Ko-Dabirɛnu 7
7
Yi Keri-Koe Duninya Kuma
1A wati kera tumɛ min, Mari ya a fɔ Nowa ye ko, “Wobɛ ila denbayɛ ni don kulɔn rɔ. N bara a yen ile le kelen pe telennɛ n ya la duninya rɔ. 2I ni sogo-sɛnimɛ sufa bɛɛsi bi a keimɛnu wɔrɔnfila, a musumɛnu wɔrɔnfila. I ni sogo-haramunɛnu fanan bi fila-filanyɛ ma, a keimɛ anubɛ a musumɛ. 3I ni kona sufa bɛɛsi bi wɔrɔnfila-wɔrɔnfila, a keimɛnu anubɛ a musumɛnu alako anu sugi ni to dugu-kole kuma. 4A ara to tele wɔrɔnfila, n ni bandɛ lana dugu-kole kuma. Bandɛ si na su bi-nani, tele bi-nani. N ya nima-fan min bɛɛsi dan, n si wo bɛɛsi halaki ka anu bɔ dugu-kole kuma.”
5Nowa ya a ma iko Mari ya a fɔ a ye nya min.
6-16 #
Matiyu 24.38-39; Luka 17.27 Yi ye kerila dugu-kole kuma tumɛ min, Nowa-sɔrɔn ara san kɛmɛ wɔrɔ (600) bɔ. Nowa anubɛ ala musi donta kulɔn rɔ anubɛ ala den mɔgɔ sawɛ, Sɛma wo, Hama wo, anubɛ Yefɛti, anubɛ wonuna musi mɔgɔ sawɛ alako anu ni kisi yi wo ma. Tele wo nyɛrɛ rɔ, sogo-sɛnimɛnu anubɛ sogo-haramunɛnu anubɛ konanu anubɛ nima-fan bɛɛsi nara Nowa wara fila-filanyɛ ma, a keimɛnu anubɛ a musumɛnu, ka don kulɔn rɔ Nowa fɛ iko Alla ya a fɔ a ye nya min. Anu ke kulɔn rɔ, Mari ya kulɔn dɛ latogon anu ma. Anu bi kulɔn wo burɔ tele wɔrɔnfila yanni bandɛ ni na dugu-kole kuma.
#
2 Pita 3.6
Nowa sɔrɔn-san kɛmɛ wɔrɔ nyɔgɛ, wo karɛ filɛ, tele tan-ni-wɔrɔnfilɛ ma, yi ya dugu punsɔgɔ ka tugu duninya kun na. San-kole ya a dɛ bɔ bandɛ kɔrɔ. Bandɛ nara dugu-kole kuma su bi-nani, tele bi-nani.
17Tele bi-nanɛ wo kɔrɔ, yi ye yɛlɛla dugu-kole kuma ka kulɔn bi dugu ma. 18Yi wo sara dugu-kole kuma ka a yamatogon. Kulɔn wo tora yi kuma. 19Yi wo tora yɛlɛla ha a ya kɔnkɔ-layan-bɛnu yamatogon. 20A tora yɛlɛla ha yi min sanɛ kɔnkɔ-layan-bɛnu kuma, ka a bi kɔnkɛ wonu kuma ka yɛlɛ, wo rayanyɛ mara nunkan-nya tan-ni-loli la. 21Nima-fan bɛɛsi fagara dugu-kole kuma, kona wo, sogo wo, anubɛ mɔgɛnu. 22-23Fenfen min si a niyi lafɛ, wo bɛɛ fagara tɛrr! Fɔ Nowa anubɛ minnu bi a fɛ kulɔn rɔ, wonu denu tora.
24Yi tora dugu-kole kuma tele kɛmɛ ani tele bi-loli.
Valið núna:
Ko-Dabirɛnu 7: KCLB
Áherslumerki
Deildu
Afrita
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.