LUKE 22
22
Pé ma dɛnbɛrɛ le Jesu na we
(Mat 26:1-5; Mar 14:1-2; Jan 11:45-53)
1Pe dáa bru kmo ajrɛʔɛgɛ wɛgɛ fun noo ka fɛti ŋa na, wi wlɛʔɛ ki dáa nori, ŋa pé na yeri Toromo srɛʔɛ fɛti we. 2Sraʔá farafɛɛ kpandoo ní, Furu sɛbɛ cɛnfɛɛ ní à pe na pomo mà ca bì Jesu kpo we hrama ni mɛjɛn pe dáa fyaʔa hɛɛn na be.
Judasi wí ma Jesu pɛrɛ we
(Mat 26:14-16; Mar 14:10-11)
3Ki nyiŋi na ge, Sotanri wɔ̀ɔ je wa Judasi ni, ŋa pé na yeri Isikariyɔte ge. Wiì wi ŋa wi dá bo ploʔofɛɛ kɛ̂ mà kɛ syɛn ni wà wi ge. 4Wɔ̀ɔ kɛri sraʔá farafɛɛ kpandoo krugu be ní Nyɛʔɛlɛ li sràʔá go sorasiyee pe lagwɔɔ ní be. À pe yâ yo pomo ma na wí bi Jesu le we pe kyɛrɛ̀ ni de. 5Àʔa pe glan. À pe flinʔi na mà yo pé buu kan gbejanra nì. 6Wɔ̀ɔ yereʔe na na nyigmaʔa ca bùu le wa pe kyɛrɛ̀ ni, janma mò gaʔa cɛn.
Toromo srɛʔɛ fɛti yrɛbɛ hranma
(Mat 26:17-25; Mar 14:12-21; Jan 13:21-30)
7Ajrɛʔɛgɛ wɛgɛ fun bru wi fɛti wlɛʔɛ ki da gâ ba no nyiŋi ga na, ki dá yala pe srɛʔɛ mbaple kpo le.
8Jesu wɔ̀ɔ Pyɛri nì, Janyee tun be mà yo: «Yee sye, ye ya wò Toromo srɛʔɛ fɛti hro hɔʔɔ jango wo lì.» 9À poo po: «Má ma cori wo ya ti hɔʔɔ hanbe?» 10Wɔ̀ɔ pé po: «Ye wèlé, nà ye ya je wa kàʔà ni ge, yé bi yà naŋa wà nya wí ma nyumu cɔlɔ tugu. Ye pà wí na. Nòo ya je go ga ni ge, ye je wa wì krugu. 11Ye yaʔa yo go fɔlɔ ma we, yoo po: ‹Krɛʔɛfɔlɔ wí yo: Go pyɔ wí nyɛ hanbe ŋa ni mí bi ba Toromo srɛʔɛ fɛti hro li de na ploʔofɛɛ ní be.› 12Pɔɔ go ki namuru go pyɔkpɔɔ wà tyɛʔɛ ye na, ŋa pé ma yrɛbɛ tyɛʔɛ wa kɔ ge. Ki deʔe kiì gi yé bi yà hro hɔʔɔ de.»
13À pe kɛri mà yáʔà nya ban cɛ nɛ pa wi daʔá yo pé ma ge. À pe Toromo srɛʔɛ fɛti hro hɔʔɔ de wa.
Wò fɔlɔ wi hutanʔara
(Mat 26:26-30; Mar 14:22-26; 1Kor 11:23-25)
14Linyiŋi ki gâ no ge, wɔ̀ɔ klɛn hro tanla wi pitunbee ní be, 15mà pe po: «Na laa dì boʔo na ceŋge bì Toromo srɛʔɛ fɛti hro li de ye nì, sanni mí bi gu ge. 16Mɛjɛn, kanyɛmɛ na, mi ìn bi gà mbara kposrɛʔɛ hro li adi fɔ ti yugu ki ba fùnŋù wa Nyɛʔɛlɛ li masaʔa ni ge.» 17Wɔ̀ɔ ajɔlɔ kpe le mà Nyɛʔɛlɛ syeri le mà yo: «Ye li syɔ. Ye jɔ ye yè kân. 18Mɛjɛn mí biʔi yo ye ma, ki tɔ na ge, mi ìn bi jè hrɛsɛn tiʔi pibi nyumu mà jɔ fɔ bì ba no Nyɛʔɛlɛ li masaʔa ki pannyiŋi na ge.»
19Wɔ̀ɔ bru kpe we mà Nyɛʔɛlɛ syeri le mòo koonlo mòo kân pé ma mà yo: «Wiì wi na wre de [da tí bi gân yè kala na le. Ye da ki woʔo ga hanri ge jango ye da lama tun ná ni.»
20Ki podeme na me, pe gâ li kɔ ge, wɔ̀ɔ ajɔlɔ kpe le mà yo: «Ki ajɔlɔ la le lí nyɛ nofefonlo wolo li. Lí ma kan ye ma na disyan fanŋa ni, ga kí bi wo yè kala na le.]
21Di yeʔe wèlé, ŋa wí bi na le na bɛnfɛɛ pe kyɛrɛ̀ ni de, ki woo wí nyɛ naʔa na li ná ni.
22 Hɛn Pyɔ wí bi gu nɛ pa Nyɛʔɛlɛ li da glú máʔà kon máʔà yaʔa pomo ma na ge. Ɛɛn di, cɔlɔkpɔʔɔ nyɛ ŋa na wí buu le wi bɛnfɛɛ pe kyɛrɛ̀ ni de dɛ.»
23À peʔe hli na pè yugu mà yo wiwii bi ki woʔo ga hanri ge pee ni be.
Wiwii wi wí ma kpɔʔɔ mâ toro pe tɔɔ na be
24Ki nyiŋi na, ploʔofɛɛ à peʔe hli na kakara wa pè ní mà yo wiwii bi da jun hɛnkpangbanŋa pee ni be.#22:24 ma wèle wa Luk 9:46 ni wè. 25Jesu wɔ̀ɔ pé po: «Naʔa drunya ni we, klòʔo fɛɛ pé na pe hɛɛn sinni be. Bee pé nyɛ wa ke yugu na ge, à pe na pè yeri “kakmaʔa hanrifɛɛ”. 26Di koò nyɛ ban yèé ní be. Mɛjɛn ŋa wí nyɛ ye ni hɛnkpangbanŋa we, wi po nɛ pa hɛntatunŋu nyɛ we. Ŋa wí nyɛ yè yɛklu we, wi po nɛ pa yè tungɔɔ nyɛ we.#22:26 ma wèle wa Mat 23:11; Mar 9:35 ni wè. 27Wiwii wi hɛnkpangbanŋa we, ŋa wí na klɛn ná fɛti hro li de, dee di, ŋa wí na fɛti hro kanʔa de? Ŋa wí na klɛn ná fɛti hro li de wiì ban yo? Di mì mí nyɛ naʔa ye ni nɛ pa hɛɛn ŋa nyɛ wí na fɛti hro kanʔa de.#22:27 ma wèle wa Jan 13:12-15 ni wè.
28Yèé bɛ ye dí bo ná ni na yɛgbanʔa kaʔa nyiŋi na ge. 29Mí bi masaʔa kan ye ma nɛ pa na To wi daʔá kan ná ma pomo ma na ge, 30jango ye da lí, yee jo na masaʔa ni wa na tabali na we. Yé bi ba glɛn masaʔa aconro na bì da Israyɛli klɛnmɛ kɛ̂ mà kɛ syɛn sinni me.»#22:30 ma wèle wa Mat 19:28 ni wè.
Jesu wí yo Pyɛri wí bi bɔɔ ce
(Mat 26:31-35; Mar 14:27-31; Jan 13:36-38)
31Wò fɔlɔ wɔ̀ɔ yo: «Simo, Simo, Sotanri wí ma ye nyɛri Nyɛʔɛlɛ ma le jango wi ye fɛ nɛ pa akaʔa nyɛ ge. 32Di mí ma Nyɛʔɛlɛ nyɛri le ma kân, jango ma pama mò ga gɔ. Mo fanna, nà ma gá ba grɛʔɛ ge, ma dihon kan ma syɛnwoo ma be.»
33Pyɛri wɔ̀ɔ wí po: «Na fɔlɔ, mí ma kondo mà yaʔa bì da sye má ni kaso nî bì yà gu wa.» 34Wɔ̀ɔ wí po: «Pyɛri, kanyɛmɛ na, gopɔlɔ wi ìn bi bo wi kpelé kpɛn alaʔa nî ge, pa ma yo mɛ ìn na cɛn fɔ bì da yohara tanri.»
Gbejanra alege ní, kasyaʔa ní, ní mlaʔa kpele ní
35Ki nyiŋi na, Jesu wɔ̀ɔ wi ploʔofɛɛ yugu be mà yo: «Nyiŋi ga na mi dá ye tun mâ yo yò gá gbejanra alege kpe, ní kasyara ní, ní sabara nì ge, yraʔa kà dà yâ ye la yo?» À pe yo: «Ayo.»
36Wɔ̀ɔ ní mà pe po: «Di ŋaŋa ni ge, nàʔa po gbejanra alege nyɛ ŋa ma, wiʔi kpe, wi wi kasyaʔa kpe ge kpo. Nà wà bí bo mlaʔa kpele wò nyɛ wí ma ge, wi wi dreʔe pɛrɛ, wi là syɔ. 37Kí nyɛ wa nyoŋoʔo Nyɛʔɛlɛ li sɛbɛ ni we mà yo: ‹Pe daʔá yo mà yo: Tipere hanrifɛɛ wà wi wí ni.› Kí ma yala ki fùŋù domi na we. Ali kì bɛfu ga ki da nyoŋó na kala na le, paʔa funŋu.»#22:37 ma wèle wa Esa 53:12 ni wè.
38À poo po: «Wò fɔlɔ, mlaʔa kpegee syɛn nyɛ naʔa, ké gee.» Wɔ̀ɔ pé po: «Kí ma yala.»
Jesu wí na nyɛri Olife tiri angolo na
(Mat 26:36-46; Mar 14:32-42)
39Wɔ̀ɔ jɛ mà kɛri angolo la na pé na yeri Olife tiri angolo ge nɛ pa wi kalɛʔɛ nyɛ ge. Ploʔofɛɛ à pe pa wí na. 40Nyiŋi ga na wi gaâ no wa ki deʔe na ge, wɔ̀ɔ pé po: «Ye da nyɛrí jango kapeʔe ki laa kò gá ye co.» 41Wɔ̀ɔ jɛ be pè tanla mà kɛri leʔe nɛ pa pe hîn ŋglɛnʔɛ wa ki na kɛri leʔe pomo ma na ge, màâ kunbiʔi kán na Nyɛʔɛlɛ nyɛri le mà yo: 42«Na To, nàʔa po má maʔa ta, ma ki cɔlɔʔɔ ajɔlɔ la kpe le nà tanla. Di mò gá na nadanma miì hanri fɔ mo ma womo miì bí hanri.»
43[Nyɛʔɛlɛ mlɛŋɛ à wa ma pan mà bâ fanna kan wí ma. 44Pɔɔ da gáa jɔlɔ wɛʔɛ ge, wɔ̀ɔ ní mà Nyɛʔɛlɛ nyɛri le ceŋge mà toro kplɛʔɛ woʔo na ge. Wi kafuʔu àʔa krɛʔɛ nɛɛ disyan gi na hɔlɔ tra na de.]
45Wi gâ nyɛri kɔ ge, wɔ̀ɔ hru mà pan wi ploʔofɛɛ krugu be mà bâ pe nya pé na ŋolo yɛpɛnʔɛ kala na le. 46Wɔ̀ɔ pé po: «Nyaʔa ma kan á ye na ŋolo ge? Ye jɛ̀, ye da nyɛrí, jango kapeʔe ki laa kò gá ye co.»
Jesu wi bɛnfɛɛ pé moo co
(Mat 26:47-56; Mar 14:43-50; Jan 18:3-11)
47Wi dá bo wí na nyu adi, hɛɛn à pe na nyini kpo. Judasi yele fɔlɔ we, wi dá bo wi hɛɛn kɛ̂ mà kɛ syɛnwoo, wi da glú ki hɛɛn pe yɛʔɛ̀. Wɔ̀ɔ flo wa Jesu tanla we jango bùu fyon. 48Jesu wɔ̀ɔ wí po: «Judasi, má bi Hɛn Pyɔ fyon we kpɛn bì noó le wi bɛnfɛɛ pe kyɛrɛ̀ ni de yo?» 49Bee pe da blɛ́n Jesu ní, à pe da gâ ga nya kí bi hanri ge, à pe yo: «Wò fɔlɔ, wo pe kmo mlaʔa kpegee ní ge yo?» 50Pee à wà ma sraʔá farafɔlɔ kpangbanŋa wi tungɔɔ kmo mà wi kaligi naakpolo kon wi na. 51Jesu wɔ̀ɔ pé po: «Yeʔe yaʔa banmɛ ge,» mà màʔà naŋa wi naakpolo na le, à li pwɔʔɔ. 52Ki kruʔu ma, wɔ̀ɔ kí yo sraʔá farafɛɛ kpandoo ma be, ní Nyɛʔɛlɛ li sràʔá go sorasiyee kundiʔiyee ní be, ní lagwɔɔ ní be, bee pe dá bì bɔɔ co ge mà yo: «Yé ma pan nà krugu mlaʔa kpegee ní, kanglanra ní nɛbo nikonŋo wi ná ni yo? 53Ali nàʔa ja bo mi dáa bin wa ye nì wlɛrɛ tì bɛfu na wa Nyɛʔɛlɛ li sràʔá go ni ge, ye ìn kyɛʔɛ pa ná na bì na co. Ɛɛn di, yè nyiŋi kiì gi ga ge, ní yeblimi fanŋa nì ge.»#22:53 ma wèle wa Luk 19:47; 21:37 ni wè.
Pyɛri wi fiʔiriʔi
(Mat 26:57-58,69-75; Mar 14:53-54,66-72; Jan 18:12-18,25-27)
54Ki nyiŋi na, à poo co mà kɛri wí ni mà yɔ́ɔ̀ lege wa sraʔá farafɔlɔ kpangbanŋa wi go nî ge. Pyɛri wɔ̀ɔ pa pé na na kori leʔe na sye pè krugu. 55À pèè ma po pé ma kwɔʔɔ kmoli wa dala li nulala ni le mà klɛnʔɛ tanla. Pyɛri wɔ̀ɔ yâ glɛn wa pe nî. 56Tungɔɔ wà dà bo wa picɛpii. Wi gɔ́ɔ̀ nya klɛnhaʔa be kwɔʔɔ tanla ge, wɔ̀ɔ noo wele mà gâ yo: «Ki naŋa ŋa wi dá bo wí ni kpo.» 57Pyɛri wɔ̀ɔ ki fiʔiri mà yo: «Cɛlɛ, mi ìn wi cɛn.» 58Cɛncɛnbo, à wà moo nya nɛ mòo po: «Mo yoo kpo, má nyɛ ki hɛɛn bee wà wi má ni.» Pyɛri wɔ̀ɔ ní mà yo: «Naŋa, pee wà ban na ní dɛ.» 59Ki gâ mo cɛnri nɛ ge, à wà maʔa yo nɛ gbanʔa mà yo: «Sɔbɛ na, ki naŋa ŋa wi dí bo pé ni kpo, mɛjɛn wí nyɛ Galile klo woo wà wi.» 60Pyɛri wɔ̀ɔ ní mà yo: «Naŋa, ga má na nyu ge, mi ìn ki kɔ̀rɔ́ cɛn we.» Wi dá bo wí na nyu adi, ki nyidege na ge, gopɔlɔ wɔ̀ɔ taʔa na kpele kpo. 61Wò fɔlɔ wɔ̀ɔ wa mà krɛʔɛ mà Pyɛri wele we. Pyɛri wɔ̀ɔ lama to wò fɔlɔ wi kayoro da nì wi dá yo wí kan mâ yo: «Sanni gopɔlɔ wí bi gbele alaʔa nî ge, pa ma yo mɛ ìn na cɛn bì da yohara tanri.» 62Wɔ̀ɔ nyini dala na le mà yáa gbele gbanʔa ceŋge.
Pé ma pè kle Jesu na we mòo kmo
(Mat 26:67-68; Mar 14:65)
63Jesu wi dá bo bee kyɛrɛ́ ni ge, ki woo à pe na pè kle wí na noo kmo, 64mà kpasyoro ton wa wi na yɛʔɛ̀ na ge mà noo yugu mà yo: «Han ma ma kmo? Moo tyɛʔɛ wo na.» 65À pe noo teri na sye.
Pé ma kɛri Jesu ní lagwɔɔ pe kpoʔolomo ma me
(Mat 26:59-66; Mar 14:55-64; Jan 18:19-24)
66Kpɛnmɛ mi bâ do ge, Juwifiyee pe lagwɔɔ à pe pè kpoʔolo, ní sraʔá farafɛɛ kpandoo ní, ní Furu sɛbɛ cɛnfɛɛ ní be mà Jesu co mà yɔ́ɔ̀ yrigí wa pe kpoʔolomo mi yɛʔɛ̀ ma ge, 67mà yo: «Nàʔa po mo má nyɛ Nyɛʔɛlɛ li wofràa, maʔa yo wo kan.» Wɔ̀ɔ pé po: «Nà mi jaʔa yo ye ma ge, yòo baʔa na fyeu. 68Nà mi ní bì ye yugu, yòo krumahru kan ná ma. 69Di, ki tɔ na ge, Hɛn Pyɔ wí bi bo wa klɛnhaʔa Nyɛgbɔfiʔi kaligi na ge.»
70Pè bɛfu à pe yo: «Má nyɛ Nyɛʔɛlɛ li Pyɔ kɛ?» Wɔ̀ɔ pé po: «Yé maʔa yo kɔ mâ yo mì wi ge.» 71À pe yo: «Wó ma cori kayoʔo kigii na nɛ? Wòó wò tala wó ma wi kayoʔo loʔo ge.»
Valið núna:
LUKE 22: NLK10
Áherslumerki
Deildu
Afrita
Want to have your highlights saved across all your devices? Sign up or sign in
Bible Society of Côte d'Ivoire