Luke 24
24
Moulyak Liki Misa
(Matthew 28:1–10; Mark 16:1–8; John 20:1–10)
1Toang na ke len se emeet in wik, mutan inge som nu ke kulyuk uh ac us mwe keng ma elos akoela ah. 2Elos liyauk lah eot sac ipisyukla liki mutun kulyuk sac, 3na elos utyak nu loac; tusruktu elos tiana konauk monin Leum Jesus. 4Elos arulana fohsak ke ma inge, na in kitin pacl ah na mwet luo tu me siskalos su nukum nuknuk na saromrom. 5Mutan uh arulana sangeng ac faksufi ke mwet luo ah fahk nu selos, “Efu kowos ku suk el su moul inmasrlon mwet misa? 6El tia oasr inge; el akmoulyeyukyak tari. Esam ma el tuh fahk nu suwos ke el muta Galilee ah: 7‘Wen nutin Mwet el ac fah itukyang nu inpoun mwet koluk, ac el ac fah anwuki fin sakseng soko, na tukun len tolu el ac fah sifil moulyak.’”
8Na mutan uh elos esamak kas lal inge, 9ac folokla liki kulyuk uh, ac fahkak ma inge nukewa nu sin mwet singoul sie, weang pac mwet wialos saya. 10Mutan inge pa Mary Magdalene, Joanna, ac Mary nina kial James. Eltal, ac kutu pac mutan saya ma welultal, pa tukeni fahkak ma inge nu sin mwet sap uh. 11A mwet sap elos nunku mu mutan inge sramsram wel, oru elos tiana lulalfongelos. [ 12Tusruktu Peter el tuyak ac kasrusr nu ke kulyuk uh. El kui nu ten ac liyauk nuknuk linen mukena. Na el folokla nu lohm sel ac arulana fwefela ke ma sikyak uh.]#24:12 Kutu Ma Simusla uh wangin fus 12 loac.
Fahsr Nu Emmaus
(Mark 16:12–13)
13In len sac pacna, luo pac selos fahsr in som nu in sie siti srisrik pangpang Emmaus, sahp ac mael itkosr liki acn Jerusalem, 14ac eltal tukeni sramsramkin ma nukewa ma sikyak uh. 15Ke eltal kaskas ac asiyuki ke ma inge, Jesus sifacna el kalukyang nu yoroltal ac welultal fahsr. 16Eltal liyal, tusruktu eltal tiana akilenul. 17Jesus el fahk nu seltal, “Mea komtal fahsr srumun an?”
Eltal tukeni tui, ac ngetnget in asor. 18Sie seltal su pangpang Cleopas el siyuk sel, “Mea, kom mukena pa mwet mutwata se nu Jerusalem ma tia etu ke ma orek we ke len ekasr somla me?”
19Ac Jesus el siyuk, “Mea ingan?”
Na eltal fahk, “Ma uh ma sikyak nu sel Jesus lun Nazareth. Mwet se inge el sie mwet palu, su kas in luti ac orekma lal arulana ku ye mutun God ac mwet uh. 20Mwet tol fulat lasr ac mwet kol saya elos eisalang in nununkeyuk, na elos wotela elan anwuki fin sakseng. 21Ac kut tuh finsrak mu el pa ac aksukosokyela Israel uh! Sayen ma inge, misenge len se aktolu tukun ma inge sikyak. 22Kutu sin mutan ke u lasr uh aklutye kut. Elos toang na som nu ke kulyuk sac, 23tuh tia ku in konauk manol. Elos foloko ac fahk lah elos liye sie aruruma ke lipufan, su fahk nu seltal mu el sifil moul. 24Kutu sin mwet wiasr uh som nu ke kulyuk sac ac konauk oana ma mutan elos srumun ah, tusruk elos tiana liyalak.”
25Na Jesus el fahk nu seltal, “Pwaye lah komtal arulana afon! Efu ku pahtlac fuk komtal in lulalfongi ma nukewa ma mwet palu ah fahk? 26Ya tia eneneyuk tuh Christ elan keok ke ma inge, na el fah utyak nu in wolana lal?” 27Ac Jesus el aketeya nu seltal ma fwack kacl in Ma Simusla nukewa, mutawauk ke book lal Moses, fahsru nu ke ma simla sin mwet palu nukewa.
28Ke eltal apkuran in sun siti srisrik se eltal fahsr nu we ah, Jesus el oru acnu mu el ac fahla na. 29Tuh eltal ikolilya ac fahk, “Tari muta yorosr, mweyen fongeni pa inge.” Ouinge el utyak ac mongla yoroltal. 30El muta in welultal mongo, na el eis bread ac pre lac kac, na el kunsalik ac sang nu seltal. 31Na ikakla mutaltal ac eltal akilenulak, ac in pacl sacna el wanginla liki ye mutaltal. 32Na eltal fahk nu sin sie sin sie, “Ya insiasr tia fusrfusryak ke engan, oana sie e tayak in kut, ke el sramsram nu sesr inkanek uh ac aketeya nu sesr ke Ma Simusla?”
33Eltal sulaklak na tuyak ac folokla nu Jerusalem ac konauk mwet tuma lutlut singoul sie, wi kutu pac mwet saya uh, 34su fahk nu seltal, “Pwayena lah Leum el moulyak! El sikyang nu sel Simon!”
35Na mwet luo ah akkalemye nu selos ma sikyak inkanek ah, ac ke eltal akilenak Leum ke el kunsalik bread uh.
Jesus El Sikyang Nu Sin Mwet Tumal Lutlut
(Matthew 28:16–20; Mark 16:14–18; John 20:19–23; Orekma 1:6–8)
36Ke pacl se eltal srakna srumun ma inge, Jesus sifacna el sikyak inmasrlolos [ac fahk nu selos, “Misla nu suwos.”]#24:36 Kutu Ma Simusla u tia fwak nu selos, “Misla nu suwos.”
37Elos arulana tuninfongla, ac nunku mu elos liyauk inut se. 38Na el fahk nu selos, “Efu kowos ku sangeng? Efu kowos ku alolo in nunak lowos uh? 39Ngetma liye pouk ac niuk, ac liye lah nga pa inge. Kahlyuwi na kowos ac fah etu na pwaye, tuh inut uh wangin ikwa ac sri kac oana ke kowos liye keik uh.” [
40El fahk ma inge, ac kolang paol ac nial nu selos.]#24:40 Kutu Ma Simusla uh wangin fus 40 loac. 41Elos srakna tia ku in lulalfongi, ke sripen arulana yohk fwefela ac engan lalos. Na el siyuk selos, “Ya oasr mongo yuruwos inge?” 42Elos sang nu sel ipin ik manman se, 43ac el eis ac kang ye mutalos.
44Na el fahk nu selos, “Pa inge ma nga tuh fahk nu suwos ke nga srakna muta yuruwos ah: Ma nukewa ma simla keik in Masap lal Moses, in ma simusla lun mwet palu, ac in book in Psalm uh enenu na in akpwayeiyukla.”
45Na el ikasla nunak lalos in kalem ke Ma Simusla uh, 46ac fahk nu selos, “Pa inge ma simla uh: Christ el ac fah keok, ac el ac fah moulyak liki misa ke len se aktolu, 47ac ke inel, pweng ke auliyak ac nunak munas ke ma koluk enenu in lutiyuk in facl nukewa, mutawauk Jerusalem. 48Kowos mwet loh ke ma inge. 49Ac nga ac fah supwama nu fowos ma su Papa tumuk El wulela kac. Tusruktu kowos enenu in mutana in siti uh nwe ke na ku lucng me fah tuku nu fowos.”
Jesus El Utukyak Nu In Kusrao
(Mark 16:19–20; Orekma 1:9–11)
50Na el kololosla nu likin siti uh ac som apkuran nu Bethany, ac el srukak paol nu faclos ac akinsewowoyalos. 51Ke pacl se el akinsewowoyalos inge, el som lukelos, [ac utukyak el nu inkusrao.]#24:51 Kutu Ma Simusla u wangin “Ac utukyak el nu inkusrao.” 52Elos alu nu sel, tari elos folokla nu Jerusalem, sesseslana ke engan, 53ac len nukewa elos muta in Tempul ac sang kulo nu sin God.
Valið núna:
Luke 24: KOS
Áherslumerki
Deildu
Afrita
Want to have your highlights saved across all your devices? Sign up or sign in
This text is in the Public Domain due to copyright expiration.