Luka 19
19
Yesu se ko Takayo
1A Yesu luponi Yeriko a gwe i tulöddu köji. 2A lele ŋuto gwe nyu, karin kanyit a Takayo; a nye gwe a duma lo kapepenak ti usur, ko a kwörinit. 3A nye ’deke meddya Yesu ko nye gwon ada, ama a nye tine bulö meddya kogwon ŋutu jore köti kogwon nye a lorutut. 4Nyena a nye woki ŋerot a kije i ki ’bi ki anyen meddya Yesu, kogwon lepeŋ tiri ŋilo kiko. 5A Yesu ko ’dure i ŋina pirit a nye diŋe ki, a luŋgi adi, Takayo, kiyene kak ’de ’de; kogwon i lo lor nan ködyö si ’da konut midi. 6A nye kiyene kak ’de ’de a wuji lepeŋ ko lyöŋön. 7A na meddi ŋutu kine kulya nu, a se liŋ wiwinyani wiwinya adi, Lepeŋ aje tu ko katoronyanit mede a kömutöt! 8Ama a Takayo gwo ’de gwo ’dan nyu a kulyani Ko MATAT adi, Mete, pon MATAT, nan titiŋdu lomerika swöt na tito kwe, a ko nan a mumulukuŋdya nene ŋo ko lele ŋuto, a nan de ropaki ropakin lepeŋ daŋin iŋwan. 9A Yesu kulyani ko lepeŋ adi, I lo lor na mede a lwökö, kogwon lepeŋ köti a ŋuro lo Abarayama. 10#Mat 18.11Kogwon nan Ŋuro lo ŋuto aje po i ga ’yu ko i Iwoggu na ŋo nagon aje likin kune.
Lilim lo ginejin
(Köti Matayo 25.14-30)
11A na yiŋge ŋutu kine kulya nu, a Yesu ’yalakiŋdye lele lilim, kogwon nye gwe nyona ko ’dur Yerusalema, köti kogwon lepeŋat yeyeju adi Tumatyan na Ŋuti pupukun ’de ’de kijek. 12A nye kulyani adi, Lele ŋuto duma a teteŋdya jölö i jur lo pajo, anyen tiki a mor, ko anyen yiyitwe. 13A nye luŋgi köliŋönök kanyit puök, a tiŋdi se liŋ geleŋ geleŋ ŋine. A nye takiŋdye lepeŋat adi, Tujaŋi ta ko kune tojo ko po nio.
14Ama a ŋutu kanyit ti jur maŋdi lepeŋ; a se yokiöddi ŋutu ko lepeŋ i mukök, adi, Yi ti ’bön ŋilo ŋuto gwon a mor likaŋ. 15A nye ko tikine a mor, a nye yitwene yitwe. A nye luŋgi köliŋönök logon nye a korakin gurut kulo anyen po kanyit i komor, anyen nye denuŋdya kaŋo ko se a toworuŋdya gurut muda i döuŋdyo nase. 16A köliŋönit togeleŋ lo poŋdi, a kulyani adi, Duma liŋ, ŋine inot na a toworuŋdya kunie puök. 17A nye kulyani ko lepeŋ adi, A na ’but parik, köliŋönit lo ’but! Nyena, kogwon do yiyiniki i ŋo na ’dit parik, wuji kido saret na köjinö puök. 18A tomurek lo poŋdi, a kulyani adi, Duma liŋ, ŋine inot na a toworuŋdya kunie mukanat. 19A nye köti kulyani ko lepeŋ adi, Gwe do a duma lo köjinö mukanat. 20a lele lo poŋdi, a kulyani adi, Duma liŋ, mana ŋine inot nagon nan aje ’delakin i boŋgo na;
21kogwon nan kukujönö do, kogwon do a kayuyukönit do ti lyöŋön ko kita na ŋuto; do ’du ’dumuŋdya ŋo nagon do a ko tiŋdu kata, do ŋeŋepa ŋo nagon do a ko weja. 22a nye kulyani ko lepeŋ adi, Do köliŋönit loron, nan de ’duŋökiŋdyö do ko kulyaesi lo jam do kilo. Do ŋona a den adi nan a ŋuto kayuyukönit logon ti lyöŋön ko kita na ŋuto, adi nan ’du ’dumuŋdya i pirit nagon nan a ko tiŋdu kata nu, a nan pepi ŋo nagon nan a ko weja kune le?
23A kirut nyo do tine tin gurut kwe i ’dela i baŋki? A kirut i yitwe nio a nan ködyö wuji ko ’yalet? 24A nye kulyani ko ŋutu lo gwo ’dan nyona kulo adi, ’Dumara ta na ŋine kaŋo kanyit i könin, ko tiki ta koliŋonit logon ko ginejin puök lo. 25a se kulyani ko lepeŋ adi, MATAT, lepeŋ gwon ko ginejin puök. 26#Mat 13.12; Mar 4.25; Luk 8.18Nan takiŋdya ta adi, Ŋutu liŋ geleŋ geleŋ lo gwon ko ŋo kulo mo ’ya ’yalaki kunie, ama ŋuto logon ’bak nene ŋo lo, ma ’di ŋo na gwon ko lepeŋ na mo ’du ’dumaji kaŋo kanyit. 27#Mat 25.14-30Ama kilo merok kwe logon ti ’bön nan tumatyan ko se kilo, joŋdi ta se ni ko tatuje ta se koyo i komor.
Yesu a lupö Yerusalema ko todumalan
(Koti Matayo 21.1-11; Marako 11.1-11; Yoane 12.12-19)
28A nagon Yesu aje jambu kine kulya nu, a nye iti ŋerot i kiko logon tu Yerusalema. 29a gwe sona, nagon nye gwe nyona ko ’durökin Betepage ko Betania nyona ko mere lo luŋu a Jeitun lu, a Yesu ’deke soŋdu kulye ŋutu kanyit kajujumuk murek ŋerot, 30a yokije se adi, Iti ta i tur logon kasu ŋerot lu, a nagon ta aje ’dur nyin nu, a ta de ryeji kaine kolojityo a munuki kak, logon lele ŋuto a ko nyuŋ wörö ko lepeŋ; yokone ta lepeŋ ko jo ta lepeŋ ni. 31A ko lele ŋuto a pija ta adi, Ko nyo ta yoyoko lepeŋ? ruŋge ta adi, nan MATAT ’de ’dekan lepeŋ. 32a ŋutu lo sonyo kulo iti tu, a ryeji ŋo liŋ gwoso nagon lepeŋ aje sarakiŋdye se nu. 33a nagon se nyuŋ yoyokoju kaine kolojityo nu, a komonye kaine pije lepeŋat adi, Nyo ta yoyoko lepeŋ? 34a se waddi adi, MATAT ’de ’dekan lepeŋ. 35A se joŋdi kaine kolojityo ko Yesu ni, a se peddi boŋgwat kase i loki na ŋina kolojityo, a tosi ’dakiŋdye Yesu i loki nanyit. 36a na tiri nye nu, a se peddi boŋgwat kase i kiko. 37a nagon nye gwe nyona ko ’dur köji, a gwe i dudulet na Mere lo Jeitun nu, a teŋ liŋ na ŋutu kanyit kajujumuk suluje lyoŋon ko pupurja Ŋun ko gworolo lobot kogwon kitajin sörösi liŋ nagon se aje met kune.
38 #
Sau 118.26
A se woŋoro ki adi, Mor lo po i karin ti MATAT lo, ti ’boriani ’boria! Ti taliŋ gwe ki yu se ko minyo i piriton ti ki.
39A kulye Parusijin logon gwon i kiden na lodir kulyani ko Yesu adi, Katodinönit, riŋe ŋutu kulök kajujumuk. 40A nye waddi adi, Nan takiŋdya ta adi, ko lepeŋat yiŋa taliŋ a ma ’di ŋurupo de wowoŋoro ki!
Yesu gwi ko Yerusalema
41A nagon Yesu gwe nyona ko ’dur nu, a nye meddi köji a nye gwine lepeŋ ko ŋolitan, 42adi, A dyoŋ, ma ’di do, ko ködyö do a den i lo lor ŋo na tiŋdu do gwon taliŋ! Ama soŋinana aje ’dela konut i konyen. 43Kogwon perok molu popokin konut logon merok kulök mo gömökiŋdyo do kiden ko liŋo logon a ’du ’dulu, a se mo lorgi do a goŋi do i swötön liŋ; 44a mo dukakiŋdye do kak se ko ŋwajik kulok lo gwon konut i mariŋ lukata, a mo tine kölokin do ŋurupit geleŋ i gwo ’dan i loki na nene, kogwon do a ko gwulu diŋit nagon Ŋun ’yö ’yi do na.
Yesu a tu i Kadi na Ŋun
(Köti Matayo 21.12-17; Marako 11.15-19; Yoane 2.13-22)
45A Yesu lupöni i Kadi na Ŋuri, a suluje riggö kaŋo ŋutu lo tugwöŋu,
46 #
Yis 56.7; Yer 7.11 a nye kulyani ko se adi, A wurö adi, Kadi nio mo gwon a kadi kwakwaset, ama ta aje kon nye a pirit ’danaet na karyakak. 47#Luk 21.37a nye gwe i Kadi na Ŋun i todiŋdyö perok liŋ. A koanejin temejik ko katodinök ti Saresi ti Mose se ko ŋutu lokukwön ga ’yi tatuja lepeŋ;
48ama a se gwe a ko ryö kiko, kogwon ŋutu liŋ ’depakiŋdya i yiŋga na kulyaesi ti lepeŋ.
Valið núna:
Luka 19: BBE
Áherslumerki
Deildu
Afrita
Want to have your highlights saved across all your devices? Sign up or sign in
Bari Bible © United Bible Societies, 1979.