MATIUS 28
28
Jesus Anigota
1Sabbat naago wadouto, kou ko dá putu ka edoga naago awe digii gaa kodaa, Marjam Magdalena ma, joko ka Marjam ma me oka kodo aadoune aamei.
2Okai kou gaa kodo maki pigi umina tidoke tai; Tuhan jaetigo-tai me idaana epaawado make mijo mejake kouja. Me oka takimijawita mogo kodo wo bikimijawijake kou wado animakai.
3Edou ko wakibego dani, daana kagaba ko pokadee waki tidoke.#28:3 saldju dani
4Douto-tai bagee maija weda gajake pigi-pigi tai, tijake bokata bagee dani kidaa tai.
5Tijake jaetigo-tai kidaa jagamo kodoopa eteete mana, „Weda te gai. Ani epi ikii pija boko maida edajawita me Jesus kidi eubaate.
6Jakai beu topi; okai anigopi, okaija tika kiteetegi danite. Mewei, emakitaida dodowei.
7Tijake tibigi auwijake okai bokata bagee jupi make anigopi mana kodo etope-taidoopa aeti-menai. Daana okai tiga Galilea makijo uwiitagi. Okai kouda kodaa ikii edouta. Daana gai! Ani kiteega,” etii.
8Tijake okejai tibigi me okaapa make auwai, weda ma umina ideide ma. Okejai etope-taido aetaine tibigi auwai.
9Tijake Jesus okei ma akado tijake eteete mana, „Kojáá,” etii. Jagamo wija kodo okaapa aajawijake okaija bado aejakimakijake migaakobe aatai.
10Tijake Jesus eteete mana, „Weda te gai. Ani kenekaaneidoopa Galilea dokoo uwii kiteegi, aanaaete-auwai. Okai kouda kodaa okei nadoutai,” etii.
Doutota ka Serdado ka Mana
11Okejai auweetigo gaa, kouda doutota bagee wija wido maki okogo jokoujo kijake ewaa kita mana kodo imam iboudo eti-menii.
12Okei me iboudo ma enaimo kotuu timakijake mana wegajake serdado mege menii,
13eteete mana, „Meido kede kii dani etii: ’Okaija etope-taido wanee jato mejake inii uno umi-toojogo oma emotigo-toogai.’
14Daana kou danite Gubernur kidi kou mana juwipi ko, inii dabaa etijake ikii enaa keewiitage,” etii.
15Kojoka okei mege motijake etita kidi danite kei tai. Kii mana muto ito kii naago kidi maija Jahudi bagee jupi wudikumii.
Jesus Etope-taido Muumai Jago Mana Etii
16Etope-tai ena ma gaati kede Galilea uwii, Jesusja etita dimi katoudaapa.
17Okei Jesus edojake migaakobe etai. Kodeja me ino ke dimi takaida kai.
18Jesus okeepa mejake okei ma mana oowegajake eteete mana, „E bida te bida epaawado ka ma, makiida ka ma ani maida boko naduwajawita.
19Okai kouja ikii uwijake me tuma tumaija anija etope-tai naawii, daana Nakame ma, Jokame ma, Rohulkudus ma eka dubaiga baptis etai.
20Anija kitimakeetega mana manaija dijo do-tijake etopai. Epeepite gai, ani ki ikii wa enaimo, kii kidi wiwitiida naago to.”
Valið núna:
MATIUS 28: EKG
Áherslumerki
Deildu
Afrita
Want to have your highlights saved across all your devices? Sign up or sign in