy da haa bə bi a ji kar gə minti giidə Pep bə minti gaanan daŋ bələy, paapa gə minti giidən bələy ba. 39Pep bə minti gaanan daŋ, karman bə minti giidu bəluŋ haa minti, kaa gə minti tó a aynan dən, ten a lente kumundu wəra guudi anə məna ba daana minti ten hərəy la wəra dədərgə adordə meŋa dər hi bə adoroŋa. 40Bədoona ana, karman bə minti giidə Barən bəluŋ haa minti, mindi mindi mo asaŋ ten kurmuyuŋ neŋ daana doŋ ne guudənaŋ, wə falə dədərgə də bay teweŋ la, daana ten həru la wəra dədərgə adordə meŋa dər hi bə adoroŋa.»
41Kəya kaanə Ziwifiŋ əsəŋ bə ŋorme kuya cəərə Yeesu gud kel gə minti wə a wəətənəy minti: «Ten kəna hame bə minti bəŋ apəy daŋ.» 42Yə minti: «Wə haa Yeesu kormə Zosefiŋ bə mo? Anə buru də nuru, yə wəra də dər áŋ pisi. Wə bə əsəŋ bə waate hebkəna gila minti tó bəŋ apəy daŋ haa naanaanə mo?» 43Yeesu jəmnəy kuy minti: «Aŋ a ŋorme kuŋ aduubə də kumsəŋa ba. 44Jəəne minti Barən bə minti gaanan daŋ zeŋ hulum sarən da baŋ, wə neke bə bi sarəna ba. Dər hi bə adoroŋa ha'aŋ, ten həru yaŋ wəra dədərgə adordə meŋa. 45*Kaa kə jogte ku mini kə Pepeŋ a jeereŋ warda minti: ‹Kaŋ keɗe Pepeŋ hətəy yaŋ haa tó#6.45 Es. 54.13›. Mindi mindi mo əskəŋ ku Barən neŋ, wə doŋ hate nuutu neŋ, toŋ bi sarəna. 46Ten waate haa paapa minti hulum kəman asaŋ Barən Pepeŋ də duru ŋaanaanə moŋ ba. Əsnu haa ten təwa, ten bə minti bəŋ suru daŋ. 47Gəəzi, gəəzi, ten waataŋ, hulum bə minti doŋ ne guudənaŋ, dədərgə də bay teweŋ máŋ nuutu ɗaw. 48Ten kəna hame bə aye dədərgə a kaŋ. 49Hame bə minti yə məntu ‹man›, kəmoomo dəŋ a həmnu giidə ful da, də teŋ keɗe yə meŋ wəra. 50Səma hame bə minti bi apəy daŋ, toŋ haa gidiirə hame bə minti hulum həmnu neŋ, wə me pəda. 51Ten də kusrən haa hame bə minti aye dədərgəŋ, bə minti bəŋ apəy daŋ gəm. Hulum bə minti hamaŋ hame tó neŋ, toŋ ji yaŋ caw bə faɗnə-faɗna. Hame bə minti ten bə əyu kir minti kaa gə cəərə seŋkaŋ falə dədərgəŋ laŋ, haa kusuki dən gadi faɗi.»
52A ko toŋa kəyaŋ, kaanə Ziwifiŋ əsəŋ bə ce awəya aduubə də kumsi wəra hasi minti: «Hulum toŋ, wə bə aye kusuki du a náŋ minti aŋ həmu laŋ haa naanaanə aye mo?»
53Kəya Yeesu wəətənəy minti: «Gəəzi, gəəzi, ten waataŋ, hulum bə minti hamnan kusuki də ten Kormə Hulúm baŋ daana saanan kor dən bə gəm, dədərgəŋ ji giidu ba. 54Hulum bə minti hamnan kusuki dən neŋ daana saanan kor dən ne gəm, dədərgə də bay teweŋ máŋ nuutu. Dər hi bə adoroŋa, ten həru yaŋ wəra dədərgə adordə meŋa. 55Gud maa mo kusuki dən haa karman bə hame bə gəəzə-gəəziŋ, kor dən haa karman bə se bə gəəzə-gəəziŋ gəm. 56Hulum bə minti hamnan kusuki dən neŋ daana saanan kor dən ne gəm, wə ji yaŋ bə tapə-tepe dəərən, ten ji yaŋ bə tapə-tepe duuru gəm. 57Aba bə dədərgəŋ gaanan da, ten caw haa kir kəəsu gəm. Gud teŋa ta, hulum bə minti hamnan kusuki dən neŋ, ji caw haa kir kaasən gəm. 58Haa kəya hame bə minti bəŋ apəy daŋ. Wə wəra hal də ‹man› də minti kəmoomo dəŋ a hamnaŋ, də teŋ keɗe yə bə meŋ wəra. Səma hame tó bə apəyaŋ, hulum həmnu neŋ, wə ji dədərgə caw bə faɗnə-faɗna.» 59Haa kəya kel gə minti Yeesu hətnəy a kaŋ giidə *kuli bə toose kə kaanə Ziwifiŋa Kapernamaŋ.
Tepe gud Yeesuŋ
60*Kaa gə gud Yeesuŋ əskəŋ kel əska kəyaŋ, ablaw diŋ əsəŋ bə waate faɗi minti: «Kel teŋ kəya yə gəəli, minti toŋ doy mo?» 61Yeesu asaŋ kaa gə guuduŋ bə ŋorme kuya gud kel teŋa anəkay, wə wəətənəy minti: «Kel teŋ hogtonoŋ tarməyaŋ mo? 62Aŋ bə asaŋ ten *Kormə Hulúm ne bə hare na apəy na a ko bə minti ten a jəŋ da adaŋ, ɗiki dəŋ bə ji máŋ naanaanə mo? 63Tiirə Pepeŋ aye dədərgəŋ haa tá, hulum də kusru neke bə ji karman ada ba. Kel gə minti ten a waatənaŋ dəŋ kənaŋ, Tiiruŋ bi cəərəŋa haa guudi bə ayaŋ dədərgəŋ. 64Səma sərdəŋ aduubə dəŋa paapa bə de guudəna ba.» Anaaŋa, kaa gə minti bə de guudu baŋ daana hulum bə minti ji akoloki yaŋ cuuruŋ, yə a wəra də duru da anə hãã faɗi. 65Yeesu wəətənəy ada pa minti: «Ten waatənaŋ minti bi sarəna haa kaa gə minti Barən əynəy kəkəy bə biŋ təwa haa sə teŋ derra faɗi.»
66Də ko toŋ kəyaŋ, ablaw də kaa gə guuduŋ haŋ giidi wəra suru, yə bəlaŋ ɗe guudu pəda. 67Yeesu laŋ ku kaa gə guudu hor ciiri ɓasiŋ minti: «Aŋ gəm, aŋ bele koore gəm mo?» 68Simoŋ Piyer minti: «Barkaŋ, kel gə minti aye dədərgə də bay teweŋ, yə kaasəma, are bə ɗe kəna sar mindi pə mo? 69Are teŋ, are doŋ guuduma, are asaŋ wəra gəm minti tam haa Hulum Cetceti bə minti Pepeŋ gəənu daŋ.» 70Yeesu minti: «Aŋ kaa hor cəərəŋ ɓasiŋ, varnaŋ warda haa ten bə mo? Anaaŋa hulum yaŋ aduubə dəŋa məna'iŋ, toŋ haa kəwal gadi!» 71Wə waataŋ kel teŋ bədoona haa cəərə Zudasa, kormə Simoŋ Iskariyotiŋ, gud maa mo bə ɗe a ji akoloki wəra cəərə Yeesu haa tó, wə a nuutu aduubə də kaa gə guudu hor ciiri ɓasiŋaŋ.
Valið núna:
ZAŊ 6: KERNT05
Áherslumerki
Deildu
Afrita
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.