Matias 19
19
Yesus 'ai do-doto'o mangale were'a nau'u ma'u oḏu'u
(Mrk. 10:1-12)
1Wakutu Yesus 'o doto'o togumu i'a Unanga 'a sisoi'i tala daeraha Galilea, re 'o tagi toma daeraha Yudea, toma Ḇanyo Yordan kaci moi 2Toma ngi'i gena-ge ngowa'a kawasa 'aḏi mete'e Unanga, re Unanga ya'u si-la ananga manga si-siḏi.
3Ngowa'a Farisi nga muḏuo i'a 'aḏi sapolo ra Yesus, ananga 'aḏi disa Yesus 'ai sala. Ananga 'aḏi sano, “Mete'e nanga 'agama ma hukumu, nau'u oḏu'u 'ai were'a sababu ma 'alasana 'oru ḇato, nyengara bolo ua?”
4Yesus 'a sangoro, “Tantu ḏua, ngini reni baca toma Boku 'Ofi-'Ofi mangale wakutu Ma Jou'ongu Madutu 'o sidadi manusia, ma mulaingi 'age 'o na-nau'u re we-were'a?!#Do. 1:27, 5:2 5Togumu i'a, Ma Jou'ongu Madutu 'o kanau ra ananga nga muḏiḏi, ‘Sababu gena-ge, na-nau'u 'o sisoi'i tala 'ai ḇaḇa re 'ai ngina, re 'o marimoi tai were'a, kara ananga nga muḏiḏi 'aḏi dadi rimoi.’#Do. 2:24 6Dadi ananga 'aḏi dadi nga muḏiḏi riwara, mada'a raḏi dadi rimoi. Sababu gena-ge, 'oru ga'a Ma Jou'ongu Madutu ra sirimoi, manusia wa sito-tola'a yoḏu'u.”
7Ḏua ngowa'a Farisi 'aḏi sano moju, “Na'o so'o gena, i'a sa'olo 'a Musa 'o soma'a nau'u balasu pula'a surata tola'a tai were'a ga'a unanga re mi oḏu'u?”#Dad. 24:1-4; Mat. 5:31
8Yesus 'a sangoro, “Musa 'o pula'a loasa ni oḏu'u ninga were'a sababu ngini ninga 'akala re sinyingara lai te'e. Mada'a ma ba-banari toma mulaingi i'a so'o gena ua. 9Dadi, Ngoi to siajele ra ngini nena-ne: 'A guna ḇato 'a oḏu'u 'ai were'a, mada'a were'a gena-ge mo tinikai ua, kara 'o molo'ara we-were'a lelegu, unanga gena-ge 'o tinikai.”#Mat. 5:32; 1Kor. 7:10-11
10Ḏua Yesus 'ai me-mete'e 'aḏi kanau ra Unanga, “Na'o so'o gena, jobilaha molo'ara awa!”
11Yesus 'a sangoro, “Demo gena-ge ngowa'a mo-moini ua nga'unu ya mete'e, mada'a pa'i ngowa'a ga'a Ma Jou'ongu Madutu ra sitantukanga. 12Sababu 'age rema ngowa'a ga'a masinge-ngeta'a da'u tala ga'a 'aḏi molo'ara 'i yoḏu'u. Re 'age rema ngowa'a ga'a 'aḏi molo'ara 'i yoḏu'u, sababu ngowa'a ya'u kabiri. Re 'age ḏi'i rema ngowa'a ga'a mau 'aḏi de-de'oso Ma Jou'ongu Madutu, dadi 'aḏi molo'ara ua. Ngowa'a ga'a nga'unu ya mete'e 'ani demo-demo gena-ge, lebe rousu ananga ya si'a'a.”
Yesus sibarakati ngowa 'olo-ngowa 'olo
(Mrk. 10:13-16; Luk. 18:15-17)
13'Age 'orasa rimoi, ngowa-ngowa'a 'aḏi gasa i'a manga ngowa 'olo ra Yesus, la Unanga 'a siteru 'Ai giama ra ananga di'a ya'u sibarakati. Mada'a 'Ai me-mete'e 'aḏi ḇangata ngowa'a gena-ge ga'a gasa manga ngowa 'olo.
14Ḏua Yesus 'o kanau Tai me-mete'e, “Sieanga i'a ḇato ngowa 'olo nena-ne 'aḏi sapolo ra Ngoi. Awa ni dola'aku ananga, sababu ngowa'a ga'a 'aḏi dadi ma tero sa'olo ngowa 'olo-ngowa 'olo nena-ne pa'i ananga gena-ge nyengara 'aḏi osama nyo-nyoimi toma Soroga ma Pareta.”#19:14 “Soroga ma Pareta” ma tero Ma Jou'ongu Madutu 'ai Pareta. Gena-ge ma tero toma bu-bula'a 23, 24.
15Gena ḏua, Yesus 'a siteru 'Ai giama toma ngowa 'olo-ngowa 'olo matengo re matengo manga sae'e ma re'u kara 'O sibarakati ananga. Gena ḏua Unanga 'o tagi sisoi'i tala ngi'i gena-ge.
Tubaie matengo ngowa'a rema-enanga
(Mrk. 10:17-31; Luk. 18:18-30)
16Toma wangere rimoi, 'age tubaie matengo 'o sapolo ra Yesus, re 'o sano, “Guru, ngoi balasu to 'a'a ga'a ma la-la sa'olo, la to dawongo 'ahu kasingado-ngadolo i'a?”
17Yesus 'a sangoro, “I'a sa'olo no sano ra Ngoi mangale 'ori i'a ma la-la? Pa'i Matengo ḇato ma la-la. Na'o ngana mau no sanga 'ahu kasingado-ngadolo i'a, ngana balasu no mete'e parenta-parenta ra Ma Jou'ongu Madutu.”
18Tubaie gena-ge 'o sano, “Parenta-parenta sa'olo?”
Yesus 'a sangoro, “No sisengene ngowa'a awa, no tinikai awa, no tori'i awa, no dadi sakisi sa-sakala awa,#Sup. 20:13-16; Dad. 5:17-20 19no silamo'o 'ani ḇaḇa re 'ani ngina, re no dadalara ngowa'a lelegu ma tero sa'olo no dadalara 'ani diri masiretene.”#Sup. 20:12; Dad. 5:16; Im. 19:18
20Tubaie gena-ge 'a sangoro, “Parenta mo-moini gena-ge ngoi reta mete'e. 'I kuranga 'oru moju?”
21Yesus 'o kanau, “Na'o ngana mau no dadi ti-tiai, no maḏibo re na wu'unu 'ani 'ori i'a rana mo-moini, re ma pipisi na sibalangu toma ngowa-ngowa'a ma dinga'unu ua. Dadi, ngana ḏuanga i'a no sanga 'ori i'a rana mode-mode'e toma soroga. Togumu i'a no sapolo re no mete'e Ngoi!”
22Wakutu tubaie gena-ge 'a 'isene Yesus 'o kanau so'o gena, unanga 'o maḏibo rai 'akala re sinyingara 'i kangela, sababu unanga gena-ge ngowa'a rema-enanga madutu.
23Ḏua Yesus 'o kanau Tai me-mete'e, “Ni ngaku mode-mode'e 'Ari demo-demo nena-ne: Kangela masala di'a ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.#19:23 “Ma Jou'ongu Madutu 'ai Pareta” ma tero Soroga ma Pareta. 24Re Ngoi to siajele ra ngini nena-ne ḏi'i: Lebe gapanga 'o 'unta rimoi 'i osama toma j̱aiti ma duso'o reo ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.”
25Wakutu 'ai me-mete'e ya 'isene Yesus 'o kanau so'o gena, ananga 'aḏi heranga masala re 'aḏi kanau, “Na'o so'o gena, 'a guna nga'unu sanga salamata?!”
26Yesus 'o tatamo ananga re 'o kanau, “Toma manusia 'i osama 'akala ua, mada'a ra Ma Jou'ongu Madutu mo-moini 'i osama 'akala.”
27Ḏua Petrus 'o sangoro, “Ngomi remi sisoi'i tala mo-moini, la mi mete'e Jou! Dadi ngomi sanga 'oru?”
28Yesus 'o kanau ra ananga, “Ni ngaku mode-mode'e 'Ari demo-demo nena-ne: Toma dungia su-sungi Ngoi, Manusia ma Ngowa'a Nau'u ḏuanga i'a To tegoro Tari ḏe-ḏegoro ga'a mulia. Re toma 'orasa gena-ge, ngini Ngoi 'ari me-mete'e, ni tegoro toma ḏe-ḏegoro nyagi moi re romoḏiḏi, re ni sijuruhakimi ngowa'a Israel suku nyagi moi re romoḏiḏi.#Mat. 25:31; Luk. 22:30 29'A guna ḇato ra sisoi'i tala 'ai wala, 'ai iḏanga re biḏanga, 'ai ḇaḇa re ngina, 'ai ngowa-ngowa'a bolo 'ai guḏa sababu mete'e Ngoi, unanga gena-ge ḏuanga i'a 'o dawongo maḏibo siḏuolo latu moi re 'o sanga ḏi'i 'ahu kasingado-ngadolo i'a. 30Mada'a ngowa'a repe ga'a nange-ne 'aḏi dadi ngowa'a la-lamo'o, ḏuanga i'a 'aḏi dadi ngowa'a ma pake ua. Re ngowa'a repe ga'a nange-ne 'aḏi dadi ngowa'a ma pake ua, ḏuanga i'a 'aḏi dadi ngowa'a la-lamo'o.”#Mat. 20:16; Luk. 13:30
Valið núna:
Matias 19: SNT
Áherslumerki
Deildu
Afrita
Want to have your highlights saved across all your devices? Sign up or sign in
2015 © Indonesian Bible Society