MATIUS 12
12
Sabbat Naago Gandum Uta Duwai
1Okai kou gaa kodo Sabbat naago Jesus gandum taidaiga wokaato kai. Etope-taido naidi tijake gandum jukuuno kodo duwa-motijake nai.
2Parisi bagee okai kou kodo dojake Jesuspa eteete mana, „Dododou, akija etope-taido Sabbat naago dijo beebu teete,” etii.
3Jesus eteete mana, „Ikii Daudja kei tita agijo kapogeije ebatai beu, mee? Okai ma, okai ma bagee ma naidi tijake
4okai Ugatameja owaa duba wadoujo kijake makita goti kodo nai; okai ma, okai ma enaimo bagee ma nai ko dá kodeja; imam to pijo.
5Daana nitimakita mana duba ebatai beu, mee? Sabbat naago Ugatameja owaa duba imam Sabbat naago ekagumijake anaani beu kodo.
6Ani kitii, jakai Ugatameja owaa ma ko ibo kato topi.
7Daana kou danite ikii kou mana kodo epi naako, kou ko: Jo-menii agijo ma ko beu ani ide gata agijo ipa dimi kodo; no, peu beu me kidi ikii ijeije te etija kodaa.
8Me Joka kidaa Sabbat naago boko duwajawita me kidi.”
Enakaato Gane Bokata Me Beu Jaawii
9Okai kouda kodaa make uwijake okeija sembahjang owaa duba woujo kai.
10Kouda kodaa enakaato gane bokata me idaana toojogo. Okei egaado taine tijake eteete mana, „Pijo, mee? Sabbat naago didi agijo beu jaawii.” Okei ijeije etaine tijake.
11Jesus wo eteete mana, „Meime ikii jupi domba idaana makijake Sabbat naago komo duba gooti-toojogo ejakimakijake wado te egoja, mee?
12Domba ma ko me ki ibo, mee? Kojoka Sabbat naago enaa agijo kei tai ko pijo.”
13Tijake me kidiipa eteete mana, „Akija gane mapido ti.” Etijake me kidi gane mapido atijake bida kidoke tai, enakaato ka gane danite.
14Kodeja Parisi bagee podomijake kawe danite wagimakija mana kodo amo wegai joko wegai tai.
15Jesus kou mana kodo epi kouja, okai kouda make uwii. Me wedaba eepejake okai me utoma beu jaawii.
16Okai maida make mana ugo te uwikume-tijake bida peu etimakai.
17Tikauwa ka gokobaki tijawiidaiga wegai tita me Jesaja wegata mana koba-tijake, kou ko:
18Edodou, anija ewitokita nakei te-tai,
Anija ei egajake juma dege-dege etita kidi.
Anija Roh okai maida jamakijawijake
Okai ojaa bageepa boko petaitagi.
19Okai akaije juwa, mana pitokai juwa te tijake
Okaija mana wuu itaidaiga te jajuwii.
20Tuwata mome te tuwajawii,
Daana nakagi utine te dinijawii,
Okai boko petajawiitagiida to.
21Okaija eka maida ojaa bagee kede dimi ekotopijawiitai.
Akaije Akaate Uguwo te Tomake
22Peka wanee ma manaawo ma enija jago me idaana me ka oomejake okai beu jaawii; tijake me kidi mana godai ma dou ma tai.
23Me utoma ego takuu-takuu tijake eteete mana, „Beu, mee? kii ke Daud Jokame,” etii.
24Kodeja Parisi bagee juwijake eteete mana, „Kii ke enijaido jaemigimakeigi ko beu, kodeja Baalzebul ka to, enija ukauto kodo,” etii.
25Okeija dimi kodo epi kouja, Jesus eteete mana, „Jakimakita maki gakita okai akaato akaije ti-toojogo peu kaita; daana maki okogo juwa, me uguwoona juwa, akaato akaije ti-toojogo te touta.
26Daana Teege ka Teege eemigimaki-toojogo, okai akaato akaije teete; kawe dani tijake okaija jakimakita makiida toja?
27Dedaana ani ki Baalzebul ka enijaido jaemigimakipa ko, ikiija jokaane meima ka eedadijake jaemigimakai ko? Okai kouja okei kede boko kipetaitai.
28Kodeja Ugatameja Roh ka ani enijaido jaemigimakipa ko, Ugatameja jakimakita makiida ikeepa keega.
29Kawe dani tijake me idaana ka bida jago me ka owaa wadoujo kija, edepedeido jamo-motiine tijake, bida jago me tiga buda te egadimi-toojogo? Kou dani to tijake okaija agijo jamomotii.
30Ani jato kai beu me kidaa ani akaije natai. Daana ani ma kotuu naatai beu me kidaa kigipapa tijawii.
31Okai kouja ani kitii, me ka peu awitaido ma, me eduwai ma, utoma ipa ejaikija; kodeja Roh eduwai kou ko ipa te ejaikija.
32Meija me Joka akaije mana mutoona godapi, ipa ejaikija; kodeja meija Rohulkudus akaije mana godapi, ipa te ejaikija, makiida kiija maija, wado ka wagi kodo maija.
33Uti enaa tijawijake uta maija enaa kija juwa,
Uti peu tijawijake uta maija peu kija juwa;
Uta uti kou ko akiuta uta gojake gaja.
34Kowaa kei, ikii jina tuma! Kawe dani tijake ikii enaa mana godaja? Ikii peu kojoka. Kegepa duba bokouto kodo ebeiga godajake kojoka.
35Enaa me okaija enaa awiida make enaa agijo podomijawe-tai, daana peu me okaija peu awiida make peu agijo podomijawe-tai.
36Ani kitii, wogidaa mana gakita me ka godajawii ko, boko petai naago okei dokiitai.
37Ikiija mana maida make maakodo keewija kouja, daana ikiija mana maida make peu keewija.”
Ego Takuu-takuu Agijo Ediimai
38Tijake kapogeije epi bagee ma, Parisi bagee ma Jesuspa wo eteete mana, „Ei, Kuduu, akeepa make dou beu agijo doune kodaa,” etii.
39Kodeja okai wo eteete mana, „Peu ma mogai jago ma tuma ki dou beu agijo doune ubaate, kodeja dou beu agijo tumaana ma te emuwakaita, kodeja tikauwa ka gokobaki tijawiidaiga wegai tita me Junus kidi to.
40Junus kidi agapi wido uno wido ikan peijo modo duba danite, kou danite maija me Joka agapi wido uno wido maki duba toutagi.
41Boko petai naago Ninewe ka bagee kii tuma ma enaida anigojake ewidogaitai; Junus mana japitokijake tedemita kouja; daana beu maa kou, jakai kiija Junus ma ko ibo topi.
42Jamaato ka maki jakimakita jagamo kodo boko petai naago kii tuma ki ma enaida anigojake ewidogaita; okai maki momogiida make Sulemanja dimi boko mana jajuwiine mei kouja; daana beu maa kou, jakai kiija Suleman ma ko ibo topi.
43Enija me duba make podomidoke tijake uwo beuda jawina tai, ee duwaineida ubaate, kodeja domakai beu.
44Tijake kei teete mana, ’Ani jaikidokeetega owaapa wo uwiine,’ wegai. Okai dakii tijake gekoo ma, jimu demakijake ma, diiti awi-toojogo ma dou.
45Okai uwijake okai ma ko umina peu enija pituwo ebukigojake oomei. Okai ma enaimo woujo kijake tou. Kii me kidi tika kodo ma ko muumai jato umina peu. Okai kou dani kii peu tuma kidi maida kei tidoke taita.”
Jesus Ukame ma Kenekaane ma
46Okai meido kodoopa mana wegaatigo gaa, ukame ma kenekaane ma juwouda jooni-toojogo, okai ma mana wegatijake ediimeete gaa.
47Me ka Jesuspa eteete mana, „Edodou, akuukai ma aki kenekaane ma juwouda topai, aki mana kaawegaine,” etii.
48Kodeja etipi meepa wo eteete mana, „Meime noukai ko, daana meima ani keneka ke?” etii.
49Tijake etope-taido doodouga gane mapido tijake eteete mana, „Edowei, noukai ma ani kenekaane ma,” etii.
50„Meija epaawado ka Naitai kidaa gata dimi kei tipi ko, okai kii ke ani keneka ma, ani paneka ma, noukai ma,” etii.
Valið núna:
MATIUS 12: EKG
Áherslumerki
Deildu
Afrita
Want to have your highlights saved across all your devices? Sign up or sign in