MATIUS 13
13
Pi Kigii Te-tai Me
1Okai kou naago kodo Jesus owaapa make podomijake itei watija animakai.
2Me wedaba okaapa kotuu timakijake okai koma matakijake animakai. Me wedaba kede adaida jooni-toojogo.
3Okai mana muto inoudo ena dani awe-tai manaidaiga oowegai, eteete mana, „Juwidowei, pi kigii te-tai me kidi pi kigii taine podomai.
4Okai pi kigii teetigo pi ino ko ita watija gootidaa; tijake bedoudo mejake nojawigou.
5Ino ko mogo makiida gootidaa, maki beu daniida; tijake egaa kodo pakamai, maki beu dani kouja.
6Kodeja meuka wadoujo kijake denadaa tai; tijake mani beu kouja wei kogi tai.
7Ino ko dogo jupi gootidaa; dogo ejajake pi kodo mijo gape-gape tai.
8Ino ko enaa makiida gootidaa tijake uta gojawii; ino ko mepiija ka wija, ino ko mutoona, ino ko jokagaati ajaago tidaa.
9Gapa jago bagee juwii to tai,” etii.
10Tijake etope-taido okaapa mejake eteete mana, „Magijo ka ena dani awe-tai manaidaiga oowegai?” etii.
11Tijake wo eteete mana, „Epaawado ka jakimakita makiida ka boone-boone manaido epi ke-tijake kinita, kodeja okeepa menii ko beu.
12Agijo jago bageepa abuma menii kouja; tijake okai euga abuma ewaa kai. Kodeja agijo tagu bageepa make makita agijo jamotii.
13Okai kouja ani ena dani awe-tai manaidaiga oowegai, okei dojake domakai beu kouja, daana juwijake juwimakai beu; tijake gamakai beu kouja.
14Okei maida tikauwa ka gokobaki tijawiidaiga wegai tita me Jesaja kidi mana kobadoke, kou ko:
Ikii maa kou juwiita, kodeja te gamakai,
Daana ikii maa kou douta, kodeja te domakai;
15Kou bageeja ka kegepa ko bida kita kouja;
Gapa ko udo kijake gapa daba kita;
Peka ko bugumita;
Okei peka ka domakai na kojoka.
Daana gapa ka juwijake,
Daana kegepa duba gamakijake
Ani beu jaawe-tijake aneepa wouga kai na kojoka.
16Kodeja ikii ke ideide no! ikiija ka peka kodo domake kouja; daana ikiija ka gapa kodo maija juwimake kouja.
17Beu maa kou ani kitii, tikauwa ka gokobaki tijawiidaiga wegai tita bagee wedaba ma, enaa bagee wedaba ma ikii do-tai manaido doune tijake didi gai, kodeja dou beu; daana ikii juwe-tai manaido juwiine tijake, kodeja juwii beu.
Pi Kigii Te-tai Me Mana Boko Petai
18Okai kouja pi kigii te-tai me ena dani awe-tai mana boko jato kodo juwidowei.
19Me idaana jakimakita makiida ka mana muto juwijake gai beu ti-toojogo, peu bokouto jago me mejake okaija kegepa duba kigii tita mana japitaki-motii; kii ke ita watija ka kigii tita kidi.
20Mogo makiida ka kigii tita kidi, okai mana muto juwijake okai kou gaa kodo egaa ideide ma jakimakai.
21Kodeja okai duba mani wejawii beu kouja mijo gaa to jakimakai; tijake mana kodo maida make gaagaa juwa, peepu juwa eti-toojogo, okai kou gaa kodaa jaikidokii.
22Dogo jupi kigii tita kidi, kii ke mana muto juwita me kidi; tijake makiida ka gai peu agijoudo ma, tonawi agijoudo eukai mana ma kodaa mana muto kodo mijo gape-gape tai, tijake uta gou beu.
23Enaa makiida ka kigii tita kidi ki, kii ke mana muto juwijake gamakai; okai kidi uta gojake mepiija ka wija juwa, mutoona juwa, jokagaati juwa ajaago tidaa.”
Ojaa Ijoo Enaa Ijoo Jupi Weta
24Joko ka ena dani awe-tai mana okeepa jabejajawii, eteete mana, „Epaawado ka jakimakita makiida kou ko me idaana ka enaa ijoo okaija taida kigii tai dani bukaa.
25Kodeja me uno umi-toojogo akaije oote-tai me mejake gandum ijoo jupi ojaa ijoo kigii tijake uwii.
26Daana taka wudidaa tijake uta goja gaa, okai kou gaa kodo ojaa ijoo maija ewaa tapa kai.
27Tijake táí ipuwe me jakei te-tai bagee mejake eteete mana, ’Ei, naitai, beu mee? akaa taida enaa ijoo weetege. Kaija make ojaa ijoo kou ko?’
28Etijake okaija wo eteete mana, ’Akaije nate-tai me kidaa kei tipi ga,’ etii. Tijake jakei te-tai bagee eteete mana, ’Ide mee? ojaa ijoo witoki-mote-uwii,’ etii.
29Kodeja okaija ’Beu’ etii; ’kou danite ojaa ijoo badi-toojogo gandum ijoo maija enaimo badidaa tija kouja.
30Kojoka okejai enaimo ejajake duwaitaida to jaikai. Duwai naago ani duwa-tai bageepa kii dani etiita: Ojaa ijoo kou tiga badikumijake boda gadimijake bodija jookogai, kodeja gandum ko anija makija owaa duba woujo naawii, etiita,’ etii.”
Sesawi Pi ma, Ejajawe-tai Agijo ma
31Joko ka ena dani awe-tai mana okeepa jabejajawii, eteete mana, „Epaawado ka jakimakita makiida kou ko sesawi miteena me idaana motijake okaija taida wejawii dani bukaa.
32Joko ka miti ma ko umina mijo daba, kodeja ejajake naapoudo ma ko euga ibo kijake uteena kai. Tijake epa bede maki bede ka bedoudo mejake kago maida geka migii.”
33Joko ka ena dani awe-tai mana maija kii dani eteete mana, „Epaawado ka jakimakita makiida kou ko goti ejajawe-tai agijo dani bukaa. Jagamo idaana motijake tepong ebijadou wido duba awijake utoma ejajawii.”
34Kei manaido kei kotuu timakita meidoopa ena dani awe-tai manaidaiga etii. Ena dani awe-tai mana beudaiga tumaana ma etii beu.
35Kii dani tikauwa ka gokobaki tijawiidaiga wegai tita meja wegata mana koba-tijake, kou ko:
Ena dani awe-tai manaidaiga mana godaita,
Maki kabo makitaida make boonita agijoudo wegakumiita.
Ojaa Ijoo Mana Boko Petai
36Tijake okai me wedaba kede ejaikidokijake owaapa wadoujo kai. Etope-taido okaapa mejake eteete mana, „Ojaa ijoo taida ejata ki ena dani awe-tai mana kodo boko jato niti-niimidou,” etii.
37Tijake wo eteete mana, „Enaa ijoo kigii tita me kidi ki me Joka kidi.
38Táí kii ko uwoje makije ki. Enaa ijoo kii ke jakimakita makiida ka jokaane kede. Ojaa ijoo kii ko peu bokouto kidi jokaane.
39Akaije te-tai me ka ojaa ijoo kigii tita kidi ki Teege kidi. Duwai wagi ko wiwitiida naago kodo, daana duwa-tai bagee jaetigo-tai bagee kede.
40Ojaa ijoo kotuu timakijake bodija jookogata kidi danite, okai kou dani maija wiwitiida gaa kei tidoke taita.
41Me Joka jaetigo-tai bagee ebadikumijake okaija jakimakita makiida make peu epauto ma, peu awe-tai ma kotuu etimakaitai.
42Tijake bodija no-taida eemigimakaitai. Okai kouda kodaa jege ma egaagede ma to touda.
43Tijake enaa bagee meuka danite ganimakaitai, Nakame ka jakimakita makiida. Gapa jago bagee juwii to tai.”
Maki Duba Boonita Agakaato Dani Agijo
44„Epaawado ka jakimakita maki kou ko, me idaana agakaato dani agijo maki duba boonita kodo domakijake boonijawii dani bukaa. Tijake ideide umina ma uwijake okai maida ka aagijo taagijo kaa tijake kou maki kodo edai.
45Daana epaawado ka jakimakita maki kou ko munaa uwe-tai me idaana ka enauto pakooba ubaate dani bukaa.
46Ibo age pakooba domakijake okai maida ka aagijo taagijo kaa te-uwii. Tijake pakooba kodo eda-motii.
Ebai
47Daana epaawado ka jakimakita maki kou ko me ka ebai maikai duba menijake ikan tuma tumaija muga-motija dani bukaa.
48Ebetume tidoke tijake me ka adaida wado gou. Animakijake okaakai tijawii; enaa kaija awimakai, daana peu kaija emigimakai.
49Okai kou dani maija wiwitiida gaa kei taita. Jaetigo-tai bagee podomijake enaa bagee jupi make peu bagee okaakai tijawiitai.
50Tijake bodija no-taida eemigimakai. Okai kouda kodaa jege ma egaagede ma to touda.
51Ikii kei manaido kei gamakeega, mee?” Etijake joko eteete mana, „Ii, gaage,” etii.
52Jesus eteete mana, „Okai kouja kapogeije epi me gakita epaawado ka jakimakita makiida maida topi-toojogo owaa ipuwe me idaana dani bukaa. Okaija tonawi agijo awijaida make ija ma doga ma podomijake te-tai.”
Jesus Nazaret Makiida Ekonita
53Kei ena dani awe-tai manaido wegajawijake Jesus kouda make uwii.
54Okai kidaa makiida dakii tijake sembahjang owaa duba meido etopai. Tijake okei ego takuu-takuu etijake eteete mana, „Kii me kii ke kou dani dimi bokouto ma, ego takuu-takuu kodo ma kaijaiga go-moteegi?
55Beu, mee? pija kei te-tai me joka kidi. Daana beu, mee? ukame eka ko Marjam kodo. Daana kenekaane kei Jakub ma, Jusuf ma, Simon ma, Judas ma kede ke.
56Daana panekaane utoma ineepa topai ko, beu mee? Kaija make kou manaido ko googi?” wegai.
57Tijake okei gaagaa. Kodeja Jesus eteete mana, „Gokobaki tijawiidaiga wega-tai me idaana me ka ibo ejaikai, kodeja okaija makiida, daana okaija owaapa to ko beu,” etii.
58Okai kouda kodaa ego takuu-takuu agijoudo wedaba kei tai beu, okei maakodo egai beu kouja.
Valið núna:
MATIUS 13: EKG
Áherslumerki
Deildu
Afrita
Want to have your highlights saved across all your devices? Sign up or sign in