Yoane 4
4
Yesu ko Ŋuto na Samaria
1A Yesu ko dene adi Parusijin ajeyiŋ adi nye a batiddya ŋutu kajujumuk jore lwölwöŋ Yoane nu, 2(ama Yesu lepeŋ a ko batiddya, ama ka ’de ŋutu kanyit kajujumuk lo batiddya,)
3a nye kö ’yi Yudaya, a yitöni Galilaya.
4A nye agu tiri lo Samaria; 5#Sul 33.19; Yos 24.32nyena a nye ’dure i nene köji na Samaria na luŋu a Sukara, nyona ko kak nagon Yakobo köju a tikin Yosepa ŋuro lonyit na. 6Kidi lo Yakobo nyuŋ kata nyu. A Yesu iŋge dara ko jölö a si ’dakine kak nyona ko kidi i tuparan kiden.
7A nene ŋuto na Samaria poŋdi i ’yiladdu na pioŋ. A Yesu kulyani ko lepeŋ adi, Tiki nan pioŋ nan mamat;
8kogwon ŋutu kanyit kajujumuk aje tu köji i gwörö na kinyo. 9#Ejr 4.1-5; Nem 4.1, 2A ŋuto na Samaria na pije lepeŋ adi, Do a Yudayakityo, nan a ŋuto na Samaria, ada lolor nagon do pija pioŋ köyö? (Kogwon Yudayaki ti morja ko ŋutu ti Samaria.#4.9 Yudayaki ti morja ko ŋutu ti SamariaKulye ŋutu yeyeju adi kweja adi Yudayaki e ko ŋutu ti Samaria ti möju i kopo geleŋ)
10A Yesu waddi lepeŋ adi, Ko do kodyö a den Ŋo nagon Ŋun ’do ’doggi na, köti ko do kodyo a den ŋuto logon luŋgu pioŋ konut ko nye a na, a do ködyo luŋgi pioŋ ko lepeŋ, a nye ködyö tiŋdi do pioŋ toruesi. 11A ŋuto na pije lepeŋ adi, Duma lio, do ’bak ŋo ’yilet lo pioŋ; kidi a logulu, a do ryöni pioŋ toruesi ya? 12Yakobo merenye likaŋ aje tin yi lo kidi. Lepeŋ ko ŋwajik kanyit ko toro ’bo kanyit köju möju kata. Do ŋona a duma lwölwoŋ lepeŋ? 13A Yesu waddi lepeŋ adi, ŋutu liŋ logon möju kune pioŋ kulo köti mo momoka kure,
14ama ko na lo möju pioŋ nagon nan mo titikin lepeŋ kine mo ti moka kure kwöŋ; ama pioŋ nagon nan mo titikin lepeŋ kune mo lelekun ki kanyit i mugun a kidi lo pioŋ nagon joŋdya ru na yeŋ nyin. 15A ŋuto na kulyani ko lepeŋ adi, Duma liŋ, tiki nan kine pioŋ anyen nan böŋö gwon ti moka kure köti. a nan gwe ti po ni köti i ’yiladdu na pioŋ.
16A Yesu takiŋdye lepeŋ adi, Iti, luŋu lalet ilot ko yitwene ta ni. 17A ŋuto na renyani adi, Nan ’bak lalet. A Yesu kulyani ko lepeŋ adi, Do a renya ’bura adi do ’bak lalet, 18kogwon do köju a gwon ko lyan mukanat, a ŋuto logon do gwon ko lepeŋ soŋinana lo ’bayin a lalet ilot. I ŋina do a kulya ’diri.
19A ŋuto na waddi adi, Pon duma lio, nan aje kurun adi do a nebi. 20Merenyejin kao kwakwaddu i lo mere, ama a ta Yudayaki kulyani adi Yerusalema a pirit nagon ŋutu ködyö kwakwaddu kata. 21A Yesu kulyani ko lepeŋ adi, Do ŋina ŋuto yubbe nan, diŋit mo popo nagon ta mo ti kwakwaddu ŋun Monye ma ’di i lo mere ma ’di Yerusalema yu.
22Ta ŋutu ti Samaria ti den ko ta kwakwaddu ŋa; ama yi kwakwaddu nye logon yi deden lo, kogwon lwökit piŋiluŋdya ko Yudayaki. 23Ama diŋit mo popo, ’diri soŋinana aje ’dur, nagon kakwakwasak ti to ’diri de kwakwaddi Ŋun Monye kase i töilyet ko to ’diri, kogwon Monye ga ’yu ŋutu gwoso kilo i kwakwaddu na lepeŋ. 24Ŋun a Mulökötyo, ti se logon kwakwaddu lepeŋ kilo ti se agu ködyö kwakwaddi lepeŋ kase i töilyet ko to ’diri. 25a ŋuto na kulyani ko lepeŋ adi, Nan deden adi Masia mo popo. (Masia lupu a Kristo.) Ko lepeŋ a po, a nye mo takiŋdye yi ŋo lio. 26A Yesu waddi adi, Nan lo jambu ko do soŋinana lo, nan nyelo.
27Nyena a i ŋinu diŋit, a ŋutu kanyit kajujumuk kulo yitwene yitwe, a se söŋi söŋu parik kogwon nye gwon i jambu ko ŋuto nakwan. Ama a lele lose gwe a ko pija adi, Do ’dek nyo? Kode pija adi, Nyo do jambu ko ŋina ŋuto?
28A kirut ŋuto, na kölökiŋdye sape lonyit lo pioŋ, a yitöni köji, a luogi ŋutu lyan lo gwon yu kulu adi, 29po ta, ko meddi ta lele ŋuto logon aje takin nan ŋo lio nagon nan aje kon kune; lepeŋ Ŋona a Masia le? 30Nyena a se kö ’yi köji a iti ko lepeŋ yu.
31A i diŋit na tiri ŋinu ŋuto nu, a ŋutu ti Yesu kajujumuk kulo mamaŋdi lepeŋ adi, Katodinönit, nyesi kinyo pon.
32A nye waddi se adi, Nan gwon ko kinyo lo nyenyei logon ta a ko den.
33A nutu kajujumuk kulo totopine ko ’börik adi, Lele ŋuto ŋona a jakin lepeŋ kinyo? 34a Yesu kulyani ko se adi, Kinyo lio gwon a koŋdya na ’dekesi ti lepeŋ lo sunyuŋdyö nan lo tojo ko nan aje tutuŋokin kita nanyit. 35Ta Ŋona a ko kulya adi, Yöŋgi yapala iŋwan anyen gwon a ’butun le? Nan takiŋdya ta adi, ’Bili ta konyen kasu ki, ko wöŋi ta meleseno, kogwon kinyojin aje yoŋe joni jo ŋera. 36Kaŋeranit wuju ropet nanyit, a momoruŋdye kinyojin a ti ru na yeŋ nyin, anyen kaweyanit se ko kaŋeranit böŋö lyölyöŋön i pirit na geleŋ. 37Kogwon tolupet a gwak logon adi, Lele lo weja a lele lo pepi. 38Nan aje son ta i ŋepa na ŋo nagon ta a ko kita kata kune; kulye ŋutu aje kita, a ta wuji ludweki lo kitaun se kulo.
39A nutu ti Samaria lo gwon i ŋinu köji kulu yubbe Yesu, kogwon ŋuto na aje tökoŋu adi, Lepeŋ aje takin nan ŋo liŋ nagon nan aje kon kune. 40Nyena a ŋutu ti Samaria ko poŋdi ko Yesu ni, a se pije lepeŋ anyen mönuŋdyö ko se i pirit na geleŋ; a nye iŋge si ’da ’e nyu perok murek. 41a kulye ŋutu jore iŋge yubbö kogwon kulyaesi kanyit,
42a se takiŋdye ŋuto na adi, Soŋinana ti gwon a kulyaesi kulök lo tiŋdu yi i yubbö, ama yi yubbö kogwon yi ko ’börik aje yiŋ, ko aje den adi lepeŋ ’diri a Kalwökönit lo ŋutu ti na kak.
43A nagon perok murek aje jo nu, a Yesu ŋiörö ŋiörö a iti Galilaya. 44#Mat 13.57; Mar 6.4; Luk 4.24Kogwon nye ko mugun nanyit a tökoŋu adi nebi ti bula kase i jur. 45#Yoa 2.23a nye ko ’dure Galilaya, a ŋutu lo gwon nyu kulu wuyuŋdye lepeŋ, kogwon lepeŋat aje tu Yerusalema i rorwe, a se iŋge met ŋo liŋ nagon lepeŋ aje kon i diŋit na rorwe.
Yesu a toke ’ya ŋuro lo ŋuto lokukwön
46 #
Yoa 2.1-11
A Yesu yitöni Kana na Galilaya, i pirit na towoŋi nye pioŋ a binyo nu. A lele ŋuto lokukwon lo mor gwe nyu, logon ŋuro lonyit a gilö Kaperanauma yu. 47A na yiŋge nye adi Yesu aje kö ’yu Yudaya a gwe Galilaya nu, a nye iti ko lepeŋ yu, a mamaŋdi lepeŋ anyen lulurara kak i toke ’ya na ŋuro lonyit logon gwe nyona ko twan lo. 48A Yesu kulyani ko lepeŋ adi, Ta kwöŋ ti yubbö ake ko ta a meddya kweyesi se ko sörösi.
49A ŋuto lokukwön lo waddi adi, Pon duma lio, luluru kak a kokwe na twaji ŋuro lio. 50a Yesu takiŋdye lepeŋ adi, Iti, ŋuro ilot de ruru. A ŋuto lo iŋge yuŋ kulyaesi logon Yesu jamakin lepeŋ kulo, a nye iti tu. 51A nagon nye lulurara nu, a kölipönök kanyit rume ko lepeŋ, a takiŋdye lepeŋ adi, Ŋuro ilot aje ru. 52a nye pije se ko ŋuro ru i nan saa. A se waddi adi, Sa ’yu na mugun a kö ’yu lepeŋ kaje i saa geleŋ na koriri.
53A monye lo iŋge den adi ŋina a diŋit gwak nagon Yesu aje takiŋdye nye adi, Ŋuro ilot de ruru. A ŋilo ŋuto ko mede nanyit liŋ iŋge yubbo. 54Nyena ŋina a kweyet tomurek nagon Yesu aje kon i mukök na poŋdi nye kaŋo Yudaya a gwe Galilaya nu.
Valið núna:
Yoane 4: BBE
Áherslumerki
Deildu
Afrita
Want to have your highlights saved across all your devices? Sign up or sign in
Bari Bible © United Bible Societies, 1979.