YOHANA 4
4
Yeso na omokungu o Samaria
1Nabo Omonene agachia komanya ng’a Abafarisai baigure ng’a Yeso okorire aborokigwa abange kobua Yohana, na kobatisa, 2(nonya Yeso omonyene tare kobatisa, otatiga aborokigwa baye), 3akarua Boyahudi, akagenda Galili naende. 4Naende yamogwenerete goika aete Samaria. 5Igo agaika omochie o Samaria, okorokwa Sikari, ang’e nomogondo oria Yakobo aete Yusufu omwana oye; 6agwo yarengeo ensoko ya Yakobo. Nabo Yeso, konya orosire ase orogendo rwaye, agaikaransa iga ase ensoko. Konya chiabeire ang’e chinsa isano nemo.
7Omokungu o Samaria agacha kobuucha amache. Yeso akamotebia, “Ing’a amache inywe.” 8Naki aborokigwa baye konya bachiire omochie kogora endagera.
9Nabo omokungu oria bw’Abasamaria akamoboria, “Naki yaba aye Omoyahudi ogonsaba amache, na inche nomokungu bw’Abasamaria?” (Abayahudi tibari gosanga n’Abasamaria).
10Yeso akamoiraneria, “Onye nkwamanya ekeegwa kia Nyasae, naende nere ng’o okogosaba amache anywe, anga nkwamosaba ere, na ere anga nakoa amache are moyo.”
11Omokungu oria akamotebia, “Omonene, tori negento gi’okobuuchera, na ensoko yachiire inse mono; ng’ai kwanyorire amache aya are moyo? 12Inee! Aye nomonene ore kobua sokoro yaito Yakobo, oyotoete ensoko eye, nere omonyene akanywa amache aya, na abana baye bonsi, na etugo yaye?”
13Yeso akamotebia, “Kera oyokonywa amache aya naigwe erang’o naende; 14korende onde bwensi oyoranywe amache aria ndamoe inche, takorang’a nonya ng’ake; korende amache aria ndanyare komoa, nabe ime yaye ensoko y’amache agosoka na komoa obogima bwa kare na kare.”
15Omokungu oria akamotebia, “Omonene, ing’a amache ayio tindang’a, gose timbaisa gocha aiga kobuucha.”
16Yeso akamotebia, “Genda, orangerie omosacha oo, oche nere aiga.” 17Omokungu oria akamoiraneria, “Tindi nomosacha.” Yeso akamotebia, “Gwakwanire boronge ng’a tori nomosacha, 18ekiagera kwabeire nabasacha batano, na ere oyore nere bono tari omosacha oo, ase ayio gwakwanire ekeene.”
19Omokungu oria akamotebia, “Omonene, narorire ng’a nomobani ore. 20Chisokoro chiaito nigo chiarenge gosasima ase egetunwa eke, na inwe nigo mogoteba ng’a Yerusalemu nao aase atogwenerete togosasimera.”
21Yeso akamotebia, “Aye omokungu, inyegene, ensa neche, motamosasime Tata ase egetunwa eke, nonya nase Yerusalemu. 22Inwe nigo mogosasima eki motamanyeti; intwe nigo togosasima eki tomanyete, ekiagera ogotooreka nigo gokorwa ase Abayahudi. 23Korende ensa neche, na bono nere, ekero abasasimi b’ekeene barasasime Tata ase omoika na ekeene, ekiagera Tata nigo akorigia abanto buna abwo bamosasime. 24Nyasae n’Omoika, na abwo bakomosasima nebagwenerete komosasima ase omoika na ekeene.”
25Omokungu oria akamotebia, “Namanyire ng’a ngocha are Masihi (oyokorokwa Kristo); karache ere, natoorokerie onsi.”
26Yeso akamotebia, “Inche, oyo ngokwana naye, nere.”
27Erio kegima aborokigwa baye bagacha. Bagakumia ekiagera arenge gokwana nomokungu; korende onde tamoboretie, “Inki okorigia?” Gose, “Naki ogokwana nere?” 28Nabo omokungu oria agatiga enyongo yaye, akagenda omochie, agatebia abanto, 29“Inchuo, morore omonto ontebirie amang’ana onsi aya nakorire! Inee! Oyio tari ere Kristo?” 30Bakaimoka korwa omochie, bakamochiera.
31Agwo ekero bataracha, aborokigwa bakamosorora bakabora, “Rabii, ragera?” 32Akabatebia, “Inche ninde nendagera nkoria, eye motamanyeti inwe.”
33Aborokigwa baye bakaborania, “Inee! Nomonto omorentera endagera?” 34Yeso akabatebia, “Endagera yane neye: ogokora ogwancha kwaye oyontomete na goikerania emeremo yaye. 35Inwe timori goteba: Yatigaire emetienyi ene, erio rigesa riche? Rora nabatebirie: Imokia amaiso aino, morigererie emegondo, ng’a yaikire koba emerabu ang’e ase rigesa. 36Oyo okogesa nkonyora are eng’eria na gosangereria amatunda ase obogima bwa kare na kare, erinde oyo okobusura na ere oyokogesa bagoke amo. 37Naki ring’ana riria: Oyomo obusura, na oyonde okogesa, nigo rire ekeene. 38Inche nabatomete mogese aya motakorerete emeremo; abande bakorire emeremo, na inwe mwasoire ase emeremo yabo.”
39Naende ase omochie oria Abasamaria abange bakamwegena ase engencho y’oborori bw’omokungu oria ekero abatebetie ng’a, “Ontebirie amang’ana onsi aya nakorire.” 40Nabo ekero Abasamaria baria bachia komochiera, bakamosorora aikaranse amo nabarabwo; akabeera aroro amatuko abere. 41Abanto abange kobua bakeegena ase engencho ye ring’ana riaye; 42bagatebia omokungu oria, “Bono twegenire, tari ase engencho y’amang’ana ao, korende ekiagera tweigwereire intwe abanyene, naende twamanyire ekeene ng’a oyo n’Omotooria bw’ense.”
Yeso okogwenia omwana omomura bw’omosomba bw’omoruoti
43Nyuma y’amatuko abere akaimoka akagenda Galili. 44Naki Yeso omonyene aorogetie ng’a omobani tari gosikwa ase ense yaye omonyene. 45Nabo ekero achia goika Galili, Abagalili bakamoroisia, ekiagera baroche amang’ana onsi ayakorete Yerusalemu ekero kie rituko rinene; naki nabarabwo boigo mbagendete ase rituko rinene.
46Agaika naende Kana ya Galili, agwo ase aonchorete amache koba edivai. Narengeo omonto omosike ase Kapernaumu, oyorenge nomwana omorwaire. 47Oyio agachia koigwa ng’a Yeso ochire korwa Boyahundi goika Galili, akamochiera, akamosorora achiche agwenie omwana oye, ekiagera konya oisire gokwa. 48Nabo Yeso akamotebia, “Motarochi ebikone na amakumia, timori kwegena nonya ng’ake.”
49Omosike oria akamotebia, “Omonene, tirimboka ritang’ani omwana one atarakwa.”
50Yeso akamotebia, “Genda, omwana oo nabe moyo.”
Omonto oria akegena ring’ana riria atebetigwe na Yeso, akabwatia enchera yaye. 51Ekero arenge gotirimboka abasomba baye bagacha komorotota, bakamotebia, “Omwana oo moyo are.” 52Erio akababoria amang’ana ensa achagete koba buya. Bakamotebia, “Nigoro, chinsa isano na ibere esosera yamotigete.” 53Erio ise akamanya ng’a nensa eria eria atebetigwe na Yeso, “Omwana oo nabe moyo!” Akeegena ere, na enyomba yaye yonsi. 54Eke nakio egekone gia kabere Yeso akorete korwa ekero arwete Boyahudi kogenda Galili.
Valið núna:
YOHANA 4: EKEGUSIIBBLE
Áherslumerki
Deildu
Afrita
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020