LUKA 21
21
1Jesu den diidi ki laa ke a piada kpiendi bi paabu U Tienu diegu ligitiagu nni. 2O go den laa ke o kpepoluodo mo kpieni falino lie lienni. 3O den yedi: «N waani yi i moamoani, o kpepoluodo na puni ki cie yaaba n sieni kuli. 4Kelima bikuli ñani bi ŋalimani nni bi ligijodi ki kpieni, ama wani, leni o luoma kuli o ñani wan pia yaala kuli ki baa je, ki kpieni.»
Jesu pua sawali ke bi baa bolini U Tienu diegu
(Mat 24.1-2; Mak 13.1-2)
5Bi nitianba den maadi U Tienu diegu maama, ban den maa leni yaa tanŋama, leni bi niba n den puni U Tienu yaa paabu ki bogidi gu. Jesu den yedi: 6«A dana baa ti cua ke yin nua yaala na, bi kan ti ŋa baa tanyenli kan sieni ki yaa maa li lieli po, ke a kuli naa padi ki baa.»
Yaa fala n baa ti cua mi juodima yogunu
(Mat 24.3-14; Mak 13.3-13)
7Bi den buali o: «Canbaa, u laa yogune ke li baa cua? Be n baa tua li sinankeeno ke li yogunu bua ki pundi?» 8Jesu den goa ki yedi: «Fangi mani yi yula ke ban da boandi yi, kelima bi niba boncianla baa ti cua n yeli nni ki yedi: ‹Mini n tie *U Tienu n Gandi Yua›, ki go yedi: ‹U yogunu nagini.› Yin da ŋoadi ba mani. 9Yi yaa ti gbadi ke bi maadi ke bu toabu maama, ki go gbadi ke bi maadi mi janjanma maama, yin da tuo lan jieni yi, kelima laa bonla baa kpa cua tiladi, ama lanyogunu da ka baa tua mi juodima.» 10O go den yedi ba: «U nibuolu baa fii ki tuogi leni nibuoto, mi diema mo baa fii ki tuogi leni dietoama. 11Mi tindigibicianma baa tiendi, mi koncianma leni i yianbiadipuodike moko baa tiendi i kaantiami, li bonlidikacianla yaala n pia i jeje leni yaa sinankeeni n yaba baa ña tanpoli ki tiendi. 12Ama hali ke lankuli daa tieni, bi baa cuo yi ki waani yi fala, ki teni yi li *bali maama bangima diena yudanba nu nni, ki kuani yi a kpaadidiena nni, ki gedini yi bi badicianba bujiali kani leni gufeneelinba bujiali kani kelima n yeli po. 13Likuli baa pa yi u sanu yin tieni npo siedi. 14Ama yin yaa bani yi yama nni ke laa tie yin tuodi ki kpaagi yin baa ti maadi yaala ki ga yi yula.#Luk 12.11-12 15Kelima mini nba baa ti pa yin baa maadi leni yaa yanfuoma ke yi koanginkaaba siiga baa yendo kan fidi ki nia ki yie ma. 16Baa yi danba leni yi kpeliba leni yi waamu leni yi kpiiba leni yi danlinba baa janbidi yi ki tendi yi yi yibalinba nuu nni, bi baa kpa yi siiga bi tianba. 17Bi niba kuli baa nandi yi kelima n yeli po, 18die yi yudi baa yuyengu kan baa tiipo. 19Kelima yi juunli po yi baa ga yi miana.
Jesu waani Jelusalema bolinma
(Mat 24.15-21; Mak 13.14-19)
20Yi yaa ti laa ke bi toatieba lindi ki cebini Jelusalema, yin bandi mani laa yogunu ke u bodima nagidi. 21Laa yogunu yaaba n baa ye Jude nni n sani ki gedi a juana po, yaaba n baa ye Jelusalema tugu nni n ña lienni ki foagidi, yaaba n ye i kuani po n da kua u dogu nni. 22Kelima laa dana baa tie li pantuuli yaa dana, ke yaala n den diani kuli n tieni ki dudi.#Ose 9.7 23Fala baa ye leni yaa puoba n punbi leni yaaba n da ŋaandi laa dana nni, kelima o falaciamo baa tieni mi diema na niinni, U Tienu pabienli cuonu baa jiidi u naa nibuolu po. 24Bi yibalinba baa kpa ba leni mu jugisiemu, ki gedini yaaba n sieni ti yonbidi i nibuoli kuli nni. I nilanbuoli yaaba baa paadi Jelusalema, ki ŋmaa u hali U Tienu n bili bipo yaa yogunu n dudi.
U Tienu bebe n bani o Ja Bijua cuama yogunu
(Mat 24.29-31; Mak 13.24-27)
25Sinankeeninba baa tieni u yienu nni leni o ŋmaalo nni leni a ŋmabila nni kuli. Tinga nni mo ti yanyagiciandi baa teni i nibuoli kuli n jie ki womi, kaa bani ban baa tieni yaala kelima mi ñincianma fuciangu po leni mi ñinguona fiipuama po.#Esa 13.10; Esk 32.7; Jl 3.4; Doa 6.12-13 26Tanpoli paaciami mo baa digibi, lani yaa po bi niba yaa kpaagi yaala n baa tieni ŋanduna nni, bi baa pabi ti jawaandi po. 27Lani, bi baa le ke o *Ja Bijua ye ku tawaligu nni ki kpendi leni u paaciamu leni ti kpiagiciandi.#Dan 7.13; Doa 1.7 28Laa bonla yaa cili ki tiendi, yin sedi mani ki yaadi yi yula kelima yi *faabima nagidi.»
Bu kankanbu kpanjama
(Mat 24.32-35; Mak 13.28-31)
29Lani Jesu den pua ba mi kpanjama ki yedi: «Diidi mani bu kankanbu leni yaa tiidi n sieni kuli. 30I beni yaa bundi yaa yogunu, yi bani ke ku siagu nagini no. 31Li go tie yene, yi yaa laa ke laa bonla tiendi, yin bandi ke *U Tienu diema nagini. 32N waani yi i moamoani ke mi naa nifiima kuli kan pendi ke lankuli ki tieni. 33Tanpoli leni ki tinga kuli baa pendi, ama n maama kan pendi hali abada.
Guudi mani o Ja Bijua cuama
34Fangi mani yi yula, ki da tuo mi jekandikaama leni li dañokandikaali leni mi yema yanyagidi n fie yi yantiana ki guli yi ke laa daali n da cua ki ludi yi. 35Kelima laa daali baa cua nani ku diagu yeni ki ludi ki cuo yaa niba n ye ŋanduna nni kuli. 36Lani yaa po yin yaa ji mani ki yaa jaandi U Tienu yaa yogunu kuli, ke yin fidi ki ña yaa bonla n baa cua kuli nni, ki sedi o Ja Bijua kani.»
37Daali kuli Jesu den bangi bi niba U Tienu diegu nni, ku ñiagu mo kuli o den ña ki caa ki ban dua ki ye *Olifie Tiidi juali po. 38Bi niba kuli den yagidi ki kpendi o kani U Tienu diegu nni ki baa cengi o maama.
Jufinba nikpiaga juogi ke bi baa kpa Jesu
(Mat 26.1-5; Mak 14.1-2; Jan 11.45-53)
Valið núna:
LUKA 21: GUX03
Áherslumerki
Deildu
Afrita
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.