MATEO 20
20
Jesosaa huohuipea-aicapoa esohui ebameesahuajji dejjacuana uvajjajja chacojji poanijo
1Jesosaa huohuitiicapoa cuana pea esohui jama ba'a: —Achajja poaje quijje, Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jiquiajjaya poaje ba'a: Oe uvajjajja equemese dejja mecajjeahuanei poquinaje dejjacuana baa ojo echacochacojji. 2Equemese dejjaa jama huohuime aquicanaje cuana ba'a: “Eyaya quiana sosequiaje oe epojja chaco sosejje.” Majoya ohuaya huoojeacanaje cuana oja uvajjajja que chacohua. 3Majoya quijje eshequi jaasohuapishanajo, a las 9:00, equemese poquio'oyanaje ona jjaishoaquiani peajo echacochacojji plazahuasijje. Jamajjeya ohuaya bacañaquinaje majotii anica peajo chacochacojjima ani. 4Ohuaya ma chacochacojjimacuana jama acañaquinaje ba'a: “Miquianaya pea-ai poquicue ecue uvajjajja que chacohua. Eyaya quiana queapame sosequiaje cua miquiaaya chacoje huisotii sosejje” jamaya acanaje. Jamajjeya poquinaje cuana oja que chacohua. 5Majoya quijje equemese poquio'oyanaje eshequi biacojjajja nequijo a'a oja quejo chacochacoje peacuana huohuiajjaa. Oya jayojja sinecua a las 3:00 oya poquio'oyanaje a'a peacuana chacochacoje ojo huohuiajjaa. 6Majoya quijjepishana sinecuanei, a las 5:00, equemese poquio'oyanaje ona jjaishoaquiani peajo echacochacojji plazahuasijje. Ohuaya peacuana bacañaquinaje jamatii chacochacojjimatii anica. Majo anica ohuaya huohuiajjacanaje jama ba'a: “¿Yajjajje acuae quiana ojjaña jiquio pojjajotii chacochacojjimatii ani?” 7Oya saja-acanaje cuaa jama ba'a: “Ecuanaya che huohuiajjajjima cuanaja poanaje echacochacojji ojo.” Majoya equemeseya jama acanaje ba'a: “Miquianaya jjeyahua poquipea-aicue ecue uvajjajja que chacohua.”
8Majoya sineajo eshequi oquequiajo equemeseya ona chacomeejji poani dejja huohuicanaje jama ba'a: “Iyaa'yocue joya ejo chacochacoanicuana mique sosequiajji. Ma quijje-ejjenei nobiquinajecuana ebionei sosequiacue. Ma ebionei mecajjeahuanei nobiquinajecuana ca quijje-ejjenei sosequiacue” jamaya acanaje. 9Jamajjeya ma quijje-ejjenei nobiquinajecuana a las 5:00 sinecuanei poeyanaje bejjo jjesheya. Ojjaña macuaaya bejjo jjeshecanaje oe epojja echaco sosejje. 10Majoya ma ebionei mecajjeahuanei nobiquinajecuana iyaaca'yajo oja esosequiajji oya jjashahuabaquinaje queahuiso bejjo equiacaje poso. Jamatii oya jayojja pea-ai jjesheme acanaje cuaa oe epojja echaco sosejje. 11Bejjo oya huisoajjaya jjeshemajje ma dejjacuana ebionei nobiqui queaquene miminaje ojee equemesenijje. 12Jama mimime poanaje cuana onijje ba'a: “De, jiquio oe-ejjenei nobiquinajecuana oepojjinei chacochaconaje una hora. Jamatii miyaya oya sosequiameenaje queahuiso jiquio ecua miyaya ecuana sosequiameenaje mahuiso pea-aiya. Ecuanaya caca oe ojjaña jiquio pojjajo chacochaconequinaje eshequi queaquiyonee nequijotii” jamaya poanaje. 13Majoya aje equemeseya oe dejja queaquene mimiani ma ebionei nobiquinaje oja que chacohua jama acanaje ba'a: “Epeejji, eyaya miya siajje ajjima' anaje. Eyaya miya ja'anei huohuinaje oe epojja echaco sosejje eyaya miya sosequiaje. Miya jama poanaje queapame jama. 14-15Jamajjeya jiquio bejjo eyaya quiameeaña jjeshecue. Miquea equiyasijje poqui'yocue. Eyaya jiquio quijje-ejjenei chacochaconajecuana oya sosehuisoajjaya pea-ai, ma ecua miquiaaya jjeshenaje jama pea-ai quiameenaje. Mahuiso pea-aiya quiasa-amajjeya eyaya oya oya huisoajjaya sosequiapea-aimeeaña ecuea bejjo equiajji poanijojoya. ¿A'a miya queaquene poani eyaya pea dejjacuana queapame aña bamajje, oya huisoajjaya sosequiameeaña bamajje? Miya jama queaquehua jjashahuabaquiani” jamaya acanaje.—
16Majoya aje Jesosaa huohuipea-aicapoa jama ba'a: —Jamajjeya jamaya poaje quijje. Jiquio jjeya ca'a-ama poani bacani cuaa joya ecua quijje-ejjenei nequiani jama, comaya quijje queaca'a etii epojji nequije'yo peacuana huoojeapoquiajji epojji. Jiquio jjeya etii poani queaca'a jjabaquiani ehuiyasijje enequijji ca quijje ca'a-ama poaje'yo joya ecua quijje-ejjenei nequiani jamaya.—
Jesosaa huohuicao'oyapoa cuana quijje o mano'yojjijo
(Mc 10.32-34; Lc 18.31-34)
17Majoya aje Jesosaa Jerusalén meshiyasijje ejeojjijje poquijeya oja babaca 12 huisome dejjacuana jjanequishiñameequicapoa onijje oopana emimijji. 18Jama mimime poa oya ba'a: —Miquianaya jjabaquiani jjeya eseya poquiani ejeojjijje Jerusalén meshiyasijje. Ma meshijotii nequi eya Dejjapojji epo siajje acaje cuaa Eyacuiñajjija equi-aijo chacochacopoquiani etiicuanaja, Moisesja tehuehuohuijji poanicuanaja e manomee'yojji. 19Majotii nequi eya peajaajji judío pojjeamacuaa soadojocaje, oja emeshimesenisho eya acaje cuaa. Eya cuiasejjajeacaje jjono ejeapashajjajjaa. Majoya eya ba'ehuanasohuajeacaje cuaa emano'yojji acui ecuiata'apeejo ba'e. Jamatii tres cahuime huiso emano'yo jaa eya shequije'yo— jama huohuimeya acapoa Jesosaa oja babaca dejjacuana.
Santiago, Juan o dohue pea-aija enaeseya Jesosa huohuiajjacapoa
(Mc 10.35-45)
20Majoya aje Zebedeoja ehuanase oja bacuaejja becanijje poquiapoa Jesosa aniyasijje. Oya Jesosa nequi cojjaneijo oja ecuioshajjajo anioqueñapoa o ehuohuiajjaneijji. 21O jama poaje bamajje Jesosaa jama acapoa ba'a: —¿Ae acuaeya saña?—
Enaeseya Jesosa saja-acapoa jama ba'a: —Ecue bacuaejja beca oe mique ebañeimijijje queaca'a animeecue, pea mique shanimijijje queaca'a animeecue peacuana huoojeapoquiajji epojji. Jamaya eyaya oya animeesa-aña minijje quijje miya ojjañacuana huoojeapoquiajjitii epojji nequiajo.—
22Oja nae jama poajo Jesosaa beca oja bacuaejja jama huohuime acapoa ba'a: —Jiquio miquiaa eya huohuiajjaña miquianaja bajjima jama epojji. ¿A'a jiquio ecua eya queaneenee acaje'yo cuaa jama posapea-ai miquiana poani? ¿A'a queaneeca'a poaje?—
Beca Zebedeoja bacuaejjaa Jesosa saja-acapoa jama ba'a: —E'e, jama posapea-aiya ecuana poani, queaneeca'a nequije.—
23O jama poani shajja-ajjamajje Jesosaa jama acapoa ba'a: —E'ejojonei miquiana queaneenee acaje'yo cuaa jiquio ecua eya queaneenee acaje'yo jama pea-aiya. Jamatii ache dejja ecuea ebañeimijijje queaca'a anije, ache ecue shanimijijje queaca'a anije pea-ai peacuana huoojeapoquiajji epojji ecuea ehuohuijji pojjeama. Ecue Chiiyanei caca oe babacacaje ache dejjacuana mamijijje animeecaje— jamaya poa Jesosa.
24Pea diez huisome Jesosaja babaca dejjacuana Santiagohua, Juanya Jesosa majo huohuiajjacani shajja-ajjamajje queaquene poa Juannijje Santiagonijje pea-ai. 25Jamajjeya Jesosaa oja babaca dejjacuana iyaacapoa onijje queaja'a emimijji. Jama mimime poa ba'a: —Miquianajaya eba joya judío pojjeama emeshimesecuana oyaneitii queaca'anee jjabaquiani oja meshijo ba'ecacuana chacomeejji epojji queabishaa. Jamajjeya oja meshijo ba'ecacuana oya queaca'anee nequiani bamajje jjashajja-ajjaquiani oja esohuijo o yajjajo. 26Miquianaya ca jama jjashahuabaquime poca-ajja. Joya queaca'a posapoani peacuana huoojeapoquiajji epojji ebionei ojaya pea onijje ba'ecacuana asahuacajji. 27Jamajjeya joya jiquiojo ani oe queaca'a posapoani peacuana huoojeapoquiajji epojji ehuiyasijje enequijji, ebionei ojaya peacuana asahuacajji. 28Eya Dejjapojji epo majoya poeyanaje peacuana queapame asahuaa. Joya ecua emeshimesecuaa queabishaa peacuana chacomeeneicani ojaya yajjijo jama pojjeama pohua eya poeyanaje. Majoya eya quijje jjaquiaquije emano'yojji queahuisocuana nahue'yojji epojji oja mimishijo.—
Jesosaa beca dejja cojjama' jjacojjaja'ameequica'yapoa
(Mc 10.46-52; Lc 18.35-43)
29Majoya aje Jesosa o shajja-ajjajji poanicuananijje Jericó meshijo ani poquije bamajje queahuisocuaa Jesosa equijje acapoquiapoa. 30Beca dejja cojjama' ejeojjicojjasahuajo aniapoa. Jesosa ejeojjijje jjayejjequije shajja-ajjamajje ma beca dejja cojjama' taaapoa jama ba'a: —Emeshimesenei, Davidja osecua, ¡che ecuanajo queayeno jjashahuabaquicue ecuana queapame pomee'yojji!—
31Queahuisocuaa ma Jesosanijje poquianiya ma beca cojjama' dejja tecueacapoa oya mimima' ejeca eani'yojji nisho. Jamatii oya taaamajamaja-aniapoa jama ba'a: —Emeshimesenei, Davidja osecua, ¡che ecuanajo queayeno jjashahuabaquicue ecuana queapame pomee'yojji!—
32Majoya Jesosa o jama taaame pomajamaja-anijo nequiñaquiapoa. Ohuaya ma beca cojjama' dejja iyaacapoa ehuohuiajjajji jama ba'a: —¿Yajja ecue asa acuae quiana poani?—
33Ma beca dejja cojjamaa oya saja-acapoa jama ba'a: —Emeshimesenei, ecuana che jjacojjaja'ameequi'yocue.—
34Jesosa ojo queayeno jjashahuabaquiapoa, jamajjeya ohuaya cojjama'ja ecojja napacapoa. Ohua cojja napacajeahua ma beca cojjama' dejja jjacojjaja'aquinana'yapoa. Majoya oya Jesosanijjetii poquinequiapoa.
Valið núna:
MATEO 20: ESE
Áherslumerki
Deildu
Afrita
Want to have your highlights saved across all your devices? Sign up or sign in
Copyright Mision Nuevas Tribus, 2006