Pomulanya 2
2
Sarita Mangkonong Eo to Kapitu
1Wali ewa wetu semo naika i mPue Allah mampapowali yangi pasi lino pasi samparia bananginya. Samparia palaongiNya etu rapakaroo ri rayanya ono eo etu. 2Wali see naka ane ratamo eo kapitu i Pue Allah mandoo yako palaongiNya, wali tamo re’e palaong to inikaNya apa samparia palaongiNya etu roomo Napakaroo. 3Wali i Pue Allah mampasisala eo kapitu etu pei mampakabae batuanginya. Ia manganto’o eo etu Iaja puenya. Naka pei Ia manganto’o ewa wetu apa ri eo etu semo Ia mandoo yako samparia palaong to inikaNya tempo Ia mampapowali samparia anu to re’e.
4Wali etu semo sarita mangkonong tempo i Pue Yawe, etu semo i Pue Allah, nampapowali yangi pasi lino.
Sarita Mangkonong Bonde ri Tana Eden Pasi Ewa Wimba Naika i mPue Yawe Mampapowali Tau
Wali tempo i Pue Yawe mampapowali yangi pasi lino, 5tempo Ia owo mangika tana, tempo etu taware bara kesaa to tuwu yako ri tana etu apa taware tau to mapalaong reria. Pasi tempo etu i Pue Yawe tawa seja re’e mantudumaka uja ri lino. 6Ojo re’e limu mupu tioretaka yako ri tana to mangarinis ri wawo ntana etu.
7Wali yako etu i Pue Yawe Ia mangoko awu ntana pei yako ri awu ntana etu Ia mangika samba’a tau langkai. Panewa ojo pangikaNya tau etu, Ia mangansinoataka nosaNya ri engo ntau etu see ia datuwu. Ewa wetu naika i mPue Yawe mampaponosa tau etu.
8Wali yako etu i Pue Yawe mangika bonde nja’u tana to rato’oka Eden, to tondo ri mata nu eo. Panewa nja’u ria pampasakaNya tau inikaNya etu. 9Wali nja’u bonde etu i Pue Yawe re’e mampapotuwu mpangaya-ngaya kaju to matao ta’anya pasi to manami wuanya. Pasi ri tongo nu bonde etu tuwu sampu’u kaju to rato’oka kaju to mangawai katuwu. Naka pei rato’oka ewa wetu apa tau to mangkoni wua ngkaju etu, tau etu datuwu singkasaenya. Pasi re’e seja nja’u ria sampu’u kaju to rato’oka kaju to mampakanasaka tau anu to matao pasi anu to maja’a, apa tau to mangkoni wua ngkaju to etu tau etu damangansani kojo anu to matao pasi to maja’a. Wali etu semo kaju to re’e ri tongo nu bonde etu.
10Pasi re’e seja sangkaju ue to maili yako ri Eden pei mangarinis bonde etu. Panewa ojo kapolasinya yako ri bonde etu, ue etu maga’a opo mpanga. 11-12Sampanga to uyunya sanganya koro mPison. Ue etu maili ngkewanya juku ri tana Hawila. Nja’u tana Hawila etu re’e weyawa to magaya kojo, pasi re’e seja soga to matao waunya pasi watu-watu to magaya kojo ta’anya. 13Wali sampanga ue to kadua sanganya koro Gihon. Ue etu maili ngkewanya juku ri tana Kus. 14Pasi sampanga to katogo sanganya koro nTigris anu maili tondo mata nu eo ri tana Asyur. Panewa sampanga to kaopo sanganya koro Efrat.
15Wali i Pue Yawe mangkeni tau langkai to inikaNya etu pei mamposaka ia ri bonde ri Eden etu see ia damampasilonga pasi damangkampang bonde etu. 16Roo see i Pue Yawe mamporentangika tau langkai etu, Ia manganto’o, “Samparia ngayanya wua ngkaju ri bonde si’i paka maya nukoni ngkorom. Tare to taa maya rakoni 17kasimbalinya wua ngkaju to yako ri kaju to mampakanasaka tau anu to matao pasi anu to maja’a. Ne’e mangkoni wua ngkaju to etu, apa ane wua ngkaju etu pei nukoni ngkorom, ri eo nupangkoni wuanya etu, monso-monso korom damate.” Wali etu semo porenta i mPue Yawe resi tau langkai etu.
Sarita Mangkonong Ewa Wimba Naika i mPue Yawe Mampapowali Tau We’a
18-19Wali yako etu i Pue Yawe magombo wo’u mangkonong tau langkai etu to sanganya i Adam, Ia manganto’o, “Taa matao ane tau langkai si’i ojo ia ngkalionya, wali see naka Aku damangikaka ia samba’a yunu to masipato mangansawang ia.” Etu semo songka i mPue Yawe, pei ri katawanya Ia mangika palaong etu Ia mangkeni ruyu samparia binatang pasi samparia tonsi to Ia roomo mangika yako ri awu ntana. Samparia binatang pasi tonsi etu Ia mangangkeni resi tau langkai see ia semo damangansanga. Wali i Adam ia mangansanga samparia binatang pasi tonsi. Pasi sanga to iwaikanya resi binatang pasi tonsi samba’a pei samba’a ri tempo etu, etu semo sanganya. 20Wali ewa wetu naika i Adam mangansanga samparia binatang nempo to yole pasiwa to maila, pasi ia mangansanga seja samparia tonsi njo’u rao. Pei tempo ia mangika palaong to etu ia taa kojo mangarata nempo samba’a yunu to masipato mangansawang ia.
21Wali see naka i Pue Yawe mampakayore yau i Adam etu see ia yore leta kojo. Panewa tempo ia yore etu i Pue Yawe mangayali yau sambensi wuku usunya, pei ri waka nu wuku usunya etu Ia mangabombongika muni wombo. 22Wali yako wuku usu nto langkai inoko i mPue Yawe etu, Ia mangika samba’a tau we’a. Roo see Ia mangkeni resi i Adam. 23Wali ojo pangkita i Adam tau we’a etu, ia manganto’o, “O gete! Si’i yunungku to masipato kojo apa ia wukunya yako ri wukungku pasi ia wombonya yako ri wombongku. Ia darato’oka tau we’a apa ia raika yako tau langkai.” #Ayat 23 Ane ri basa Ibrani, gombo to batuanginya “tau langkai”, etu semo “is”. Pasi gombo to batuanginya “tau we’a”, etu semo “issa”, wali see naka i Adam manganto’oka yununya “issa” apa mosu sewaju pei “is”. Etu semo to nato’oka i Adam. 24Wali etu semo sabanya naka pei tau langkai damampiyaika pa’anya pasi indonya pei dasiwaka pei tau we’a to mawali indo nu ananya. Wali to langkai pasi to we’a etu damawali samboko.
25Wali tempo etu tau samboko etu paka lambe pei nempo ewa see sira dua taa mangepe mea samba’a pei samba’a.
Valið núna:
Pomulanya 2: WNT
Áherslumerki
Deildu
Afrita
Want to have your highlights saved across all your devices? Sign up or sign in
© 2018 New Tribes Mission, Sanford, FL 32771-1487, USA.
Printed in the United States of America