Zã 17
17
A Yeezu puore na kʋ̀rɛ a ʋ po-tuurbɛ
1A Yeezu na wa ƴɛ̀r à ŋá baar'a, ʋ úor'a kaa a salom ɛ́ yel: «Ɩ̃ Sãà a, a daar ta na, ɩ a fʋ Bie nyɛ̃ yúor-vɩɛlʋ-danʋ, a fʋ Bie mɩ̀ tʋ̃ɔ́ ɩ fʋ nyɛ̃ yúor-vɩɛlʋ-danʋ. 2Lɛ n'a ʋ na kʋ̀ a nyɔ-vʋʋrʋ na be kʋralɛ a a bɛlɩ dem za fʋ na de kʋ̀ ʋ a, a fãw fʋ na kʋ̀ ʋ bʋ̃-vʋʋra za zu a ƴãw. 3Ɛ́ a nyɔ-vʋʋrʋ na be kʋralɛ a n'ɩ kɛ́ bɛ bãw fʋ, fʋ̃ʋ yõ na ɩ a Naaŋmɩn-sɩza a, ɛ́ mɩ̀ bãw a sob nɛ fʋ na tõ a, a Yeezu Kɩrɩta. 4Ɩ̃ ɩ n a fʋ yúor nyɛ̃ vɩɛlʋ-danʋ a tẽ-daa zu. A ton fʋ na kʋ̀ m a, ɩ̃ tõ na baarɩ. 5Ƴɛrɛŋa a, pãa ɩ ɩ̃ nyɛ̃ yúor-vɩɛlʋ-danʋ a fʋ zie, ɩ̃ Sãà a, a yúor-vɩɛlʋ-danʋ ʋl ɩ̃ na tɩ tɛr a fʋ zie, ɛ́ fʋ bɛ ír a tẽ-daa sɛr a. 6A nɩbɛ bɛl fʋ na ír a tẽ-daa pʋɔ kʋ̀ m a, ɩ̃ ɩ na kɛ̀ bɛ bãw a fʋ yúor. Fʋ̃ʋ tɩ so bɛ, ɛ́ de bɛ kʋ̀ m, ɛ̀ bɛ tɛr'ɩ a fʋ ƴɛ̀rʋ vla. 7Ƴɛrɛŋa a, bɛ bãw na kɛ́ a alɩ bome nɛ za fʋ na kʋ̀ m a, a yi n a fʋ zie. 8A ƴɛ̀rʋ al fʋ na ƴɛ̀r kʋ̀ m a, ɩ̃ ƴɛ̀r'a kʋ̀ bɛ, ɛ̀ bɛ sàw na de, bɛ bãw nɩ yel-mɩŋa k'ɩ̃ɩ yi n a fʋ zie, bɛ sàw na de kɛ́ fʋ tõ m'a.»
9«A bɛl ƴãw n'a ɩ̃ puore, ɩ̃ bɛ puore a tẽ-daa ƴãw ɛ. A bɛlɩ dem fʋ na kʋ̀ m a ƴãw n'a ɩ̃ puore: fʋ̃ʋ so bɛ, 10ɩ̃ɩ bʋ̃-sora za ɩ n fʋ bʋ̃-sora, mɛ̃ a lɛ fʋ bʋ̃-sora za na ɩ ɩ̃ bʋ̃-sora a, ɩ̃ɩ nyɛ̃ nɩ yúor-vɩɛlʋ-danʋ a bɛ ƴãw. 11Ɩ̃ bɛ cãà a tẽ-daa zu ɛ, ɛcɛ bɛl cãà nɩ a tẽ-daa zu, ɛ́ mãa waar a fʋ zie. Ɩ̃ Sãà sõw i, a bɛlɩ dem fʋ na kʋ̀ m a, gùre bɛ a fʋ yúor ƴãw, kɛ̀ bɛ ɩ been mɛ̃ a tɩɩm a. 12Ɩ̃ na tɩ be a bɛ zie a, ɩ̃ tɩ gùre bɛ nɩ a fʋ yúor ƴãw, a fʋ yúor fʋ na kʋ̀ m a. Ɩ̃ gù bɛ nɩ vla, ɛ́ a bɛ been kãw za bɛ bɔr ɛ, a bɛ ɩ a ʋlɩ sob nɛ a na tɩ fɛr k'ʋʋ bɔr, a Sɛb-sõw ƴɛ̀r-bie tʋ̃ɔ́ tu a ɩ. 13Ɛcɛ ƴɛrɛŋa a, ɩ̃ waar'ɩ a fʋ zie, ɛ́ yere a yele á ŋá a tẽ-daa zu ka ɩ̃ na cãà a, kɛ́ bɛ tɛr a ɩ̃ nʋ̃ɔ̀ ʋ paalɩ bɛ tɩ tɔ a ʋ tɔb zie. 14Ɩ̃ kʋ̀ bɛ nɩ a fʋ ƴɛ̀rʋ, ɛ́ a tẽ-daa bɛ nɔ̃w bɛ ɩ, bɛ na faa bɛ ɩ a tẽ-daa nɩbɛ a, mɛ̃ a mãa mɩŋa na bɛ ɩ a tẽ-daa nɩr a. 15Ɩ̃ bɛ zɛlɛ kɛ́ fʋ ír bɛ a tẽ-daa zu ɛ, ɩ̃ zɛlɛ na kɛ́ fʋ gùre bɛ a Faalʋ sob ƴãw. 16Bɛ bɛ ɩ a tẽ-daa nɩbɛ ɩ, mɛ̃ a mãa na bɛ ɩ a tẽ-daa nɩr a. 17Maalɩ bɛ nɩ a yel-mɩŋa bɛ ɩ son: a fʋ ƴɛ̀rʋ ɩ n yel-mɩŋa. 18Mɛ̃ a lɛ fʋ na tõ m a tẽ-daa zu a, a mãa mɩ̀, ɩ̃ tone bɛ nɩ a tẽ-daa zu. 19Ɩ̃ dier'ɩ ɩ̃ tʋɔra kʋ̀rɛ fʋ k'ɩ̃ɩ ɩ sõw a bɛl ƴãw, kɛ̀ bɛ mɩ̀ ɩ son a fʋ ƴãw nɩ yel-mɩŋa.»
20«A bɛl tɛwr bɛ nɛbɛ ɩ̃ puore kʋ̀rɛ ɩ, ɩ̃ puore na kʋ̀rɛ a bɛlɩ dem mɩ̀ nãà wa sàw de m a bɛ ƴɛ̀rʋ zũú a: 21ɛ́ bɛ za ɩ been, mɛ̃ a lɛ fʋ̃ʋ ɩ̃ Sãà, fʋ na lãw nɩ mɛ̃ ɩ̃ɩ mɩ̀ lãw nɩ fʋ a. A bɛl mɩ̀, bɛ lãw nɩ tɩ, a tẽ-daa tʋ̃ɔ́ sàw kɛ́ fʋ tõ m'a. 22Ɛ́ a mãa a, ɩ̃ kʋ̀ bɛ nɩ a yúor-vɩɛlʋ-danʋ ʋl fʋ na kʋ̀ m a, kɛ́ bɛ ɩ been mɛ̃ tɩ na ɩ been a: 23ɩ̃ lãw nɩ bɛ, ɛ́ fʋ lãw nɩ mɛ̃, kɛ́ a bɛ lãw-taa vɩɛl ʋ za: lɛ n'a a tẽ-daa na bãw kɛ́ fʋ tõ m'a, ɩ̃ɩ nɔ̃w bɛ mɛ̃ fʋ na nɔ̃w mɛ̃ a. 24Ɩ̃ Sãà a, a bɛlɩ dem fʋ na kʋ̀ m a, ɩ̃ bɔbr'a kɛ́ a be ɩ̃ na be a, bɛ mɩ̀ be a be lãwnɩ mɛ̃, ɛ́ nyɛ̃ a ɩ̃ yúor-vɩɛlʋ-danʋ, a yúor-vɩɛlʋ-danʋ ʋl fʋ na kʋ̀ m a, a fʋ na tɩ nɔ̃w mɛ̃ ɛ́ bɛ ír a tẽ-daa sɛr a ƴãw. 25Ɩ̃ Sãà yel-mɩŋa za sob i, a tẽ-daa bɛ bãw fʋ ɛ, ɛcɛ mãa bãw fʋ na, ɛ́ a bɛl mɩ̀ a, bɛ nyɛ̃ na bãw kɛ́ fʋ tõ m'a. 26Ɩ̃ ɩ na kɛ̀ bɛ bãw a fʋ yúor, ɛ́ na cãà ɩ bɛ bãw ʋ: a nɔ̃wfʋ ʋl fʋ na nɔ̃w mɛ̃ a, ʋ tʋ̃ɔ́ be a bɛ zie, ɩ̃ɩ mɩ̀ be a bɛ zie.»
Valið núna:
Zã 17: DBDC
Áherslumerki
Deildu
Afrita
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.