LUKA 16
16
Gba we ngɔ 'dã kapita
1Nɛ Yezu tɔ̃ 'bɔ hã owi yambala mɛnɔ 'da a na: “Mbe wi kpamɔ kpo, a zi do kapita ngɔ mɛnɔ 'da a. Nɛ mbe wele kpo tɛa, nɛ a tɔ̃ hã wi kpamɛ ni na: ‘Kapita 'da mɔ 'danga mɛnɔ 'da mɔ wena.’ 2Nɛ wi kpamɛ ni sa mɔ hã kapita, nɛ a tɔ̃ hã a na: ‘Wenɔ mi zele dɛ ngɔ mɔ ni a ge nde? Mɔ tɛ́ do mbɛti mbili kɛ ma le kɔ kɛsi, do kɛ ma hɔ nza ni, kɔ mɔ be hã mi sɛ! We kɛ mɔ wè 'bɔ we 'bana kapita ngɔ mɛnɔ 'da mi gɔ.’ 3Nɛ kapita ni lingga mɔ ni gbaa, nɛ a tɔ̃ do kɔ sila a na: ‘Nwa 'da mi nɛ fo mi tɛ toe fua. Kɔ mi nɛ dɛ nɛ nɛ nde? Mi ĩ̀ ti wa fɔ gɔ, nɛ sape gɔ mɔ kɔ̃ wele ba li mi wena. 4Ɛ̃ɛ, mi ĩ ti mɛ mi nɛ dɛ nɛ ni ia! Mi nɛ dɛ kɛ na, fala kɛ a fo mi tɛ toe, nɛ owinɔ wa dɛ sɛ gɛnɛ mi nu tɔa 'da wa ni!’
5“Nɛ a sa mɔ hã owinɔ kɛ wa ba zi ku'da kɔ̃ nwa 'da a ni kpo kpo. Nɛ a aka wele kɛ dati ni na: ‘Mɔ ba ku'da kɔ̃ nwa 'da mi nɛ nde?’ 6Nɛ wi ni gese na: ‘Be pipa nɔ kama kpo.’ Nɛ kapita ni tɔ̃ hã a na: ‘Mɔ dúngú nù, kɔ mɔ kɔ́mɔ́ kɔ mbɛti ku'da gɛ na, 'bu nɛ mɔlɔ.’ 7Nɛ a sa 'bɔ mɔ hã mbé nɛ, nɛ a aka a na: ‘Nɛ mɔ, mɔ zi do ku'da zu mɔ nɛ nde?’ Nɛ wele ki ni gese na: ‘Saki gbãlã kɔni kama mɔlɔ.’ Nɛ kapita ni tɔ̃ hã a na: ‘Mɔ zɔ́ mbɛti ku'da zu mɔ gɛ ma kɛ! Mɔ kɔ́mɔ́ kɔ nɛ na, kama nalɛ.’ 8Kɔ wi kpamɛ ni nɛa we zɔ ni, nɛ a dɔnggɔ kapita wi zũi ni, we duzu hã zã 'da a. Mba gɔ, o'dã winɔ ngɔ nùi gɛ, wa ĩ ti dɛ mɔ hã zã dɛ sanga tɛ ngba wa nɛa ngɔ owinɔ 'da Gale.”
9Nɛ Yezu tɔ̃ 'bɔ na: “Mi tɔ̃ hã nɛ na, nɛ kɛ mbili zũi 'da nɛ hã Owele, takɔ wa kɔ̃ gɛnɛ nɛ. Nɛ fala kɛ nɛ sɛ 'bɔ do mbé mbili bina ni, nɛ Gale a hã sɛ fala hã nɛ kɔ le nwa 'da a. 10Wi kɛ a dɛ obe mɛnɔ do wala olo nɛ ni, nɛ a dɛ sɛ tɛ mɛ 'bɔ ogã mɛnɔ do wala olo nɛ. Kɔ wi kɛ a dɛ́ obe mɛnɔ do wala olo nɛ gɔ ni, a dɛ́ sɛ tɛ mɛ 'bɔ ogã mɛnɔ do wala olo nɛ gɔ. 11Kɔ fala kɛ nɛ dɛ̀ mbe gbãlã we mɔ do kpamɔ zũi 'da nɛ ngɔ nù gɛ gɔ, nɛ wi nɛ hã sɛ ngbongbo kpamɔ hã nɛ a wio nde? 12Fala kɛ nɛ dɛ̀ mbe gbãlã we mɔ do mɔ mɔ́ ngba nɛ gɔ, nɛ wi nɛ hã sɛ mɔ kɛ ma yɔla nɛ ngboo ni hã nɛ a wio nde?
13“Wi dɛa to wè tɛ dɛ to hã onwa bɔa gɔ. Mba gɔ, a sɛnɛ sɛ mbe kpo, nɛ a kɔ̃ gɛnɛ mbee nɛ. Tabi a nɛ sɛ 'do mbe kpo, nɛ a bɛ̃ we nu mbee nɛ. Kɔ nɛ wè tɛ hã tɛ nɛ we dɛa toe 'da Gale, nɛ nɛ hã 'bɔ tɛ nɛ we mbili gɔ.”
Yezu bia we kpi do kpi
(Mat. 11.12-13; 5.31-32; Mar. 10.11-12)
14Yezu nɛa we tɔ̃ wenɔ ni do'do, nɛ Ofariziɛnɔ wa mɔmɔ a wena, we kɛ wa kɔ̃ gɛnɛ mbili wena. 15Nɛ Yezu tɔ̃ hã wa na: “Nɛ be tɛ nɛ na, owinɔ wa zɔ nɛ ɔ nɛ odia wele, nɛ nde Gale ĩ ti kɔ sila nɛ. We kɛ mɛ Owele wa zɔ ma li wa ɔ nɛ dia mɔ ni, nɛ nde Gale zɔ li ɛ na, mɛ a mɔ gbɔlɔ mɔmu iko. 16Zɛ́ dati, gbaa we hɔ ngba soe 'da Yoanɛ wi batisa winɔ, mɛ be zi wala hã winɔ a mbula 'da Mɔizɛ, do 'bukunɔ 'da owi gba olo nu Gale. Nɛ yolo do Yoanɛ, nɛ wa ma ngɔ be Dia Sako ngɔ le nwa 'da Gale, nɛ wele do wele dɛ nganda wena na, ɛ le kɔ le ni. 17Li nza do nùi ma bisi sɛ dɔ̃, nɛ nde gbãlã mbɛti kpo kɔ 'buku mbula bísí sɛ gɔ.
18“Wi wili bɛ̃ kɛnɛ a, kɔ a ba mbé wuko, nɛ nde a yɛngga vĩ zu yali do wuke ni. Nɛ wele kɛ a ba wuko kɛ wili a bɛ̃a a ni, nɛ nde a yɛngga vĩ zu yali do wuke ni.”
Gba we ngɔ mbe wi kpamɔ do Lazarɛ
19Nɛ Yezu tɔ̃ gba we na: “Mbe wele zi kpo, a a wi kpamɔ, nɛ a he'de zi fai a dia tulu, kɛ gole nɛ gã wena ni. Nɛ tũ kpo kpo, a nyɔngɔ mɔ ɔ nɛ mɛ a 'da fala ɛngga ni. 20Nɛ mbe wi sã kpo, li a a Lazarɛ, tɛ̃ a kpa do dani vɛ̃. Nɛ tũ kpo kpo, a tɛ, nɛ a ɔ dɛ nu tɔa 'da wi kpamɛ ni. 21Nɛ a kɔ̃a we nyɔngɔ 'bulu nyɔngɔmɛnɔ kɛ ma ala dɛ ti mɛsa 'da wi kpamɛ ni. Dɛ ngɔ nɛ, otolonɔ wa tɛ, nɛ wa ma ngɔ la'da li daninɔ tɛ̃ a ni.
22“'Do nɛ, nɛ wi sã ni fia, nɛ oanzɛnɔ wa kã a dɛ kɛ zã Abrahama tɛ li nza i. Nɛ 'do nɛ là tũ dɛlɛ gɔ, nɛ wi kpamɛ ni fia tɛ mɛ 'bɔ, nɛ wa mi a. 23Nɛ wi kpamɛ ni ma ngɔ kpa zɛlɛ tɛ kɔ le 'da ofionɔ i wena. Kɔ a nɛa we ba li a ngɔ, nɛ a zɔ Abrahama ndũu, nɛ nde Lazarɛ dɛ kɛ zã a ni. 24Nɛ a he mɔ na: ‘Baa mi Abrahama, mɔ ĩ́ 'bako hã mi, kɔ mɔ tómbó Lazarɛ, kɔ a ndɔ gbãlã zu kɔ̃ a 'dɔ lì, hã a tɛ nɛ, we tɔkpɔlɔ ngɔ lɛfɛ mi. We kɛ mi zɔ ngamɔ tɛ li we gɛ wena.’ 25Nɛ Abrahama gese hã a na: ‘Be 'da mi, mɔ lénggé do kɛ mɔ zi do kpamɔ kɔ dungu nza 'da mɔ wena, nɛ Lazarɛ zi a wi 'bakoe ni. Kɔ ngangga gɛ, 'bakoe 'da a ma ia, nɛ mɔ tɛ kpa ngamɔ. 26Dɛ ngɔ nɛ, gba 'du kɔ̃ sanga ngba lɛ do mɔ boe. Nɛ wele wè tɛ yolo dɛ, nɛ a kũ dɛ 'da nɛ i gɔ. Nɛ wele wè tɛ mɛ 'bɔ tɛ yolo 'da nɛ mɔ, nɛ a kũ dɛ 'da lɛ nga gɔ.’
27“Nɛ wi kpamɛ ni ala nu ɛ hã Abrahama na: ‘Baa mi, ní nɛ mɔ tómbó Lazarɛ nu tɔa 'da baa mi i, 28we kɛ mi do onya mi wi wili nɛ zu wa mɔlɔ. Kɔ a nɛ, hã a mbese wa na, dɔ wa tɛ́ 'bɔ dɛ fala zɛlɛ tɛ mi tɛ nɛ gɛ gɔ.’ 29Nɛ Abrahama gese na: ‘Onya mɔ wa do 'buku 'da Mɔizɛ, do kɛnɔ owi gba olo nu Gale wa kɔma ni boe. Ma mbese sɛ wa, nɛ ma wia na, wa zele ma.’ 30Nɛ wi kpamɛ gese na: ‘Aa baa mi Abrahama, ma wé sɛ gɔ. Kɔ fala kɛ mbe wele yolo 'da ofionɔ nga, kɔ a nɛ we mbese wa, nɛ wa kifi sɛ sila wa.’ 31Nɛ Abrahama tɔ̃ hã a na: ‘Fala kɛ wa kɔ̃̀ we zele wenɔ 'da Mɔizɛ do kɛnɔ 'da Owi gba olo nu Gale gɔ, kɔ gɛnɛ kɔ wele za'da nza kɔ fio, kɔ a nɛ we mbese wa, nɛ nde wa kɔ̃́ sɛ gɔ.’ ”
Valið núna:
LUKA 16: NGB
Áherslumerki
Deildu
Afrita
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.