Luka 21
21
’Dogga na karu ’be
(Köti Marako 12.41-44)
1A Yesu ko boŋgi a meddi ŋutu kwörinikö i gumba na ’dokesi kase i saŋduk na gwon i Kadi na Ŋun nagon ’dokesi guba kata; 2a nye meddi nene ŋuto nagon a lomeri ko a karu ’be i gubakiŋdya na milin murek.
3A nye kulyani adi, ’Diri nan takiŋdya ta adi, na ŋuto nagon a lomeri ko a karu ’be na aje ’dogga bia parik lwölwöŋ ŋutu liŋ; 4kogwon lepeŋat liŋ ’dumundya ’dokesi i tukwörienjin kase; ama na ŋuto ’dumuŋdya i tolomerian nanyit, a iŋge ’dogga ko gurut kanyit liŋ nyeesi.
Yesu a jambu i kulya ti turö na Kadi na Ŋun kak asut
(Köti Matayo 24.1-2; Marako 13.1-2)
5A na jambi kulye kajujumuk kulya ti Kadi na Ŋun nu, adi nye a tokwelenyo ko ŋurupo dumalak parik ko ’dokesi na rurwan na tiki Ŋun, a Yesu kulyani adi, 6Kine ŋo nagon ta memet kine, perok molu popo nagon ŋurupit nene geleŋ molu ti koloki ni i nene loki nagon mo ti gubaki kak.
Yöyöŋesi se ko sasanyesi
(Koti Matayo 24.3-14; Marako 13.3-13)
7A se pije lepeŋ adi, Katodinönit, kine ŋo mo gwon nanu? Kweyet mo a nyo ko kine ŋo mo gwe nyona ko pokin? 8A Yesu waddi adi, Kunyar ta, an ta ko totogira ta. Kogwon ŋutu jore mo popo i karin kwe a kulyani adi se a nan, ko adi, Diŋit gwe nyona ko po. Ama an ta ko keporo ta lepeŋat. 9A na yiŋge ta kulya ti mörö ko woŋesi nu, ko kujönö ta, kogwon kine ŋo agu ködyö kokona, ama ’dutet nyuŋ ti po ’de ’de. 10A kirut nye kulyani ko lepeŋat adi, Jur mo mömörö ko lele jur, a tumatyan mo möroni ko nene tumatyan;
11a rigirigilön dumalak mo gwe kata, a twana iŋgo se ko dyaŋan mo gwe i piriton ka ’de ka ’de; a ŋo kujonöesi ko kweyesi dumalak mo gwe kata i ’diko.
12Ama a kokwe nagon kune ŋo a ko kona nu, ŋutu mo momok ta, a sasaŋdi ta a joŋgi ta i kadijik lomoresi, ko i kadijik rerekesi, a ta mo joŋani ko moran i komor se ko i mödiron kogwon kulya ti karin kwe. 13a ŋina mo gwe a komor nasu na ’but i tokurukiŋdyö na Loŋe Lo ’but. 14#Luk 12.11, 12Nyenagon tetenaki ta kasu i töilyet adi ta mo ti yeyeju a kokwe kiyaŋ ko ta ködyö waddu ŋutu ada, 15kogwon nan mo titin ta kulyaesi se ko koŋon nagon lele lo merok kasu mo ti bulö teŋgu kode renya. 16Nyena ma ’di komunyi ko koŋuti, ko luŋösurök, ko karu kasu, ko julin mojoŋ ta i putet, a se mo tatuje kulye kasu; 17a ŋutu liŋ mo mane man ta kogwon karin kwe.
18Ama ma ’di kupiret geleŋ kasu i kusik mo ti likin. 19Ko ta a gwo ’dan go i ŋoŋaddu diŋit a najo a ta mo telundye ru nasu na to ’diri.
Yesu a jambu i kulya ti körö na Yerusalema
(Köti Matayo 24.15-21; Marako 13.14-19)
20Ama ko ta mo a met Yerusalema i tuma ko merok, nyena dene ta den adi korö nanyit gwe nyona. 21A kirut ti ŋutu lo gwon Yudaya. kulo wöki i merya; ti se lo gwon i köji kata kulo iti kaŋo, ko ti se lo gwon i jur kulo gwe ti lupö lukata, 22#Ose 9.7kogwon na a diŋit ropet na toron; anyen ŋo liŋ na wurö kune tetemakiŋdya. 23Ama gwon a delya i ŋutu na gwon ko pelela, ko i se na tutunöggu i kilu perok! Kogwon delya duma mo gwon i kak se ko woran duma mo pokin i lo jur. 24a se mo tatuani tatua ko baŋdujin, a se mo momokajine i jurön liŋ a ’dupi, a Lwaka mo ryoggi Yerusalema, tojo ko diŋitan kase na wulwe a temakiŋdya.
Po na Ŋuro lo ŋuto
(Köti Matayo 24.29-31; Marako 13.24-27)
25 #
Yis 13.10; Ejk 32.7; Yoe 2.31; Kwe 6.12, 13 A kweyesi mo gwe i kolor, ko i yapa, ko i kaser, a i kak ni a jurön liŋ mo durwene durwe, a dyadyaŋgi dyadyaŋgu i kulya ti woŋon na tor se ko na yalajin; 26töilyet ti ŋutu mo rurusukö ko kujönö na möŋdi se ŋo nagon mo pokin i kak kune, kogwon riŋitön ti ki mo yeyeta. 27#Dan 7.13; Kwe 1.7a kirut ŋutu mo meddi nan Ŋuro lo ŋuto popo i ’diko ko riŋit se ko minyo a duma parik. 28A na suluje kine ŋo i po nu, riuŋdye ta ’börik ki gwogwo, ko ’bili ta kusik kasu ki, kogwon ta gwe nyona ko lwökö.
Todinet i kulya ti ki ’bi
(Köti Matayo 24.32-35; Marako 13.28-31)
29A Yesu jamakiŋdye lepeŋat lele lilim adi, Meddi ta ki ’bi se ko kaden liŋ;
30a na suluje se wilan nu, ta ko ’borik memet ko deden adi kiser soŋinana gwe nyona. 31Nyena köti na meddi ta kine ŋo i kona nu, a ta deŋdi adi Ŋun gwe nyona ko po i tumatyan. 32’Diri nan takiŋdya ta adi, ŋutu ti na toberon mo ti ’duddyö tojo ko kune ŋo liŋ mo a kona. 33Ki ko kak mo ’du ’duddyö ama kulyaesi kwe mo ti ’duddyö kwöŋ.
Gwe ta ko konyen ŋa
34Ama kunyar ta ’börik an töilyet kasu gwon pömöni ko rorweki, ko meran se ko wiwinyesi ti kak, an ŋilu lor jakakin ta adi wulek gwoso ridiket;
35kogwon ŋilu lor mo pokin i ŋutu liŋ lo si ’da i kak ’bukuluŋ kulo. 36Ti konyen kasu gwe ŋa ko momo ’yi ta i diŋitan liŋ, anyen ta böŋö wuju riŋit anyen rwöddi kine ŋo liŋ nagon mo popokin kine, ko anyen gwo ’dan köyo i komor nan ŋuro lo ŋuto.
37 #
Luk 19.47
Temba i tuparan Yesu totodiŋdyö i Kadi na Ŋun, a i tukwaje a nye iti kaŋo a si ’dani i mere lo luŋu a Jeitun.
38A i ko ’bure kobubut a ŋutu liŋ iti ko lepeŋ yu i Kadi na Ŋun anyen yiŋga kulyaesi kanyit.
Valið núna:
Luka 21: BBE
Áherslumerki
Deildu
Afrita
Want to have your highlights saved across all your devices? Sign up or sign in
Bari Bible © United Bible Societies, 1979.