Luki 24
24
Jesu fiima bi tinkpiba siiga
24
Jesu ñani li takuli nni
(Mat 28.1-10; Mrk 16.1-8; Jan 20.1-10)
1Aŋada daali, ku tiŋaapanpangu, bi puoba yeni den taa ban tuodi ki bogini yaa tibidi ke ti pia u nuulumanu yeni, ki guani ki gedi li takuli po. 2Bi den sua ke yaa tanpabigu n bii li takuli ñoabu bindi ki pigidi. 3Bi den kua li takuli nni ki lingi, baa den laa o Diedo Jesu. 4Ban kaa den bani ban baa maali yaala, jabilie yaaba n la yaa tiadi n ñuliti den doagidi ki sedi bi kani. 5Ti jawaanciandi den cuo ba ke bi tibini bi nunmu ki nua tiipo. Bi jaba yeni den yedi ba: «Be yaa po ke yi lingi yua n fo yaaba n kpe siiga? 6Waa go ye ne, o fii bi tinkpiba siiga. Tiadi mani ke wan den ye Galile po, #Mat 16.21; 17.22-23; 20.18-19; Mrk 8.31; 9.31; 10.33-34; Luk 9.22; 18.31-33. 7o den yedi yi: ‹Li tie tiladi ban cuo o Joa Bijua ki teni ti o tuonbiadi danba, ban joani o li dapoanpoanli po. Ama li dataali daali, o baa fii bi tinkpiba siiga.› » 8Lani, bi puoba yeni den tiadi Jesu maama.
9Bi den ñani li takuli kani, ki kuni ki ban togidi laa bonla bi piiga n niyendiba leni yaaba n sieni kuli. 10Yaa puoba n den togidi Jesu tondiba laa bonla den tie Magidala dogu yua Mariyama, Janni, Jaki naa Mariyama leni puotoaba yaaba n den ye leni ba. 11Jesu tondiba den tama ke ban togidi yaala tie mafanma. Baa den dugi ke bi maama tie moamoani. 12Ama Pieli den fii ki sani ki gedi li takuli po. O den buani ki noanli lienni, ki laa ban den fini fini o kpiemo yaa cabipiena bebe n bili. O den lebidi ki kuni, ke yaala n tieni paki o boncianla.
Yaala n tieni Emayusi sanu nni
(Mrk 16.12-13)
13Landaali bi ŋoadikaaba siiga nibilie den caa Emayusi dogu, ke li foagi leni Jerusalemi nani piiga n kilo dajenbiyenga. 14Bi den cuoni ki maadi leni biyaba yaala n den tieni tieni kuli. 15Ban den maadi ki nia leni biyaba yaa yogunu, Jesu wani o ba den nagini ki yegi leni ba. 16Bi den laa o, ama li den duagi bi po ke baa bandi o. 17O den yedi ba: «Yi cuoni ki boe be ke yi pala biidi nanda?» 18Bi siiga yendo ke bi yi o Kileopasi den guani ki yedi o: «Yaaba n ye Jerusalemi siiga kuli, fini bebe n ki bani yaa bonla n tieni u niinni a dana ne?» 19O den buali ba: «Be n tieni?» Bi den guani ki yedi o: «Yaa bonla n tieni Jesu, Nasareti yua, yua n den tie U Tienu leni bi niba kuli nintuali, yaa saawalipualo n pia u paalu a tuona po leni mi maama po kuli. 20Bi kopadicianba yudanba leni ti yudanba den cuo o, ki teni ke bi jia o buudi ki bili ke ban kpa o. Bi den joani o li dapoanpoanli po. 21Tinba, ti den daani ke wani n baa faabi Isidayeli buolu. Ama dinla n tie danataa leni laa bonla n tieni. 22Ti siiga bi puotianba maama paki ti. Bi bi yagidi ki gedi li takuli po dinla ku tiŋaapanpangu, 23kaa ban laa o kpiemo. Bi guani ki yedi ti ke bi laa malekinba yaaba n doagidi bi yula bi kani, ki waani ba ke Jesu fo. 24Ti lieba bi tianba gedi li takuli po ki ban sua ke li bonla kuli tie nani bi puoba n yedi maama, die baa laa wan wani.»
25Lani, Jesu den yedi ba: «Yinba bi yanpiidanba na, yaaba n ki jaligi ki baa daani bi saawalipuaba n den yedi yaala kuli. 26Naani laa den tie tiladi ke U Tienu n Gandi Yua n le fala yeni, ki kua o kpiagidi kaanu?» 27Lani, Jesu den cili leni Musa yaa maama kani, ki pundi bi saawalipuaba yaama, ki bundi bi po i Diani nni kuli yaala n den maadi o po.
28Ban den nagini ban caa yaa dogu, Jesu den tieni nani o bua ki pendi ki suagi liiga. 29Ama bi den yie o po, ki yedi: «Sedi leni ti kelima u yienu kua ke u kaanu mo boandi.» Lani, o den kua ki sedi, ki ye leni ba. 30Wan den kaa u saajekaanu kani leni ba, o den taa dupen ki tuondi U Tienu ki cabidi ki teni ba. 31Lani, bi nuni den ŋubidi ke bi bandi o. Ama o den yindi bi siiga ke baa go laa o. 32Bi den yedi biyaba: «Wan bi maadi leni ti u sanu nni ki bundi ti po i Diani n yedi yaala yeni, laa bi tie nani u mu n co ti pala nni yeni ka?»
33Lanyogunu liga bi den fii ki guani Jerusalemi, ki laa ke bi piiga n niyendiba leni bi ŋoadikalieba taani ki kaa. 34Bi den yedi ba: «O Diedo fii bi tinkpiba siiga moamoani lige. O doagidi o yuli Simon po.» 35Bani bi niliediba yeni mo den togidi yaala n tieni u sanu po leni ban bandi Jesu maama, wan cabidi dupen yaa yogunu.
Jesu doagidi o yuli o ŋoadikaaba po
(Mat 28.16-20; Mrk 16.14-18; Jan 20.19-23; JTT 1.6-8)
36Ban den maadi laa bonla yaa yogunu, Jesu wani o ba den doagidi ki sedi bi siiga ki yedi ba: «Mi yanduanma n yaa ye leni yi.» 37I jeje leni ti jawaanciandi den cuo ba, kelima bi den tama ke bi laa jiingoe. 38Jesu den yedi ba: «Be n teni ke yi yama yagi yeni? Be yaa po ke yi pia laa yanmaalibuolu? 39Diidi mani n nii leni n taana, mini lige. Sii mani n nii ki le, jiingu naa pia gbanandi leni kpaba, nani yin nua ke n pia maama.» 40Wan den maadi yeni, o den waani ba o nii leni o taana. 41Li pamancianli po n den teni ke bi daa den daani o maama ki go ye leni ti jawaandi yeni, o den buali ba: «Yi pia li bonjekaala nekanba bi?» 42Bi den teni o li janjenŋoabidili. 43O den gaa ki ŋmani bi nintuali.
44Lani, o den yedi ba: «Line n tie min da den ye leni yi ki wangi yi yaala, ke li tie tiladi ke yaala n diani ki bili n po Musa bali maama nni, bi saawalipuaba leni Pisomi tila nni kuli, n tieni ki dudi.» 45Lanwani, o den libidi bi yantiali ke ban fidi ki gbadi i Diani n yedi yaala. 46Lani, o den yedi ba: «Li diani ki yedi, ke U Tienu n Gandi Yua baa le fala, ki yuandi ki fii bi tinkpiba siiga li dataali daali. 47Bi baa cili Jerusalemi na ki yadi ki gedi i nibuoli kuli po, ki ban yaa wangi ke bi niba n lebidi bi pala, ki baa sugili bi tuonbiadi po. 48Yinba n tie laa bonla siedinba. 49Mini n ba baa soani yi po n Baa n niani yaala. Ama yin yaa ye mani u naa dogu nni hali tanpoli paalu n baa jiidi yi po.» #JTT 1.4.
Jesu doni tanpoli
(Mrk 16.19-20; JTT 1.9-11)
50Li yaa puoli, Jesu den ñani ba u dogu nni, ki gedini ba hali ki ban kuli Betani dogu. O den yugidi o nii ki gaali ba. #JTT 1.9-11. 51Wan den gaaliti ba yaa yogunu, o den paadi leni ba ki doni tanpoli po. 52Ama bani wani n den gbaani ki pugi o ki gbeni, bi den lebidi ki guani Jerusalemi leni li pamancianli. 53Bi den ye U Tienu diegu nni daali kuli, ki pagi U Tienu.
Valið núna:
Luki 24: BGP
Áherslumerki
Deildu
Afrita
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.